Kulava 36
36
Vushwana vwa vanakazi vakushomboka
1Vantwama va ku cikota ca Ngilyande muna Makile, mutekulu wa Manase muna Yosefa, vaile kuli Mosesa, na kuli vantwama va vanu va Isalele. 2#Kul 27:7 Vendekele ngwavo, “Mwane, omo Shukulu Kalunga washikile kupangezela lifuti kupwa vushwana vwa vanu va Isalele akuta n̄ela, ikeye lalo wakushikile kwana vushwana vwa ndolome yetu Zelofehande kuli vana vendi va vanakazi. 3Oloni nga vakashomboka ku vanalume va miyati yeka kesi ya vanu va Isalele, co vushwana vwavo vakavutundisa ku vushwana vwa vakukulwila vetu, nakuvunungulwila ku miyati ije vakashombokela. 4Co omo Mwaka Wakuliilwisila wa vanu va Isalele weta, vushwana vwavo vakavunungulwila ku vushwana vwa miyati ije vakashombokela, co vushwana vakavutundisa ku vushwana vwa muyati wa vakukulwila vetu.”
5Ngecivene, akushika kwa Shukulu Kalunga Mosesa waanene lishiko eli kuli vanu va Isalele ngwendi, “Evi vanendeka vatekulwila va Yosefa vinapu vya vushunga. 6Evi vikevyo vyanashiki Shukulu Kalunga vana va vanakazi va Zelofehande ngwendi, valishombokele ku vanu vaje vavanashaka, oloni kuvanga va mu naanga ya ishavo. 7Kukwesi vushwana navumo vwai vwa vanu va Isalele vukatunda ku muyati umo nakuvunungulwila ku muyati ukwavo, co vanu va Isalele vakakakateye kunyunga vushwana vwa vaishavo. 8Co vana va vanakazi voshe vaje vashwana vushwana mu muyati umo wa vanu va Isalele vakashomboke ku vanalume vaje va mu naanga ya muyati wa vaishavo, ngeci vanu va Isalele vakashwane munu na munu vushwana vwa vakukulwila vendi. 9Mu ngila eyi vushwana navumo vwai vukatunda ku muyati umo, nakuvunungulwila ku muyati ukwavo, co miyati yoshe ya vanu va Isalele vakakakateye nakunyunga munu na munu vushwana vwendi vavenya.”
10Ngecivene, vana va Zelofehande, valingile ngwe muje mwashikile Shukulu Kalunga kuli Mosesa. 11Co Mahela, na Tileza, na Hongela, na Mileka, na Nowa, vana va Zelofehande va vanakazi, vashombokele kuli vashonyavo va ku vuyishe ngwe muje mwashikile Shukulu Kalunga kuli Mosesa. 12Vashombokele ku vikota vya vatekulwila va Manase muna Yosefa, co vushwana vwavo vavunyungilile vene mu muyati wa ishavo.
13Awa akewo mashiko na vilongesa vije vyashikile Shukulu Kalunga kuli Mosesa ali vanu va Isalele mu vyana vya Mowavi ku Ndonga ya Yondau vyalishungama na Yeliko.
Currently Selected:
Kulava 36: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
