Uan 2
2
Actembobi uba ënë yanmequin Esusën nadatiambocquin uaid
1Aden Natanaed chiash daëdec ushambi aton nidaid Cadidea caid yacnocquid shubu dadpen icquid Cana yacnocquid dadan: Nëbi cun chido bedembi, queshun cuishonquequin aton shubuno matses dadpen chochomepondash. Aden chochomiaidobëd Esusën tita puduedpondash. 2Adecbidi abëd icquidobëd Esus puduedpondash. 3Adec matses dadpen pudued puduedash tabadquin uba chinaid paë uaid uesquin acbededpondash. Aden uesquin acacsho issumbien aton titan Esus chuiquin: Actequid naimëdaccoshe. Nashunta, mado, capondash. 4Adoaquien: ¿Atotsi quequin mimbi ubi chuipe, tita? Cun Pan tantiacpadënquio naimbi, quepondash Esus. 5Adsho tantiatanquimbien aton titan actequid cushtobanquido chuiquin: Cun madon chiacpadombuen nabededta, capondash.
6Ambobi tëchu dapa 6ted tabëcaid icpondash. Ëndenquimbo chiampicpadec isadaidbo mëpamëdte acte nua 70 ditedos cactembi anidbuedi acte naimëdaid icpondash. 7Adsho issumbien Esusën: Në tabëcaidën acte cushtoban, cac cubu cubuctsëcquio icnuc acte cushtobampondash iuabon. 8Aden cushtobanquidon cushtobanacsho issun Esusën: Aniactsëc ueshun buanshun min chuiquid acmetan, cac aidën chiacpaden acmetampondash.
9Adoac acquin tanaquien paë uaid bëdambocquid icpanëdash actembo icbuedi. Nibëda dambuedquio ¿mitsimbo bedpash? quepondash iuabon chuiquid. Adsho tantiashumbien iuabon: Esusënquiobien nacposh, quequin otacquio tantiapanëdash. Adnubien iuabon chuiquidën chido bednuequid naden chuipanëdash: 10Nuquin matsesën actequid paë uaid bëdambocquidba isedanquido acmequid yendac. Adquid acmiac matses nua cubudacsho actequid icsactsëcquidtsen acmenu, quequid yendac. Aden nainquiocquin acte paë uaid bëdambocquidquio ma mibi acmianeyoc, quepanëdash iuabon chuiquid chido bednuequid chiec.
11Nuquin Papan Chomiaid yec nadatiambocquin nabanquidquio nebi, quequin aden Esusën tauaquin ismepondash. Aden nidaid cuëshë Cadidea caid yacnocquid shubu dadpen icquid Cana caid yacnoshonquio tauaquin ismebempondash. Adosho issun: Cun matsesën chiampid Nuquin Papan Chomiaidquio nec, quequin abëd icquidobëtan tantiabededpondambi.
12Aden actembobi uba ënë paë uaid uash nidec shubu dadpen icquid Capednaun caid yacno Esusbëd nidec aton tita yec aton utsibo yec abëd icquido yec quec nidannepondash. Ambo daëdpactsëc ushec tabadpondash.
Esusën chushcaquin Nuquin Papa tabadte shubu dapanoshon nicaid
(Mat. 21.12-13; Madc. 11.15-18; Duc. 19.45-46)
13Capednaun caid yacno ushanec nidequi shubu dadpen icquid Edusaden yacnotsen Esus nidanneuapondash. Tsusedpabon: Ma cun mado uënësmenquio icnu, queshun obeca caniactsëc cuessunniampid tantiate uëshë anoentsëqui yanec, quiash Esus ambo nidannepondash.#2.13 Aden obeca caniactsëc uënës uampid iste bunquin Buan. 12.1-27bëta M.I.Ch. 16.1-8 isbanta. 14Nidashic Nuquin Papa tabadte shubu dapa tsicatequin daquënë uaidën puduedpondash. Puduedshun isaquien atona menequin piucquid bedquido dadpen nëish iua chedobëd icpondash. Baca yec obeca yec oshpodcobimbuecquid quënëmpin sauedaid yec quec icpondash. Aton iua menequin piucquid bednuec utsibo tabadnubi utsibo ambi tabëcaid dayun tabadpondash. Nidaid utsi yacnouësh chochoquidën piucquid bedquin aton nidaidën icquid piucquid meneuaquido icpondash. 15Adec tabadsho istanquimbien Esusën cueshcante nacnentanquin cuesquin aton nëish iua chedobëta umanuc abitedimbo cuenmequin niacumpondash. Adotanquimbic tabëcaidtsen bëcunneshumbanquin piucquid siabudshumbampondash. 16Adotanquimbic oshpodcobiecquid menequin piucquid bedquidotsen chiec: Baded mitsana buanec nid. ¿Piucquid bedec tabadnuen shubu uaidta nedic? Ma Cun Pa tabadte shubu dapa neyoc, quequin chushcapondash.
17Aden nicasho issun naden Nuquin Papan Chiaid chuiquin cun tsusedpan dada uampid tantiapondambi: Cun Pa tabadte shubu cudasquidquio nebi, quequin Esusën nate chiampid abëd icquid utsibobëtan tantiabededpondambi.#2.17 Chotaquën onqueten Cuëd. 69.9 isbanta.
18Aden nicasho issumbien isadaidbon chuiquidon: ¿Tsuntsin chiac nai? Nuquin Papan Chomiaid icquin naombi, quequin nadatiambocquin nabanquin ubi isme, caquien 19aden ismenquio icquin Esusën naden chuipondash: Mimbi nëid shubu dapa uesquin chic chicacsho daëdec ushquin padpiden nacnenuaindambi, quepondash Esus. 20Adsho tantiashun Nuquin Papa tabadte shubu dapambo danquin: ¿Badedquioda mimbi nacnempatsia? Ma nëid shubu dapa nacnenquin seta dadpenquioshë 46tedquiobi matanmiac cadenneyoc, quepondash cun matses isadaidbon chuiquido.
21Abibi cadquimbi Esusën: Nëid Nuquin Papa tabadte shubu dapa, quequin chuipondash. 22Uënës uacsho chococac daëdec ushash Esus uincuenacsho issumbi Nuquin Papan Chiaid cun tsusedpabon chuiquin dada uampidbëta Esusën chiondaidquio abëd icquidobëtan: Abibi cadecshenda neposh, quequin tantiabededpondambi.
Matses abitedishun tantiaid tantiaquidquio Esus nec, quiaid
23Edusaden yacno abi tabadnubi tsusedpabon: Ma cun mado uënësmenquio icnu, queshun obeca caniactsëc cuessunniampid tantiate uëshë yannubi nadatiambocquin nabanquin Esusën ismepondash. Aden ismiac matses dadpenshun: Nuquin tsusedpabon chiampid Nuquin Papan Chomiaidien Esus nec, quequin tantiabededpondash. 24Aden tantiasho isash tantiaquidquio yec: Ubi bëdiactsëc tantiaquido nec, quequin Esusën tantiapanëdash. 25Utsin chiambobi ambibi matsesën tantiaidtedi tantiaquidquio yec Esus adpondash.
Currently Selected:
Uan 2: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.