Levítico 1
1
Li cꞌatbil mayej
1Li Dios quia̱tinac chak saꞌ li tabernáculo li nequeꞌxchꞌutub cuiꞌ ribeb li tenamit chi lokꞌoni̱nc. Quixbok laj Moisés ut quia̱tinac riqꞌuin. 2Quixye re nak tixye reheb laj Israel chanru teꞌxba̱nu nak teꞌmayejak chiru li Dios. Joꞌcaꞌin quixye re: Nak li tenamit teꞌxmayeja li xul tento nak teꞌxqꞌue jun reheb lix queto̱mk cuacax, malaj ut carner. 3Cui cuacax teꞌxqꞌue chokꞌ xcꞌatbil mayej, tento nak teꞌxqꞌue li toro tzꞌakalak re ru. Ut teꞌxqꞌue joꞌ na-ala saꞌ xchꞌo̱leb. Teꞌxcꞌam lix mayej chiru li Ka̱cuaꞌ saꞌ li oqueba̱l re li tabernáculo li nequeꞌxchꞌutub cuiꞌ ribeb li tenamit chixlokꞌoninquil li Dios. 4Li ani tixqꞌue lix cꞌatbil mayej tixqꞌue li rukꞌ saꞌ xbe̱n lix jolom li xul li tixcꞌat re nak li Ka̱cuaꞌ tixcꞌul chokꞌ re xtojbal rix lix ma̱c. 5Nak tixcamsi li toro toj sa̱j li tixqꞌue chokꞌ cꞌatbil mayej, tixxekꞌ chi chꞌi̱chꞌ lix cux chiru li Ka̱cuaꞌ. Ut laj tij, li ralal laj Aarón, tixxoc lix quiqꞌuel ut tixrachrachi chixjun sutam li artal ut saꞌ xbe̱n li artal li cuan chixcꞌatk li oqueba̱l re li tabernáculo. 6Nak tixqꞌue lix cꞌatbil mayej, ta̱risi lix tzꞌu̱mal li cuacax ut tixseti lix tibel. 7Eb laj tij li ralal xcꞌajol laj Aarón, teꞌxtus lix siꞌ saꞌ xbe̱n li artal ut teꞌxqꞌue xxamlel. 8Ut chirix aꞌan, eb laj tij teꞌxqꞌue li tib li ac xeꞌxset saꞌ xbe̱n li xam. Teꞌxqꞌue lix jolom ut lix xe̱bul lix cꞌamcꞌot saꞌ xbe̱n li xam saꞌ li artal. 9Tixchꞌaj li cꞌamcꞌot ut li raꞌ li xul. Ut laj tij tixqꞌue chixjunil saꞌ xbe̱n li artal ut tixcꞌat. Ut aꞌanak jun li sununquil mayej ta̱cuulak chiru li Ka̱cuaꞌ. 10Cui carner malaj ut chiba̱t li tixqꞌue chokꞌ cꞌatbil mayej, tento nak tixqꞌue junak te̱lom tzꞌakalak re ru. 11Tixcamsi chiru li Ka̱cuaꞌ chixcꞌatk li artal saꞌ li pacꞌal li nacana saꞌ li norte. Ut eb laj tij teꞌxrachrachi lix quiqꞌuel saꞌ xbe̱n li artal ut chixjun sutam. 12Tixseti lix tibel li xul ut eb laj tij teꞌxqꞌue li setbil tib saꞌ xbe̱n li artal. Ut teꞌxqꞌue ajcuiꞌ saꞌ li xam lix jolom li xul ut lix xe̱bul li cꞌamcꞌot. 13Li tixqꞌue xcꞌatbil mayej tixchꞌaj lix cꞌamcꞌot ut li raꞌ li xul. Ut laj tij tixmayeja chiru li Ka̱cuaꞌ ut tixqꞌue chixjunil saꞌ xbe̱n li artal ut tixcꞌat. Ut aꞌanak jun li sununquil mayej ta̱cuulak chiru li Ka̱cuaꞌ. 14Cui tixmayeja chokꞌ xcꞌatbil mayej jun li xul narupupic, tento nak mucuy malaj ut jun li paloma li toj sa̱j li tixmayeja. 15Laj tij tixcꞌam ut ta̱risi lix jolom ut tixcꞌat saꞌ li artal. Lix quiqꞌuel ta̱hoyekꞌ chixcꞌatk li artal. 16Ta̱risi lix puj rochben li rix ut tixcut jun pacꞌal li artal saꞌ li este li nequeꞌxqꞌue cuiꞌ li cha. 17Tixchap saꞌ xxicꞌ ut tixjach saꞌ xyi li xul. Abanan incꞌaꞌ tixjach chi jun cuacaj. Ut incꞌaꞌ ta̱risi lix xicꞌ. Chirix aꞌan laj tij tixcꞌat saꞌ li artal saꞌ xbe̱n li xam. Ut aꞌanak jun li sununquil mayej ta̱cuulak chiru li Ka̱cuaꞌ.
Currently Selected:
Levítico 1: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
