Kulava 35
35
Vinganda vivaanene kuli vaLevi
1Shukulu Kalunga wendekele kuli Mosesa mu vyana vya Mowavi mu ngangela ya Ndonga ya Yondau yashungama na Yeliko ngwendi, 2“Shika vanu va Isalele ngwove, ku vushwana vuje vakatambula, vanapande kwanako vinganda vimo vaLevi ngeci vakalemo amo na mutambela wa mwila wauvwa uje unazengeleka vinganda. 3Co vinganda vije vikapwa vya vaLevi, vakevo vakakalamo, na mutambela wa mwila wauvwa wakulila vingombe vavo na vimuna vavo voshe. 4Co mutambela wa mwila wauvwa ukatunda ku civumbe ca nganda kulava mamita 450 mu mitambela nomu nomu mwoshe muwana. 5Ngecivene, seteko ikapwe amolika mamita 900 mu mitambela mwoshe, co nganda ikakale mukati. 6Munapande kwana kuli vaLevi vinganda vitanu na imo mwakutewela vaka-kuvulumuna nga munu natsii mukwavo na cintulu. Vaaneni vinganda vikwavo makumi awana na vinganda vivali. 7Vinganda vyoshe kuvikumbasana vikapwe makumi awana na vinganda vitanu na vitatu, amo na mutambela wa mwila wauvwa. 8#Yos 21:1-42 Vinganda vya vushwana vwa vanu va Isalele vimukaana kuli vaLevi vinapande kupwa ku vungi vwa muyati wa vanu na kuvundondo vwa muyati wa vanu. Ku muyati wa vanu vavangi vakaane vinganda vyavingi, co ku muyati wa vanu vavandondo vakaane vinganda vyavindondo.”
Vinganda mwakutewela
(Kwi 19:1-13; Yos 20:1-9)
9Shukulu Kalunga wendekele kuli Mosesa ngwendi, 10“Endeka kuli vanu va Isalele ngwove, omo mukajavuka Ndonga ya Yondau nakukovela mu lifuti lya Kanana, 11munapande kwangula vinganda mwakutewela muje munu asa kukavandamo omo natsii munu na cintulu. 12Co akakala mwamuvwa omwo natewa kuli vavushoko vwa uje munu yanatsii na cintulu, vaje valinakushaka kumulinga shambandinga. Munu uje natsii mukwavo kesi vamutsiye kuvanga vanamusompo ku mbunga ya vanu va Isalele. 13Mukaangula vinganda vitanu na imo kupwa vinganda mwakutewela, 14vinganda vitatu vikakale mu ngangela ya Yondau, co vinganda vitatu lalo vikakale mu lifuti lya Kanana kupwa vinganda mwakutewela. 15Vinganda evi mukavinyunga vikapwe vyakutewela vanu va Isalele, na vaka-kwija, amo na vangenzi vaje vali akati keni, ngeci nga munu natsii mukwavo na cintulu, ase kutewelamo.
16“Oloni nga munu napupisile mukwavo na citwa ca cikuvo ngeci natsi, co ikeye ali na mulonga wakutsiya, co nendi vakamutsiye. 17Co nga namwashele limanya, co uje munu atsa, uje namwashele ali na mulonga wakutsiya, co nendi vakamutsiye. 18Nambe nga nakwatele citi, co amupupisaco, co uje munu atsa, uje namupupile ali na mulonga wakutsiya, nendi vakamutsiye. 19Co kavushoko wa a mbunge wa uje mutsi, ali na moko yakutsiya uje natsii mukwavo. Omo amuwana, co amutsiye.
20“Nga munu wazinda mukwavo, co amuvandelela nakumuwisila asi, co amutsiya, 21nambe amupupa n̄ome, munu wa cifwa eci ali na mulonga wakutsiya, nendi vakamutsiye. Co kavushoko ka uje mutsi ali na moko yakutsiya uje natsii mukwavo. Omo amuwana, co amutsiye.
22“Oloni nga munu asindika mukwavo na cintulu ikeye kamuzindile, nambe asha cuma cimo, ikeye kamuvandelele. 23Nambe a kukengezeka omo munu asha limanya, co likwata munu uje kayongwele kuvulumuna, co ikeye kapwile citozi cendi embwe. 24Co a vin̄anda vya cifwa cangacije, mbunga ikasompe nakutetela uje munu natsii mukwavo na cintulu, ngwe ku mashiko awa. Oloni kesi vakatetele vavushoko vwa uje mutsi vaje vashaka kumulinga shambandinga embwe. 25Mbunga ikaamene uje munu ali na mulonga wakutsiya na cintulu kuli vavushoko vwa uje mutsi, co vakevo vakamwilwisile mu nganda yakutewela ngeci akavandemo. Ikeye napande kukala muje noo Muka-kukombelela Wakama, uje ivavwavesele na mazi akujela natsi. 26Oloni nga uje natsiile munu na cintulu atunda mu nginga ya nganda yendi yakutewela muje mwanatewelele, 27nga kavushoko ka uje mutsi amuwana, co amutsiya, uje muka-kulinga shambandinga kakakala na mulonga wakutsiya uje munu. 28Uje munu muka-mulonga wakutsiya napande kutumbama mu nganda yakutewela noo Muka-kukombelela Wakama natsi, cooni omo Muka-kukombelela Wakama natsi laja ikeye nasa kwiluka ku lifuti lya vushwana vwendi. 29Mashiko awa vaemikila yeni, na vatekulwila veni kwoshe kumukakala.
30 #
Kwi 17:6; 19:15 “Woshe uje atsiya mukwavo munu, nendi vakamutsiye avukaleo vwa vanu vavali nambe kutuvakana, oloni vukaleo vwa munu umolika kuvwapwilemo kuwanena munu mulonga ngeci atse. 31Muka-kutsiya nendi napande kutsa. Kesi mukatambule ndando yakukula mwonyo wa muka-kutsiya embwe, ikeye napande kutsa. 32Nga munu natewela mu nganda yakutewela, kesi mumutave alipatule eluke kwimbo lyavo simbu kanda Muka-kukombelela Wakama atse. 33Nga mukalinga ngacije, co mukajwalesa mu lifuti muje mumuli nakukala. Kwitila maninga kukajwalesa mu lifuti, co kukwesi ngila yeka lalo yakujelesa mu lifuti muje vanatsiila munu kuvanga maninga a uje munu natsii mukwavo. 34Kesi mukajwalese mu lifuti muje mumuli nakukala, omwo yange njapwa Kalunga, co njilinakukala akati ka vanu va Isalele.”
Currently Selected:
Kulava 35: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
