YouVersion Logo
Search Icon

Ducas 24

24
Esus uincuenaid
(Mat. 28.1-10; Madc. 16.1-8; Uan 20.1-10)
1Adashic dominco badiadnuc danoshcanun ambi nacnembued danoshquete bëdambo nuadquid buanec Esus chococabocno isec chidobo nidpanëdash. 2Adec nidshun Esus nauedshun bëtashaid cuënote dapa shëcniacsho istuidash 3shëcuën puduedshun aton Icbo Esusën dada nibëdsho isec tabadpanëdash. 4Aden isash natiaquiec tabadnubien dada daëd dashcute ushumboshëcquid dasiuidash chënquec bëchamauanquiec tabadsho ispanëdash.#24.4 Nuquin Papabëd icquido ambi budmiaido nepanëdash. 5Aid isash dacuëdcuededequi dannëshën tinquebudec nidaidën bëccuësquebudcuededpanëdash. Adsho isash dada daëd: ¿Atotsi quequin uënësaido chococacno chococac uincuenaid nibëne? 6Nëmbo nibëdec. Aidi uincuenosh. ¿Aidëmbi Cadidea yacno mibëd tabadquin chuibambued tantienquioda ique? 7Naden Esusën mibitedi chiondash: Matsesën Tishaid icsho chieshënquin bedmiac bedshun icsambocquido ubi menendac. Aden meniac cueste napotiaidën dectanquin uënës uaqui daëdec ushash uincuenendabi, quequin chiondash, quepanëdash dada daëd. 8Aden chiac chidobon Esusën chuibued padpidembuen tantiauapanëdash.
9Aden tantiash Esus chococaid shëcuë yacnouësh puduenanec Esusbëd icbuedo 11tedbëd utsibo dadpen tabadacno choec puduedshun ambi isbuedbëtabi ambi tantiabued chidobon chuibampanëdash. 10Aido nëidtedi nepanëdash. Nëidic Madia Macdadena. Utsibic Uana. Utsibic Madia utsi Uambëtan Santiacon tita. Utsibic chido utsibo. Aidtedi chochoshon Esusën: Ubi chuibenneta, caido chuituidpanëdash. 11Aden chuisho tantiash: Mimbi ambembi chuiquin chiaid tantiatiapimbo iquebi, quecuededpanëdash aidotedi. 12Padnuen Petedo puduenanec titinquianec Esus nauedaid shëcuë yacno nidshun shuebudquin shëcuë anisquimbi dataniaid dashcuteuidtsëqui uesho ispanëdash. Aden isanec aucbidi shubuno choequi: ¿Mitsipadquidien nepec? quepanëdash Petedo tantiadempambo yec.
Emaus yacno dada daëd nidaid
(Madc. 16.12-13)
13Adashic abi uëshëmbi Edusaden yacnouësh Esusbëd iccuededbued dada daëd shubu dadpen icquid Emaus caid yacno nidec 11 quidometedo caction nidpanëdash. 14Adec nidequi ambi Edusaden yacnoshon isbuedbëta ambi tantiabued chiec onquenidpanëdash. 15Aden chiec onquenidshobi aid daëdi chinunash aidobëdi Esus nidpanëdash. 16Aden abi chinuntuidsho isac utsibimbuec Esus isadpanëdash. Adsho isash: Esus nec, quequin tantienquio icpanëdash.
17Adec nidequi Esus: ¿Atotsi chuibanec onquenidec ne? quepanëdash. Adsho tantiash uënësquio yec nidtuidpanëdash.
18Adec nidtuidshun Quedeopas cuëmëdquidën: ¿Edusaden yacno icquimbi ashunquio nabued mimbida tantiambo icco? quepanëdash Esus caic.
19Adoaquien: ¿Atotsi naid chiec ne? quepanëdash.
Adoaquien: Esus Nasaded yacnouësh choquid chiec nebi. Aidi Nuquin Papan oncamiaid icquin nadatiambocquin nabanquin ambi chiaidquio chuibansho Nuquin Papabëtan matses dadpenshun bëdambuen isaid icposh. 20Adsho issumbien Nuquin Papa ismequin nëish iua cuessunneshun pichicaquidon chuiquidobëtan nuquin chuiquid utsibon Esus bedshun: Uënës uameta, quequin isadaidpembo chuiquid meniac cueste napotiaidën dectanquin uënës uaposh. 21Nëbi chuiquid tapa isadaidpembo iquenquio icnuc Esus isadaidbon chuiquid tapa ictsiash, quequin ubitedishun tantiauidpombi. Umbi adobuedi uënës uaposh. Aid uënës uabued daëdec ushac. 22Adec ushbombi nëid badiadnuc dacuëdanquiecnuc chidobon naden chuibededposh: 23Esusën dada nauedbocno badiadnuc nidshun isac nibëdosh. Adsho isash ambobi icnubi Nuquin Papan budmiaido abëd icquido daëd isadcuenec: Mimbi nibënaid nibëdec. Uincuenanec nidosh, quiosh, quequin chidobon chuiposh. 24Aden chidobon chuisho tantienquio yec ubëd icquid utsi utsiec Esusën dada nauedbocno nidshun chidobon chuibocpadembi nibëdquio icsho ispaccosh, quepanëdash ambi chinunaido Esus chiec.
25Adoaquien Esus: Ma bëdiactsëc tantiaquid mibi daëdi neyoc. Nuquin Papan oncamiaidon dada uampid bëdiactsëc tantiaquin tantiesabidi ma mibi neyoc. 26Nuquin Papa yacnouësh abitedishun icbombo ictequid abuc niduabicnuc Nuquin Papan tantiacpadombuen matsesën Ambi Chomiaid Quidistu mëyanquin uënës uaindac ¿quequin chiaid tantiamboda icco? quepanëdash Esus. 27Adshumbic abi natequid chuibanquin Moisesën dada uampidbëtabi Nuquin Papan oncamiaidon dada uampidtedi tantiamequin Esusën chuibampanëdash.
28Aden chuibanequi shubu daëdpactsëcquid Emaus caid istuidnubi Esusën datantsensho issun naden chuipanëdash: 29Inchëshbudec neque. Nuquibi nëmbobi ushnuna, abidaëdshumbi cac shubun aidobëd puduedpanëdash.
30Adshumbic nuntan tabadquin pete tabëcte dayun abëdi tsadquin pan bedshun: Mimbi pete uaid bëdambo iquec, Papa, quequin Nuquin Papa chuishun cuështanquin Esusën abidaëdi menepanëdash. 31Aden nasho issun badedi: Esusien niacpec, quequin tantiactannubi Esus nibëdquio yampanëdash. 32Adsho isash: Podquiedën choquin Nuquin Papan Chiaid dada uampid chuibansho tantiash: Cuishonquec bëdambo ictanobi, quepanëdash abidaëdi.
33Adtanequi abidaëdi Edusaden yacnobidi chouapanëdash. Adec choec Esusbëd icquido 11tedbëdi utsibo iccuededacno puduedsho issun: 34Abimbobi caic. Nuquin Icbo uincuenaccosh. Adshun Simon Petedo ismiaccosh, quepanëdash iccuededquido. 35Aden chuisho tantiashumbien Emaus yacnouësh chobued daëdshun abi chinunshun Esusën chuibuedbëta pan bedshun cuëshsho ambi isquin tantiactambued chuipanëdash.
Abëd icquido yacno Esus isadcuenaid
(Mat. 28.16-20; Madc. 16.14-18; Uan 20.19-23)
36Adec onquecuedednubi aidon nënantanquio isadcuenshun Esusën: Dacuëdenda, capanëdash.
37Adec isadcuensho istanequien: Podobitsien nec, quiash abëd icquido dacuëdcuededpanëdash. 38Adsho isashien Esus: ¿Atotsi quiash dacuëdcuededec ne? ¿Ubi tantienquioda ique? 39Cun mëdantebëta cun taë is. Ubibi nebique. ¿Mëtoccaid taëbëd chiuë nibëdecta ye? Mishec cho. Ubi yacpadquid canitebëd nami choquid podobitsi nibëdec, quepanëdash Esus abëd icquido chiec.
40Aden chuitanquimbi abi bëchun shuin mëtoccaid chiuë aton mëdantebëta aton taë Esusën ismepanëdash. 41Aden ismiac: Aidquiobi nec, quenquio yec dacuëdcuededquin isequi bëdambo yanec cuishonquec: Adec uincuentequidshenda dectampaccosh, quequin tantiec tabadpanëdash. Adec tabadsho issun: ¿Ada pete iquec? Penu, caquien 42nuëcquid shëaid bushcu menepanëdash. 43Aden meniac bedshun abëd icquidon isnubi Esusën pepanëdash.
44Aden petanec: Mibëd icquimbi naden chuibanombi: Nuquin Papan umbi nate chuiquin Moises dada uamiampicpadombuen naquinc Nuquin Papan ambi oncamiaido dada uamiampicpadombuen naquinc Cuëdënte dada uampicpadombuen naquinc caquin Nuquin Papan chiampictedi nabanembi, quequin chuibanombi, quepanëdash abëd icquido tantiamenuen chiec. 45Aden chuishumbic abëd icquido bëdambuen tantiamequioquin: 46Nuquin Papan chuiquin dada uamiampid nad iquec: Nuquin Papan Chomiaid Quidistu Mesias caidbidi matsesën mëyanquin uënës uaqui daëdec ushash uincuenendac, quequin chuipampic.#24.46 Isa. 53.1-12 Esusën naid chuipampic. Aid ista. 47Nadembidi chiampid iquec: Nuquin Papa tantiabenquin mimbi icsambuen naid ënsho isash: Icsambocquid nec, quequin tantienquio yec mimbi icsambuen naid Nuquin Papa bëshunendac, quequin Edusaden yacnoshomba ubi tantiaquidon ubi chuibanendac. Aden chuibanshumbic nidaid utsi utsiec yacno nidshun adombuembidi chuibanuaindac. 48Ubi nabuedbëta Umbi chuibambuedtedi mibitedishun chuibantequid nendac. 49Aden chuibantequid icnuc ubi tantiaquido icsho: Cun Pan mibitedi: Menenu, caid aton Mayan Bëda chomendambi. Aidi mibitedi nadatiambocquin nabanmequid abucuësh choeque. Aid mibitedi meniabicnuc Edusaden yacnobi tabadquin aidi cainta, capanëdash Esusën.
Esus abuc nidaid
(Madc. 16.19-20)
50Adashic abëd icquido buanec nidec shubu daëdpactsëcquid Betania yacno choash nidtuidshun aton mëdante abuc cadoquin ismec: Nëidotedi bëdambuen ista, Papa, quepanëdash Esus. 51Aden chiec onqueshobi aido nianmequin Esus abuc indopanëdash. 52Aden indosho isash: Cun Icbo bëdamboshë iquec, quequin tantiec tabadtanec: Bëdambo iquebi, quianec cuishonquequiec Edusaden yacnobidi chochopanëdash. 53Adec chochoash tabadquin Nuquin Papa tabadte shubu dapa yacno badiadquidën badiadquidënquiec nidted nidtedquin Nuquin Papan naid cuëdënquin chuidednepanëdash.#24.53 Teopido cuëmëdquid chuiquin aidtedi Ducasën dada uapanëdash.

Currently Selected:

Ducas 24: mcfNT

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy