Kulava 31
31
Shambandinga ali vaMindyani
1Shukulu Kalunga wendekele kuli Mosesa ngwendi, 2“Linga shambandinga kuli vaMindyani omwo a vije valingile kuli vanu va Isalele. Omo unamanesa kulinga vyoshe evi, co ukatsa.”
3Ngecivene, Mosesa wendekele kuli vanu va Isalele ngwendi, “Lipakateni vingonga ngeci vanalume voshe vaye ku nzita, vakalwe na vaMindyani mukalingile shambandinga Shukulu Kalunga ali vakevo. 4Ku muyati umo na umo wa Isalele kutunde vanalume 1,000 vaye ku nzita.”
5Vanalume 1,000 vaangukile ku muyati na muyati, co vungi vwavo vapwile vanalume 12,000 valipakatele vingonga vyavo. 6Mosesa wavatumine ku nzita amo na muka-kushika Finehase muna Elyazale muka-kukombelela. Finehase ikeye wambatele vivala vyakujela, amo na malupembo akwimba kashashutwiya. 7Co valwisile vaMindyani, ngwe muje mwashikile Shukulu Kalunga kuli Mosesa, co vatsiile vanalume voshe, 8amo na vimyene vatanu va vaMindyani, Mwene Evi, na Mwene Lekeme, na Mwene Zule, na Mwene Hule, na Mwene Lemba. Co vatsiile lalo na Mbalame muna Mbeole na moko ya mukwale.
9Co vanu va Isalele vafungulwile vanakazi va vaMindyani amo na vanike, vambatele vingombe vavo vyoshe na matanga a vimanga vavo oshe, co vapukwile vufuko vwavo vwoshe, 10venyekele vinganda vya vaMindyani vyoshe, na vilombo vyavo vyoshe. 11Ngecivene, vanu va Isalele vambatele vyoshe vije vapukwile na vije vafungulwile, amo na vinzinda na vimuna. 12Asinoni vavinenele kuli Mosesa, na Elyazale muka-kukombelela, na ku mbunga ya vanu va Isalele, vaje vakele mu cilombo mu vyana vya vaMowavi musambwa ya Ndonga ya Yondau vyashungama na Yeliko.
Mashwalale veluka kwimbo
13Mosesa na Elyazale muka-kukombelela, na vantwama voshe va mbunga ya vanu va Isalele vatuukile mu cilombo nakuliwana na mashwalale. 14Co Mosesa waluvalesele manene vamyata va mashwalale, na vaka-kushika mashwalale 1,000 na vaka-kushika mashwalale 100, vaje velukile ku nzita. 15Mosesa wavehwile ngwendi, “Omwo vikajo mwasezelao vanakazi voshe ava vayoye? 16#Kul 25:1-9 Anukeni ngweni ava vakevo vanakazi vaje vakavangeyeye vilongesa vya Mbalame ku Peole vakevo vene vashongangeyeye vanu va Isalele ngeci vonwele kulemesa Shukulu Kalunga. Eci cikeco cuma canenesele mushongo wakulitambwisa akati ka vanu va Shukulu Kalunga. 17Ngecivene, ololo tsiyeni vakwenje voshe, na vanakazi voshe vaje valimono laja na vanalume, 18oloni vambanda voshe vaje kanda valimone na vanalume vanyungeni. 19Oloni yeni voshe munatsii vanu, nambe vaje vanakwata a civimbi, munapande kukala anja ya cilombo matangwa atanu na avali. Co lijeleseni a litangwa lyamucitatu, na a litangwa lyamucitanu na avali amolika na vaje vinzinda munakafungulwile. 20Munapande kujelesa vuzalo vwoshe na vyuma vyoshe vije vinalingiwa na cilambu, na vya maka a membe, nambe vya viti.”
21Asinoni Elyazale muka-kukombelela wendekele kuli vanalume vaje velukile ku nzita ngwendi, “Evi vikevyo vilongesa vyashikile Shukulu Kalunga kuli Mosesa ngwendi, 22ngolinde, na siliva, na vunengu, na cikuvo, na vutale vwa citasu, na vutale vwa shumbu, 23na vyuma vyoshe vije kuvyenye ku tuhya, viitiseni mu tuhya, co vikapwa vyakujela. Nameme ngoco mukavijelesa lalo na mema akujelesa, oloni coshe cije kucasa kwita mu tuhya, co mukacijelesa na mema akujelesa. 24A litangwa lyamucitanu na avali munapande kukusha vuzalo vweni, co mukajela, asinoni mukakovela mu cilombo.”
Kulipangela vyakupukula
25Shukulu Kalunga wendekele kuli Mosesa ngwendi, 26“Yove na Elyazale muka-kukombelela amo na vantwama va mbunga ya vanu va Isalele, munapande kulava vyuma vyoshe vije vanafungulwile, amo na vinzinda na vimuna. 27Co angununa vije munafungulwile mu mitambela ivali, mutambela umo wa mashwalale, co mutambela ukwavo wa mbunga yoshe. 28Co ku mutambela uje wakundama ku mashwalale, ku vinzinda 500 ambatako cinzinda umo, cuma cimolika na ku vingombe, na ku vimulu, na ku vimanga, na ku vimembe kupwa mulambu wa Shukulu Kalunga. 29Vyaneni kuli Elyazale muka-kukombelela kupwa mulambu wa Shukulu Kalunga. 30Co ku litambelo lyasala kuli vije munaana kuli vanu va Isalele, ku makumi atanu ambateniko cinzinda umo, na ku vingombe, na ku vimulu, na ku vimanga, na ku vimembe. Co vyaneni kuli vaLevi vaje vaka-kunyunga Mbalaka ya Shukulu Kalunga.” 31Ngecivene, Mosesa na Elyazale muka-kukombelela valingile ngwe muje mwavashikile Shukulu Kalunga.
32Vyuma evi vikevyo vakafungulwile mashwalale ku nzita vyapwile vimanga na vimembe 675,000, 33na vingombe 72,000, 34na vimulu 61,000, 35na vambanda vaje kanda valimone na vanalume 32,000. 36Litambelo lije lyakundamene ku mashwalale vaje vaile ku nzita lyapwile vimanga, na vimembe 337.500, 37co mulambu wa Shukulu Kalunga wa vimanga, na vimembe wapwile 675. 38Vingombe vapwile 36,000, co mulambu wa Shukulu Kalunga wa vingombe wapwile 72. 39Vimulu vapwile 30,500, co mulambu wa Shukulu Kalunga wa vimulu wapwile 61. 40Vambanda vaje kanda valimone na vanalume vapwile 16,000, co mulambu wa Shukulu Kalunga wa vambanda vaje kanda valimone na vanalume wapwile 32. 41Ngecivene, Mosesa waanene kuli Elyazale muka-kukombelela mulambu uje wapwile mutambela wa Shukulu Kalunga, ngwe muje mwashikile Shukulu Kalunga kuli Mosesa.
42Vije vivatambwile mbunga ya vanu va Isalele vyapwile amolika na vije vivatambwile mashwalale. 43Vyapwile vimanga na vimembe 337,500, 44na vingombe 36,000, 45na vimulu 30,500, 46na vambanda vaje kanda valimone na vanalume 16,000. 47Co ku makumi atanu Mosesa wambateleko cinzinda umo, na ku vimuna, ngwe muje mwashikile Shukulu Kalunga, co wavyanene kuli vaLevi vaje vakele nakunyunga Mbalaka ya Shukulu Kalunga.
48Asinoni vamyata vaje vakele nakushika mashwalale vaile kuli Mosesa 49vendekele ngwavo, “Mwane, vangamba vove vanalava mashwalale vaje vali mwisi yakushika kwetu, co naumo wai nazimbalao akati kavo. 50Ngecivene, tunanena mulambu wa Shukulu Kalunga, uje munu na munu nakawanene, wa vyuma vya ngolinde vyakutaleka, na tunzeya, na vimbilingwa, na sungu, nakulyambesa yetu vavenya ku mesho a Shukulu Kalunga.” 51Co Mosesa, na Elyazale muka-kukombelela vatambwile ngolinde ije yoshe yakele na cifwa cakutaleka. 52Mulambu woshe wa ngolinde uje valambwile vamyata vakele nakushika mashwalale wapwile makilo 200. 53Co vaje kuvapwile vamyata, vakevo vatulikile vije vakapukwile. 54Ngecivene, Mosesa, na Elyazale muka-kukombelela vambatele ngolinde nakuyitwala ku Mbalaka Mwakuliwanena ngeci Shukulu Kalunga anyunge vanu vaIsalele.
Currently Selected:
Kulava 31: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
