2 Tesalonicenses 1
1
Xqꞌuebal xsahileb xchꞌo̱l
1La̱in laj Pablo. Cuochben laj Silvano ut laj Timoteo nak yo̱co chixtzꞌi̱banquil li hu aꞌin e̱riqꞌuin la̱ex laj pa̱banel li cuanquex aran Tesalónica. La̱ex rehex chic li Dios li kaYucuaꞌ ut rehex chic li Ka̱cuaꞌ Jesucristo. 2Aꞌ taxak li usilal ut li tuktu̱quilal chicua̱nk e̱riqꞌuin, li naxqꞌue li Dios li kaYucuaꞌ ut li Ka̱cuaꞌ Jesucristo.
Li Ka̱cuaꞌ Jesucristo ta̱cha̱lk chi rakoc a̱tin
3Ex inherma̱n, incꞌaꞌ nakacanab xbantioxinquil chiru li Dios saꞌ e̱cꞌabaꞌ la̱ex. Tento takabantioxi chiru li Dios xban nak yo̱ chi cacuu̱c e̱chꞌo̱l saꞌ le̱ pa̱ba̱l ut kꞌaxal cuiꞌchic nequera e̱rib che̱ribil e̱rib. 4Joꞌcan nak kꞌaxal sa saꞌ kachꞌo̱l chixserakꞌinquil resil le̱ pa̱ba̱l reheb li nequeꞌpa̱ban re li Dios yalak bar. Nakaye reheb chanru nak nequexpa̱ban chi anchal e̱chꞌo̱l ut cau e̱chꞌo̱l nak yo̱quex chixcuybal xnumsinquil li raylal ut li ra xi̱cꞌ. 5Xban nak nequecuy xnumsinquil li raylal nacꞌutun nak li Dios yo̱ che̱tenkꞌanquil. Li Dios ta̱rakok a̱tin saꞌ ti̱quilal. Tento nak te̱cuy li raylal re nak li Dios tixye nak e̱cꞌulub oc saꞌ lix nimajcual cuanquilal ut saꞌ xcꞌabaꞌ ajcuiꞌ aꞌan nak yo̱quex chixcꞌulbal li raylal. 6Kꞌaxal ti̱c xchꞌo̱l li Dios. Joꞌcan nak tixqꞌue raylal saꞌ xbe̱neb li nequeꞌrahobtesin e̱re. 7Abanan la̱ex li yo̱quex chixcꞌulbal raylal, li Dios texqꞌue chi hila̱nc kochben la̱o ut incꞌaꞌ chic takacꞌul raylal. Aꞌin ta̱cꞌulma̱nk nak li Ka̱cuaꞌ Jesucristo tixcꞌutbesi chak rib nak ta̱cha̱lk toj saꞌ choxa. Ta̱cha̱lk rochbenakeb chak lix ángel li cuanqueb xcuanquil. 8Chanchan li rakꞌ xam nak ta̱cha̱lk li Ka̱cuaꞌ Jesucristo riqꞌuin xnimal xlokꞌal chi rakoc a̱tin. Tixqꞌueheb chixtojbal xma̱queb li ani incꞌaꞌ nequeꞌpa̱ban re li Dios joꞌ ajcuiꞌ li ani incꞌaꞌ nequeꞌraj rabinquil resilal li colba-ib li naxqꞌue li Ka̱cuaꞌ Jesucristo. 9Lix tojbal rixeb lix ma̱c li tixqꞌue, aꞌan li sachc chi junelic nak teꞌisi̱k chiru li Ka̱cuaꞌ Jesucristo ut chiru lix nimal xlokꞌal ut lix cuanquilal. 10Chixjunil aꞌin ta̱cꞌulma̱nk saꞌ li cutan nak tol-e̱lk cuiꞌchic li Ka̱cuaꞌ Jesucristo. Saꞌ li cutan aꞌan li Jesucristo ta̱lokꞌoni̱k xbaneb chixjunileb li nequeꞌpa̱ban re. La̱ex cuanquex saꞌ xya̱nkeb aꞌan. Rehex chic li Cristo xban nak ac xepa̱b lix ya̱lal li xkachꞌolob che̱ru. 11Joꞌcan nak junelic nocotijoc che̱rix ut nakatzꞌa̱ma chiru li Dios nak cha̱bilakex taxak re nak e̱cꞌulubak cua̱nc chokꞌ ralal xcꞌajol li Dios. Nakatzꞌa̱ma chiru nak riqꞌuin taxak xnimal xcuanquil, textenkꞌa chixba̱nunquil li us re nak tzꞌakalak re ru le̱ yehom e̱ba̱nuhom saꞌ xcꞌabaꞌ le̱ pa̱ba̱l. 12Nocotijoc che̱rix re nak la̱ex junelic te̱nima xlokꞌal li Ka̱cuaꞌ Jesucristo. Ut la̱ex tex-oxlokꞌi̱k ajcuiꞌ xban nak rehex chic li Cristo. Aꞌ taxak li Dios ut li Ka̱cuaꞌ Jesucristo riqꞌuin xnimal rusilal chitenkꞌa̱nk e̱re re nak joꞌcan taxak chi-uxma̱nk.
Currently Selected:
2 Tesalonicenses 1: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.