João 3
3
Nicodemos tỹ Jesus mré vẽmén
1Ẽn kã ũ tóg nĩgtĩ, ti jijin hã vỹ: Nicodemos, he mũ. Judeu ag pã'i ũ vẽ, Fariseu ũ vẽ. 2Ẽn vỹ Jesus ve sór mũ, kỹ tóg kuty ra ti venh tĩ mũ, ti mré vẽmén jé. Kỹ tóg ti mỹ: “Topẽ vỹ ã jẽnẽ. Hã kỹ ã tóg ẽg tỹ nén han vãnh ẽn hynhan tĩ. Topẽ tỹ ã mré han tũ nĩ ra ã tóg han ki kagtĩg nĩnh mũ vẽ,” he mũ.
3Kỹ Jesus tóg: “ũn mur mãn kỹ nỹtĩ ag hã vỹ Topẽ tỹ tỹ ẽg pã'i nĩ venh ke mũ. Ki hã sóg tó mũ mỹr,” he mũ.
4Kỹ tóg ti mỹ: “kỹ ũn sanh hỹn hẽ ri kenh mũ, ti mur mãn jé?“ he mũ. “Ti mỹ vẽsỹ sĩ' he mãn kỹ ti mỹnh fi nug ki rã mãn ke mũ'?“ he tóg.
5-6Hã ra tóg: “vó,” he mũ. “Ẽprã ke ag krẽ vỹ tỹ ẽprã ke nỹtĩ, ag mỹnh fag ri ke. Jãvo Topẽ kuprĩg tỹ ũ han kỹ tóg Topẽ kuprĩg tỹ jagrẽ nĩ. Mur mãn to ken hã vẽ, hã vỹ: inh ki rã, he mũ. Goj tỹ ke vẽ, Topẽ kuprĩg tỹ ke vẽ gé. Ũ tỹ gen kỹ mur mãn ja tũ nĩn kỹ tóg Topẽ tỹ tỹ ẽg pã'i nĩ venh ke tũ pẽ nĩ. 7Hã ra tóg ã mỹ e tĩ, sỹ ã mỹ: mur mãn jé ã tóg ke mũ, hen kỹ. 8Kãka to jykrén nĩ. Ti tỹ mĩ tĩg sór mũ ẽn mĩ tóg tĩ tĩ. Ti tỹ krog he ẽn hã mẽg ẽg tóg tĩ, hã ra ẽg tóg ti vég tũ nĩgtĩ. Ge ti nĩgtĩ. Topẽ kuprĩg vég tũ ẽg tóg nĩgtĩ, hã ra tóg ẽg mỹ ti jykre tãg nĩm tĩ,” he tóg.
9Kỹ Nicodemos tóg: “tag hỹn hẽ ri ke tĩ?“ he mũ. 10Kỹ tóg: “Israel ag kanhrãn ã tóg tĩ, hã ra ã tóg sỹ ã mỹ nén tó mũ tag ki kagtĩg nĩ',” he mũ. 11“Ki hã sóg tó mũ. Sỹ nén ũ ki kanhrãn mũ ẽn hã tó sóg tĩ. Isỹ nén ũ ve ja ẽn hã kãmén sóg tĩ. Hã ra ãjag tóg mẽ jãvãnh nỹtĩ'. 12Isỹ ãjag mỹ ga kri vẽjykre kãmén mũ ra ãjag tóg jẽmẽ sór tũ nĩgtĩ. Kỹ ãjag hỹn hẽ ri kenh ke mũ', sỹ ãjag mỹ kanhkã tá vẽjykre kãmén kỹ?“ he tóg. 13“Ha vé, ãjag kã mĩ ũ vỹ kanhkã ra tãpry tũ nĩ, tá vẽjykre ẽn ve jé. Ãjag jãvo isóg tá kãkutẽ ja nĩ, hã kỹ sóg tó tĩ. Ijamãn hã vẽ. Tỹ sóg ẽprã ke fi kósin nĩ,” he tóg.
14“Moisés vỹ pỹn kãgrá tỹ ka to sa ja nĩgtĩ, pỹn tỹ ũn kyprãg mũ ag tỹ ki ẽvanh tugrĩn krenkren jé, ga kórég ẽn tá. Tag ri ke han jé ag tóg ke mũ, isỹ. 15Kỹ ũ tỹ inh ki rã mũ ẽn vỹ kren ke mũ. Rĩr krỹg ja tũ ve jé tóg ke mũ. Hã jé ag tóg ka to isanh ke mũ. 16Topẽ vỹ ga kri mũ ag to há nĩ. Hã kỹ tóg ti kósin pir fẽg, vẽnh kar tỹ ti ki ge jé, ãjag tỹ tũ' he tũ nĩ jé, ãjag tỹ ẽg rĩr krỹg ja tũ ẽn ve jé. 17Topẽ vỹ ti kósin jẽnẽ, ti tỹ ãjag krenkren han jé, ẽprã ke kar. Ti pijé isỹ ãjag vóg kónãn jé inh jẽnẽ',” he tóg.
18“Ũ tỹ inh ki rã mũ to tóg jũnh ke tũ nĩ. Jãvo tóg ũ tỹ inh ki ge tũ ẽn ag hã to jũnh ke mũ, isỹ tỹ ti kósin pir nĩn kỹ“, he tóg.
19“Ti tỹ ũ tỹ inh ki ge tũ ag to jũ vỹ ge nĩ, ha mẽ. Ga kri mũ ag kanhrãn sóg tĩ, hã ki sóg ãjag mỹ jẽngrẽ ri ke nĩ. Hã ra ũ ag tóg mẽ sór tũ nĩgtĩ. Kuty mĩ ag tóg mũ sór mũ, jẽngrẽ tóg ag mỹ kórég nĩ, ag jykre pãno nỹtĩn kỹ. 20Ũ tỹ vẽjykre pãno han mũ kar vỹ kurã to kórég nỹtĩ, kỹ ag tóg kurã ki vẽnh ven sór tũ nĩ, vẽnh kar tỹ ag jykre pãno venh ha mẽ tĩn kỹ. 21Ũ tỹ Topẽ vĩ ki króm mũ ag vỹ kurã ki vẽnh ven sór tĩ. Kurã tóg ag mỹ sér tĩ, vẽnh kar tỹ ag jykre há ven jé. Topẽ vỹ ag tar han tĩ, ag tỹ nén ũ há han jé. Hã ve jé ag tóg ke mũ, vẽnh kar,” he tóg, Jesus ti.
João Batista tỹ Jesus kãmén mãn
22Ẽn kã kejẽn Jesus tóg ti mré mũ tĩ ag mré ga tỹ Judéia ra tĩ mũ. Kỹ ag tóg tá nỹtĩ. Vẽnh kar kygpég ag tóg mũ. 23Hã ra João vỹ ag kygpég mũ gé, ẽn kã, vãnh tỹ Enom tá. Salim tóg tá kakó nĩ. Tá goj vỹ éhé nĩ. Hã kỹ tóg ag tỹ tá vẽnhmãn kỹ ag kygpég mũ. 24Ẽn kã tóg ver se kỹ jẽ tũ nĩ.
25Kejẽn Judeu ũ tóg tá nĩ gé, hã ra tóg João mré mũ tĩ ag vĩ kafãn mũ, vẽnh kype kỹ nỹtĩnh ke to. 26Kỹ ti mré mũ ag tóg João mỹ: “ũ tỹ Jordão mãtá ã mré nĩ ja ẽn vỹ ag kygpég jẽ nĩ, ã tỹ ẽg mỹ ũn kãmén ja ẽn ti. Hã ra vẽnh kar vỹ ti mré mũ mũ ha, hã kỹ ag tóg ã venh kãmũ mãn tũ nĩ ha,” he mũ. Ag tỹ Jesus to vẽ. 27Hã ra João tóg ag mỹ: “há ti nĩ,” he mũ. “Topẽ tỹ ẽg mỹ nén nĩm mũ ẽn hã vég ẽg tóg tĩ,” he tóg. 28“Mĩ ẽkrén nĩ, sỹ ãjag mỹ nén tó ja ti, hã vỹ: inh pijé tỹ Cristo nĩ', he mũ. Sỹ ti jo tĩg ke hã jé tóg inh jẽnẽ, Topẽ ti, he ja sóg nĩ ãjag mỹ,” he tóg. 29“Vẽnh prũg to jykrén nĩ. Ũn prũg mũ hã vỹ ti prũnh ke fi mré nĩ nĩ. Kỹ ti régre tóg ũn prũg mũ ẽn rã hã jẽ, kỹ tóg ti vĩ mẽg mũ, hã ra tóg ti mỹ mẽ sér pẽ tĩ. Ge ti nĩ, inh mré. Inh mỹ tóg sér tĩ, vẽnh kar tỹ Jesus mré mũn kỹ, ti tỹ tỹ ũn prũg mũ ri ke nĩn kỹ. 30Ũn e tỹ ti mré mũn kỹ tóg há tĩ. Kỹ tóg tỹ ũn mág nĩnh mũ ha. Jãvo sóg tỹ nén ũ tũ nĩnh mũha,” he tóg, João ti.
Jesus tỹ kynhmỹ kãtĩg
31“Ũn tỹ kynhmỹ kãtĩ mũ ẽn vỹ vẽnh kar kafór nĩ. Ẽprã ke ag vỹ tỹ ẽprã ke nỹtĩ, kỹ ag tóg ẽprã ke jykre tỹ vẽmén tĩ. Ũ tỹ kanhkã tá kãtĩ mũ ẽn vỹ tỹ vẽnh kar kri ke jẽ. 32Kỹ tóg ti tỹ tá nén ve ja ẽn hã tó mũ, ti tỹ tá nén mẽ ja ẽn, hã ra ag tóg ti vĩ mẽ sór tũ nĩ. 33Ũ tỹ ti vĩ mẽg mũ ag hã ra Topẽ to: “ki hã tóg tó tĩ,” he mũ. 34Topẽ tỹ ũn jẽnẽg mũ ẽn vỹ ti vĩ kãmén mũ. Topẽ kuprĩg vỹ Jesus tar han mũ, ti tỹ tỹ ti jagrẽ pẽ nĩn kỹ, ti tỹ ti ve mág han kỹ. 35Topẽ vỹ ti kósin to há tãvĩ nĩ, kỹ tóg ti mỹ nén (ũ) kar tovãnh, ti hã tỹ ki rĩr jé. 36Hã kỹ ũ tỹ ti kósin ki rã mũ vỹ ter mãn ke tũ nĩ. Rĩr krỹg ja tũ ve jé tóg ke mũ. Ũ tỹ ti vĩ han sór tũ ẽn vỹ rĩr krỹg ja tũ tag venh ke tũ pẽ nĩ. Topẽ vỹ ti vóg kónãn ke mũ. Kỹ ti jagtar ke tóg tũ' henh ke tũ nĩ,” he tóg, João ti.
Currently Selected:
João 3: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido