YouVersion Logo
Search Icon

San Juan 5

5
Li Jesús quixqꞌuirtesi jun li cui̱nk incꞌaꞌ nabe̱c, li cuan chire li haꞌ Betesda xcꞌabaꞌ
1Chirix chic aꞌin, li Jesús co̱ Jerusalén saꞌ li ninkꞌe li nequeꞌxba̱nu eb laj judío. 2Saꞌ li tenamit Jerusalén bar cuan cuiꞌ li oqueba̱l li nequeꞌrocsi cuiꞌ li carner, cuan jun li haꞌ Betesda xcꞌabaꞌ saꞌ ra̱tinoba̱leb laj hebreo. Aran cuan o̱b li muheba̱l. 3Saꞌ eb li muheba̱l aꞌan cuanqueb nabaleb li yaj. Cuanqueb mutzꞌ, cuanqueb ye̱k rokeb, ut cuanqueb li sic rokeb ut sic rukꞌeb. Yo̱queb chiroybeninquil nak ta̱ecꞌa̱nk li haꞌ. 4Jun x-ángel li Ka̱cuaꞌ nacube chak saꞌ choxa yalak jokꞌe ut narecꞌasi li haꞌ. Li ani xbe̱n cua na-oc chi saꞌ nak ac x-ecꞌasi̱c li haꞌ, li jun aꞌan naqꞌuira aꞌ yal cꞌaꞌru xyajel. 5Cuan jun li cui̱nk aran cuakxaklaju xcaꞌcꞌa̱l (38) chihab roquic lix yajel. 6Nak li Jesús quiril li cui̱nk jiljo aran chire li haꞌ quixnau nak ac najter roquic lix yajel. Quixye re: —¿Ma ta̱cuaj qꞌuira̱c? chan re. 7Quixye li cui̱nk: —Ka̱cuaꞌ, nacuaj raj abanan ma̱ ani na-ocsin cue saꞌ li haꞌ nak na-ecꞌasi̱c. Nak yo̱quin chixyalbal oc, jalan chic na-oc xbe̱n cua chicuu, chan. 8Quixye li Jesús re: —Cuaclin, xoc la̱ cuarib ut be̱n, chan re. 9Saꞌ ajcuiꞌ li ho̱nal aꞌan li cui̱nk quiqꞌuira. Quixakli, quixxoc lix cuarib ut quibe̱c. Aꞌin quicꞌulman saꞌ li hiloba̱l cutan. 10Queꞌoc chi cuechꞌi̱nc li nequeꞌtaklan saꞌ xya̱nkeb laj judío. Queꞌxye re li cui̱nk li quiqꞌuira: —Hiloba̱l cutan anakcuan. Yo̱cat chixkꞌetbal li kachakꞌrab xban nak yo̱cat chixcꞌambal la̱ cuarib chiru li hiloba̱l cutan, chanqueb. 11Quichakꞌoc li cui̱nk ut quixye reheb: —Li cui̱nk li xqꞌuirtesin cue, xye cue, “cꞌam la̱ cuarib ut be̱n”, chan. 12Queꞌxpatzꞌ re: —¿Ani li cui̱nk li xyehoc a̱cue nak ta̱xoc la̱ cuarib ut tatbe̱k? chanqueb. 13Li cui̱nk li quiqꞌuirtesi̱c incꞌaꞌ naxnau ani ta aꞌan, xban nak kꞌaxal nabaleb li cuanqueb aran ut li Jesús ac x-el saꞌ xya̱nkeb. 14Mokon chic li Jesús quixtau cuiꞌchic li cui̱nk saꞌ li templo ut quixye re: —Chaqꞌuehak retal nak xatqꞌuira. Canab xba̱nunquil li incꞌaꞌ us ma̱re anchal ta̱cha̱lk junak chic nimla raylal saꞌ a̱be̱n, chan li Jesús re. 15Qui-el li cui̱nk riqꞌuin li Jesús ut quixye resil reheb li nequeꞌtaklan saꞌ xya̱nkeb laj judío nak li Jesús, aꞌan li quiqꞌuirtesin re.
Lix cuanquil li Cꞌajolbej qꞌuebil re xban li Yucuaꞌbej
16Eb li nequeꞌtaklan saꞌ xya̱nkeb laj judío xicꞌ queꞌril li Jesús xban nak naqꞌuirtesin saꞌ li hiloba̱l cutan. Ut queꞌraj xcamsinquil. 17Li Jesús quixye reheb: —Lin Yucuaꞌ toj yo̱ chixtenkꞌanquileb li cristian ut tento ajcuiꞌ nak tintenkꞌaheb la̱in, chan. 18Kꞌaxal cuiꞌchic queꞌjoskꞌoꞌ laj judío riqꞌuin aꞌin. Joꞌcan nak queꞌraj xcamsinquil xban nak moco caꞌaj ta cuiꞌ naxkꞌet lix chakꞌrabeb nak naqꞌuirtesin chiru li hiloba̱l cutan; riqꞌuin aj ban cuiꞌ nak naxjuntakꞌe̱ta rib riqꞌuin li Dios nak naxye nak li Dios, aꞌan lix Yucuaꞌ. 19Joꞌcan nak li Jesús quixye reheb: —Relic chi ya̱l tinye e̱re, La̱in li Cꞌajolbej. Ma̱cꞌaꞌ naru tinba̱nu injunes. Li cꞌaꞌru naxcꞌut chicuu lin Yucuaꞌ, aꞌan li ninba̱nu. Chixjunil li naxba̱nu lin Yucuaꞌ, aꞌan li ninba̱nu la̱in. 20La̱in li Cꞌajolbej. Raro̱quin xban lin Yucuaꞌ. Aꞌan naxcꞌut chicuu chixjunil li cꞌaꞌak re ru naxba̱nu. Ut toj cuan cuiꞌchic cꞌaꞌak re ru xni̱nkal ru naꞌleb chiru aꞌin tixcꞌut chicuu xba̱nunquil. Ut la̱ex ta̱sachk e̱chꞌo̱l chirilbal. 21Li Yucuaꞌbej naxcuaclesiheb cuiꞌchic chi yoꞌyo li camenak. Ut joꞌcan ajcuiꞌ la̱in li Cꞌajolbej. La̱in ninqꞌue li junelic yuꞌam reheb li ani nacuaj. 22Li Yucuaꞌbej ma̱ ani naxrak a̱tin saꞌ xbe̱n. Quixkꞌaxtesiheb ban saꞌ cuukꞌ re nak la̱in chic tinrakok a̱tin saꞌ xbe̱neb. 23Quixba̱nu chi joꞌcan re nak chixjunileb teꞌxqꞌue inlokꞌal joꞌ nak nequeꞌxqꞌue xlokꞌal li Yucuaꞌbej. Li ani incꞌaꞌ naxqꞌue inlokꞌal la̱in li Cꞌajolbej, incꞌaꞌ ajcuiꞌ naxqꞌue xlokꞌal li Yucuaꞌbej li quitaklan chak cue. 24Relic chi ya̱l ninye e̱re nak li ani na-abin re li cꞌaꞌru ninye ut naxpa̱b li Dios li quitaklan chak cue, li jun aꞌan cuan xyuꞌam chi junelic. Incꞌaꞌ ta̱xic saꞌ tojba ma̱c xban nak incꞌaꞌ chic tenebanbil li ca̱mc saꞌ xbe̱n. Cua̱nk ban chic xyuꞌam chi junelic. 25Chi ya̱l ninye e̱re ta̱cuulak xkꞌehil ut anakcuan ajcuiꞌ xcuulac xcutanquil, nak eb li chanchan camenakeb xban li ma̱c teꞌrabi li cua̱tin la̱in li Cꞌajolbej. Ut li teꞌabi̱nk cue teꞌcua̱nk xyuꞌam chi junelic. 26Li Yucuaꞌbej cuan xcuanquil chi qꞌuehoc junelic yuꞌam ut aꞌan ajcuiꞌ quiqꞌuehoc cue la̱in li Cꞌajolbej lin cuanquil chi qꞌuehoc junelic yuꞌam. 27Ut quixqꞌue ajcuiꞌ incuanquil chi rakoc a̱tin xban nak la̱in li Cꞌajolbej. Taklanbilin chak xban li Dios. 28Misach e̱chꞌo̱l chirabinquil li yo̱quin chixyebal. Ta̱cuulak xkꞌehil nak chixjunileb li camenak teꞌrabi li cꞌaꞌru tinye. 29Li queꞌxba̱nu li us teꞌcuacli̱k cuiꞌchic ut teꞌcua̱nk xyuꞌam chi junelic. Ut eb li queꞌxba̱nu li incꞌaꞌ us teꞌcuacli̱k ajcuiꞌ re teꞌtakla̱k saꞌ li tojba ma̱c. 30La̱in ma̱cꞌaꞌ naru ninba̱nu injunes. La̱in ninrakoc a̱tin joꞌ naxye cue li Yucuaꞌbej. Joꞌcan nak ninrakoc a̱tin saꞌ ti̱quilal. Incꞌaꞌ ninba̱nu li cꞌaꞌru nacuaj la̱in. Ninba̱nu ban li cꞌaꞌru naraj li Yucuaꞌbej li quitaklan chak cue. 31Cui la̱in tinchꞌolob xya̱lal che̱ru anihin tzꞌakal la̱in, la̱ex te̱ye nak incꞌaꞌ ya̱l li yo̱quin chixyebal. 32Abanan cuan jun chic li naxchꞌolob xya̱lal che̱ru anihin tzꞌakal la̱in ut la̱in ninnau nak ya̱l li yo̱ chixyebal chicuix. 33La̱ex xetakla xpatzꞌbal re laj Juan laj Cubsihom Haꞌ ut aꞌan quixchꞌolob lix ya̱lal che̱ru ut ya̱l li quixye chicuix. 34Abanan incꞌaꞌ tento nak junak cui̱nk tixchꞌolob xya̱lal anihin. Ninye ban e̱re anihin re nak texcolekꞌ. 35Laj Juan chanchan jun li xam quixcutanobresi e̱be nak quixchꞌolob lix ya̱lal che̱ru. Ut quisahoꞌ jun cꞌamoc saꞌ e̱chꞌo̱l chirabinquil li quixye. 36Li cꞌaꞌru quixchꞌolob laj Juan chicuix, aꞌan ya̱l. Abanan riqꞌuin li cꞌaꞌru ninba̱nu, kꞌaxal cuiꞌchic naxcꞌut chi tzꞌakal anihin la̱in. La̱in ninba̱nu li cꞌaꞌru quixye cue li Yucuaꞌbej. Li cꞌaꞌru ninba̱nu la̱in, aꞌan naxcꞌut nak taklanbilin xban li Yucuaꞌbej. 37Ut li Yucuaꞌbej li quitaklan chak cue, aꞌan quixchꞌolob ajcuiꞌ lix ya̱lal chicuix usta ma̱ jun sut xerabi chi a̱tinac chi moco queril chanru na-iloc. 38La̱ex incꞌaꞌ nequeraj xcꞌulbal li ra̱tin xban nak incꞌaꞌ niquine̱pa̱b la̱in, li taklanbilin chak xban aꞌan. 39La̱ex nequeqꞌue e̱chꞌo̱l chixtzolbal xsaꞌ li Santil Hu. La̱ex nequecꞌoxla nak aran te̱tau chanru ta̱cua̱nk le̱ yuꞌam chi junelic. Abanan incꞌaꞌ nequeqꞌue retal nak li Santil Hu aꞌan naxchꞌolob ajcuiꞌ lix ya̱lal chicuix la̱in. 40La̱ex incꞌaꞌ nequeraj xpa̱banquil nak la̱in ninqꞌuehoc e̱re le̱ yuꞌam chi junelic. 41La̱in incꞌaꞌ nacuaj nak te̱qꞌue inlokꞌal la̱ex, 42xban nak ninnau chanru le̱ naꞌleb. Ninnau nak incꞌaꞌ nequera li Dios chi anchal e̱chꞌo̱l. 43La̱in xinchal saꞌ xcꞌabaꞌ lin Yucuaꞌ. Abanan incꞌaꞌ xeraj incꞌulbal. Cui ut ani ta chic junak ta̱cha̱lk yal naxtakla chak rib xjunes, la̱ex te̱cꞌul raj aꞌan. 44Nak nequeqꞌue e̱lokꞌal chi ribil e̱rib, cꞌajoꞌ nak nacuulac che̱ru. Abanan incꞌaꞌ nequesicꞌ li lokꞌal li naxqꞌue li jun chi Dios. ¿Chan ta cuiꞌ ru nak tine̱pa̱b la̱in chi joꞌcanan? 45Me̱cꞌoxla nak la̱in tinjitok e̱re chiru lin Yucuaꞌ. Cuan jun li ta̱jitok e̱re. Aꞌan li chakꞌrab li quiqꞌueheꞌ re laj Moisés li cꞌojcꞌo cuiꞌ e̱chꞌo̱l. 46Cui ta nequepa̱b li cꞌaꞌru quixye laj Moisés, tine̱pa̱b aj raj cuiꞌ la̱in xban nak laj Moisés quixchꞌolob ajcuiꞌ chak xya̱lal chicuix la̱in. 47Cui incꞌaꞌ nequepa̱b li cꞌaꞌru quixtzꞌi̱ba laj Moisés chicuix, ¿chan ta cuiꞌ ru nak te̱pa̱b li cꞌaꞌru ninye la̱in? chan li Jesús.

Currently Selected:

San Juan 5: kek

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy