Isaya 1
1
1 #
2 Vim 15:1-7; 15:32—16:20; 18:1—20:21; 2 Miz 26:1—32:33 Cimona ca Isaya#1:1 CIMONA CA ISAYA: Nambe, majwi a Isaya. muna Amoze, cije camwene ca a Yunda na Yelusalema simbu ije omo Uziya, na Yotame, na Ahaze, na Hezekiya vapwile vimyene va mu Yunda.#1:1 VIMYENE VA MU YUNDA: Uziya (783-742 BC), Yotame (742-735 BC), Ahaze (735-715 BC), Hezekiya (715-687 BC).
Njambi aluvalesa vanu vendi
2Shukulu Kalunga wendekele ngwendi, “Lilu na asi, tolilileni ku vije njendeka! Vana vaje njalelele vananjitengulukila. 3Vingombe vazivuka uje wavafuka, na vimulu vazivuka kuje akavalisila shukwainavo. Oloni vanu vange va Isalele kuvazivuka Shukulu yavo. Vanu vange kuvazivuka uje akavalisa.”
4Ngongo yeni, yeni muyati wakuvulumuna, yeni vanu vakulemuwa na vuvi! Yeni naanga ya vaka-kulinga vuvi, vanu vaje vaka-kulinga vyangoco. Munaseza Shukulu Kalunga, Njambi wakujela wa Isalele, co munamukengesa nima. 5Omwo vikajo mulinakunjitengulukila? Mushaka ngeci njimihise lalo manene ndi? Isalele, ku mutwe wove kulilaja vimbandu, co mbunge yove na viyongola vyove vinazeye. 6Kutunda ku mutwe wove kweta ku mendi naamo ali mwamuvwa ai kuli lika mikiki, na tuvimbandu twatundondo na vimbandu vyakama. Vimbandu vyove kuvavikushile nambe kuzengao. Kuvaakeleo mazi.
7Lifuti lyeni linemuka mambo, co vinganda vyeni vanavyenyeka. Vaka-kwija vanamitambula lifuti lyeni oku munavakengelela. 8Yelusalema lika ivanazengeleka vitozi, inapu ngwe cipundo ca muka-kunyunga citungu ca mikolovozi ya vushuka vwa vinyu, nambe ngwe cipundo ca muka-kunyunga lihya lya vinende. 9#Kus 19:24; Lom 9:29 Nga Shukulu Kalunga Muka-nzili yoshe kasezeleo vanu vamo, nga Yelusalema yoshe yanyongele, ngwe muvyanyongele vinganda vya Sondoma na Ngomola.
10Yove Yelusalema, vaka-kushwana vove na vanu vove, vanafu ngwe vanu va mu Sondoma na Ngomola. Tolilila kuli vije vyendeka Shukulu Kalunga. Tolilila vije vyakulongesa Njambi yetu. 11Ikeye alinakwendeka ngwendi, “Kuma yeni munayongola ngweni njishaka vin̄ombelo vyoshe evi mulinakukombelela kuli yange ndi? Yange njinapwisamo na vin̄ombelo vya kwenyeka vya vimanga, na mazi a vimuna veni vakununa. Yange kunjivwaelela na maninga a vingombe va nkomba, na maninga a vimanga, naa a vimembe. 12Iyajo namishika ngeci munjinenele vyuma vyoshe evi omo mwija nakunjilemesa? Iyajo namileka ngeci mulyatangele mu Njuvo yange? 13Cinapu cangoco kunena vin̄ombelo vyeni. Njilinakuziva vunyengwe a insense muli nakwenyeka. Viwano vyeni vya Kutenama kwa Ngonde, na Matangwa Akuhwima eni, na viwano vyeni vya vuNjambi, vyoshe vinaviya na vuvi vweni. 14#Amo 5:21-22 Yange njazinda Viwano vyeni vya Kutenama kwa Ngonde na matangwa eni akujela, vinapu vyuma vije vinanjipese manene.
15“Omo mujundula mavoko eni mukulombela, kunjikamikenge embwe, nambe mulombela malombelo amangi-mangi, kunjikamizivi, omwo mavoko eni anashulu na maninga. 16Lijweleseni yeni vavenya ngeci mujele. Likeleni vuvi vwoshe ovu njilinakumona vumulinakulinga. Eyo, likeleni kulinga vuvi, 17lilongeseni kuyoya mwamuvwa. Moneni ngeci vushunga vulinakulingiwa, kwaseni vaje valinakuyanda, aneni visiwa vije vyavapande, co nyungeni vifwile.”
18Shukulu Kalunga alinakwendeka ngwendi, “Ijeni tulizivasane. Nambe vuvi vweni vuvenga ngengu, oloni vukatoka too ngwe mema akukonda. Nambe vuvi vweni vuvenga ngengu, oloni vukatoka too ngwe memba. 19Nga mukanjononoka, co mukalya vyuma vyavivwa vije vikamena mu lifuti. 20Oloni nga munjivyana nakunjikengesa nima, co vitozi vakaminyongesa. Yange Kalunga, njinendekamo.”
Nganda ya vuvi
21Nganda ije yapwile ya kulongwa ololo inalifu ngwe cikwizi! A simbu yalaja, mu nganda omu mwakele vanu vaka-vushunga, oloni ololo munasala lika vanu vaka-kutsiya. 22Yelusalema simbu yalaja wafwile ngwe siliva oloni ololo unapu uwangoco, wapwile ngwe vinyu vyavivwa oloni ololo unapu u mema lika. 23Vantwama vove vananjiyengula, co vanalikwata vusamba na vanu va muuka, simbu yoshe valinakutambula wana vwavungi na mazika-kanwa. Kuvesi kwamena visiwa mu vimbanja nambe kutolilila omo vifwile vambulula milonga yavo.
24Ngecivene, ololo tolilila kuli vije vyendeka Shukulu Kalunga Muka-nzili yoshe, Njambi ya Isalele muka-kushwana wa nzili ngwendi, “Njikalinga shambandinga ali yeni vitozi vange, co kumukanjinenela lalo tuyando. 25Njikakunyanyamesa nakukujelesa ngwe muvakavwaesa vutale, co njikatundisa vuvi vweni vwoshe. 26Yelusalema njikakwana vaka-kushwana na vaka-kunangula ngwe vaje vawakele navo ku san̄ulu. Asinoni lizina lyove lyaliha likapwa ‘Nganda yakushungama na kulongwa.’ ”
27Omwo Shukulu Kalunga wapwa wa vushunga, akamena Yelusalema na vanu voshe vaje valimo vaje vatenguluka. 28Oloni vaka-kutengulukila na vaka-vuvi vakavanyongesa voshe, na vaje vavyana Shukulu Kalunga vakavanyongesa.
29Ukaziva shwamwa omwo walemesele miti nakukuna vitungu vyakujela. 30Ukapwa ngwe muti wa oke wakujujwama, nambe ngwe citungu cakwona kutukumwina mema. 31Ngwe vulimu vwenya na tuhya twa vishashe, ngecivene, vantwama vove vaka-nzili vilinga vyavo vya vuvi vikavanyongesa, co naumo wai akavakwasa omo vanyonga.
Currently Selected:
Isaya 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006