João 21
21
Jesus tỹ ti mré mũ tĩ ũ ag mỹ vẽnh ven mãn
1Tag pãte Jesus tóg kejẽn goj nig mág tỹ Galiléia tá ti mré mũ tĩ ag mỹ vẽnh ven mãn mũ, ha mẽ. 2Simão Pedro vỹ tá nĩ, Tomé ti ke gé, ag tỹ ũ to: “ũn vẽgni,” he mũ ẽn ti, kar kỹ Natanael ti ke gé, ẽmã tỹ Caná tá ke ẽn, ga tỹ Galiléia tá ke ẽn, kar kỹ Zebedeu krẽ ag vỹ tá nỹtĩ gé, Jesus mré mũ tĩ régre ũ ag ke gé. 3Kỹ Pedro vỹ ag mỹ: “isỹ pirã kugmĩnh tĩg ke vẽ,” he mũ. Kỹ ag tóg ti mỹ: “ã mré ẽg mũnh mũ,” he mũ gé. Kỹ ag tóg barco ki ge kỹ mũ mũ, goj kri. Hã ra ag tóg nén ũ kãgmĩg tũ pẽ nĩ, kuty ẽn kã.
4Tỹ vaj kỹ kusãg pẽ ki, rã tỹ jun ke mũ ra Jesus vỹ goj fyr tá jẽ nĩ, hã ra ag tóg ti ki kagtĩg nỹtĩ ver. 5Kỹ tóg ag mỹ: “ãjag mỹ pirã ũ kãgmĩg tũ?“ he mũ. Kỹ ag tóg ti mỹ: “hỹ,” he mũ. 6Kỹ tóg ag mỹ: “rede tỹ barco pẽgja tá fón, kỹ ãjag tóg kugmĩnh ke mũ, pirã ti,” he mũ. Kỹ ag tóg ke mũ. Kỹ tóg fór mũ, rede ti, kỹ ag tóg kãtãnfyn kórég nỹtĩ, ti kufy tĩn kỹ, pirã e nỹtĩn kỹ. 7Kỹ Jesus tỹ ũ to hapẽ ẽn tóg Pedro mỹ: “ẽg Senhor hã vẽ,” he mũ. Kỹ Pedro tóg ti kur rĩnh mãn mũ. Kunũnh ja ti nĩ, ti kur ti. Ti kur rĩnh kỹ tóg barco ki kãkutẽ kỹ goj kã mĩ tĩ mũ sir, Jesus kukãm. 8Hã ra ag tóg ti nón barco kã mĩ mũ mũ gé. Rede ẽn raran ag tóg mũ mũ. Kakó ti nĩ ha, goj fyr ti, 100 (ke) metros hỹn.
9Ag tỹ barco kã tá kãpa kỹ ag tóg Jesus jãká vég mũ sir. Pirã kugjin tóg nĩ nĩ, kỹ ẽmĩ tóg tá nĩ gé. 10Kỹ tóg ag mỹ: “ãjag pirã gé kãmũjẽg,” he mũ. 11Kỹ Pedro tóg barco kã ra rã kỹ rede ẽn raran tĩ mũ, goj fyr kukãm. Hã ra tóg fór nĩ, rede ti, pirã tỹ, 150 (ke) hỹn, pirã mág tãvĩ. Hã ra rede tóg jar ja tũ nĩ, ti e tãvĩ nỹtĩ ra. 12Kỹ Jesus tóg ag mỹ: “konh kãmũjẽg,” he mũ. Hã ra tóg ag tỹ ti mỹ: “ã tỹ ũ nĩ?“ he jãvãnh tĩ. Ki kanhró ag tóg nỹtĩ, ti tỹ tỹ ẽg Senhor nĩn ki. 13Kỹ tóg ag mỹ ẽmĩ ẽn vẽnh kãpãm mũ sir, pirã ti ke gé.
14 Jesus tỹ ag mỹ vẽnh ven tãgtũ vẽ ha, ẽn kã, ti ter kar kỹ rĩr mãn kar kỹ.
Jesus tỹ Pedro mré vẽmén
15Ag jẽn kar kỹ Jesus tóg Simão Pedro mỹ: “Simão', João kósin', ã mỹ iso há tãvĩ nĩ, ã mré ke ag tỹ iso há nỹtĩ ẽn kãfór?“ he mũ. Kỹ tóg ti mỹ: “hỹ, hã vẽ. Ki kanhró ã tóg nĩ, isỹ ã to hapẽ nĩn ki,” he mũ. Kỹ Jesus tóg: “kỹ ũ tỹ inh ki ge kỹ nỹtĩ ag mỹ inh vĩ tóm nĩ,” he mũ.
16Kỹ tóg ti mỹ: “Simão', João kósin', ã mỹ iso há nĩ?“ he mãn mũ gé. Kỹ tóg ti mỹ: “hỹ, hã vẽ. Ki kanhró ã tóg nĩ, isỹ ã to há nĩn ki,” he mãn mũ. Kỹ Jesus tóg: “kỹ ũ tỹ inh ki ge kỹ nỹtĩ ag mỹ inh vĩ tóm nĩ,” he mãn mũ gé.
17Kỹ tóg ti ki jẽmẽ mãn mũ gé, jẽmẽ tãgtũ han kỹ. “Simão', João kósin', ã mỹ iso há nĩ?“ he mãn tóg. Kỹ tóg ti mỹ e tĩ, ti tỹ ti mỹ ke tãgtũ han kỹ. Kỹ tóg: “nén kar ki kanhró ã tóg nĩ. Ki kanhró ã tóg nĩ. Hã kỹ ã tóg isỹ ã to há nĩ ki kanhró nĩ,” he mãn mũ. Kỹ Jesus tóg: “kỹ ũ tỹ inh ki ge kỹ nỹtĩ ag mỹ inh vĩ tóm nĩ,” he mãn mũ. 18“Ã mỹ sóg ki hã tó mũ, ha mẽ. Ã kyrũ kã ã tóg ã kur rĩnh kỹ ã tỹ hẽn ra tĩg sór mũ ẽn ra tĩ' he ja nĩgtĩ. Kejẽn ã kófa nĩnh ke mũ. Ẽn kã ã tóg ag mỹ ã nĩgé tỹ vẽnh kri tỹ tam kenh mũ, kỹ ag tóg ã senh mũ, ha vem nĩ, kỹ ag tóg ã pére mũnh mũ, ã tỹ hẽ ra tĩg sór tũ ẽn ra,” he tóg, Pedro mỹ. 19Ti tỹ ti mỹ ag tỹ ti tén ke tó vẽ. Hã ra ag tóg Topẽ tỹ tỹ ũn mág nĩ venh ke mũ, ag tỹ Pedro tén ke tugrĩn.
Tag pãte tóg ti mỹ: “mũ jé ha, inh mré,” he mũ gé sir, Jesus ti.
Jesus tỹ João to Pedro mỹ vĩ
20Ag mũn kỹ Pedro tóg vẽsỹjãm ẽvãnh kỹ ũ tỹ Jesus nón kãtĩ mũ ẽn vég mũ gé, Jesus tỹ ũ to ha tãvĩ ẽn. Ag jẽn rén ja ẽn tá tóg Jesus rã hã nĩ ja nĩ. Ẽn kã tóg Jesus mỹ: “ũ nỹ hỹn ã ven ke mũ, pã'i ag mỹ?“ he ja nĩ. Ẽn hã vỹ Jesus nón tĩ mũ, Pedro tỹ ti mré tĩ ra. 21Pedro tỹ ti tỹ ag nón kãtĩ ẽn ve kỹ tóg Jesus mỹ: “jãvo ũ tỹ ẽg nón kãtĩ tag ti?“ he mũ. 22Kỹ tóg: “sỹ ti mỹ nén tó mũ vỹ vyr mỹ nĩ, kỹ sỹ ã mỹ nén tó mũ vỹ vyr mỹ nĩ gé,” he mũ. “Sỹ ti mỹ: ter ke tũ ã tóg nĩ, isỹ vỹn ke ve jé ã tóg ke mũ, he sór ra sóg ti mỹ kenh ke mũ vẽ. Ã hã mỹ sóg ã tũ tó mũ, hã kỹ sóg ã mỹ: mũ jé ha, inh mré, he mũ,” he tóg.
23 Jesus vĩ tag tugrĩn vẽnh kar tóg ti to: “ter ke tũ ti nĩ,” he tĩ, Jesus ki ge kỹ nỹtĩ kar ag. Hã ra Jesus pijé ti to: “ter ke tũ ti nĩ,” he ja nĩgtĩ'. Ti to tóg: “sỹ ti mỹ: ter ke tũ ã tóg nĩ, isỹ vỹn ke ve jé ã tóg ke mũ, he sór kỹ sóg ti mỹ tag tónh ke mũ vẽ,” he ja nĩ, Pedro mỹ, ũ ẽn to. Hã kỹ ti to: “ter ke tũ ti nĩ,” he tũg nĩ.
João tỹ vẽnh kãmén
24 João vỹ tỹ inh nĩ. Inh hã vỹ tag ve kãn ja nĩ, hã kỹ sóg rán. Ki hã tó sóg tĩ. Vẽnh kar vỹ tag ki kanhró nỹtĩ. 25Hã ra sóg Jesus tỹ nén hynhan mũ ẽn rán kãn ja tũ nĩ. Ti tỹ nén hynhan mũ ẽn vỹ e nỹtĩ, e tãvĩ. Ẽg tỹ tag rán kãn sór ra ẽg tóg vẽnh rá tỹ hẽn ri ke hynhan ke mũ vẽ. Sĩ ti nĩ, ẽg ga ti, kỹ ẽg tỹ hẽ tá vẽnh rá tag vin han ke tóg tũ tĩnh mũ vẽ.
Hã vẽ.
Currently Selected:
João 21: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido