Kwituluka mu Mashiko 24
24
Kukondola na kwambata
1 #
Mat 5:31; 19:7; Mak 10:4 “Nga munalume ambata munakazi, co kulutwe kakamushaka omwo nawana cuma cimo ca shwamwa ali ikeye, co akamusonekele mukanda wakumukondola. Amwanewo ikeye vavenya mu livoko lyendi, co akamusheke a njuvo yendi. 2Co nga uje munakazi natundu ku njuvo ya uje munalume akalishombokela kweka, 3nga uje munalume wendi wamucivali kamushaka, co akamusonekele mukanda wakumukondola nakumwanawo ikeye vavenya mu livoko lyendi nakumusheka a njuvo yendi. Nambe nga uje munalume wendi wamucivali atsa, 4co munalume wendi uje wamwambatele akulivanga uje wamukondwele, kakasa lalo kumwambata embwe, omwo ikeye nalijwalesa laja. Nga akamwambata lalo, co cikapwa ca vunyengwe ku mesho a Shukulu Kalunga. Kesi mukalinge lalo vuvi vwa cifwa cangacije mu lifuti lije lyanamyana Shukulu Kalunga Njambi yeni.
Mashiko akuliseza-seza
5“Omo mukwenje nambata munakazi wendi ololo, kesi aye ku nzita embwe nambe ku vipangi vyeka vya mbunga. Vamwane lisesa mwaka woshe wamutunu, ngeci akale embo nakuvwaelela amo na munakazi wendi.
6“Omo ukumwisa munu cuma cimo, co kesi ukambate mamanya akulolela vunga kupwa cishimbikiya, omwo eci cinapu kumwonwesa ngila yakuyoyeselamo naanga yendi.
7 #
Kut 21:16
“Nga munu ayiva mukwavo kaIsalele nakumupwisa ndungo nambe kumulandesa ku vundungo, vamutsiye. Mu ngila eyi mukatundisa vuvi ovu akati keni.
8 #
VaLe 13:1—14:54
“Linyungeni ku mushongo wa a cikonde wakulitambwisa. Nyungeni vyoshe vije vivamileka vaka-kukombelela vaLevi ngwe munjavashikile. 9#Kul 12:10 Anukeni vije vyalingile Shukulu Kalunga Njambi yeni kuli Milyamu a ngila, omo mwatundile ku Ingito.
10“Omo mukakumwisa mukweni cuma cimo, kesi mukalikovelele mu njuvo yendi nakulinonela cishimbikiya. 11Mukavandamena anja, co munu uje imunakumwisa akanena ikeye vavenya cishimbikiya. 12Nga ikeye kautu, kesi mukalitulikileco noo alikaki embwe. 13#Kut 22:26-27 Mwilwisilenico simbu ya cingwezi ngeci akalale oku nalifwiki. Co akamishangazala, co cikapwa cuma cacivwa ku mesho a Shukulu Kalunga Njambi yeni.
14“Kesi mukanyanyamene kautu, na ngamba wa uje mwakumwine, nambe mukweni kaIsalele, nambe muka-kwija uje ali mu nganda yeni. 15#VaLe 19:13 Mukamufwete fweto yendi ya a litangwa na litangwa omo litangwa kanda litoke, omwo ikeye kautu, co naakao mbunge, kutewa akalinyenyetela kuli Shukulu Kalunga, co mukakala na mulonga wa vuvi.
16 #
2 Vim 14:6; 2 Miz 25:4; Ezek 18:20 “Visemi kuvapandele kutsila vuvi vwa vana vavo, co lalo vana vavo kuvapandele kutsila vuvi vwa visemi vavo embwe. Munu na munu napande kutsila vuvi vwendi.
17“Kesi mukaengese n̄anda ya vaka-kwija nambe ya visiwa, nambe kwambata cikoveyo ca fwile kupwa cishimbikiya embwe. 18#Kut 23:9; VaLe 19:33-34; Kwi 27:19 Oloni anukeni ngweni neni mwapwile mu vindungo mu Ingito, co Shukulu Kalunga Njambi yeni wamikulile. Ngeci njinamyana lishiko eli.
19“Omo mukateja vimbuto vyeni mu lihya, co mwivala lyanda limo mu lihya, kesi mukaliilukile kukalishaka. Oloni lisezeleni vaka-kwija, na visiwa, na vifwile, ngeci Shukulu Kalunga Njambi yeni akamivezikise mu vyuma vyoshe vimukalinga. 20Omo mukapapa ku miti yeni ya olive, co kesi mukelukile lalo vushuka vunasalako. Vusezeleni vaka-kwija, na visiwa, na vifwile. 21#VaLe 19:9-10; 23:22 Co omo mukapotola vushuka vweni mu citungu ca mikolovozi ya vushuka vwa vinyu, kesi mukelukile lalo vushuka vuje vunasalako. Vusezeleni vaka-kwija, na visiwa, na vifwile. 22Anukeni ngweni neni mwapwile mu vindungo mu Ingito. Ngeci njinamyana lishiko eli.
Currently Selected:
Kwituluka mu Mashiko 24: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
