1 Timoteo 1
1
Laj Pablo naxtakla xsahil xchꞌo̱l laj Timoteo
1La̱in laj Pablo. Taklanbilin xban li Jesucristo chi cꞌanjelac chiru xban nak joꞌcan quiraj li Dios laj Colol ke. Ut joꞌcan ajcuiꞌ quiraj li Ka̱cuaꞌ Jesucristo li kayoꞌon. 2At Timoteo, yo̱quin chi tzꞌi̱bac a̱cuiqꞌuin. Chanchanat li tzꞌakal cualal nak cuancat xban nak chicuu xapa̱b li Cristo. Chicua̱nk taxak a̱cuiqꞌuin li usilal, li uxta̱n ut li tuktu̱quilal li naxqꞌue li Dios li kaYucuaꞌ ut li naxqꞌue li Ka̱cuaꞌ Jesucristo.
Laj Timoteo tixchꞌolob xya̱lal chiruheb laj pa̱banel re nak incꞌaꞌ teꞌxpa̱b laj balakꞌ
3Nacuaj nak tatcana̱k aran Éfeso joꞌ quintzꞌa̱ma cha̱cuu nak co̱in Macedonia. Tatcana̱k aran re nak ta̱kꞌuseb li yo̱queb chi balakꞌi̱nc saꞌ xya̱nkeb laj pa̱banel. Ta̱ye reheb nak teꞌxcanab xcꞌutbal li incꞌaꞌ ya̱l. 4Ut ta̱ye ajcuiꞌ reheb nak cheꞌxcanabak xcuechꞌinquil rix aniheb lix xeꞌ xto̱naleb xban nak li naꞌleb aꞌan ma̱cꞌaꞌ rosoꞌjic ut ma̱cꞌaꞌ na-oc cuiꞌ. Ta̱ye reheb nak incꞌaꞌ chic teꞌxpa̱b li xeꞌto̱nil naꞌleb. Li naꞌleb aꞌin junes yoꞌoban cuechꞌi̱nc ib naxba̱nu. Incꞌaꞌ nocoxtenkꞌa xba̱nunquil li cꞌanjel qꞌuebil ke xban li Dios. Caꞌaj cuiꞌ li kapa̱ba̱l natenkꞌan ke. 5At Timoteo, lix ya̱lal li cꞌaꞌru yo̱quin chixyebal a̱cue, aꞌan aꞌin. Xcanabakeb li balakꞌi̱nc. Cheꞌxqꞌue ban xchꞌo̱l chixra̱baleb li rech aj pa̱banelil. Ut teꞌxraheb cui teꞌcua̱nk saꞌ ti̱quilal chi ma̱cꞌaꞌak li cꞌaꞌak re ru nachꞌiꞌchꞌiꞌin reheb saꞌ xcꞌaꞌuxeb ut cui teꞌpa̱ba̱nk chi anchaleb xchꞌo̱l. 6Eb aꞌan incꞌaꞌ nequeꞌxqꞌue retal lix ya̱lal aꞌin. Aꞌ chic li ma̱cꞌaꞌ na-oc cuiꞌ nequeꞌxqꞌue xchꞌo̱l chixcuechꞌinquil rix. 7Nequeꞌraj raj xchꞌolobanquil xya̱lal li chakꞌrab. Aj cꞌutul chakꞌrab nak nequeꞌxye rib. Abanan incꞌaꞌ ajcuiꞌ nequeꞌxtau ru li cꞌaꞌru nequeꞌxcꞌut usta chanchan nequeꞌxtau ru chi tzꞌakal li cꞌaꞌru yo̱queb chixyebal.
Tento takanau cꞌaꞌru aj e nak qꞌuebil li chakꞌrab
8La̱o nakanau nak li chakꞌrab cha̱bil cui nakatau ru cꞌaꞌru aj e nak qꞌuebil xban li Dios. 9Joꞌcan nak nacuaj nak te̱qꞌue retal nak li chakꞌrab moco qꞌuebil ta reheb li ti̱queb xchꞌo̱l. Reheb ban li incꞌaꞌ nequeꞌabin ut li nequeꞌkꞌetoc re li chakꞌrab. Reheb ajcuiꞌ li incꞌaꞌ useb xnaꞌleb ut eb laj ma̱c. Reheb ajcuiꞌ li incꞌaꞌ nequeꞌpa̱ban re li Dios chi moco cuanqueb junak xpa̱ba̱leb. Ut reheb ajcuiꞌ laj camsinel ut li nequeꞌxcamsi xnaꞌ xyucuaꞌeb. 10Li chakꞌrab reheb laj coꞌbe̱t laj yumbe̱t ut reheb li nequeꞌma̱cob riqꞌuin rech cui̱nkilal rech ixkilal. Reheb ajcuiꞌ li nequeꞌelkꞌac cristian. Reheb ajcuiꞌ li nequeꞌticꞌtiꞌic ut li nequeꞌxpatzꞌ xcꞌabaꞌ li Dios riqꞌuin yoꞌobanbil a̱tin. Li chakꞌrab reheb chixjunileb li nequeꞌxba̱nu li cꞌaꞌak chic re ru chi ma̱usilal li napoꞌoc ru li katijbal li tzꞌakal ya̱l. 11Li katijbal aꞌan li quicꞌuteꞌ chiku xban li lokꞌlaj colba-ib li naxqꞌue ke li nimajcual Dios, li tenebanbil saꞌ inbe̱n xyebal resilal yalak bar.
Laj Pablo naxbantioxi chiru li Cristo li rusilal
12Ninbantioxi chiru li Ka̱cuaꞌ Jesucristo xban nak aꞌan xcꞌojob xchꞌo̱l saꞌ inbe̱n ut xinixxakab chi cꞌanjelac chiru. Ut aꞌan naqꞌuehoc incuanquil chixba̱nunquil. 13Quixqꞌue cue li cꞌanjel aꞌin usta ac xinmajecua li Jesucristo ut xinrahobtesi eb laj pa̱banel ut xinhobeb. Abanan li Jesucristo quiruxta̱na cuu xban nak toj ma̱jiꞌ ninnau bar cuan li tzꞌakal ya̱l ut toj ma̱jiꞌ ninpa̱ban. 14Ut li Ka̱cuaꞌ Jesucristo numtajenak cuiꞌchic li cuosobtesinquil quixqꞌue. Quixqꞌue inpa̱ba̱l ut quixqꞌue cue li rahoc li nakatau nak junajo chic riqꞌuin li Cristo. 15Nakanau nak tzꞌakal ya̱l ut xcꞌulub nak takapa̱b chi anchal li kachꞌo̱l nak li Cristo Jesús quicꞌulun saꞌ ruchichꞌochꞌ chixcolbaleb laj ma̱c. Ut la̱in li kꞌaxal numtajenak inma̱c saꞌ xya̱nkeb chixjunileb nak quincuan. 16Usta la̱in kꞌaxalin aj ma̱c nak quincuan, abanan li Jesucristo quiruxta̱na cuu re nak tixcꞌutbesi nak kꞌaxal nim lix cuyum re xcuybal xsachbal li ma̱c. Quixcꞌut chiruheb lix nimal lix cuyum nak quixcuy inma̱c la̱in. Aꞌan quiraj nak la̱in tincꞌamok be chiruheb li ani teꞌpa̱ba̱nk re li Jesucristo ut teꞌxcꞌul li junelic yuꞌam. 17Lokꞌoninbil taxak li tzꞌakal Rey li cuan chi junelic kꞌe cutan, li incꞌaꞌ nacam ut incꞌaꞌ na-ilman ru, li junaj chi Dios li numtajenak xnaꞌleb. Chikalokꞌonihak taxak anakcuan ut chi junelic kꞌe cutan. Joꞌcan taxak.
Laj Pablo quixye re laj Timoteo chanru ta̱cꞌanjelak chiru li Dios
18At Timoteo, chanchanat li cualal chicuu nak nacatcuil. Tinqꞌue a̱cue la̱ taklanquil joꞌ queꞌxye li profeta cha̱cuix junxil. Li a̱tin queꞌxye, aꞌan ta̱qꞌuehok xcacuil a̱chꞌo̱l chixba̱nunquil li cꞌanjel qꞌuebil a̱cue. Joꞌcan ut nak yal a̱kꞌe chi cꞌanjelac chiru li Ka̱cuaꞌ. 19Cauhak taxak a̱chꞌo̱l saꞌ la̱ pa̱ba̱l ut ma̱cꞌaꞌ taxak li cꞌaꞌru ta̱chꞌiꞌchꞌiꞌi̱nk a̱cue saꞌ la̱ chꞌo̱l nak yo̱cat chi cꞌanjelac chiru li Dios. Ninye a̱cue aꞌin xban nak cuanqueb li xeꞌxcanab xba̱nunquil li ti̱quil chꞌo̱lej. Incꞌaꞌ queꞌxqꞌue retal li cꞌaꞌru yo̱ chi chꞌiꞌchꞌiꞌi̱nc reheb lix cꞌaꞌux. Ut riqꞌuin aꞌan yo̱queb chixtzꞌekta̱nanquil lix pa̱ba̱leb. 20Saꞌ xya̱nkeb aꞌan cuan laj Himeneo ut laj Alejandro. Ac xinkꞌaxtesiheb saꞌ rukꞌ laj tza re xcꞌajtesinquileb ru re nak incꞌaꞌ chic teꞌxmajecua li Dios.
Currently Selected:
1 Timoteo 1: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.