Codinto 1 1
1
I. BEDANQUIN CHIAID
(1.1-9)
Mibi tantiembi, quequin chiaid
1Pabado nebi. Nuquin Papa bunacpadombuen Esuquidistun: Ubi chuibennequid icta, quequin tantiamiaidquio nebi.
Esus tantiaquid icsho nuqui cun utsi caid Sostenes ubëd iquec. 2Aidbëtambi Codinto yacnoquid Nuquin Papan bëdambuen tantiamiac Esus tantiaquido icsho mibitedi tantiembi, quequin chiec nebi.
Esuquidistunuidtsëqui bëdamboshëcquid icmequin tantiamiac Nuquin Papa tantiaquido mibitedi nec. Adoaido icquin utsi utsiec yacnoshon Esus tantiaquid utsibobëtan Nuquin Icbo Esuquidistu chiannequid nuquitedi nec. Aidi Nuquin Icbo yec aidon Icbobidi nec.
3Nuquin Papabëtan Nuquin Icbo Esuquidistun ma bëdambuen isquin bëdambuec tabadmepanu, quequin mibitedi tantiaquin Nuquin Papa chiannembi.
Nuquin Papa chianniaid
4Mibitedi tantiaquin ënenquio icquin Nuquin Papa naden chiannembi: Mibi bëdambocquid nec. Adquid icquin mimbi tantiamiac Esuquidistu tantiasho bëdambuen isquin bëdambo icmeta, Papa, quequin mibitedi tantiaquin chiannembi. 5Nuquin Papan bëdambuen isaido icsho Esuquidistun abibi tantiamequin ambi naidbëta Nuquin Papan Chiaid bëdambuen tantiamequin mibitedi bëdambuen chuibanmec.
6Esus tantiesabo icsho umbi Esuquidistun naid chuibansho tantiash aid tantiaquidombo mibitedi yanondac, tantiesa yanuainquio icnun. 7Adquido yec Nuquin Icbo Esuquidistu chouate uëshë caimbudec tabadec: Nuquin Papan tantiamiambocquid nebi, quetiapimbo mibitedi iquec. 8Aden tantiamiac bëdambuec tabadsho utsibon: Icsambuec tabadquido nec, catiapimbo iquec. Adquid icsho Nuquin Papan Nuquin Icbo Esuquidistu chouacnobi cuëscaquin mibitedi chieshtoenquiocquid icmendac. 9Ambi chiampicpadombuen naquidquio Nuquin Papa nec. Aidëmbi aton mado Esuquidistu Nuquin Icbo tantiamequin aidbëd abentsëc yacbimbuecnuc tabadmec.
II. ESUS TANTIAQUIDO CUËSHËDTE CHIAID
(1.10—4.21)
1. Cuëshëdec Esuquidistubëd abentsëc yacbimbuec tabadtiapimbo yanaid
(1.10-17)
10Tantia, cun utsibo, Nuquin Icbo Esuquidistun namiaid icquin mibitedi chuinu. Mibëtan Esus tantiaquidobëd chieshënnanec cuëshcuëshëdec tabadenda. Adenquio yec Esus tantiaquid utsibobëd tsidadash tabadec: Naden nanuna, quec abentsëcshun tantiacbimbuen tantiec bëdambuec tabadta. 11Cun utsibo, mibitedi utsi utsiec chushcananec tabadosh, quequin chido Codoen shubun icquidon chuisho tantiombi. 12Mibitedi utsi utsiec nadec onquiaid chuinu: Pabadon tantiamiaid nebi, quenubi utsibo: Apodon tantiamiaid nebi, quenubi utsibo: Petedon tantiamiaid nebi, quenubi utsibo: Esuquidistun tantiamiaid nebi, quec tabadosh, quequin chuisho tantiombi.
13¿Adquid iquecta Esuquidistubëd abentsëc yacbimbuec mibitedi tabadpe? ¿Mibitedi tantiectabi ubided cuidadec cueste napotiaidën dectanac uënësponda? ¿Cun cuëmëdquid chuiquinda mibitedi acten mentobanondash? 14Aden tantiaquin: Nuquin Papa bëdambo iquec, caimbi. Esus tantiaquid icsho Quidispobëta Cayo acten mentoquimbi mibitedi padambo iccondambi. 15Adquid icnuc: Pabadon aton cuëmëdquid chuiquin acten mentondaid nebi, quetiapimbo mibitedi iquec. 16Adembidi Estepanasën shubun icquidotsen acten mentondambi. Utsibo acten mentondambi, quequin tantienquio iquembi. 17Ubi tantiaquido acten mentobanta, quequin Esuquidistun chiambo iccondashi. Adoenquio icquin: Matsesën icsambuen naid bedshunec abided cuidadec Esuquidistu uënëspanëdash, quequin Chiaid Bëda chuibenneta, caid icquin aden chuibennec nebi. Bëdambuen tantiaquidquio nebi, quequin chienquio icquin: Nuquin Papa matses bëdambuen ismenuec Esuquidistu abided uënëspanëdash, quequin ma utsibontsen tantianu, queshun aidquio chuibennec nebi.
2. Nuquin Papan abitedi tantiaidbëta matsesën tantiaid chiaid
(1.18—3.4)
Esuquidistu nadatiambocquin tantiaquidquio chiaid
18Esuquidistu abided cuidadec cueste napotiaidën dectanac uënëspanëdash, quequin chuibanac: Ambembi chiec onquequido nec, quequin tantiaquido icsho chian annëdënquiacno nësecatequid nendac. Padnuen: Aid chuibanaid abimbo chiaid nec, quesho Nuquin Papan nadatiambocquin tantiamiac Esus tantiaquid yec Nuquin Papa yacno puduedtequido nuqui nendac. 19Nuquin Papan chuiquin dada uamiampid nad iquec:
Umbi ënmiac: Cumapenquien tantiaquid nebi, quequidombi tantienquio yanendac.
Adecbidi: Dadpenquio tantiaquid nebi, quequidombi tantienquio yanendac,
quequin chuipampic.#1.19 Isa. 29.14 isbanta.
20Cumapenen tantiaquid yec dadpen tantiaquin utsibo tantiamequid yec utsi onquesho tantiec utsibëd chuinanquid yec quequid iquequi abi tantiesabo icsho Nuquin Papan: Matsesën tantiaidtedi ambembi chiec onquiaid nec, caindac. 21Aden tantiesa icquin cumapenen tantiaquidon ambi tantiaiduidi chiaid tantiash: Nuquin Papa cumapenen tantiaquid nec, quetiapimbo matses iquec. Adecbidi: Esusën naidquio chuibanac tantiadenquio icnuc ambembi chiec nec, quepec. Adquidon tantiatiapimbo icnubi ubipadquidon Esuquidistu chuibanac abi tantiaquid yansho Nuquin Papan bëdambuen isaido yec abi yacno puduedtequido nendac.
22Adquidon aden tantianubi isadaidbon nadatiambocquin nabanshouidtsëqui iste bunquin tantiauidec. Quidieco matsesien: Dadpenquio tantiaquidon chuibansho tantianu, quequinuidtsëqui tantiaquido nec. 23Aden tantiec tabadnubi nuquitedi: Nuquin Papan Chomiaid Mesias caid yec Esuquidistu abided cuidadec cueste napotiaidën dectanac uënëspanëdash, quequin chuibanec. Adoaquien: Nuquin Papa icsambuen chuishunec, quequin tantiec isadaidbo tabadec. Adnubi matses utsibo: Ambembi chiec tantiadenash onquequid nec, quequin tantiec tabadec. 24Padnuen isadaidbobëtabi matses utsibo icshobi Nuquin Papan tantiamiaido iquendac. Adquido icquin Ambi Chomiaid Esuquidistu abided cuidadaid chuisho tantiaquidën: Nuquin Papan abitedimbo tantiaquid icquin nadatiambocquin naid nec, quequin tantiec. 25Adec Esuquidistu abided cuidadec uënësnëdaid chuisho tantiash: Nuquin Papan bëdambuen tantienquio icquin ambembi napanëdash, quequin matsesën tantianubi Nuquin Papa cumapenen tantiaquidquio icnuc adquid matses ictiapimbo iquec. Adecbidi: Nuquin Papa nadatiambocquidpenquio icquin Esus uënësmepanëdash, quequin matsesën tantianubi Nuquin Papa nadatiambocquid icnuc adquid matses ictiapimbo iquec.
Codinto yacnocquido nadquido nec, quequin chiaid
26Tantia. Cun utsibo, mibitedi chuinu. Nuquin Papan: Cun matses canu, quequin tantiamiabi yec nadquid mibi icpondac. Daëdpactsëc tantiaquidombo mibi icpondac. Chuiquidpenquio mibi icpondac. Chuiquid tapan bacuëpenquio mibi icpondac. 27Adquid icshobi Nuquin Papan tantiamiaido icsho isash dadpen tantiaquido: Ambembi chiec onquequido nec, quequin icsambuen tantiashunchitombi, camenuen dadpen tantiesabobi abi tantiaquido icmiac. Adembidi Nuquin Papan tantiamiaido caic: Chuiquidpenquio nec, quequidobi: Icsambuen tantiashunchitombi, camenuen Nuquin Papan chuiquidpenquiobi abi tantiaquido icmiac. 28Aden utsibon chieshënquin: Tantienquiocquid nec, caidi Nuquin Papan tantiamiaido nec. Adembidi: Chuiquid tapa ictiapimbo iquec, caidi ambi tantiamiaidobidi nendac. Aden abi tantiesabo: Bëdambo iquec, camenquiocnuen abi tantiaquido icmendac. 29Nuquin Papan adotequid icnuc: Ubiuidtsëqui cumapenen tantiaquidquio nebi, quequin matsesën chuitiapimbo iquec. 30Adquid icnuc Nuquin Papanuidtsëqui tantiamiac mibitedi Esuquidistubëd abentsëc yacbimbuec tabadquido nec. Adembidi aidëmbi nuquitedi bëdambuenshë tantiaquid icmequin abimbo chuiquid icmec. Adoshon icsambuen naisabimbuecnuc Esusën Nuquin Papa nuqui bëdambuen ismec. Adoaid yec Esuquidistubëd bëdambocquid icsho cuidenquio ictequid Nuquin Papa yacno tabadtequido nuqui nendac. Esus abided cuidadaid icnuc Nuquin Papan nuqui cuidenquio iquendac,#1.30 Esuquidistu tantiaquid mibitedi yannuc abipadquid Nuquin Papan Chomiaid yec abi tantiaquidtedi bëdambuec tabadaid tantiamequid nendac. 31Nuquin Papan chuiquin dada uamiampid nad iquec:
Bëdambocquid nec, quete bunquid yec ma: Nuquin Icbombo Esus Icsaisambo yec Bëdamboshëcquid nec, quequin tantiec adpanuna,
quequin chuipampic.#1.31 Ede. 9.23-24 isbanta.
Currently Selected:
Codinto 1 1: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.