Lucas 24
24
Jesus rĩr mãn
(Mt 28.1-10; Mc 16.1-8; Jo 20.1-10)
1Kỹ semana kurã ve tóg tá krỹg mũ sir. Kỹ fag tóg kusãg pẽ ki ti kej venh mũ mũ. Vẽser ger há han jafã ẽn ma fag tóg mũ mũ. 2Hã ra fag tóg pó tỹ ti kej nĩfe kunũnh kỹ nĩ vég mũ. 3Kỹ fag tóg ti kej tá junjun kỹ kã ra ge mũ. Hã ra fag tóg vẽser vég tũ nĩ, ẽg Senhor ti. 4Kỹ tóg fag fe kaj tĩ sir. Kỹ vãhã ũn régre ag vỹ kãge mũ gé, kur kupri rĩnh kỹ, kur kókov. Topẽ tỹ jẽnẽ jafã ag vẽ. 5Kỹ fag tóg kanẽ junjur mũ sir. Ẽprã fag tóg ẽvãnh mũ. Hã ra ag tóg fag mỹ: “ãjag ne tóg vẽser jãvãnh mũ', ti rĩr ja ra',” he mũ. 6“Ki ti tũ nĩ, rĩr ti jẽ ha. Hã kỹ tóg ãjag mỹ tó ja nĩgtĩ, ãjag tỹ Galiléia tá nỹtĩ ẽn kã. 7Kỹ tóg ãjag mỹ: “ẽprã ke fi kósin ẽn fẽg jé ag tóg ke mũ, ũ tỹ Topẽ vĩ mranh tĩ ag mỹ,” he ja nĩ. “Ka to ag tóg ti sanh ke mũ, hã ra tóg kurã tãgtũ ki rĩr mãn ke mũ,” he ja tóg nĩgtĩ, vẽso,” he ag tóg mũ.
8Kỹ fag tóg Jesus tỹ nén tó ja ẽn mĩ ẽkrén mãn mũ sir. 9Kỹ fag tóg ti kej tá kãpa kỹ mũ mũ sir, ũ tỹ 11 (ke) ag mỹ tó jé, ti mré mũ tĩ kar ag mỹ ke gé. 10Maria Madalena fi vẽ, kar kỹ Joana fi ke gé, Maria ũ fi ke gé, Tiago mỹnh tag fi, ũ fag ke gé. Fag hã ne Jesus tỹ ũn vin mũ ag mỹ kãmén mũ, apóstolo ag mỹ. 11Hã ra tóg ag mỹ tỹ vẽnh ó nỹ ve nĩ, hã kỹ ag tóg kri fi ja tũ nĩgtĩ.
12Kỹ Pedro vỹ jẽgnẽ kỹ ti kej ra vẽnh vãg tĩ mũ. Tá jun kỹ tóg kã tá pãnh ke kỹ ti kur hã vég mũ sir, ti pãg ja ti. Kỹ tóg ti mỹ e tĩ. Ti tỹ to jykrén tũ tóg tĩ sir. Kỹ tóg tĩg mãn mũ.
Ag tỹ Emaús ra mũ
(Mc 16.12-13)
13Kurã ẽn kã ti mré mũ tĩ régre ag tóg ẽmã sĩ ra mũ mũ. Jerusalém tán kakó nĩ, 12 (ke) quilômetros hỹn. Ẽmã ẽn jijin hã vỹ: Emaús, he mũ. 14Ag mũn kỹ ag tóg jagnẽ mré vẽmén mũ nĩ sir, ag tỹ nén ve ja ẽn to.
15Vãhã Jesus tóg ag mré tĩ mũ. 16Hã ra ag tóg ti ki kagtĩg nỹtĩ, ag tỹ ti vég mũ hã ra. 17Kỹ tóg ag mỹ: “ãjag tỹ ne tó nẽ?“ he mũ. “Vẽmén mág ãjag tóg mũ nĩ,” he tóg.
Kỹ ag tóg krỹg he mũ sir. Ve ũ han ag tóg mũ, ag fe kaj tugrĩn. 18Kỹ Cleopas he mũ ẽn tóg ti mỹ: “kỹ ã mỹ mẽg tũ? Ũ tỹ fénhta venh kãmũ ja ag vỹ mẽ kãn. Ã hã mỹ ã pir mỹ mẽg tũ?“ he mũ. 19“Ne nẽ?“ he tóg. Kỹ ag tóg: “Jesus ti, Nazaré tá ke ẽn,” he mũ. “Topẽ vĩ tó tĩ vẽ. Ẽg tỹ nén han vãnh hynhan ja tóg nĩgtĩ. Topẽ vĩ tó há han ja tóg nĩgtĩ, kỹ Topẽ vỹ ti mré han tĩ, milagre kar ti. Kỹ povo kar ag vỹ vég tĩ, kỹ tóg ẽg kar mỹ e tĩ. 20Kỹ Topẽ tũ ki rĩr tĩ ag vỹ ti fẽg, ẽg pã'i kar ag, fóg tỹ pã'i tỹ ti tén jé, krunh to ti sa jé, hã kỹ tóg tũg mũ. 21Ẽg tỹ ti ve kỹ ẽg tóg ti to: “ti hỹn ẽg povo tỹ Israel ag krenkren han ke mũ,” he ja nĩ vẽ. Hã ra tóg ter ja nĩ. Ũri tóg kurã tãgtũ han, ti ter kri,” he ag tóg. 22“Kỹ ẽg kã ũ fag vỹ ẽg mỹ nén ũ tó gé, kỹ tóg ẽg mỹ e tĩ gé. Kusã pẽ ki fag tóg ti kej ra mũjẽg. 23Hã ra fag tóg ti vég tũ nĩ, ti tỹ tá nỹ tũ nĩn kỹ. Kỹ fag tóg: “nén nẽ ve ẽg,” he mũ gé. Topẽ tỹ jẽnẽ jafã nẽji, kỹ tóg nẽji fag mỹ: “rĩr ti jẽ nĩ,” hé. 24Kỹ ẽg kã ũ ag vỹ ra mũ mũ, ti kej ra. Kỹ ag tóg vég mũ gé. Hã ra ag tóg ti vég tũ pẽ nĩ,” he ag tóg.
25Kỹ tóg ag mỹ: “ãjag tỹ ne jé vãsỹ Topẽ vĩ tó tĩ ag vĩ kri fi ja tũ nĩ nẽ?“ he mũ. “Krĩ tũ ãjag nỹtĩ, to jykrén há han tũ ãjag tóg nĩ,” he tóg. 26“Cristo vẽsỹrénh ke vẽ, vẽsỹrénh kar kỹ tóg tỹ ũn mág nĩnh ke mũ vãhã,” he tóg. 27Kỹ tóg ti to nén rán ja kãmén kãn mũ sir, Moisés tỹ rá ti, Topẽ vĩ tó tĩ ag kar tỹ rá ti.
28Ti tỹ ag mỹ kãmén tĩ ki ag tóg ẽmã ẽn tá junjun mũ sir. Kỹ tóg mã ra tĩg sór mũ. 29Kỹ ag tóg ti mỹ: “ẽg mré nĩm nĩ. Rãké tóg nỹ ha. Kutyg tóg rã ha,” he mũ. Kỹ tóg ag mré rã mũ. 30Ag mré jẽn ke jo tóg ẽmĩ mãg mũ. Kỹ tóg Topẽ mré vĩ mũ, kar tóg kupãn kỹ tỹ vẽnh ken mũ. 31Kỹ ag tóg vãhã ti ki kanhrãn mũ. Ti ve há han ag tóg mũ sir. Hã ra tóg ki tũ nĩ ha, ti ve mãn tũ ag tóg nĩ.
32Kỹ ag tóg jagnẽ mỹ: “ti tỹ ẽg mré vẽmén kỹ tóg ẽg fe ki rã,” he mũ. “Ẽg mỹ tóg ti to rán kỹ nĩ ẽn kãmén kãn, ẽg mũn kỹ. Ti hã ja vẽ,” he ag tóg mũ.
33Kỹ ag tóg vẽsỹmér Jerusalém ra vỹnvỹn ke mũ sir. Tá ag tóg ũ tỹ 11 (ke) ag vég mũ, ag mré ke ũ ag mré hã. 34Hã ra ẽn ag tóg ag mỹ: “ẽg Senhor vỹ rĩr mãn,” he vén mũ. “Simão Pedro mỹ tóg vẽnh ven, mỹr, ha mẽ,” he ag tóg mũ sir. 35Kỹ ag tóg ag mỹ: “hỹ, ti ve ẽg ke gé,” he mũ gé. Kỹ ag tóg ag mỹ ag tỹ nén ve ja ẽn tó mũ sir, ag tỹ ag mũ ki ti ve ja ti, ti tỹ ag mỹ ẽmĩ kupãn ja ti ke gé. “Hã ki ẽg tóg ti ki kanhrãn mũ,” he ag tóg mũ.
Jesus tỹ ag kar mỹ vẽnh ven
(Mt 28.16-20; Mc 16.14-18; Jo 20.19-23; Hk 1.6-8)
36Ag tỹ ver tỹ vẽmén nỹtĩ ra Jesus tóg vãhã ag mré jẽ nĩ, ti tỹ hẽ tá kãrãnh ke tũ hã ra. Kỹ tóg ag mỹ: “mỹ sér nỹtĩm nĩ,” he mũ. 37Hã ra ag tóg jũrũn ke mũ. Ti kamẽg ag tóg mũ. “Vẽnh kuprĩg hỹn,” he ag tóg mũ, ti to. 38Kỹ tóg ag mỹ: “ãjag ne tóg jũrũn ke mũ',” he mũ. “Ãjag tỹ ne jé: vẽnh kuprĩg hỹn, he nẽ, iso?“ he tóg. 39“Inh nĩgé ve ra, inh pẽn ve ra, inh hã vẽ. Inh mẽgmẽ ra, isugnỹm han ra. Vẽnh kuprĩg pijé fár nĩgtĩ', ti pijé kuka nĩ'. Inh fár ve ra, inh kuka ti,” he tóg. 40Vĩ kỹ tóg ag mỹ ti nĩgé ven mũ, ti pẽn ke gé. 41Hã ra tóg ver ag mỹ e tĩ, ag fe tỹ mrin ke pẽ han kỹ. Hã kỹ tóg ag mỹ: “mỹ ki vẽjẽn tũ?“ he mũ. 42Kỹ ag tóg ti mỹ pirã grã nĩm mũ. 43Kỹ tóg mãn kỹ ko mũ, ag rĩnve.
44Kỹ tóg ag mỹ: “hã tó ja inh nĩ, ãjag mỹ, iser ke to hã, isỹ ãjag mré nĩ mũ ẽn kã,” he mũ. “Vãhã sóg ve kãn ja nĩgtĩ, Moisés tỹ iso nén rán ja ti, Topẽ vĩ tó tĩ ag kar tỹ nén rán ja ti ke gé, Topẽ to jãn ki ke gé,” he tóg. 45Kỹ tóg ag mỹ kãmén há han mũ. Hã kỹ ag tóg ti to nén rán ja ki kanhrãn kãn mũ. To jykrén há han ag tóg mũ sir.
46Kỹ tóg ag mỹ: “hã kỹ Cristo vỹ vẽsỹrénh kỹ rĩr mãn gé, ti ter kar kỹ, kurã tãgtũ tũg kỹ. Tag ve kãn sóg huri,” he mũ. 47“Kỹ ũ ag tỹ vẽnh kar mỹ inh kãmén ke vẽ. Ijiji tó jé ag tóg ke mũ. Vẽnh kar mỹ ag tóg: “ãjag jykre pãno tovãnh ra. Kỹ Topẽ vỹ ãjag mỹ vẽnh pãte fón ke mũ, ãjag tỹ ti vĩ mranh ja ti,” henh ke mũ. Povo kar mỹ ag tóg tónh ke mũ, hã ra ag tóg tag ki tó vén ke mũ, Jerusalém ki.
48Ãjag to ken hã vẽ. Ve kãn ãjag tóg mỹr, hã kỹ ãjag tóg tónh ke mũ. 49Ãjag mỹ sóg inh panh tỹ ãjag mỹ ti kuprĩg tó ja ẽn jẽnẽnh ke mũ. Hã kỹ tag ki nỹtĩm nĩ ver, ẽmã tỹ Jerusalém tag ki. Hẽ ra mũ tũg nĩ. Ti kuprĩg tỹ kanhkã tá kãtĩg kỹ ãjag tar han ke ẽn jãvãnh nĩ,” he tóg.
Jesus tỹ kanhkã ra tĩg
(Mc 16.19-20; Hk 1.9-11)
50Kỹ tóg ag jãmĩ tĩ mũ, ẽmã tỹ Betânia ra. Tá tóg ti nĩgé tỹ ag kri ven mũ. Kỹ tóg ag mỹ vĩ há han mũ sir. 51Ag mỹ vĩ há han kar tóg ag ré kỹ tĩ mũ. Kanhkã ra tóg tãpry mũ. 52Kỹ ag tóg ti to: “Topẽ vỹ tỹ ti nĩ,” he mũ sir. Kỹ ag tóg Jerusalém mĩ kãmũ mãn mũ, vẽsỹkã. Ag mỹ tóg sér pẽ tĩ vãhã, fag mré hã. 53Kurã kar ki ag tóg Topẽ ĩn ra mũ tĩ, tá Topẽ mỹ vĩ há han jé, ti mỹ nén ũ há kar tó jé, ti tỹ ag mỹ sér tĩn kỹ, fag mré hã.
Hã vẽ.
Currently Selected:
Lucas 24: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido