Codinto 1 11

1Esuquidistun tantiamiacpaden nabanec tabadquid nebi. Adecbidi mibitedi umbi nabanaid tantiaquin nabanec tabadta.

VI. ESUS TANTIAQUIDO ICSAMBUEC ICCUEDEDAID

(11.2-34)

1. Iccuededacnoshon Chidobon Nate Chiaid

(11.2-16)

2Umbi chuibanondaid bëshunenquio icquin tantiaquin nabanec mibitedi tabadec, quiash bëdambo iquec cuishonquebi.

3Tantia. Nëidtsen chuinu: Dadan icbo Esuquidistu nec. Adecbidi aton chidon icbo aton bënë nec. Adecbidi Esuquidistun Icbo Nuquin Papa nec. 4Nuquin Papa chuinu, queshun aton mauete mauiacchobi dada chuiquid yec: Cun chuiquidpenquio Esuquidistu nec, quiacbimbuen ismequid nec. Adembidi dadan aton mauete mauiacchobi Nuquin Papan Chiaid tantiamequin chuibanquin: Cun chuiquidpenquio Esuquidistu nec, quiacbimbuen ismequidbidi nec.

5Padnuen chidon: Nuquin Papa chuinu, queshun mapucudambobi chuiquin: Cun chuiquidpenquio cun bënë nec, quiacbimbuen ismequid nec. Adembidi chidon mapucudambobi Nuquin Papan Ambi nate oncamiac chuiquidën: Cun chuiquidpenquio dada nec, quiacbimbuen ismequid nec. Adquid yec nibëdquio icnuc matasacbimbuecquid aid chido nec. 6Chido mapucudte bunenquio icsho nibëdquio icnuc matasac bëdambo ictsiash. Aden matasaid dacuëdënec ma chido mapucudpanu, caimbi. 7Dada mapucudenquio icquid nec. Abibimbuecnuc uashun Nuquin Papan bëdamboshë icquid icmiaid dada nec. Padnuen chido dadan bëdambo icmiaid nec.#11.7 Ene. 1.26-27 isbanta. 8Dadaba Nuquin Papan uapampic. Chidon dadan icquid chicshun dada icmiambo icpampic. Dadan shictodo chicshumbien chido uapampic. 9Nuquin Papan: chido tantiaquin dada icmianambo icpampic. Dada tantiquimbien chido uapampic. Ma dada tantiaquin nashunnu, queshun.#11.8-9 Ene. 2.18-23 isbanta. 10Adquid icmiac: Nuquin Papabëd icquidon ubi isec, queshun: Dada cun chuiquid nec, quiash aidën chiacpadec tabadquin mapucudshun ismequid chido nec. 11Esus tantiaquido iquec dada nibëdnuc chido ictiapimbo iquec. Chido nibëdnuc dada ictiapimbo iquec. 12Aid abimbo caic. Dadan shictodo chicshun chido uapampic. Adoaid icquin chidon tishaid dada nec. Ambi tantiampicpaden abitedimbo Nuquin Papan uaid nec. 13Nuquin Papa chuinu, queshun ¿ada chidon mapucudambobi chiac bëdambo icpec? quequin mibitedishumbi tantiata. 14Abi bunacpadec tabadquin dadan aton manëdaid chidon tëbucshumbimbuecnuc canimiacsho issun: Icsambo iquec, quequin nuquitedi tantiec. 15Padnuen chidon manëdaid ënapen icnuc canimiaid Nuquin Papan chido tantiaquin bëdambo icmequin aton manëdaid canimiaid aton mapi mapucudte nec. 16Umbi chuibued tantiash: Icsambuen chiosh, quiash chushcante bunquido icsho ubëtan chuibennequidobëtan: Nuquin Papan tantiamiac Esus tantiaquidon: Aden Pabadon chiacpadquid utsi nibëdec, quequin tantiata.

2. Nuquin Icbo Esus tantiaquin peshun acte chiaid

(11.17-34)

Esus tantiec iccuedednuna, queshun abi bunacpaden icsambuen naid

17Mibitedi utsibobëd iccuededquin naid tantiashun: Bëdambuen nash, catiapimbo iquebi. Adec iccuededquin Esus tantiaquido utsibo bëdambuen nametiadquidi mimbi icsambuen namec. 18Mibitedi caic: Esus tantiaquidobëd iccuedednu, quiashi cuësh cuëshëdosh, quequin chiaid tantiashun: Abimbuen cachitec, quequin tantiombi. 19Adec cuësh cuëshëdquid mibi yacno icac bëdambo ictsiash. Adec utsi utsiec cuëshëdsho issun mimbi naden tantiatsiac. Cuësh cuëshëdenquiocquid icsho issun: Chieshtoenquio icquin Esus tantiaquidombo nec, quequin mimbi tantiatsiac. 20Adquid icnuc Esuquidistu abided cuidadec uënësaid tantiec iccuedednuna, queshun abimbo tantienquio icquimbi mimbi peshun acbededpec. 21Utsibo cainenquio icquin abia choquidon nua pebededpec. Adnubi utsibo tsiuec choash bunec tabadnubi abia choquido acte paë uaid nua acash tantiadenash tabadcuededpec. 22¿Mibitedishun peshun aquec tabadte min shubuda nibëdpec? ¿Atotsi quequin mimbi Nuquin Papan tantiamiac Esus tantiaquido iccuededquido icshobi icsambuen chuimepe? ¿Atotsi quequin atona nibëdquid icshobi natiamequin dacuëdmepe? ¿Atotsimbi chuipe? Mimbi bëdambuen nabanec ¿capendambi icpe? Padenquio iquembi.

Ubi uënëste tantiaquin peshun acta, quequin Esusën chiaid

(Mat. 26.26-29; Madc. 14.22-25; Duc. 22.14-20)

23Nuquin Icbon abi uënës uate tantiaquin chuibanondaid chuisho tantiondashun mibitedi chuibanondambique. Aidquiobidi chuinu. Tantia. Abi chieshënquidon bedmete inchëshëmbi: Ubëd icquidëmbi ubi bedmendac, quequin tantiaquin Nuquin Icbo Esusën pan bedshun sananquin: 24Mimbi uaid nëid pete bëdambo iquec, Papa, quequin Nuquin Papa chiec onqueshun cuësh cuështanquin menebanquin naden chuipanëdash: Mibitedi icsaid bedshunacsho ubided cuidquin mëyanquin uënës uaidën namibimbuecquid neque. Ubimbo tantiaquin pedenneta, quequin chuipanëdash Esusën. 25Adembidi pebededquin naintanquin uba chinaid ënë cushtoaid dëshote bedshun sananquin chiec: Nëid actequid cun intacbimbuecquid neque. Aid acquin: Ubi cuidmenquio icnuen Esusded Nuquin Papan cuidmiac aton intac siquebudpambuec uënëspanëdash. Adsho issun aid tantiaquid icsho Nuquin Papan ubi cuidenquio iquec, quequin tantiata. Aden aid actednequin ubimbo tantiadennequiota, quequin chuipanëdash Esus.#11.24-25 Mat. 26.26-28 isbanta. 26Aden pete cuëshëmpi pedennequimbi sicaid actequidëmpi actennequin Nuquin Icbo Esus uënësaid tantiaquin aid padpidec choacnobi cuëscaquin mibitedishun nadedneta.

Esus uënësaid tantiaquin nadednete chiaid

27Esuquidistu uënësaid tantiec iccuedednuna, queshun Nuquin Icbo Esus uënësaid tantienquio icquimbi pete cuëshëmpi peshun sicaid actequidëmpi acquin: Aton dadabëd intac icsambo icquid Esuquidistu nec, quiacbimbuen naquin icsambuen naindac. 28Adquid icnuc pete cuëshëmpi pequin sicaid actequidëmpi acnumbi: ¿Adambi Esus tantiaquin bëdambuen napoba? ¿Adabi Esus tantiec utsibobëd bëdambuec tabadpoba? quec mibibi datantiadcuededta. 29Nuquin Icbo Esus uënësaid tantienquio icquimbi peshun acquid icsho Nuquin Papan cuidtequid nendac. 30Adquid icnuc mibitedi utsi utsiec uidëmpentsëcquio iquec. Utsi utsiec nënec daicsabudnubi utsi utsiec uënësac. 31Adtequid icnuc nuquibi datantiadquin: Icsambuen naombique. Ubi bëdambuen isuata, quequin abi chuishun peshun acsho issun Nuquin Icbon cuidenquio iquendac. 32Adesa icsho Nuquin Icbon cuidquin icsambuen naid ënmequin tantiamebennuen nuquitedi natiamendac. Adoaqui abi tantiasho issun Esus tantiesabobëta cuidenquio iquendac.#11.31-32 M.I.Ch. 8.5 isbanta. 33Cun utsibo, Esus uënësaid tantiaquin iccuededquin penuna, queshun: Utsibo choabi iquec, quequin aido cainta. 34Bundoshon ma aton shubunoshombi penuna. Adosho isash: Icsambuen naique. Cuidnu, quetiapimbo Nuquin Papa iquendac.

Mibi yacno isec nidshun mimbi: Chui, cabued utsitedi tantiamequin nainquin chuibanendambi.

Currently Selected:

Codinto 1 11: mcfNT

Highlight

Copy

Compare