Uan 6
6
Esusën matses dadpenquio pemiaid
(Mat. 14.13-21; Madc. 6.30-44; Duc. 9.10-17)
1Adashic Esus chian dapa Cadidea caid budash cano antabëdtoshon ëquëmatsiuc potepondash. Aid chiambidi Tibedias cuëmpondash. 2Adnubien Esusën nadatiambocquin nabanquin nënquido dadpen bëdanmesho isbuedo Esus tsibanec matses dadpen chochopondash. 3Adnubi Esus abëd icquidobëd macuësh tapa dectatoec poctsebi tabadtuidpondash. 4Cun tsusedpabo isadaidbon: Ma cun mado uënësmenquio icnu, queshun obeca caniactsëc cuessunniampid inchësh tantiate uëshë Pascua caid anoentsëqui yannuc nepondash.
5Adec choash matses dadpenquio tabadsho istanequien Esus: Uedipe ¿mitsimbo nëido pemenun piucquid menequin pete bedtiad? capondash. 6¿Atotsi quetsiashe? Tantianu, queshun adopondash Esusën. Pete bedabi icsho issun umbibi pete uanu, quequin otacquio tantiequi adpondash. 7Adoaquien Uedipe: Inchëshën uëshë 8tedquiobi nidmec chonoadshun bedaidtedimbo piucquid menequin pan bedshun: Pemenu, cac aidtedquio pemiadenquio ictsiash, quepondash Uedipe Esus caic.
8Adnubien abëd icquid utsi Simon cashumbic Petedo caidën utsi Andedesën: 9Ma nëid bacuëna pan 5tedtsëc icnubi nuëcquid daëd icpayoc, Icbo. Ma aidtedtsëc icquid pemiadtiapimbo matses dadpenquioshë icpayoc, capondash. 10Adoaquien Esusën: Padi. Aidi bëdambo iqueque. Abitedi: Nëmbo tabadbud, caban, cac abëd icquidon: Nëmbo tabadbud, cabanac sebad sebadpambo yec uasinuidpambo yacno matses dadpenquioshë tabadbudpondash. Dadatedi tambanac 5 midted icpondash.
11Adshumbic Esusën bacuën bëaid pamba bedtanquin: Mibi bëdambocquid icquin mimbi uaid nëid pete bëdambo iquec, Papa, quequin chuitanquin: Nëid meneban, cac abëd icquidon tabadquido abitedi menebampondash. Adotanquimbic nuëcquidtsen bedtanquin adembidi Nuquin Papa chuitanquin: Meneban, cac menebanuapondash. Adoac utsibon ambi piactembi pebedednubi utsibon ambi piactembidi pebededuapondash. 12Aden ambi piactembi pebededambien Esusën abëd icquido chuiquin: Napi uaid mëyannushe. Sandoban, cac 13tidico caid pan nacnenaid 5 ted icbued napi uaid bedbanshun sandobanaid tsitsan dapa 12ted icpondash.
14Aden pemiaquien ambi pemiaido: Nadatiambocquin nabanquin Esusën pete dadpenquio icmiosh. Aidi Nuquin Papan ambi oncamiaid bëdamboshëcquid chomendac, campidien nec,#6.14 M.I.Ch. 18.15-18 tantiaquin nëid dada uapanëdash. quecuededpanëdash Esus tantiamenquio iquec. 15Adsho ambibi tantiashien Esus: Aton chuiquid tapa icmenuen ubi bedshun buannu, capec, quianec abentsëqui icnuec Esus macuësh tapa dectatoec niduapondash.
Esus acte bëntse choaid
(Mat. 14.22-27; Madc. 6.45-52)
16Adanec Esus nidbon abëd icquidobëd inchëshbudtsëqui chian budpondabi. 17Capednaun yacno nidnu, quec cano antabëdtoanec nidquin potenubi inchëshquio yampondash Esus choambo icnubi. 18Adnubien cunquequid tapa choec cumapenec cunquetuidnubi acte cumapenec bocquiannuc uncadenquio yampondash. 19Ënapen nidabi nëbi 6 quidometedo cactiontsëqui nidquimbi Esus acte bëntse choec anoentsëqui yansho istanec dacuëdcuededpondabi. 20Adshobien: Ubi neque. Dacuëdenda, capondashi. 21Adoac: Esus nec, quec bëdambo iquebi, quetanquin badedi cano antsadtomepondambi. Adotanec badedquio potequin nandotuidpondambi.
Ambi pemiaidon Esus nibënquin istuiduaid
22Adnubien abi Esusën pemebocnobi matses ushpanëdash. Badiadnuc isucunshun isaquien Esus nibëdec. Nibëdsho isashien: Ma cano abentsëcquidëmbi abëd icquidon potepaboc. Ma aidbëd nidenquio icpaboc, quecuededpanëdash ambi pemebuedo. 23Adnubien shubu dadpen icquid Tibedias caid yacnocquidon cano dadpen bëbëpanëdash. Aden bëbëshun abi Esusën: Papa nëid mimbi meniaid bëdambo iquec, queshun pan pemebued anoentsëqui nando nandosho isac: 24Abëd icquidobëd Esus nibëdsho isash: Potequimbien Esusën icashe. Nëid canombi antabëdtoshon poteshun Esus nibënnu nid, quianec Capednaun yacno nidpanëdash.
Panbimbuecquid Esus nec, quiaid
25Adec nidash ëquëmatsiuc pudundoquin Esus istuidpondash. ¿Mitsipadec nëmbo cho, Dabi? caquien 26Esusën: Tantia. Mibitedi chuinu. ¿Nuquin Papan Chomiaidquio nec, quequin Ubimbo tantiecta chochodio? Umbi pete uasho isash: Nuquin Papan Chomiaidënquio naoshe. Istannu ¿quecta ictio? Ma mimbi peteuidtsëqui tantiaquin ubi nibëmpayoc. 27Peteuidtsëqui tantiaquin pete bednuen naquidquio mibi nec. Aidquio chodquetequid neque. Chodquetiapimbo icquid tantiaquin bëdambuen nata. Aden nash Nuquin Papabëd ënëdenquio yec tabadtequid mibi yantsiandac. Nuquin Papan: Umbi chomiaidquio yec Matsesën Tishaid neque. Ismenu, quequin Aidën namiacpadombuen mibi ismequin nadatiambocquin nabanombi, quepondash Esus. 28Adsho tantiash: Nuquin Papan chiacpadombuen nata, quequien mibi icpec. Adombuen nate bunquin ¿atotsimbi nape? caquien: 29Nuquin Papan chiacpadombuen nate bunquin Aidën Chomiaidquio tantiata, quepondash Esus.
30Adoaquien: Ma ubi tantiaquiono, queshun ¿atotsi utsi nadatiambocquin nabanquin ubi mimbi ismepatsia? 31Ëndenquimboshë shubu nibëdacnoshon Moisesën nuquin tsusedpabo nibedbëdi pete mana caid abucuësh sequiaid pete pemiannepampic, quequin dada uampid isombique. Aden ubitedi nashun, capondash ambi pemebuedon.#6.31 Chotaquën onqueten Cuëd. 78.24 isbanta. 32Adoaquien Esusën: Nuquin tsusedpa Moisesëmpenquien napanëdash. Cun Pambien aden pemiondash. Nëbi ambi chomiaid petebimbuecquid icsho Nuquin Papan mibi aidquio tantiamete bunec. 33Aid petebimbuecquid Nuquin Papa yacnouësh Choquidëmbien matses abi yacno tabadtequid icmendac, quepondash Esus abibi cadec.
34Adsho tantiash petembo danec: Ënenquio icquin aidquio ubi pemianneta, quepondash ambi pemebuedo. 35Adshobien Esusën: Ubiuidtsëqui petebimbuecquid icquin matses bëdambo icmequid nebi. Ubi tantiaquid icsho pete pemetanquin acte acmiac bundoenquio yacbimbuecnuc bëdambo icmendambi. 36Umbi chuibanaqui ma mimbi ubi tantienquio icpayoc. Umbi nadatiambocquin nabansho issumbi ma mibitedishun ubi tantienquio iqueyoc. 37Nuquin Papan tantiamiaidtedishun ubi tantiasho bëdambuen isquin aido cacunmenquio iquendambi. 38¿Umbi tantiacpadombuen nanuectabi abucuësh chodionda? Padenquio. Ubi chomequid Cun Pan chiacpadombuen nanuec mabi aid yacnouësh chondac. 39Aden aidën chomiaid yec ambi chiacpadombuen naquin ambi ubi tantiamiaido chieshtoenquiocnoc dayun uaindambi. Uënësacsho uincuenmeshun cuidenquio icquin ubëdi tabadmendambi. Uënësaid abitedi uincuenmete uëshën adoendambi. 40Cun Pa bunacpaden ubi tantiaquido uënësacsho uincuenmete uëshën uincuenmeshun Cun Pabëd ubi tabadacnombo ënëdenquiocnoc tabadmendambi, quepondash Esus ambi pemebuedo chiec.
41Adec: Abucuësh chondaid yec petebimbuecquid nebi, quesho tantiashien cun matses isadaidbo chuiquido nadec chushquecuededpondash: 42¿Adquidida nepec? Ma icsambuen chuipayoc. ¿Nuquin Papa yacnouësh choaidta nedic? ¿Nuqui isacmaidta nedic? Ma Esus cuëmëdquid neyoc. Ma Osen mado neyoc. Anitsen tantiembi. Matsesën Tishaid yec ¿Nuquin Papan Chomiaidta nedi?, quecuededpondash.
43Adshobien Esusën: Shoshoshquetsëcquien ubi icsambuen chuishunenda. 44Ubi Chomequidën tantiamiabi icquin mimbi ubi tantiatiapimbo iquec. Cun Papan tantiamiaid icquimbien mimbi ubi tantiatsiandac. Adquid icnuc Nuquin Papan uënësaido uincuenmete uëshëmbi ubi tantiaquid icsho mibi uincuenmendambi. 45Aden ubi tantiate chuiquin Nuquin Papan Ambi oncamiaido chuiquin dada uampid nad iquec: Matses abitedi Nuquin Papan tantiamendac, quequin chuipampic. Adquid icnuc aidën chiampid tantiashun matsesën ubi tantiabenendac.#6.45 Isa. 54.13 tantiaquin nëid dada uapanëdash. 46Ambi tantiamiaid icquin matsesën Cun Pa isambo iquec. Umbiuidtsëqui Ambi chomiaid icquin Cun Pa isondac, quepondash Esus.
47Adashic padpidec: Tantia. Abimbo chuinu. Ubi tantiaquido Nuquin Papa yacnombo ënëdenquio icnuc ubëdi tabadmendambi. 48Ubiuidtsëqui petebimbuecquid icquin aden tabadmendambi. 49Min tsusedpabon shubu nibëdacnoshon pete utsi mana caid pepampic. Aid pequidobi uënësbudnepampic. 50Petebimbuecquid utsi Nuquin Papan abucshun chomiaid nëmbobi iquec. Aid piash umbi chiacpadquiec padpidec uënësenquio yec Nuquin Papabëd tabadtequid yanendac. 51Aid petebimbuecquidquio yec abucuësh chondaid nebi. Cun nami piash matses uënëstiapimbo icquid yanendac. Adquidquio matses icmenuec ubided cuidadquin cun nami menendambi, quepondash Esus.#6.51 Naden tantiaquin Esusën chuipanëdash. Ubi tantiaquido uënësacsho Nuquin Papa yacno ubëdi tabadmendambi padpidec uënëstiapimbo icnuc, quequin tantiaquin Esusën chuipanëdash.
52Aden: Cun nami piash matses uënëstiapimbo icquid yanendac, quesho tantiashien namimbo ca danec isadaidbon chuiquido utsi utsiec: ¿Mitsipaden Esusën aton namibi nuqui pemepatsiash? quecuededpanëdash. 53Adsho ambibi tantiashien Esus: Tantia. Mibi abimbo chuinu. Matsesën Tishaid icsho cun nami pequinc cun intac acquinc cainquiocquid Nuquin Papabëd ënëdenquio yec tabadtiapimbo iquendac. 54Padnuen cun nami pequinc cun intac acquinc cash Nuquin Papabëd ënëdenquio yec tabadtequid mibi iquendac. Adquid icsho ubëdi tabadmenuen uënësaido uincuenmete uëshënquio uincuenmendambi. 55Ai, cun nami petebimbuecquid icsho pequid bëdambuec tabadmetequid nec. Cun intac actebimbuecquid acquid bëdambuec tabadmetequidbidi nec. 56Aden cun nami pequinc cun intac acquinc caquid yec ubëd abentsëc yacbimbuec tabadtequid nendac. Adecbidi aidbëd abentsëc yacbimbuec iquendabi. 57Cun Papa ubi chomequid uënëstiapimbo icquid yec matses uincuenmequidquio nec. Aidën chomiaid icsho cun nami piacbimbuec ubi tantiec tabadquid uënësacsho uincuenmequin uënëstiapimbo icquid icmendambi. 58Aden ubi tantiamenuen: Nuquin Papan abucshun chomiondaid petebimbuecquid utsi iquec, quequin chiombi. Ubi adquid icsho ubi tantiaquid Nuquin Papabëd ënëdenquio yec tabadtequid iquendac. Min tsusedpabon mana caid piampidpadquidpenquio nebi. Aid pequidi uënësbudnepampic. Padnuen Ubi tantiaquido padpidec uënëstiapimbo icquid yanendac, quepondash Esus. 59Aden Esusën Nuquin Papan Chiaid chuibante shubu yacnoshon shubu dadpen icquid Capednaun caid yacnoshon chuibampondash.
Abi tsibanquidon utsin utsinquien Esus nianaid
60Adec: Cun nami pequinc cun intac acquinc cash mibi bëdambo ictsiac, Esus quesho tantiashien abi tsibanquido utsi utsiec: Aden natiapimbo icnuc chiec, quepondash. 61Adec onquesho ambibi tantiashien Esus: ¿Umbi chuibued tantiashta chieshtotiadquio ique? 62Matsesën Tishaid iquequi ubi iccondacnobidi abuc ubi nidsho isash ¿atoda mibi quendac? 63¿Nami pequinc intac acquinc cashta mibi bëdambo icpatsia? Padenquio. Nuquin Papan Mayanën umbi chuibuedbëta ubi tantiamequin matses bëdambuec tabadquid icmetsiash. Adoaid yec Nuquin Papa yacno ubëdi tabadendac, quepondash Esus. 64Adashic padpidec: Umbi aden bëdambuen chiaqui utsin utsinquien mimbi ubi tantienquio iquec, quepondash Esus. Aido tauambuec abëdi nidsho: Nëidën ubi tantienquio yanendac. Nëidën ubi chieshënquido ubi bedmendac, quequin ambibi tantiec adpondash Esus.
65Aden chiashic padpidec: Ubi tantiauidquido tantiaquin naden chiombi. Nuquin Papan tantiamiabi yaidën ubi tantiatiapimbo iquendac. Nuquin Papan tantiamiaidënquien ubi tantiatsiash, quequin chiec niobi, quepondash Esus. 66Adsho tantiashun abi tsibanquid dadpenshun Esus niampondash. 67Aden utsibon nianaquien Esusën abëd icquid 12ted icquido chuiquin: ¿Mimbitsenda adembidi ubi niane? caquien 68Simon Petedon: Padenquio, Icbo. ¿Tsudabëd icnundambi mibi niannuc? Mibi padquid utsi nibëdec. Mimbiuidtsëquien: Ubi tantiaquid bëdambuen isquin uënësacsho uincuenmeshun ënëdenquio yec ubëd tabadmendambi, quequin mimbi chuipoc. 69Ubitedishun: Abimbuen caic, quequin mibi tantiembi. Nuquin Papan Chomiaidquio yec bëdamboshëcquidquio nec, quequin mibi tantiembi, quepondash Petedo Esus caic. 70Adoaquien Esus: Ai, mibitedi: Nuquibi icnu. Cho, cabampondambi. Umbi adondaid icnubi abentsëc Mayan Icsa Satanasën namiaidquio yec icsamboshëcquid iquec, quepondash. 71Simon Iscadioten mado ubëd icquid Udasën ubi chieshënquido ubi bedmendac, quequin ambibi tantiec adpondash Esus.
Currently Selected:
Uan 6: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.