Levítico 2
2
Li mayej cꞌaj
1Nak junak cristian tixmayeja ru li racui̱mk, tento nak tixqꞌue li cha̱bil cꞌaj. Tixqꞌue aceite saꞌ xbe̱n ut tixqꞌue ajcuiꞌ incienso. 2Chirix aꞌan tixcꞌam riqꞌuineb laj tij. Aꞌaneb li ralal xcꞌajol laj Aarón. Jun reheb laj tij tixchap jun mo̱chꞌ li cha̱bil cꞌaj rochben aceite ut incienso, ut tixcꞌat saꞌ xbe̱n li artal chokꞌ mayej chiru li Ka̱cuaꞌ. Aꞌan retalil nak chixjunil li cꞌaj kꞌaxtesinbil re li Dios. Li mayej li ta̱cꞌatk, aꞌanak jun sununquil mayej chiru li Ka̱cuaꞌ. 3Ut li joꞌ qꞌuial chic li mayej cꞌaj li ta̱cana̱k, aꞌan ta̱qꞌuehekꞌ re laj Aarón ut reheb li ralal. Li cꞌaj aꞌan santobresinbil chic xban li ac xcꞌatman chokꞌ mayej chiru li Ka̱cuaꞌ. 4Cui tixmayeja li caxlan cua li yi̱banbil saꞌ horno, tento nak yi̱banbilak riqꞌuin cha̱bil cꞌaj, ut tento nak ma̱cꞌaꞌak xchꞌamal. Naru tixmayeja li caxlan cua li pim, li yokꞌinbil riqꞌuin li cha̱bil aceite oliva, malaj ut naru tixmayeja li caxlan cua, sursu ut jay, li yulbil riqꞌuin aceite oliva. 5Cui tixmayeja li caxlan cua yi̱banbil saꞌ qꞌuil tento nak ta̱yi̱ba̱k riqꞌuin li cha̱bil cꞌaj yokꞌinbil riqꞌuin aceite oliva, abanan ma̱cꞌaꞌak xchꞌamal. 6Tixjachi ut tixqꞌue li aceite chiru. Aꞌanak jun li mayej cꞌaj. 7Cui li mayej cꞌaj ta̱yi̱ba̱k saꞌ jun li xartin, tento nak ta̱yi̱ba̱k riqꞌuin li cha̱bil cꞌaj ut riqꞌuin aceite. 8Tixcꞌam chiru li Ka̱cuaꞌ li mayej cꞌaj li yi̱banbil riqꞌuin li aceite ut tixqꞌue reheb laj tij ut eb aꞌan teꞌxqꞌue saꞌ li artal. 9Laj tij tixchap caꞌchꞌinak li caxlan cua ut tixcꞌat saꞌ xbe̱n li artal chokꞌ retalil nak kꞌaxtesinbil re li Ka̱cuaꞌ lix comon li mayej. Ut li mayej aꞌan, aꞌanak jun sununquil mayej chiru li Ka̱cuaꞌ. 10Ut li joꞌ qꞌuial chic li mayej ta̱cana̱k, aꞌan ta̱qꞌuehekꞌ re laj Aarón ut reheb li ralal. Li mayej cꞌaj aꞌan li kꞌaxal santo saꞌ xya̱nkeb li nequeꞌxcꞌat chokꞌ mayej chiru li Ka̱cuaꞌ. 11Nak te̱qꞌue le̱ mayej cꞌaj chiru li Ka̱cuaꞌ, incꞌaꞌ te̱qꞌue xchꞌamal. Ma̱ jun li mayej ta̱cꞌatekꞌ chi cua̱nk xchꞌamal, chi moco te̱qꞌue li xyaꞌal cab. 12Ta̱ru̱k te̱qꞌue li caxlan cua cuan xchꞌamal ut li xyaꞌal cab chokꞌ e̱mayej re li xbe̱n ru le̱ racui̱mk. Abanan incꞌaꞌ ta̱cꞌatekꞌ saꞌ xbe̱n li artal. 13Chixjunil li ru le̱ racui̱mk li te̱mayeja, tento nak te̱qꞌue ratzꞌamil. Incꞌaꞌ te̱qꞌue le̱ mayej chi ma̱cꞌaꞌ ratzꞌamil xban nak aꞌan retalil li contrato li quixba̱nu li Dios e̱riqꞌuin. Nak te̱qꞌue le̱ mayej, junelic te̱qꞌue ratzꞌamil. 14Nak te̱qꞌue li xbe̱n ru le̱ racui̱mk chokꞌ e̱mayej chiru li Ka̱cuaꞌ, te̱qꞌuili li ju̱nk chijil nak toj rax. Nak acak xeqꞌuili, te̱ten ut te̱qꞌue li ru chokꞌ e̱mayej. 15Saꞌ xbe̱n li mayej aꞌin te̱qꞌue li aceite ut li incienso. Aꞌanak jun li mayej re li ru le̱ racui̱mk. 16Ut laj tij tixcꞌat caꞌchꞌinak li ru li acui̱mk, li tenbil rochben li aceite ut li incienso. Aꞌanak jun li cꞌatbil mayej chiru li Ka̱cuaꞌ.
Currently Selected:
Levítico 2: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
