Kulava 32
32
Miyati ya vanu vaje vatungile mu ngangela ku Yondau
(Kwi 3:12-22)
1Miyati ya Luvena na Ngande vakele na vimuna vavangi manene. Co omo vamwene vuvwa vwa lifuti lya Njazele, na Ngilyande kulilamo vingombe, 2vaile kuli Mosesa, na Elyazale muka-kukombelela, na kuli vantwama va mbunga ya vanu va Isalele vendekele ngwavo, 3“Vinganda vya Atalote na Ndimboni na Njazele na Nimela na Heshevone na Simbema na Nembo na Mbeone, 4vili mu lifuti lije lyanakwasa Shukulu Kalunga vaIsalele ngeci vakalemo. Linapu lifuti lyalivwa kulilamo vimuna, co vangamba vove vakala na vimuna vavangi. 5Mwane, nga tunawana kutetela ku mesho eni, tulomba mutwaneko lifuti eli lipwe vufuko vwetu, co kesi mutujavwisile musambwa ya Ndonga ya Yondau nakukatunga muje embwe.”
6Oloni Mosesa wavakumbulwile ngwendi, “Kuma yeni mwashaka kusala muno, oku vavushoko vweni vaIsalele valinakuya ku nzita ndi? 7Omwo vikajo mwonwesa vanu va Isalele kujavuka Ndonga ya Yondau nakuya ku lifuti lije lyanavana Shukulu Kalunga? 8Omu mukemwo muvalingile vaishweni omo njavatumine ku Kandeshe Mbaleneya nakunenga lifuti. 9#Kul 13:17-33 Omo vaile nakweta ku Cana ca Eshekole, vamwene lifuti, oloni omo velukile, vonwesele vimbunge vya vanu kukakovela mu lifuti lije lyavanene Shukulu Kalunga. 10Co Shukulu Kalunga waluvalele a litangwa lije vene, walisingile ngwendi, 11‘Mwa vushunga, omwo vanu ava kuvanjononokele na vimbunge vyavo vyoshe, naumo wai wa ali vakevo, uje ali na myaka makumi avali nambe kutuvakana, vaje vatundile mu Ingito, akakovele mu lifuti lije linjakulaesele Avilahama, na Isake, na Yakomba. 12Naumo wai akakovelamo, kuvanga Kalembi muna Njefune kaKeni, na Yoshwa muna Nune, omwo vakevo vononokele Shukulu Kalunga, na vimbunge vyavo vyoshe.’ 13#Kul 14:26-35 Co Shukulu Kalunga waluvalele na vanu va Isalele, wavendanganesele mu mambo myaka makumi awana, noo cisemwa coshe cije calingile vuvi ku mesho a Shukulu Kalunga vanyongele. 14Co yeni munengi mu mwela wa vaishweni, cisemwa caciha ca vanu vavavi vaje vashaka kunena vukalu vwa Shukulu Kalunga ali vanu va Isalele. 15Nga yeni vanu va Luvena, na Ngande muvyana kumukava, co Shukulu Kalunga akaseza vanu ava mu mambo, co yeni mukakala na mulonga wakunyongesa kwa vanu voshe ava.”
16Co vanu va Luvena, na vanu va Ngande vaile kuli Mosesa vendekele ngwavo, “Akulivanga, tutave tutungile vimuna vetu matanga a mamanya, na membo a vimpaka mwakunyungila vanakazi vetu na vana vetu. 17Asinoni tukalivwaesa nakuya na vakwetu vaIsalele ku nzita nakutwamenena nzita noo tukavetesa mu lifuti lyavo. Co a simbu ino, vana vetu vakakala kuno mu membo a vimpaka, kutewa vanu va lifuti lino. 18Kutukeluka lalo ku membo etu noo vaIsalele voshe vanatambula munu na munu vushwana vwendi. 19Kutukatambulako lalo vufuko kuli vakevo musambwa ya Yondau omwo tunatambula laja vufuko vwetu muno mu ngangela ya Yondau.”
20Co Mosesa wavakumbulwile ngwendi, “Nga evi vimunendeka vinapu vya vushunga, cooni lipakateni vitwa vyeni vya nzita muye ngwe mumunakulaesa ku mesho a Shukulu Kalunga. 21Co vanalume voshe vaka-kulwa nzita vakajavuka Yondau akushika kwa Shukulu Kalunga noo Shukulu Kalunga nafungulula vitozi vendi voshe. 22Co omo Shukulu Kalunga akafungulula lifuti, asinoni mukeluka kuno, co kumukakala na mulonga kuli Shukulu Kalunga, na kuli vakweni vaIsalele. Asinoni Shukulu Kalunga akamitava ngeci eli lifuti lili mu ngangela ya Yondau linapu lyeni. 23Oloni nga kumunyungu cikulaeso ceni, co munalingi vuvi ku mesho a Shukulu Kalunga. Kesi muvulumune, co vakamihisa a vuvi vweni. 24Ngecivene, tungeni membo a vana veni, na matanga a vimuna veni, oloni lingeni ngwe mumunakulaesa!”
25Co vanu va Ngande, na vanu va Luvena vendekele kuli Mosesa ngwavo, “Mwane, vangamba vove vakalinga ngwe muunatushiki. 26Vanakazi vetu, na vana vetu, na vingombe vetu, na vimanga vetu vakasala kuno ku membo a mu Ngilyande. 27Oloni yetu voshe vangamba vove tunalivwaesela cimweja kuya ku nzita, ngwe mwanatushiki Shukulu Kalunga. Tukajavuka Yondau nakulwa, ngwe muunendeka.”
28Ngecivene, Mosesa waanene mashiko awa kuli Elyazale muka-kukombelela, na kuli Yoshwa muna Nune, na kuli vantwama va Isalele. 29Co Mosesa wendekele kuli vakevo ngwendi, “Nga vanu va Ngande, na vanu va Luvena vanalivwaesela cimweja kujavuka nakuya musambwa ya Yondau ku nzita amo neni ngwe mwanashiki Shukulu Kalunga, nga vakamikwasa kufungulula lifuti, co mukavana lifuti lya Ngilyande kupwa vufuko vwavo. 30Oloni nga vanu va Ngande, na vanu va Luvena kuvakajavuka musambwa ya Yondau na kuya ku nzita amo neni, co vakevo vakatambule vufuko vwavo mu lifuti lya Kanana amo neni.”
31Co vanu va Ngande, na vanu va Luvena vamukumbulwile ngwavo, “Mwane, tukalinga ngwe mwatushikile Shukulu Kalunga. 32#Yos 1:12-15 A lishiko lya Shukulu Kalunga tukajavuka musambwa ya Yondau nakukovela mu lifuti lya Kanana na vitwa vya nzita, oloni tukashwana vushwana vwetu musambwa lino lya Yondau mu ngangela.”
33Ngecivene, Mosesa wapangelele vanu va Ngande, na vanu va Luvena, na litambelo limo lya muyati wa Manase lifuti lyoshe lya Mwene Sihone wa vaAmoli, na lifuti lya Mwene Onge wa ku Mbashane, amo na membo na mitambela yoshe yazengelekele membo aje. 34Co vanu va Ngande vatungulwile vimpaka vya membo a ku Ndimboni, naa a ku Atalote, naa a ku Aloele, 35naa a ku Atalote Shofane, naa a ku Njazele, naa a ku Njongambeha, 36naa a ku Mbete-Nimela, naa a ku Mbete-Halame, amo na matanga a vimanga. 37Vanu va Luvena vatungulwile Heshevone, na Elyale, na Kilyataime, 38na Nembo, na Mbale Meone, na Simbema, oloni vatengulwile lika lizina lya Mbale Meone. Co valukile mazina amaha ku membo aje avatungulwile.
39Co vatekulwila va Makile muna Manase vakalwisile lifuti lya Ngilyande, valitambwile nakushekamo vaAmoli vaje vakelemo. 40Ngecivene, Mosesa waanene lifuti lya Ngilyande kuli Makile muna Manase, co vakevo vatungilemo. 41Njaile, mutekulwila wa Manase walwile nakufungulula membo amo nakuwaluka ngwendi, “Membo a Njaile,” 42Nomba walwile nakufungulula Kenate na membo amwo, co waalukile Nomba ngeci mwa lizina lyendi.
Currently Selected:
Kulava 32: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
