San Juan 19
19
Quiteneba̱c ca̱mc saꞌ xbe̱n li Jesús
1Laj Pilato quixtakla li Jesús chi saqꞌuecꞌ riqꞌuin tzꞌu̱m. 2Eb li soldado queꞌxyi̱b jun li corona riqꞌuin qꞌuix ut queꞌxqꞌue saꞌ xjolom li Jesús. Ut queꞌxqꞌue jun li caki tꞌicr chirix xcomon li nequeꞌrocsi li rey. 3Ut queꞌxye re: —¡Sahak taxak saꞌ a̱chꞌo̱l, at xreyeb laj judío! chanqueb re. Ut queꞌxsacꞌ riqꞌuin rukꞌeb. 4Laj Pilato co̱ cuiꞌchic riqꞌuineb laj judío ut quixye reheb: —Xincꞌam chak arin chirix cab re nak te̱nau nak ma̱ jun xma̱c xintau, chan. 5Ut li Jesús qui-el chirix cab. Cuan saꞌ xjolom li corona li yi̱banbil riqꞌuin qꞌuix ut cuan li caki tꞌicr chirix. Laj Pilato quixye reheb: —Cueꞌ li cui̱nk. Ilomak, chan. 6Eb li nequeꞌcꞌacꞌalen saꞌ li templo ut eb li xbe̱nil aj tij queꞌril li Jesús ut queꞌxjap reheb ut queꞌxye: —¡Qꞌue chiru cruz! ¡Qꞌue chiru cruz! chanqueb. Ut laj Pilato quixye reheb: —Cꞌamomak la̱ex ut qꞌuehomak chiru cruz cui te̱raj. La̱in ma̱ jun lix ma̱c xintau, chan. 7Abanan eb laj judío queꞌxye: —La̱o cuan kachakꞌrab ut li kachakꞌrab naxye nak ta̱camsi̱k xban nak aꞌan quixqꞌue rib chokꞌ Ralal li Dios.— 8Nak quirabi li queꞌxye, kꞌaxal cuiꞌchic quixucuac laj Pilato. 9Qui-oc cuiꞌchic saꞌ cab rochben li Jesús ut quixye re: —Ye cue bar xatchal chak.— Abanan li Jesús ma̱ jun li a̱tin quixye. 10Laj Pilato quixye re: —¿Cꞌaꞌut nak incꞌaꞌ nacatchakꞌoc? ¿Ma incꞌaꞌ nacanau nak cuan incuanquil cha̱qꞌuebal chiru cruz ut cuan incuanquil cha̱cuachꞌabanquil? chan re li Jesús. 11Li Jesús quixye re: —Ma̱cꞌaꞌ raj a̱cuanquil saꞌ inbe̱n cui ta incꞌaꞌ qꞌuebil a̱cue xban li Dios. Ut li jun li xkꞌaxtesin cue saꞌ a̱cuukꞌ re nak tatrakok a̱tin saꞌ inbe̱n, aꞌan kꞌaxal cuiꞌchic nim xma̱c cha̱cuu la̱at, chan. 12Ut chalen aꞌan laj Pilato yo̱ chixsicꞌbal chanru nak ta̱rachꞌab li Jesús. Abanan eb laj judío queꞌxjap reheb ut queꞌxye: —Cui nacacuachꞌab li cui̱nk aꞌan, la̱at ma̱cuaꞌakat chic rami̱g li Acuabej César. Li ani naraj xqꞌuebal rib chokꞌ rey, li jun aꞌan xicꞌ chic naril li Acuabej, chanqueb. 13Nak laj Pilato quirabi li queꞌxye, quixcꞌam li Jesús chirix cab. Quicꞌojla saꞌ li naꞌajej li narakoc cuiꞌ a̱tin. Li cꞌojleba̱l aꞌan cuan saꞌ xbe̱n li tusbil pec. Cꞌajoꞌ xchꞌinaꞌusal. Gabata xcꞌabaꞌ li naꞌajej aꞌan saꞌ li a̱tinoba̱l hebreo. 14Cuaꞌleb na re cutan nak quicꞌulman aꞌin. Li tenamit yo̱queb chixcauresinquil li ninkꞌe Pascua, li ta̱ticla̱k saꞌ li cutan jun chic. Laj Pilato quixye reheb: —Cueꞌ le̱ rey, chan. 15Queꞌxjap cuiꞌchic reheb chixyebal: —¡Qꞌuehomak chiru cruz! ¡Qꞌuehomak chiru cruz! Ut laj Pilato quixye reheb: —¿Ma te̱raj nak tinqꞌue chiru cruz le̱ rey? chan. Eb li xbe̱nil aj tij queꞌxye: —Jun ajcuiꞌ li karey cuan. Aꞌan li Acuabej César, chanqueb. 16Laj Pilato quixkꞌaxtesi li Jesús saꞌ rukꞌeb li soldado re nak ta̱qꞌuehekꞌ chiru cruz. Ut queꞌxcꞌam li Jesús.
Joꞌcaꞌin nak quiqꞌueheꞌ li Jesús chiru cruz
17Li Jesús yo̱ chixpakonquil lix cruz nak co̱ saꞌ li naꞌajej Xbakel Xjolom Camenak xcꞌabaꞌ. Saꞌ li a̱tinoba̱l hebreo Gólgota xcꞌabaꞌ. 18Ut aran queꞌxqꞌue chiru cruz. Ut queꞌxqꞌue cuib chic li cui̱nk chiru cruz rochben. Jun queꞌxqꞌue saꞌ xnim ukꞌ ut li jun chic queꞌxqꞌue saꞌ xtzꞌe. Li cruz li queꞌxqꞌue cuiꞌ li Jesús quicana saꞌ xyi. 19Laj Pilato quixtzꞌi̱ba jun li retalil ut queꞌxqꞌue saꞌ xjolom li cruz li quiqꞌueheꞌ cuiꞌ li Jesús. Li retalil aꞌan quixye: Li Jesús aj Nazaret, aꞌan lix reyeb laj judío. 20Nabaleb laj judío queꞌril li retalil li quitzꞌi̱ba̱c, xban nak li naꞌajej li quiqꞌueheꞌ cuiꞌ chiru cruz li Jesús nachꞌ cuan riqꞌuin li tenamit. Li retalil tzꞌi̱banbil saꞌ eb li a̱tinoba̱l hebreo, griego ut latín. 21Incꞌaꞌ quicuulac chiruheb li xbe̱nil aj tij li quixtzꞌi̱ba. Queꞌxye re laj Pilato: —Ma̱tzꞌi̱ba nak aꞌan xreyeb laj judío. Tzꞌi̱ba ban nak aꞌan xyehoc re, “La̱in xreyeb laj judío”, chanqueb. 22Ut laj Pilato quixye reheb: —Li cꞌaꞌru xintzꞌi̱ba, xintzꞌi̱ba. Incꞌaꞌ chic ta̱jalma̱nk, chan. 23Nak ac xeꞌxqꞌue chiru cruz li Jesús, eb li soldado queꞌxcꞌam li rakꞌ chokꞌ reheb. Ca̱hib e̱chal queꞌrisi, jun re li junju̱nk chi soldado. Ut queꞌxcꞌam ajcuiꞌ li rakꞌ li ma̱cꞌaꞌ xbojbal. Junaj ru lix quembal. 24Queꞌxye chi ribileb rib: —Incꞌaꞌ takapeji. Us takabu̱li rix re rilbal ani ta̱e̱chani̱nk re, chanqueb. Joꞌcan queꞌxba̱nu re nak ta̱tzꞌaklok ru li tzꞌi̱banbil saꞌ li Santil Hu li naxye chi joꞌcaꞌin:
Queꞌxjeqꞌui chirixeb lin tꞌicr ut queꞌxbu̱li rix li cuakꞌ. (Sal. 22:18)
25Nachꞌ riqꞌuin li cruz xakxo li xnaꞌ li Jesús rochben lix María li ras. Aꞌan li rixakil laj Cleofas. Ut cuan ajcuiꞌ aran lix María, Magdala xtenamit. 26Li Jesús quiril lix naꞌ ut quiril ajcuiꞌ lix tzolom li raro xban. Li Jesús quixye re lix naꞌ: —At innaꞌ, li cui̱nk aꞌin, aꞌan chic la̱ yum.— 27Ut quixye re lix tzolom: —Li ixk aꞌin, aꞌan chic la̱ naꞌ.— Ut chalen aꞌan lix tzolom quixcꞌul lix naꞌ li Jesús riqꞌuin saꞌ li rochoch.
Joꞌcaꞌin nak quicam li Jesús
28Chirix chic aꞌan quixnau li Jesús nak ac xtzꞌakloc ru chixjunil. Re nak ta̱tzꞌaklok ru li tzꞌi̱banbil saꞌ li Santil Hu, li Jesús quixye: —Ta̱chakik cue, chan. 29Cuan aran jun secꞌ nujenak chi vinagre. Queꞌxtzꞌa saꞌ li vinagre jun li esponja ut queꞌxtaksi saꞌ ruꞌuj jun li rukꞌ cheꞌ hisopo xcꞌabaꞌ ut queꞌxqꞌue saꞌ re. 30Li Jesús quirucꞌ li vinagre ut quixye: —Anakcuan xtzꞌakloc ru chixjunil.— Quixxulub lix jolom ut quicam. 31Eb li nequeꞌtaklan saꞌ xya̱nkeb laj judío queꞌxtzꞌa̱ma chiru laj Pilato re nak tixtakla xtokbal xbakel li raꞌeb li queꞌqꞌueheꞌ chiru cruz re nak teꞌca̱mk chi junpa̱t. Queꞌraj nak teꞌisi̱k chiru cruz xban nak cuulac re li hiloba̱l cutan. Yo̱queb chixcauresinquil ribeb re li ninkꞌe Pascua xban nak aꞌan li kꞌaxal lokꞌ chiruheb. 32Queꞌchal eb li soldado ut queꞌxtok xbakel li raꞌeb li cuib chi cui̱nk li queꞌqꞌueheꞌ chiru cruz rochben li Jesús. 33Abanan nak queꞌcuulac cuan cuiꞌ li Jesús, queꞌril nak ac xcam ut incꞌaꞌ queꞌxtok xbakel li raꞌ. 34Jun li soldado quixhop xcꞌatk xsaꞌ riqꞌuin lix chꞌi̱chꞌ ut saꞌ junpa̱t qui-el li quicꞌ ut qui-el ajcuiꞌ li haꞌ. 35La̱in quin-iloc re chi tzꞌakal li cꞌaꞌru quicꞌulman ut li cꞌaꞌru yo̱quin xyebal e̱re tzꞌakal ya̱l. Yo̱quin chixyebal e̱re aꞌin re nak te̱pa̱b nak tzꞌakal ya̱l nak quicꞌulman chi joꞌcan. 36Quicꞌulman chi joꞌcan re nak ta̱tzꞌaklok ru li tzꞌi̱banbil saꞌ li Santil Hu:
Ma̱ jun lix bakel ta̱tokma̱nk. (Ex. 12:46)
37Ut tzꞌi̱banbil ajcuiꞌ saꞌ li Santil Hu:
Eb aꞌan teꞌril li ani quihopeꞌ chi chꞌi̱chꞌ. (Zac. 12:10)
Joꞌcaꞌin nak quimukeꞌ li Jesús
38Jun li cui̱nk aj José xcꞌabaꞌ Arimatea xtenamit quicuulac riqꞌuin laj Pilato chixtzꞌa̱manquil chiru nak tixqꞌue lix tzꞌejcual li Jesús re, re tixmuk. Laj José, aꞌan jun reheb li nequeꞌpa̱ban re li Jesús. Abanan incꞌaꞌ quixye xban nak quixucuac xbaneb li nequeꞌtaklan saꞌ xbe̱neb laj judío. Laj Pilato quixye re nak ta̱ru̱k tixmuk, ut laj José co̱ chixcꞌambal li camenak. 39Laj Nicodemo li quicuulac riqꞌuin li Jesús chi kꞌek, co̱ rochben laj José. Quixcꞌam na oꞌcꞌa̱lak (100) libra li sununquil ban yi̱banbil riqꞌuin mirra ut áloes. 40Li cuib chi cui̱nk queꞌxcꞌam lix tzꞌejcual li Jesús ut queꞌxlan riqꞌuin li cha̱bil tꞌicr lino ut queꞌxqꞌue li sununquil ban joꞌ cꞌaynakeb chi mukuc eb laj judío. 41Saꞌ li naꞌajej li quiqꞌueheꞌ cuiꞌ li Jesús chiru cruz cuan jun si̱r li acui̱mk. Aran cuan jun li mukleba̱l toj acꞌ. Toj ma̱ ani mukbil aran. 42Aran queꞌxmuk li Jesús xban nak nachꞌ cuan li naꞌajej aꞌan ut queꞌraj ru xmukbal chi junpa̱t xban nak cuulac re li hiloba̱l cutan.
Currently Selected:
San Juan 19: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.