YouVersion Logo
Search Icon

San Juan 10

10
Li Jesús quixye nak aꞌan li cha̱bil pastor
1Relic chi ya̱l tinye e̱re, li ani na-oc saꞌ xcorraleb li carner chi incꞌaꞌ na-oc saꞌ li tzꞌakal oqueba̱l re li corral, li jun aꞌan aj e̱lkꞌ. 2Abanan li ani na-oc saꞌ li tzꞌakal oqueba̱l re li corral, li jun aꞌan aj ilol reheb li carner. 3Li nacꞌacꞌalen re li oqueba̱l naxnau ru aꞌan ut naxte li oqueba̱l chiru. Ut eb li carner nequeꞌxnau ru li xya̱b xcux nak naxbokeb chi xju̱nkaleb riqꞌuin lix cꞌabaꞌeb ut narisiheb saꞌ li corral. 4Nak ac xrisiheb, naxberesiheb ut eb li carner nequeꞌxta̱ke xban nak nequeꞌxnau ru xya̱b lix cux. 5Abanan junak li incꞌaꞌ nequeꞌxnau ru, ma̱ jokꞌe teꞌxta̱ke. E̱lelic ban chic teꞌxba̱nu chiru xban nak incꞌaꞌ nequeꞌxnau ru xya̱b lix cux, chan li Jesús. 6Aꞌan aꞌin li jaljo̱quil ru a̱tin li quixye li Jesús reheb. Abanan incꞌaꞌ queꞌxtau ru lix ya̱lal. 7Joꞌcan nak li Jesús quixye cuiꞌchic reheb: —Relic chi ya̱l ninye e̱re, La̱in li oqueba̱l reheb li teꞌpa̱ba̱nk cue. 8Chixjunileb li queꞌcꞌulun xbe̱n cua chicuu la̱in, aꞌaneb aj e̱lkꞌeb ut aj balakꞌeb. Ut eb li nequeꞌpa̱ban cue, incꞌaꞌ nequeꞌxpa̱b li cꞌaꞌru nequeꞌxye. 9La̱in li oqueba̱l. Chixjunileb li nequeꞌpa̱ban cue la̱in, teꞌcolekꞌ ut la̱in tin-ilok reheb. Chanchaneb li carner li nequeꞌoc ut nequeꞌel ut nequeꞌxtau lix cuaheb. 10Laj e̱lkꞌ nachal chi elkꞌac ut chi camsi̱nc ut chi sachoc. La̱in xinchal re nak ta̱cua̱nk e̱yuꞌam chi tzꞌakal. Ta̱cua̱nk e̱yuꞌam chi junelic. 11La̱in chanchanin jun li cha̱bil pastor. Junak cha̱bil pastor naxkꞌaxtesi lix yuꞌam saꞌ xcꞌabaꞌeb lix carner. 12Junak tojbil mo̱s ma̱cuaꞌ tzꞌakal pastor xban nak ma̱cuaꞌ aꞌan laj e̱chal re li carner. Naril nak yo̱ chi cha̱lc laj xoj, naxcanabeb li carner ut nae̱lelic. Ut laj xoj naxchapeb li carner ut naxchaꞌchaꞌi ruheb. 13Li tojbil mo̱s nae̱lelic xban nak yal mo̱s. Aꞌan incꞌaꞌ naxqꞌue xchꞌo̱l chixcolbaleb li carner. 14La̱in chanchanin jun cha̱bil pastor. La̱in ninnau ruheb li cualal incꞌajol. Ut eb aꞌan nequeꞌxnau cuu la̱in. 15Joꞌ nak lin yucuaꞌ naxnau cuu la̱in, joꞌcan ajcuiꞌ nak ninnau ru lin yucuaꞌ ut tinkꞌaxtesi cuib chi camsi̱c re xcolbaleb li cualal incꞌajol. 16Cuanqueb ajcuiꞌ cualal incꞌajol jalaneb xtenamiteb.#Saꞌ li versículo 10:16 naxye li ralal xcꞌajol li jalaneb xtenamit. Aꞌaneb li ma̱cuaꞌeb aj judío. Tento nak la̱in tincꞌameb chak. Eb aꞌan teꞌrabi ajcuiꞌ xya̱b lin cux. Ut junajakeb chic ru nak teꞌcua̱nk ut junak ajcuiꞌ laj ilol reheb. 17Ninxra li Yucuaꞌbej xban nak la̱in tinkꞌaxtesi cuib chi camsi̱c ut tincꞌul cuiꞌchic lin yuꞌam. 18Ma̱ ani ta̱qꞌuehok cue chi camsi̱c cui incꞌaꞌ nacuaj la̱in. Xban nak la̱in nacuaj, tinkꞌaxtesi cuib chi camsi̱c. Cuan incuanquil chixkꞌaxtesinquil lin yuꞌam. Ut cuan ajcuiꞌ incuanquil chixcꞌulbal cuiꞌchic lin yuꞌam. Aꞌan aꞌin li quixye cue lin Yucuaꞌ nak tento tinba̱nu, chan li Jesús. 19Ut xban nak jalan jala̱nk yo̱queb chixcꞌoxlanquil chirix li quixye li Jesús, quicuan cuiꞌchic jachoc ib saꞌ xya̱nkeb. 20Nabaleb queꞌyehoc re: —Cuan ma̱us aj musikꞌej riqꞌuin. Incꞌaꞌ tuktu xjolom. ¿Cꞌaꞌut nak nequerabi li cꞌaꞌru naxye aꞌan? chanqueb. 21Ut cuanqueb cuiꞌchic yo̱queb xyebal: —Incꞌaꞌ naru ta̱a̱tinak chi joꞌcan cui cuan ma̱us aj musikꞌej riqꞌuin. ¿Ma ta̱ru̱k ta biꞌ tixqꞌue chi iloc junak mutzꞌ cui cuan ma̱us aj musikꞌej riqꞌuin? chanqueb.
Li Jesús quitzꞌekta̱na̱c xbaneb laj judío
22Yo̱ li habalkꞌe aran Jerusalén nak quicuulac xkꞌehil li ninkꞌe re xjulticanquil nak queꞌxkꞌaxtesi li templo saꞌ rukꞌ li Ka̱cuaꞌ Dios. 23Ut li Jesús yo̱ chi be̱c saꞌ li templo bar cuan cuiꞌ li oqueba̱l Salomón xcꞌabaꞌ. 24Quisuteꞌ xbaneb laj judío ut queꞌxye re: —¿Jokꞌe ta̱ye ke chi tzꞌakal anihat? ¿Ma yal yo̱kat chixqꞌuebal kacꞌaꞌux? ¿Ma la̱at li Mesías, li yechiꞌinbil xban li Dios? Cui la̱at li Cristo, ye ke chi tzꞌakal anakcuan, chanqueb. 25Li Jesús quixye reheb: —Ac xinye e̱re anihin ut incꞌaꞌ niquine̱pa̱b. Li milagros li yo̱quin chixba̱nunquil saꞌ xcꞌabaꞌ lin Yucuaꞌ, aꞌan naxcꞌut chi tzꞌakal anihin. 26La̱ex incꞌaꞌ niquine̱pa̱b xban nak la̱ex ma̱cuaꞌex cualal incꞌajol. 27Eb li cualal incꞌajol nequeꞌrabi li cꞌaꞌru ninye. La̱in ninnauheb ru ut eb aꞌan nequeꞌxba̱nu li cꞌaꞌru ninye. 28La̱in tinqꞌueheb xyuꞌam chi junelic. Incꞌaꞌ teꞌosokꞌ ut ma̱ ani ta̱ru̱k ta̱makꞌok reheb chicuu. 29Lin Yucuaꞌ li kꞌaxal nim xcuanquil chiruheb chixjunil, aꞌan li quikꞌaxtesin reheb saꞌ cuukꞌ. Ma̱ ani naru ta̱makꞌok reheb chiru aꞌan. 30La̱in ut li Yucuaꞌbej junajo chi kibil kib, chan li Jesús. 31Ut eb laj judío queꞌxchap xpequeb ut queꞌraj cuiꞌchic xcutbal chi pec. 32Li Jesús quixye reheb: —Nabal li cha̱bilal xinba̱nu che̱ru joꞌ quicꞌutbesi̱c chicuu xban lin Yucuaꞌ. ¿Bar cuan reheb li cha̱bil cꞌanjel aꞌin li xinba̱nu tine̱cuti cuiꞌ chi pec? chan. 33Eb aꞌan queꞌchakꞌoc ut queꞌxye: —Incꞌaꞌ tatkacut chi pec xban li cha̱bilal xaba̱nu. Tatkacut chi pec xban nak nacajuntakꞌe̱ta a̱cuib riqꞌuin li Dios. La̱at yal cui̱nkat. Moco Diosat ta joꞌ yo̱cat chixyebal, chanqueb re li Jesús. 34Li Jesús quixye reheb: —¿Ma incꞌaꞌ ta biꞌ tzꞌi̱banbil retalil saꞌ le̱ chakꞌrab nak li Dios quixye reheb li queꞌcꞌuluc re li ra̱tin “diosex la̱ex”? (Sal. 82:6) 35Nakanau nak incꞌaꞌ naru takaye nak incꞌaꞌ ya̱l li tzꞌi̱banbil saꞌ li Santil Hu. Li Dios quixye “dios” reheb li quixxakab. 36Li Acuabej Dios xsicꞌoc cuu ut xinixtakla chak saꞌ ruchichꞌochꞌ. ¿Cꞌaꞌut nak nequeye la̱ex nak yo̱quin chixmajecuanquil li Dios riqꞌuin nak ninye nak la̱in li Ralal? 37Cui la̱in incꞌaꞌ yo̱quin chixba̱nunquil li cꞌaꞌru naraj lin Yucuaꞌ, me̱pa̱b nak la̱in li Ralal li Dios. 38Abanan cui yo̱quin chixba̱nunquil li cꞌaꞌru naraj li Dios, usta incꞌaꞌ niquine̱pa̱b la̱in, cheqꞌue retal li milagro li yo̱quin chixba̱nunquil re nak te̱nau chi tzꞌakal nak li Dios cuan cuiqꞌuin ut la̱in cuanquin riqꞌuin aꞌan, chan li Jesús. 39Ut queꞌxyal cuiꞌchic xchapbal, abanan li Jesús qui-el chiruheb. 40Ut co̱ jun pacꞌal li nimaꞌ Jordán saꞌ li naꞌajej li quicubsin cuiꞌ haꞌ laj Juan junxil. Ut aran quicana. 41Nabaleb li tenamit queꞌcuulac riqꞌuin. Yo̱queb chixyebal chi ribileb rib: —Laj Juan ma̱ jun milagro quixba̱nu. Abanan ya̱l chixjunil li quixye chirix li cui̱nk aꞌin, chanqueb. 42Ut nabaleb li cuanqueb aran queꞌxpa̱b li Jesús.

Currently Selected:

San Juan 10: kek

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy