2 Petulu 1
1
1Mukanda wakutunda kuli yange Simoni Petulu, ngamba na muluwa wa Yesu Kilistu.
Njilinakusoneka kuli vaje, a vushunga vwa Njambi yetu na Muyoyesi wetu Yesu Kilistu vanavana kukulaela kwa seo yakama manene ngwe yetu vene.
2Kutetela na kwoloka vikale amo neni akuzivuka Njambi na Yesu Mwene yetu.
Kwangula nakusana kwa Njambi
3Nzili ya vuNjambi vwendi inatwana vyuma vyoshe vije tunajeneka mukuyoya kwakuvwa kwa vuNjambi akutuzivuka kuli uje natusana ngeci tulipangele vumpau na vuvwa vwendi.#1:3 TULIPANGELE VUMPAU NA VUVWA VWENDI: Kunungulula kumo ngwavo, mu vumpau na vuvwa vwendi. 4Mu ngila eyi vene ikeye natwana vwana vwakama vwa seo vuje wakulaesele, ngeci a vwana ovu mwase kutunda ku lishungu lije linyongesa lije lili muno mu kaye, ngeci mwije mulipangele cifwa ca vuNjambi. 5Omwo a cuma eci, lingeni na nzili kuwezelelako vuvwa kukukulaela kweni, ku vuvwa vweni wezeleleniko mana, 6co ku mana eni wezeleleniko kulinyunga, co ku kulinyunga kweni wezeleleniko lukakateya, co ku lukakateya lweni wezeleleniko vuNjambi, 7co ku vuNjambi vweni wezeleleniko cizemo ca vuka-Yesu, na ku cizemo ceni ca vuka-Yesu wezeleleniko cizemo. 8Evi vikevyo vyuma munapande kukala navyo, co nga mulinavyo mu vungi, vikevyo vikamilingisa kupwa vaka-kupanga na vaka-kwima vushuka mu mana eni ali Mwene yetu Yesu Kilistu. 9Oloni nga kumwesi navyo, munapu tupuputwa, kumwasa kumona, co munevala ngeci vanamijelesa ku vuvi vweni vwalaja.
10Ngecivene, vasamba vange, esekeni manene na nzili kupwisa kusana nakwangula kweni ngwe vyuma vyeni vya myaka yoshe, omwo nga mulingamo, co kumukatundu kukukulaela kweni.#1:10 CO KUMUKATUNDU KUKUKULAELA KWENI: Nambe, co kumukawila mu vuvi. 11Mu ngila eyi vene, vakamyana moko yakukovela mu Vumwene vwa Mwene yetu na Muyoyesi wetu Yesu Kilistu vuje vya myaka yoshe.
12Ngecivene, simbu yoshe njikamyanukisa vyuma evi, nambe yeni mwavizivuka laja, co munemana mbe mu vushunga vuje munatambula. 13Njayongola lika ngwange mwamuvwa kuli yange kumyanukisa vyuma evi omo njicili nakuyoya. 14Omwo njazivuka ngwange ololo njikashulula muvila uno wakuvola, ngwe mwanjilekele Mwene yetu Yesu Kilistu. 15Co njikalinga na nzili kumyana ngila ngeci simbu yoshe omo yange njinatsi mwase kwanuka vyuma evi.
Vakaleo va vumpau vwa Kilistu
16Omwo kutwakavele visimo vyakutunda ku mana a vanu mukumyambulwila vya kwija kwa Mwene yetu Yesu Kilistu mu nzili. Na mesho etu vavenya twamwene vukama vwendi. 17#Mat 17:1-5; Mak 9:2-7; Luk 9:28-35 Netu kutwakele omo vamwanene kasingimiko na vumpau kuli Ishe Njambi, omo lijwi lyezile kuli Ikeye lyakutunda kuli uje Mutwe wa Vumpau ngwalyo, “Ou ikeye Munange injazema, muli ikeye njilinakuvwaelela.” 18Yetu vene twazivile lijwi eli lyatundile mwilu, omo twakele nendi a munkinda wakujela.
19Ngecivene, twasimpile na muzimbu uje watundile mwilu uje uvambulwile vaka-kwimanena. Nga mutolilila ku muzimbu ou, co mulinga mwamuvwa, omwo unapu ngwe ndeya ilinakutwila ceke mu lisusulungu noo Litangwa linaki na ceke ca litota lya mutondo linatwila ceke mu vimbunge vyeni. 20Nameme ngoco, akamwa ya vyoshe evi, anukeni ngeci naumo wai wetu asa ikeye vavenya kunungulula a lijwi lya vuka-kwimanena mu Visoneka. 21Omwo kukwesi lijwi lya vuka-kwimaneana lyezile kutunda ku cizango ca munu, oloni vanu vavatwamenenene kuli Munzinzime Wakujela omo vambulwile lijwi lije lyatundile kuli Njambi.
Currently Selected:
2 Petulu 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006