San Juan 16
16
1Yo̱quin chixyebal e̱re chixjunil li cꞌaꞌak re ru aꞌin re nak incꞌaꞌ ta̱chꞌina̱nk e̱chꞌo̱l saꞌ le̱ pa̱ba̱l nak ta̱cha̱lk li raylal saꞌ e̱be̱n. 2Tex-isi̱k saꞌ li cab li nequeꞌxchꞌutub cuiꞌ ribeb laj judío. Ta̱cuulak xkꞌehil nak eb li teꞌcamsi̱nk e̱re teꞌxcꞌoxla nak yo̱queb chi cꞌanjelac chiru li Dios nak teꞌxba̱nu chi joꞌcan. 3Teꞌxba̱nu li raylal aꞌin e̱re xban nak incꞌaꞌ nequeꞌxnau ru lin Yucuaꞌ chi moco nequeꞌxnau cuu la̱in. 4Ac xinye e̱re chixjunil li cꞌaꞌak re ru aꞌin re nak ta̱julticokꞌ e̱re li cꞌaꞌru xinye e̱re nak yo̱kex chixcꞌulbal li raylal. La̱in incꞌaꞌ quinye chak e̱re junxil nak quintiquib chak lin cꞌanjel xban nak cuanquin e̱riqꞌuin, chan.
Li Jesús quixye cꞌaꞌru li cꞌanjel li tixba̱nu li Santil Musikꞌej nak ta̱cha̱lk
5Li Jesús quixye ajcuiꞌ: —Anakcuan xic cuiꞌchic cue riqꞌuin li quitaklan chak cue. Ut ma̱ jun e̱re napatzꞌoc cue bar xic cue. 6Xrahoꞌ saꞌ e̱chꞌo̱l xban li cꞌaꞌru xinye e̱re. 7Abanan la̱in xinye lix ya̱lal e̱re. Kꞌaxal us chokꞌ e̱re nak tinxic xban nak cui incꞌaꞌ ninxic, incꞌaꞌ ta̱cha̱lk li Santil Musikꞌej e̱riqꞌuin. Aꞌan li ta̱tenkꞌa̱nk e̱re ut aꞌan li ta̱cꞌojoba̱nk re le̱ chꞌo̱l. Nak tinxic, la̱in tintakla chak li Santil Musikꞌej e̱riqꞌuin. 8Nak ta̱cha̱lk li Santil Musikꞌej, aꞌan tixcꞌutbesi chiruheb li cuanqueb saꞌ ruchichꞌochꞌ nak incꞌaꞌ nequeꞌxtau ru cꞌaꞌru li ma̱c ut cꞌaꞌru li ti̱quilal chi moco nequeꞌxtau ru li rakba a̱tin li tixba̱nu li Dios. 9Incꞌaꞌ nequeꞌxtau ru cꞌaꞌru li ma̱c xban nak incꞌaꞌ niquineꞌxpa̱b. 10Incꞌaꞌ nequeꞌxtau ru cꞌaꞌru li ti̱quilal. Cui ta queꞌxtau ru teꞌxnau raj nak la̱in ti̱c inchꞌo̱l. Xban nak ti̱c inchꞌo̱l, tinxic riqꞌuin li Dios ut incꞌaꞌ chic te̱ril cuu. 11Incꞌaꞌ nequeꞌxtau ru cꞌaꞌru li rakba a̱tin. Cui ta queꞌxtau ru, teꞌxnau raj nak ac tenebanbil li rakba a̱tin saꞌ xbe̱n laj tza li nataklan saꞌ ruchichꞌochꞌ. 12Toj cuan raj nabal chic li tinye e̱re, abanan incꞌaꞌ te̱cuy rabinquil anakcuan. 13Abanan nak ta̱cha̱lk li Santil Musikꞌej, aꞌan tixcꞌut che̱ru chixjunil lix ya̱lal. Incꞌaꞌ ta̱a̱tinak yal xjunes. Tixye ban e̱re chixjunil li cꞌaꞌru ta̱rabi riqꞌuin li Dios ut tixchꞌolob che̱ru li cꞌaꞌru ta̱cha̱lk mokon. 14Li Santil Musikꞌej tixqꞌue inlokꞌal xban nak li cꞌaꞌru tinye re, aꞌan ajcuiꞌ li tixchꞌolob xya̱lal che̱ru. 15Chixjunil li cꞌaꞌru cuan re lin Yucuaꞌ, cue ajcuiꞌ la̱in. Joꞌcan nak xinye e̱re nak li cꞌaꞌru tinye e̱re, aꞌan ajcuiꞌ li tixcꞌutbesi che̱ru li Santil Musikꞌej. 16Chi se̱b incꞌaꞌ chic te̱ril cuu. Abanan mokon chic te̱ril cuiꞌchic cuu, chan li Jesús. 17Cuanqueb lix tzolom yo̱queb chixyebal chi ribileb rib: —¿Cꞌaꞌru xya̱lal nak xye ke nak ta̱xic riqꞌuin lix yucuaꞌ? ¿Cꞌaꞌut nak xye ke nak chi se̱b incꞌaꞌ chic takil ru ut mokon chic takil cuiꞌchic ru? 18¿Cꞌaꞌut nak xye chi joꞌcan? Incꞌaꞌ nakatau ru cꞌaꞌut nak quixye nak chi se̱b incꞌaꞌ chic takil ru, chanqueb. 19Li Jesús quixnau nak queꞌraj xpatzꞌbal re cꞌaꞌru xya̱lal li yo̱ chixyebal. Joꞌcan nak quixye reheb: —¿Ma yo̱quex chixpatzꞌbal che̱ribil e̱rib cꞌaꞌru xya̱lal li xinye? ¿Ma incꞌaꞌ xetau ru nak xinye e̱re nak chi se̱b incꞌaꞌ chic te̱ril cuu ut mokon chic te̱ril cuiꞌchic cuu? ¿Ma aꞌan li te̱raj xnaubal? 20Relic chi ya̱l ninye e̱re nak eb li incꞌaꞌ nequeꞌpa̱ban cue ta̱sahokꞌ saꞌ xchꞌo̱leb nak tincꞌul li raylal. La̱ex ta̱yotꞌekꞌ e̱chꞌo̱l ut texya̱bak nak tincꞌul chi joꞌcan. Ta̱rahokꞌ saꞌ e̱chꞌo̱l, abanan mokon ta̱sahokꞌ cuiꞌchic saꞌ e̱chꞌo̱l nak te̱ril cuiꞌchic cuu. 21Junak ixk yoꞌla̱c re lix cꞌulaꞌal narecꞌa xrahil lix raylal. Abanan nak ac xyoꞌla lix cꞌulaꞌal, nasach saꞌ xchꞌo̱l li raylal li quixcꞌul ut nasahoꞌ saꞌ xchꞌo̱l xban nak ac xyoꞌla lix cꞌulaꞌal. 22Joꞌcan ajcuiꞌ la̱ex. Anakcuan ra saꞌ e̱chꞌo̱l. Abanan nak te̱ril cuiꞌchic cuu, ta̱sahokꞌ saꞌ e̱chꞌo̱l. Ut ma̱ ani ta̱isi̱nk che̱ru lix sahil e̱chꞌo̱l. 23Ta̱cuulak xkꞌehil nak ma̱cꞌaꞌ chic te̱tzꞌa̱ma cue la̱in. Chiru ban chic lin Yucuaꞌ textzꞌa̱ma̱nk. Relic chi ya̱l tinye e̱re nak chixjunil li te̱tzꞌa̱ma chiru lin Yucuaꞌ saꞌ incꞌabaꞌ la̱in, aꞌan tixqꞌue e̱re. 24Chalen anakcuan toj ma̱cꞌaꞌ nequetzꞌa̱ma saꞌ incꞌabaꞌ. Chextzꞌa̱ma̱nk ut ta̱qꞌuehekꞌ e̱re re nak kꞌaxal cuiꞌchic ta̱sahokꞌ saꞌ e̱chꞌo̱l, chan li Jesús. 25Chixjunil li cꞌaꞌak re ru aꞌin xinye e̱re saꞌ jaljo̱quil ru a̱tin. Abanan ta̱cuulak xkꞌehil nak incꞌaꞌ chic tinye e̱re chi jaljo ru. Tinye ban e̱re chi tzꞌakal riqꞌuin a̱tin incꞌaꞌ chꞌaꞌaj xtaubal ru ut tinchꞌolob che̱ru lix ya̱lal chirix lin Yucuaꞌ. 26Nak ta̱cuulak xkꞌehil la̱ex chic textzꞌa̱ma̱nk chiru li Yucuaꞌbej saꞌ incꞌabaꞌ la̱in. Incꞌaꞌ chic tento nak la̱in tintzꞌa̱ma̱nk chiru li Yucuaꞌbej che̱rix la̱ex. 27Lin Yucuaꞌ nequexra la̱ex xban nak la̱ex niquine̱ra la̱in ut xban nak xepa̱b nak riqꞌuin li Dios xinchal chak. 28La̱in riqꞌuin lin Yucuaꞌ xinchal chak. Ut anakcuan tincanab li ruchichꞌochꞌ ut tinxic cuiꞌchic riqꞌuin lin Yucuaꞌ, chan li Jesús. 29Ut eb lix tzolom queꞌxye re: —Anakcuan yo̱cat chi a̱tinac riqꞌuin a̱tin incꞌaꞌ chꞌaꞌaj xtaubal ru. Incꞌaꞌ chic xaye ke riqꞌuin jaljo̱quil ru a̱tin. 30Anakcuan nakaqꞌue retal nak la̱at nacanau chixjunil li cꞌaꞌak re ru. Moco toj ta ta̱yehekꞌ a̱cue. Joꞌcan nak nakapa̱b nak la̱at riqꞌuin li Dios xatchal chak, chanqueb. 31Li Jesús quixye reheb: —¿Ma ya̱l nak niquine̱pa̱b anakcuan? 32Xcuulac xkꞌehil, ut anakcuan ajcuiꞌ, nak ta̱chaꞌchaꞌi̱k e̱ru che̱junilex. Ac xbe xbe li junju̱nk tixchap ut tine̱canab injunes. Abanan moco injunes ta xban nak lin Yucuaꞌ cua̱nk cuiqꞌuin. 33Xinye e̱re li cꞌaꞌak re ru aꞌin re nak texcua̱nk cuiqꞌuin ut ta̱cua̱nk e̱riqꞌuin li tuktu̱quilal. Saꞌ li ruchichꞌochꞌ te̱cꞌul li raylal. Abanan cacuubresihomak le̱ chꞌo̱l xban nak la̱in ac xinnumta saꞌ xbe̱n li nataklan saꞌ ruchichꞌochꞌ, chan li Jesús reheb lix tzolom.
Currently Selected:
San Juan 16: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.