João 18
18
Ag tỹ Jesus se
(Mt 26.47-56; Mc 14.43-50; Lc 22.47-53)
1 Jesus tỹ ti panh mré vĩ kar kỹ tóg ti mré mũ tĩ ag mré tĩ mũ sir. Goj tỹ Cedrom kafã ũ ra ag tóg pa mũ sir. Tá ka tóg krãnkrãn kỹ nỹtĩ. Ka kré ẽn krẽm ag tóg nĩgnĩ mũ sir. 2Hã ra Judas tóg ti tĩg ẽn ki kanhró nĩ gé. Tá tóg ti mré mũ tĩ ag mré vẽmén tỹ hẽn ri ke han ja nĩ, Jesus ti, hã kỹ Judas tóg ag tỹ ra mũnh ke ki kanhró nĩ, ũ tỹ pã'i ag mỹ ti ven ke mũ ẽn ti. 3Kỹ tóg ag nón tá jun mũ sir, soldado ag mré, porisa ag mré hã ke gé, pã'i ag tỹ ag jẽgnẽn kỹ. Fariseu ag vỹ pã'i ag mré porisa ag jẽgnẽ ja nĩ gé. Néj e gé ag tóg kãmũ mũ, pĩ jónhkó ke gé, ka kykyv mré hã. 4Hã ra Jesus tóg ki kanhró nĩ, ti jagtar ken ki, kỹ tóg ag kato tĩg kỹ ag mỹ: “ãjag tỹ ũ tỹ hẽ ve sór nẽ?“ he mũ. 5Kỹ ag tóg ti mỹ: “Jesus ti, Nazaré tá ke ẽn,” he mũ. Kỹ tóg ag mỹ: “inh hã vẽ,” he mũ. Hã ra Judas tóg ag mré kãtĩg ja nĩ gé. 6Jesus tỹ ag mỹ: “inh hã vẽ,” hen kỹ ag tóg ti jo ranh ke mũ. Rom ke ag tóg mũ sir, ẽprã. 7Kỹ tóg ag mỹ vĩ mãn mũ. “Ãjag tỹ ũ ve sór nẽ?“ he tóg. Kỹ ag tóg ti mỹ: “Jesus ti, Nazaré tá ke ẽn,” he mãn mũ. 8Kỹ tóg ag mỹ: “ãjag mỹ sóg: inh hã vẽ, hé huri. Kỹ ãjag tỹ ise sór kỹ inh mré ke tag ag tugvãnh nĩ,” he mũ. 9Hã ra tóg tag tó, ti tỹ to hã ti panh mỹ: “ã tỹ inh mỹ ũn vin ja ẽn ag vỹ ki nỹtĩ, ag kã ki ũ vỹ vãfor ja tũ nĩ,” he ja nĩn kỹ. Ti tỹ ag jy nĩgãn jé tóg porisa ag mỹ: “ag tugvãnh ra,” he mũ, ti mré mũ tĩ ag to.
10Hã ra Simão Pedro tóg ti rógro ẽn vyn kỹ porisa ag kã ũ nĩgrẽg kym mũ. Ti pẽgja tá ti nĩgrẽg jẽ ẽn tỹ tóg kym ke mũ. Topẽ tũ to pã'i mág camarada vẽ, ti tỹ ũ nĩgrẽg kym mũ ẽn ti, ti jijin hã vỹ: Malco, he mũ. 11Kỹ Jesus tóg Pedro mỹ: “ã rógro fẽg han ra,” he mũ. “Inh panh tỹ inh mỹ: “vẽsỹrénh jé ã tóg ke mũ,” he ja vẽ, hã kỹ sóg ag mỹ vẽnh fẽg ke mũ ha. Vẽnh nenh ke tũ sóg nĩ,” he tóg.
Pã'i tỹ Anás tỹ Jesus ve
12Kỹ soldado ag mré, porisa ag tóg, ag pã'i mré, Jesus mrĩnh mũ sir, vãfe tỹ. 13Kỹ ag tóg ti pére mũ mũ, Anás ĩn ra. Caifás kakrã vẽ, Anás ti, hã ra Caifás vỹ tỹ Topẽ tũ to pã'i ag pã'i mág nĩ, prỹg ẽn kã. 14Hã ra Caifás ẽn vỹ pã'i ag mỹ: “ũn pir tỹ ẽg povo jagfy ter kỹ tóg pãgsĩ nĩ,” he ja nĩ. Ẽn kakrã ĩn ra ag tóg Jesus pére mũ mũ.
Simão tỹ Jesus to ón vén
(Mt 26.57-58, 69-70; Mc 14.53-54, 66-68; Lc 22.54-57)
15Kỹ Simão Pedro tóg Jesus nón tĩ mũ, Jesus mré ke ũ mré ke gé. Hã ra Jesus mré ke ũ ẽn tóg Topẽ tũ to pã'i ag pã'i mág ẽn ki kanhró nĩ, hã kỹ tóg Jesus nón Anás ĩn kã ra rã mũ, ĩn vãso ra. 16Hã ra Pedro tóg re tá jẽ nĩ, ĩn jãnkã rã hã. Kỹ Jesus mré ke ũ ẽn tóg ver ũ tỹ jãnkã ki rĩr mũ ẽn fi mré vẽmén mũ, kỹ fi tóg Pedro mỹ: “ha kãrã,” he mũ, ti mré ke ũ ẽn tỹ pã'i mág ki kanhró nĩ tugrĩn. 17Kỹ fi tóg ti mỹ: “ã hỹn tỹ Jesus mré ke nĩ,” he mũ, ũ tỹ jãnkã ki rĩr jẽ ẽn fi. Hã ra tóg ón kỹ fi mỹ: “vó,” he mũ.
18Hã ra Anás camarada ũ ag vỹ tá nỹtĩ gé, porisa ag mré. Ðn vãso ki ag tóg pĩ han kỹ nỹtĩ, ti kusa jagy tĩn kỹ. Pĩ to ag tóg tugtón nỹtĩ. Kỹ Pedro tóg ag mré tón nĩ gé, pĩ ẽn ti to.
Anás tỹ Jesus ki jẽmẽ sór
(Mt 26.59-66; Mc 14.55-64; Lc 22.66-71)
19Kỹ pã'i mág tóg Jesus mỹ: “inh mỹ ã mré mũ tĩ ag kãmén. Ã tỹ nén kãmén tĩ ẽn ti kãmén nĩ gé, inh mỹ,” he mũ. 20Kỹ tóg: “vẽnh kar mỹ sóg jamã há ra tó tĩ,” he mũ. “Vẽnh kanhrãn jafã krẽm sóg tó tĩ, Topẽ ĩn krẽm ke gé. Judeu kar tỹ vẽnhmãn kỹ nỹtĩn kỹ sóg ag mỹ kãmén tĩ. Inh pijé vẽnh péju kỹ tó tĩ'. 21Hã ra ã tóg inh ki jẽmẽ sór mũ'. Inh vĩ mẽg mũ ẽn ag ki jẽmẽm nĩ. Ki kanhró ag tóg nỹtĩ, isỹ ag mỹ nén tó ja ẽn ki,” he tóg.
22Ti tỹ tag tó kỹ porisa ũ tóg Jesus tãnh mũ, kỹ tóg ti mỹ: “pã'i mág vẽ mỹr, hã ra ã tóg ti mỹ vĩ mũ,” he mũ. 23Kỹ Jesus tóg: “kỹ inh hỹn vẽnh vĩ kórég tỹ ne tó?“ he mũ. “Ha inh mỹ tó. Vĩ há han inh, ã tỹ hã ra ne tugnĩn isãnh nẽ?“ he tóg.
24Tag pãte Anás tóg Jesus jẽnẽg mũ sir, Caifás mỹ, Topẽ tũ to pã'i ag pã'i mág ẽn mỹ. Ti mrĩnh kỹ jẽ kỹ tóg ti jẽnẽg mũ.
Pedro tỹ Jesus to ón mãn
(Mt 26.71-75; Mc 14.69-72; Lc 22.58-62)
25Hã ra Pedro tóg ver tón nĩ nĩ, pĩ to. Kỹ tá nỹtĩ ag tóg ti mỹ: “ã hỹn tỹ ti mré ke nĩ gé,” he mũ. Hã ra tóg ón kỹ: “vó,” he mãn mũ. 26Kỹ pã'i mág mỹ rãnhrãj tĩ ũ vỹ tá nĩ gé. Pedro tỹ ũ nĩgrẽg kym ja ẽn kanhkã ũ vẽ. Ẽn vỹ ti mỹ: “ã ve inh, ka kré krẽm. Tá ã tóg ti mré jẽ ja nĩ,” he mũ. 27Hã ra tóg ón kỹ ti mỹ: “vó,” he mãn mũ. Ẽn kã galo vỹ vãhã kynkyr mũ.
Pilatos tỹ Jesus ki jẽmẽ
(Mt 27.1-2, 11-14; Mc 15.1-5; Lc 23.1-5)
28Kusã pẽ ki ag tóg, Caifás ĩn tá Jesus pére kã mũ kỹ, pã'i tỹ governador ĩn ra ti pére mũ mũ, ti vẽmén jafã ra, palácio ẽn ra. Hã ra ag tóg kã ra ge sór tũ nĩ. Ag tỹ fénhta tỹ Páscoa han ke vỹ kakó tĩ ha, hã ra ũ tỹ pã'i tỹ governador ĩn kã ra ge mũ vỹ fénhta tỹ Páscoa ẽn ko tũ nĩgtĩ. Ag jykre vẽ. Hã ra ag tóg ko sór mũ, hã kỹ ag tóg kã ra ge sór tũ nĩ sir. 29Kỹ Pilatos tóg re mĩ kãkutẽ mũ, ag mré vẽmén jé. Kỹ tóg ag mỹ: “ti hẽ ri ké? Ti vẽjykre kórég tỹ ne han'?“ he mũ. 30Kỹ ag tóg: “vẽjykre kórég han ti tĩ. Ti há nĩ ra ẽg tóg ã mỹ ti ven ke tũ nĩ vẽ,” he mũ. 31Kỹ tóg pã'i ag mỹ: “ãjag jykre hã han nĩ,” he mũ. Hã ra ag tóg ti mỹ: “ti ter ke vẽ, kỹ ã hã vỹ ẽg mỹ: “ha ti tén,” henh ke mũ,” he mũ. 32Hã ra Jesus tóg ag tỹ fóg tỹ pã'i mỹ ti fẽg ke tag tó ja nĩ, fóg ag tỹ krunh to ti sa kỹ ti tén ke ti. Hã kỹ ag tóg Pilatos mỹ ti ven mũ.
33Kỹ Pilatos tóg ti ĩn kã ra rã mãn mũ, Jesus mré vẽmén jé. Kỹ tóg ti mỹ: “ã mỹ tỹ Judeu ag pã'i mág nĩ?“ he mũ. 34Kỹ tóg ti mỹ: “ũ nỹ ã mỹ tag tó? Ã tỹ vẽsóg ki to jykrén mỹ vó, pã'i ag tỹ ã mỹ tó mỹ vó?“ he mũ. 35Kỹ Pilatos tóg: “inh pijé tỹ Judeu nĩ',” he mũ. “Ã kanhkã ag vỹ inh mỹ ã fẽg, ã povo to pã'i ag. Ã hẽ ri ké?“ he tóg.
36Kỹ Jesus tóg: “inh pijé tỹ ga tag kri pã'i mág nĩ',” he mũ. “Isỹ tỹ tag ki ũn mág nĩ ra inh krẽm ke ag tóg Judeu ag mré jagnẽ génh ke mũ vẽ, kỹ ag tóg isenh ke tũ nĩ vẽ. Isỹ tỹ ũn mág nĩ vỹ tỹ vyr mỹ ke nĩ,” he tóg.
37Kỹ Pilatos tóg: “kỹ ã mỹ hã ra tỹ pã'i mág nĩ'?“ he mũ. Kỹ tóg: “ki hã ã tóg tó mũ,” he mũ. “Isỹ ki hã tó hã jé sóg ga kri mur kỹ, ga kri tĩ nĩ. Kỹ ũ tỹ ki hã tó to há nỹtĩ ẽn ag kar vỹ inh vĩ jẽmẽg mũ,” he tóg. 38Kỹ Pilatos tóg: “ne nỹ tỹ ki hã tó nĩ'? Sỹ ki kagtĩg tóg tĩ,” he mũ.
Jesus ter ke
(Mt 27.15-31; Mc 15.6-20; Lc 23.13-25)
Kỹ tóg re ra tĩg mãn mũ, pã'i ag mré vẽmén jé, kỹ tóg ag mỹ: “ti pijé vẽjykre kórég han tĩ',” he mũ. 39“Páscoa kar ki sóg ãjag mỹ vẽse ũ kavãg tĩ. Kỹ inh hỹn ãjag mỹ ãjag tỹ ũ to: “Judeu ag pã'i,” he mũ tag kavãn ke mũ,” he tóg. 40Hã ra ag kar tóg prẽnprẽr mũ sir. “!..Jesus pijé'..! Barrabás kava ra..!“ he ag tóg mũ sir, prẽnprẽr kỹ. Hã ra Barrabás ẽn vỹ tỹ ũn jykre kórég pẽ nĩ.
Currently Selected:
João 18: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido