Mako 1
1
Kwambulula kwa Yowano Muka-kumbwitika
(Mateo 3:1-12; Luka 3:1-18; Yowano 1:19-28)
1Evi vikevyo Vin̄anda Vyavivwa vya ali Yesu Kilistu, Muna Njambi.#1:1 MUNA NJAMBI: Kunungulula kumo lijwi eli, Muna Njambi lyaimo. 2#Mal 3:1 Ngwe mwasonekele Isaya muka-kwimanena ngwendi,
“Njambi nendeka ngwendi,
‘Kengeni njikatuma muluwa wange kulutwe lwove
uje akavwaesa ngila yove.’
3 #
Isa 40:3
Lijwi lya umo atambeka mu mambo ngwendi,
‘Vwaeseni tapalo ya Shukulu Kalunga,
sheveni mu ngila yendi ngeci akwitilemo!’ ”
4Ngecivene, Yowano washolokele mu mambo, wakele nakumbwitika vanu nakwambulula#1:4 NGECIVENE, YOWANO WASHOLOKELE MU MAMBO, WAKELE NAKUmbwitika VANU NAKWAMBULULA: Kunungulula kumo ngwavo, Yowano Muka-kumbwitika washolokele mu mambo, nakwambulula. ngwendi, “Tengulukeni ku vivi vyeni ngeci vamimbwitike, co Njambi akamisambesa ku vivi vweni.” 5Co vanu vavangi vatundile ku lifuti lya Yundeya na ku nganda ya Yelusalema vezile kuli Yowano nakumutolilila. Valitavelele ku vuvi vwavo, co wavambwitikile mu Ndonga ya Yondau.
6 #
2 Vim 1:8
Yowano wazalele vuzalo vwa maaka a kamelo, na mwiva wa cipapa mu mbunda yendi, co walile vimbimba mikumbi na vuki. 7Co wambulwile kuli vanu ngwendi, “Munu ou alinakwija munima yange wakama kutuvakana yange. Kunjapandele nameme kutsikama nakuzitula mikole ya a vin̄aku vyendi embwe. 8Yange njimimbwitika mu mema, oloni ikeye akamimbwitika mu Munzinzime Wakujela.”
Kumbwitika na vyeseko vya Yesu
(Mateo 3:13—4:11; Luka 3:21-22; 4:1-13)
9A matangwa aje vene Yesu watundile ku Nazaleta mu lifuti lya Ngalileya, co Yowano wamumbwitikile mu Ndonga ya Yondau. 10Co vwasi-vwasi omo watumukile mu mema, wamwene lilu linashokoloka, co Munzinzime watundile mwilu watongamene ali ikeye ngwe katela. 11#Kus 22:2; Mya 2:7; Isa 42:1; Mat 3:17; 12:18; Mak 9:7; Luk 3:22 Co mwilu mwatundile lijwi ngwalyo, “Yove u Munange injazema. Njilinakuvwaelela ali yove.”
12Aje vene Munzinzime wamutwalele mu mambo, 13muje mwakakele matangwa makumi awana, nakumweseka kuli Satana. Co wakele amo na tusitu kuje, oloni tungelo vezile nakumukwasa.
Yesu asana vaka-kujevela visi vawana
(Mateo 4:12-22; Luka 4:14-15; 5:1-11)
14Omo Yowano vanamwaka laja mu kamenga, Yesu waile ku Ngalileya nakwambulula Vin̄anda Vyavivwa vya Njambi. 15#Mat 3:2 Wendekele ngwendi, “Simbu yaivwa ineete, co Vumwene vwa Njambi vuli muyehi! Tengulukeni mu vimbunge vyeni ngeci mutunde ku vuvi, co kulaeleni ku Vin̄anda Vyavivwa!”
16Omo Yesu wakele nakushwangesa Lishali lya Ngalileya, wamwene vandolome vavali vaka-kujevela visi, Simoni na ndolome yendi Anduleo, vakele nakutsiya visi mu lishali a linimbwa. 17Yesu wendekele kuli vakevo ngwendi, “Njikaveni, co njikamipwisa vaka-kujevela vanu.” 18Co vwasi-vwasi vasezele manimbwa avo, co vakavele Yesu.
19Omo washwenyeseleko wamwene lalo vandolome vavali, Yakomba na Yowano, vana va Zembendeo. Vakele mu vwato nakutungulula manimbwa avo. 20Co omo Yesu wavamwene, wavasanene, co vasezele ishavo Zembendeo mu vwato amo na vaje vanu vaka-vipangi, co vakavele Yesu.
Munalume muka-munzinzime wakujwala
(Luka 4:31-37)
21Co Yesu na vandongisi vendi vezile mu nganda ya Kapenauma, co a Litangwa Lyakuhwima Yesu wakovelele mu sinangonge washangumukile kulongesa. 22Co vanu vaje vamuzivile vakomokele manene kulongesa kwendi, omwo ikeye kalifwile ngwe valongisi va majwi a Lishiko, oloni ikeye walongesele na moko.
23Aje vene munalume umo wakele na munzinzime wakujwala wakovelele mu sinangonge watambekele ngwendi, 24“Ushaka kulinga vika netu, yove Yesu wa ku Nazaleta? Kuma unaija kuno nakutunyongesa ndi? Njakuzivuka, yove wapwa u muluwa wakujela wa Njambi!”
25Asinoni Yesu washikile uje munzinzime ngwendi, “Oloka kuluu, co tunda muli munu ou!”
26Co uje munzinzime wakujwala wapindisile uje munalume manene, watambekele manene, co watundile muli ikeye. 27Co vanu voshe valikomokelele manene vashangumukile kulyendekesa umo na mukwavo ngwavo, “Vika evi? Oku kunapu kulongesa kwakuhwa ndi? Munu ou ali na moko yakushika minzinzime yakujwala, co ikeyo imwononoka!”
28Co aje vene lutsimo lwa Yesu lwashandokelele mu lifuti lya Ngalileya mwoshe.
Yesu akangwisa vanu vavangi
(Mateo 8:14-17; Luka 4:38-41)
29Co Yesu na vandongisi vendi, amo na Yakomba na Yowano, vatuukile mu sinangonge vaile ku njuvo ya Simoni na Anduleo. 30Vainamweno ya Simoni vavinjile lisika-sika valalele a vulili, co omo Yesu wetele kuje vamulekele vya ali vainamweno ya Simoni. 31Co waileko, wamukwatele ku livoko, wamwindwile. Co lisika-sika lyamutundile, co washangumukile kuvapangela.
32Ku cingwezi akulauka kwa litangwa, vanu vanenele kuli Yesu voshe vaka-kuvinja na vaje vakele na minzinzime yakujwala. 33Co vanu voshe va mu nganda vakungulukilile ku njuvo ya Petulu. 34Co Yesu wakangwisile vavangi vaje vakele nakuvinja mishongo yakuliseza-seza, co watundisile lalo minzinzime yakujwala yaingi. Co katavele minzinzime yakujwala yendeke cuma cimo, omwo ikeyo yamuzivukile.
Yesu ambulula mu Ngalileya
(Luka 4:42-44)
35Co alikaki mutondo-tondo, simbu kanda kukye, Yesu wendukile, co watuukile mu njuvo. Waile mu mambo endi lika nakulombela. 36Oloni Simoni na vasamba vendi vaile nakumushakezeka, 37co omo vamuwanene, vendekele ngwavo, “Vanu voshe valinakukushakezeka.”
38Oloni Yesu wavakumbulwile ngwendi, “Tunapande kuya kulutwe ku membo akwavo akwatako. Njinapande kwambulula kuli vakevo lalo, omwo evi vikevyo vinjezilile.”
39 #
Mat 4:23; 9:35 Ngecivene, wetile mu Ngalileya mwoshe, wambulwile mu masinangonge nakutundisa minzinzime yakujwala.
Yesu akangwisa muka-mbumba
(Mateo 8:1-4; Luka 5:12-16)
40Co munu umo wakele nakuyanda na mushongo wa mbumba wezile kuli Yesu, watsikamene ku mesho endi, co wamulambelelele ngwendi, “Shukulu, nga mushaka, mwasa kunjijelesa.”#1:40 MWASA KUNJIJELESA: Kenga 8:2.
41Yesu wamuzivilile mema ku mbunge, co wolwele livoko lyendi, wamukwatele, wendekele ngwendi, “Njishaka, jela!” 42Co aje vene mbumba yamutundile, co wajelele. 43Asinoni Yesu wamusin̄ikile, co aje vene wamutumine kweka, 44#VaLe 14:1-32 wendekele kuli ikeye ngwendi, “Kesi ulekeko munu umo a cuma eci embwe. Oloni ya ukalisholole kuli muka-kukombelela akakwilule, asinoni ukakombelele n̄ombelo ije yashikile Mosesa, ngweci voshe vakazivuke ngwavo vanakukangwisa.”
45Oloni uje munalume waile, co washangumukile kushandola ije n̄anda kwoshe-ikwoshe. Mwa vushunga vene, wambulwile manene ngeci Yesu kasele kuya mu nganda citona-mesho. Oloni wakele kwendi lika, co vanu vezile kuli lkeye vatundile kwoshe-ikwoshe.
Currently Selected:
Mako 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006