San Juan 15
15
Li Jesús quixjuntakꞌe̱ta rib riqꞌuin li xto̱nal li uvas
1Li Jesús quixye ajcuiꞌ reheb: —La̱in chanchanin li xto̱nal li uvas. Ut lin Yucuaꞌ joꞌ jun li nasabesin re. 2Li ani incꞌaꞌ naxba̱nu li cꞌaꞌru naraj lin Yucuaꞌ, aꞌan chanchan li rukꞌ li cheꞌ li na-isi̱c xban nak incꞌaꞌ nau̱chin. Abanan li ani naxba̱nu li cꞌaꞌru naraj lin Yucuaꞌ, aꞌan chanchan li rukꞌ li cheꞌ li nau̱chin. Ut li na-iloc re naxsabesi re nak tixqꞌue nabal li ru. 3La̱ex chanchanex li cha̱bil rukꞌ li cheꞌ li nau̱chin chi nabal xban nak sabesinbil chic ru. La̱ex ac ti̱c chic le̱ yuꞌam xban lix ya̱lal xinchꞌolob che̱ru. 4Cua̱nkex cuiqꞌuin ut la̱in cua̱nkin e̱riqꞌuin. Joꞌ li rukꞌ li cheꞌ, cui incꞌaꞌ letzlo riqꞌuin lix to̱nal, incꞌaꞌ naru nau̱chin. Joꞌcan ajcuiꞌ la̱ex. Cui incꞌaꞌ cua̱nkex cuiqꞌuin, incꞌaꞌ ta̱ru̱k texqꞌui̱k saꞌ le̱ pa̱ba̱l. 5La̱in joꞌ li xto̱nal li uvas ut la̱ex joꞌ li rukꞌ. Cui cua̱nkex cuiqꞌuin ut la̱in cua̱nkin e̱riqꞌuin, la̱ex texcua̱nk saꞌ ti̱quilal ut texqꞌui̱k saꞌ le̱ pa̱ba̱l. Yal e̱junes ma̱cꞌaꞌ naru te̱ba̱nu. 6Li ani incꞌaꞌ ta̱cua̱nk cuiqꞌuin ta̱isi̱k joꞌ nak nayoqꞌueꞌ li rukꞌ li cheꞌ li incꞌaꞌ us. Nak nachakic nacuteꞌ saꞌ xam ut nacꞌat. 7Cui la̱ex cua̱nkex cuiqꞌuin ut te̱ba̱nu li cꞌaꞌru xinye e̱re, ta̱qꞌuehekꞌ e̱re chixjunil li cꞌaꞌru te̱tzꞌa̱ma. 8Nequeqꞌue xlokꞌal lin Yucuaꞌ riqꞌuin li cha̱bilal nequeba̱nu. Cui yo̱kex chixba̱nunquil li cꞌaꞌru naraj li Dios, la̱exak tzꞌakal intzolom. 9La̱in nequexinra la̱ex joꞌ nak ninxra lin Yucuaꞌ la̱in. Chexcua̱nk cuiqꞌuin re nak texinra chi junelic. 10Cui te̱ba̱nu li cꞌaꞌru ninye e̱re, la̱in texinra junelic. La̱in xinba̱nu li cꞌaꞌru xye cue lin Yucuaꞌ ut aꞌan junelic niquinixra la̱in. 11La̱in ninye e̱re aꞌin re nak textzꞌako̱nk riqꞌuin lix sahil inchꞌo̱l la̱in. Cui te̱ba̱nu li cꞌaꞌru ninye e̱re, numtajenakak xsahil e̱chꞌo̱l la̱ex. 12Aꞌan aꞌin li chakꞌrab li ninqꞌue e̱re nak cherahak e̱rib che̱ribil e̱rib joꞌ nak nequexinra la̱in. 13Li rahoc chi tzꞌakal aꞌan nak junak tixkꞌaxtesi lix yuꞌam saꞌ xcꞌabaꞌ li ras ri̱tzꞌin. 14Cui te̱ba̱nu li cꞌaꞌru ninye e̱re, la̱exak li raro̱kex inban. 15La̱ex ma̱cuaꞌakex chic yal aj cꞌanjel xban nak junak laj cꞌanjel incꞌaꞌ naxnau cꞌaꞌru yo̱ lix patrón. Abanan la̱in xinye e̱re chixjunil li naxye cue lin Yucuaꞌ. Aꞌan naxcꞌut nak raro̱quex inban. 16Ma̱cuaꞌ la̱ex xexsicꞌoc cuu la̱in. La̱in ban xinsicꞌoc e̱ru la̱ex ut xexinxakab chixba̱nunquil li ti̱quilal. Le̱ ti̱quilal incꞌaꞌ ta̱osokꞌ. Ta̱cua̱nk ban chi junelic. Ut lin Yucuaꞌ tixqꞌue e̱re chixjunil li te̱tzꞌa̱ma saꞌ incꞌabaꞌ la̱in. 17Aꞌan aꞌin li yo̱quin chixyebal e̱re nak cherahak e̱rib che̱ribil e̱rib.—
Xicꞌ qui-ileꞌ li Jesús ut xicꞌ ajcuiꞌ teꞌilekꞌ li ralal xcꞌajol
18—Cui la̱ex xicꞌ nequex-ileꞌ xbaneb li incꞌaꞌ nequeꞌpa̱ban, chenauhak nak xbe̱n cua la̱in xicꞌ xineꞌril che̱ru la̱ex. 19Cui ta la̱ex incꞌaꞌ xine̱pa̱b la̱in, raro̱kex raj xbaneb li incꞌaꞌ nequeꞌpa̱ban. Abanan la̱ex ma̱cuaꞌex chic jun saꞌ xya̱nkeb xban nak la̱in xinsicꞌoc e̱ru. Joꞌcan nak xicꞌ nequex-ileꞌ xbaneb. 20Chijulticokꞌ e̱re nak xinye e̱re nak ma̱ jun aj cꞌanjel naxkꞌax ru xcuanquil lix patrón. Cui xineꞌxrahobtesi la̱in, texrahobtesi̱k ajcuiꞌ la̱ex. Cui ta xeꞌxba̱nu li cꞌaꞌru xinye la̱in, teꞌxba̱nu aj raj cuiꞌ li cꞌaꞌru te̱ye la̱ex. 21Texrahobtesi̱k xban nak la̱ex cualal incꞌajol. Teꞌxba̱nu chi joꞌcan xban nak incꞌaꞌ nequeꞌxnau ru li ani quitaklan chak cue. 22Ma̱cꞌaꞌeb raj xma̱c cui ta la̱in incꞌaꞌ xincꞌulun ut cui ta incꞌaꞌ xinye reheb lix ya̱lal. Abanan ma̱cꞌaꞌ cꞌaꞌru teꞌxcol cuiꞌ ribeb xban nak cuanqueb xma̱c. 23Li ani xicꞌ na-iloc cue la̱in, xicꞌ ajcuiꞌ naril lin Yucuaꞌ. 24Ma̱cꞌaꞌeb raj xma̱c cui ta incꞌaꞌ xeꞌril li milagros li xinba̱nu chiruheb, li milagros li ma̱ ani chic naru xba̱nunquil. Abanan eb aꞌan queꞌril li xinba̱nu. Joꞌcan nak xicꞌ niquineꞌril la̱in ut xicꞌ ajcuiꞌ nequeꞌril lin Yucuaꞌ. 25Joꞌcaꞌin xcꞌulman xban nak tzꞌi̱banbil chak retalil saꞌ li chakꞌrab li quiqꞌueheꞌ reheb: Ma̱cꞌaꞌ raj inma̱c, abanan xicꞌ quineꞌril. 26Nak ta̱cha̱lk li Santil Musikꞌej, laj Cꞌojobanel Chꞌo̱l, e̱riqꞌuin aꞌan tixcꞌut chi tzꞌakal lix ya̱lal che̱ru chicuix la̱in. La̱in tintakla chak e̱riqꞌuin li Santil Musikꞌej li nachal riqꞌuin lin Yucuaꞌ. 27Ut la̱ex te̱chꞌolob ajcuiꞌ lix ya̱lal chicuix xban nak la̱ex cuanquex cuiqꞌuin chalen nak xintiquib lin cꞌanjel arin saꞌ ruchichꞌochꞌ.
Currently Selected:
San Juan 15: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.