Tito 1
1
Yichbꞌanil Scarta Naj Pablo
1Jaꞌ tinaniꞌ xin, jain Pablo jin tiꞌ, yakꞌomal jin servil Dios. Yetoj pax oj, ẍejabꞌ jin pax Naj Jesucristo an, yu waon oc snaꞌbꞌal ebꞌ sicꞌbꞌilxa el yu Dios, yu yaon oc scꞌul ebꞌ yin. Ey wopiso jin cuyon ebꞌ yin jun cuybꞌanile caw yel, jaꞌton jun yet cu cuybꞌanil. 2Yu wopiso tiꞌ, yuxan chin cuywa yin jun tuꞌ, yet watxꞌ chi yaoc ebꞌ yipoj scꞌul tol oj cu chaꞌ jun kꞌinale tol ey cꞌal yin tobꞌalkꞌinal. Jaꞌ Dios cꞌam bꞌey chi yakꞌ lekꞌtiꞌal juneloj. Jaꞌ yet cꞌamto chi swaꞌne jun yul yibꞌankꞌinal tiꞌ, jix yakꞌon can stiꞌ tol oj yakꞌ cu kꞌinal tol ey cꞌal yin tobꞌalkꞌinal tuꞌ. 3Julnajxa stiempoal tinaniꞌ tol jix el yin scꞌul Dios tol chi yakꞌ otajnele el skꞌaneal. Yuxan jaꞌ Naj cu Colomal Dios jix akꞌon walel skꞌaneal tiꞌ. 4Tol chi watoj jun jin carta tiꞌ ey jaach, Tito. Caw yel tol jaxca jin cꞌaal jaach an, yutol jain jix wal ja wabꞌe, yuxan jix ja waoc ja cꞌul yin Cristo wetoj an. Chi woche tol jaꞌ cu Mam Dios, cꞌal Kaawil Jesucristo chi xꞌox swatxꞌcꞌulal ey jaach. Chi woche pax oj, tol chi okꞌ scꞌul ja win, catuꞌ ey watxꞌcꞌulal snan je xol yetoj ebꞌ.
Smulnail Naj Tito Yin Yet Dios Bꞌey Txꞌotxꞌ Creta
5Jix jaach wakꞌcan bꞌey Creta tuꞌ yu cha waꞌne oc wan tzetyetal eyto swaꞌxi tituꞌ, cꞌal yu ja sicꞌon el wanoj chi oc yin ancianoal xol ebꞌ creyente bꞌey junjun conobꞌ tituꞌ. Cha sicꞌ el ebꞌ jaxca jix wute walon can ey jaach an. 6Jix wal ey jaach, tol jaxca tiꞌ sbꞌeybꞌal ebꞌ smoo yoc ancianoal. Jaꞌ junoj anciano, cꞌam ojabꞌ chi skeꞌ yal-le spenail yin. Asan ojabꞌ yistil eyoc yin sat ebꞌ. Jijem ojabꞌ yuninal masanil catuꞌ man comonoj chi sey yun junoj spenail ebꞌ. Man ojabꞌ pit oj chi yute sbꞌa ebꞌ, tol ojabꞌ jijem chi yute sbꞌa ebꞌ yuninal ebꞌ tuꞌ. 7Yutol jaꞌ ebꞌ chi oc yilomaloj ebꞌ ket creyenteal tuꞌ, sowalil caw watxꞌ chi yute sbꞌeybꞌal ebꞌ, yutol yakꞌomal cuenta smulnail Dios yeoc ebꞌ. Ma skeꞌ tol asanxane ebꞌ chi yoche chi yal yul yet. Ma skeꞌ tol comon cꞌal chi tit sjowal scꞌul ebꞌ. Ma skeꞌ tol chi scamtze el sbꞌa ebꞌ yetoj an. Ma skeꞌ tol makꞌwawom pax ebꞌ. Yetoj pax oj ma skeꞌ tol asan yin yakꞌon ganar tumin eyoc snaꞌbꞌal ebꞌ. 8Jaꞌ ebꞌ ey yopiso tuꞌ, akꞌom ojabꞌ posada ebꞌ. Sowalil ojabꞌ yin yunen tzetyetal watxꞌ chi tzala ebꞌ. Sowalil ojabꞌ tol chi snaꞌ sbꞌa scꞌul ebꞌ yin wan tzettaj yetal yet cꞌamto chi swaꞌne. Tool ojabꞌ chi yute sbꞌeybꞌal ebꞌ, chi cꞌal yun tzet chi yalaꞌ. Asanne ojabꞌ yin yet Dios chi yaoc snaꞌbꞌal ebꞌ. Sowalil ojabꞌ tol chi skeꞌ smitxꞌon oc tucan smimanil ebꞌ yin tzet man watxꞌoj. 9Sowalil ojabꞌ chi yaoc snaꞌbꞌal ebꞌ yin jun cuybꞌanile jaꞌcaw yel, jun cuybꞌanile akꞌbꞌil xa scuy ebꞌ, yet watxꞌ chi yakꞌ yip ebꞌ yalon jun cuybꞌanile yel tuꞌ tet wanojxa. Catuꞌ chi skeꞌ pax yakꞌon ebꞌ yotajne el ebꞌ tet ebꞌ ánima man yeloj scuybꞌanil. 10Caw sowalil chi yun ebꞌ jaxca tuꞌ yutol ecꞌal ebꞌ ánima txꞌiꞌtaj chi yute sbꞌa. Tucꞌal chi comon yal junoj tzetyetal cꞌam yeloc apnoj. Caw ecꞌal pax ebꞌ chi somcha el scꞌul yu ebꞌ. Jaꞌ wan chi yun jaxca tuꞌ, ecꞌal ebꞌ tol creyente xa xol ebꞌ Israel. 11Sowalil chi cu tenchane ebꞌ yet watxꞌ cꞌamxa chi yal ebꞌ, yutol yal cꞌal bꞌeytet nail bꞌey chi ecꞌ ebꞌ chi ecꞌ yakꞌ somcha scꞌul ebꞌ creyente ebꞌ tituꞌ. Chi ecꞌ ebꞌ yakꞌon cuybꞌanile, jal pax scuybꞌanil ebꞌ tuꞌ, man watxꞌoj. Asan yu chi yakꞌ ganar stumin ebꞌ yin ebꞌ creyente tuꞌ, yuxan chi ecꞌ ebꞌ yakꞌ cuybꞌanile. 12Ey jun naj a Creta tuꞌ, jun cuywawom xol ebꞌ, jaꞌ naj jix alon jaxca tiꞌ: “Jaꞌ ebꞌ wet conobꞌal bꞌey Creta tiꞌ, tucꞌaltaꞌ lekꞌtiꞌ ebꞌ. Caw laan ebꞌ jaxca junoj noꞌ noꞌ caw jow. Isa ebꞌ, tucꞌal chi yoche ebꞌ chi lowi,” ẍi naj tuꞌ. 13Yel ton chi yal naj. Yuxan sowalil cha tenchane ebꞌ sicꞌlebꞌil, yet watxꞌ chi yaoc jun cuybꞌanile jaꞌcaw yel ebꞌ yin scꞌul. 14Cha wal tet ebꞌ, tol manche yakꞌ xiquin ebꞌ yin wan comon icꞌtiꞌ chi yal ebꞌ Israel, cꞌal wanxa comon chejbꞌanil chi yal ánima, wan cꞌamxa chi chaꞌon wan cuybꞌanile yel. 15Tol jaxca tiꞌ yeocoj, jaꞌ yul cu sat jaon watxꞌ xa cu naꞌbꞌal tiꞌ, watxꞌ cꞌal masanil tzetyetal. Jal pax ebꞌ cꞌam chi yaoc scꞌul yin Dios, ebꞌ cꞌam swatxꞌil snaꞌbꞌal, cꞌam junoj tzetyetal watxꞌ yul sat ebꞌ, yutol jaꞌ snaꞌbꞌal ebꞌ cꞌam swatxꞌil. Jaxca tol tzꞌil spixan ebꞌ cꞌal snaꞌbꞌal ebꞌ, yuxan pena yul sat ebꞌ. 16Chi tzꞌaj yal ebꞌ tol yotaj Dios ebꞌ, jal sbꞌeybꞌal ebꞌ chi txꞌoxon pax eloj tol man yotaj Dios ebꞌ. Cꞌam swatxꞌil ebꞌ yul sat Dios, yutol cꞌam chi sjije niꞌoj ebꞌ tzet chi yalaꞌ. Yu ton tuꞌ, yuxan cꞌam junoj tzet watxꞌ chi skeꞌ el yunen ebꞌ.
Currently Selected:
Tito 1: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.