Uan 17
17
Esusën abëd icquido tantiaquin Nuquin Papa chiannaid
1Aden ubitedi tantiamequin chuibanshumbic abuc isquin Esusën naden Nuquin Papa chuipondash: Papa, nëbi mimbi tantiaidtedi nainsho issun mimbi tantiamiacpadquiec: Aton Mado Esus bëdamboshëcquid yec abitedishun Icbombo nec, matses cameta. Adembidi mimbi chiacpadombuen umbi nasho issun mibi caic: Abi namequidtsen bëdamboshëcquid yec abitedishun Icbombo nec, cameta. 2Mimbi icmiacpadec abitedishun Icbo icquin mimbi ubi tantiamiaidotedi matses nuquibëd ënëdenquio yec tabadtequido icmendambi, Papa. 3Matsesën: Abipadquid utsi nibëdnuc Nuquin Papa abentsëcquiobi iquec. Adembidi Ambi Chomiondaidquio Esuquidistu nec, quequin tantiasho nuquibëd ënëdenquio yec tabadtequido icmendambi, Papa. 4Mimbi chiacpadombuen naquin nëbimbobi nidaidënshun nainembi. Umbi adoacsho isash matses: Abi namequid Nuquin Papa bëdamboshëcquid yec abitedishun Icbombo nec, quendac. 5Nëbi mimbi tantiaidtedi umbi nainacsho mibi yacno indoshon nuqui abitedi uabi yequi bëdamboshëcquid yec abitedishun Icbombo iquec min dayun ubi tsadondacno ubi tsadmeuata, Papa, quepondash Esus.
Esusën abëd icquido tantiaquin Nuquin Papa chiaid
6Adshumbic Esusën abëd icquido icsho ubitedi tantiaquin aton Papa naden chuiuapondash: Mimbi tantiaidtedi Mimbi ubi tantiaquid icmiacsho Mimbi bëdambuen iste chuibanombi. Aden mimbi chiaidquio chiac nabanosh, Papa. 7Adembidi aidon: Nuquin Papan namiaidquio nec, quequin ubi tantiosh. 8Mimbi namiacpadombuen Mimbi Chiaidquio umbi chuibansho tantiashun: Nuquin Papan Chomiaidquio nec, quequin aidon ubi tantiosh, Papa. 9Ubi tantiesabo tantiaquin mibi chienquio iquembi. Mimbi tantiamiaido icquin ubi tantiaquidouidtsëqui tantiaquin mibi chiec nebi, Papa. 10Ubi tantiaquido yec mibi tantiaquido nec. Adquido icquin: Mibi bëdambo iqueque. Cun Icbo canu, queshun mimbi chiacpadec bëdambuec tabadquin utsibo ubi tantiamec, Papa. 11Ubi mibi yacno nidan nidaidën ubëd icquido abi tabadsho dayun uata, Papa. Ubi chieshënquidon aido chieshtomenushe. Aido dayun uata. Nadatiambocquin nabanquin aido bëdambuec tabadmeta. Nuqui tantiananquiacpadquiec abentsëc yacbimbuec tabadacpadec ma ubëd icquido tantiananquiec abentsëc yacbimbuec ma tabadnu. Aido bëdambuen dayun uata, Papa. 12Mimbi nadatiambocquin namiac ubëd icquidobëd icquin mimbi chiaidquio bëdambuen chuibanquin chieshtomiambo iccombi. Aden bëdambuen dayun uaquin aido Mayan Icsa Satanas iuamiambo iccombi. Udas abentsëquien ubi tantiesa yanosh. Mimbi chiaid tsusedpan dada uaquin chiampicpadombuen ubi chieshënquido bedmenuec Mayan Icsa Satanasën iua Udas yanosh.#17.12 Chotaquën onqueten Cuëd. 41.9 tantiaquin Esusën Udasën bedmete aden chuipanëdash.
13Nëbi mibi yacno nidendabi, quequin nëidobëd nidaidën abi tabadquin mibi otacquio chienquio iquembi. Aden umbi chuisho tantiash ubëd icquido ubi cuishonquiacpadquiecbidi ma cuishonquequiono, quequin mibi chiec nebi, Papa. 14Mimbi chiaidquio nëido chuibanombi. Aden umbi chuibanac ubi tantiaquid icsho ubi chieshënquidon nëidotsen chieshënendac, Papa. 15Aden tantiaquin: Ubi tantiesabobëd ubëd icquido tabadmenda, quequin chienquio icquin: Satanas iuamequin chieshtomenda, quequin chiec nebi, Papa. 16Ubi tantiesabo tabadacpadec tabadenquio yec ubi nidaidën tabadbocpadquiec aido tabadeque. 17Mimbi chiaidquio bëdambuen tantiamequin mibimbo tantiamequin mitsana icmeta, Papa. 18Mimbi: Matses chiec nid, quequin ubi chomiondacpadombuembidi nëido nidmequin: Matses tantiamequin ubi chuibennetan, caindambi, Papa. 19Nëido tantiaquiec nëbimbobini mimbi chiacpadec ubided cuidadec uënësendac. Adombuembidi ma nëidon mimbi chiacpadombuen nanu, quiash mibi tantiaquidombo icmenuec adebi, quepondash Esus Nuquin Papa chiec.
Esusën abi tantiaquid utsibotsen tantiaquin Nuquin Papa chiaid
20Adashic abi Nuquin Papa chiec Esus: Ubëd icquido tantiaquin mibi chuishumbic nëbi aidon chuibanac ubi tantiabentequido tantiaquin mibi chuinu, Papa. Umbi chiaidbëta umbi naidtedi ubëd icquidon chuibanac utsibotsen ubi tantiaquido yanendac. 21Mibëd ubi tëshnanenquio yacpadecbidi nuquibëd tëshnanenquio icquid aido icmeta, Papa. Adoac tantiananec abentsëc yacbimbuec tabadsho issun nuqui tantiesabon: Abimbuen cachitec. Nuquin Papan Chomiaidquien Esus nepanëdash, quequin tantiendac, Papa. 22Mibëd ubi abentsëc yacbimbuec tabadec tantiananquiacpadquiecbidi ma ubi tantiaquido tantiananquiono, quequin mimbi ubi namiacpadombuen ubi tantiaquido namiombi, Papa. 23Aidobëd ubi tantiananquiacpadec mibëd tantiananquiebi. Adec mibëd tantiananquiacpadec aido ubi tantiaquido utsibobëd tantiananquiendac. Adsho issun: Abembi adec tantianantiapimbo iquec. Nuquin Papan chomenëdaid Esusën namiaquien nec. Aton Papan Esus tantiacpadombuembidi Esus tantiaquido tantiec, quequin ubi tantiesabon tantiendac, Papa. 24Mimbi ubi tantiaquido icmiaido nuqui tabadacnombo tabadmeta, Papa. Abitedimbo uabi icquin mimbi: Umbi tantiaidquio mibi neque. Nuquibi nanuna, Mado, mimbi cac bëchamauanquiec bëdamboshë yec tabadtennecpadequi mibëd tabadsho ma ubi tantiaquidon isnu, queshun: Mibi yacno tabadmeta, quequin mibi chiec nebi, Papa 25Icsaisambo mibi icsho ubi tantiesabon mibi tantiatiapimbo icnubi mibi tantiaquiembi. Adnubi mimbi ubi tantiamiaidon: Nuquin Papan Chomiaidquio nec, quequin ubi tantiosh, Papa. 26Aden Mibimbo tantiamenuec iuec ubëd icquidobëd tabadquin mimbi chiaidquio chuibanombi. Adembidi ënenquio icquin ubi tantiaquido tantiamendambi. Ënëdenquio yec aidobëd iquendabi. Adshobi abentsëc yacbimbuec mibëd ubi tantiananquiacpadecbidi aido utsibëd tantiananmeta, Papa, quequin Esusën Nuquin Papa chuipondash.
Currently Selected:
Uan 17: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.