YouVersion Logo
Search Icon

Filipenses 1

1
Yichbꞌanil Scarta Naj Pablo
1Jaꞌ tinaniꞌ xin, jain Pablo jin tiꞌ, yetoj naj Timoteo, yakꞌomal servil Jesucristo kei. Tol chi katoj jun cu carta tiꞌ ey jex je masanil jex yet xa Dios a conobꞌ Filipos, yetoj pax jex anciano cꞌal jex diácono, jex junxane je yeoc yetoj Cristo Jesús. 2Chi koche chi xꞌox swatxꞌcꞌulal cu Mam Dios cꞌal Naj Kaawil Jesucristo ey jex. Chi koche pax tol ey watxꞌcꞌulal snan je xol tituꞌ, yutol watxꞌ jex yul sat Dios tinaniꞌ.
Chi Txali Naj Pablo Yu Ebꞌ Creyente
3Jaꞌ yet chex jin naꞌontej junjun el, chi wal yu diosalil tet cu Diosal je yu. 4Jaꞌ yet chin txali junjun el, chin txali yin tzalacꞌulal je yu je masanil. 5Yutol yet tax cꞌal jix je yaon oc je cꞌul yin Cristo masantaꞌcꞌal tinaniꞌ, junxane mulnailal chi kun yin skꞌaneal yet colbꞌanile tinaniꞌ. 6Jaꞌ Dios jix ẍaꞌel yich smulna oc yin je pixan. Jaꞌ tinaniꞌ, wotaj sicꞌlebꞌil, tol oj mulna cꞌal oc je yin masantaꞌcꞌal yet jun cꞌual yet oj jul Jesucristo yin scaelal. 7Smoo ton queytuꞌ chin naꞌ je yin je masanil, yutol caw camcꞌulnebꞌil jex wu an. Caxcꞌal ey jin oc preso jaxca tiꞌ, caxcꞌal chin apni sattaj ebꞌ yaaw yu too waloni, tol yel jun skꞌaneal yet colbꞌanile tiꞌ, lalan cꞌal pax je chaꞌon swatxꞌcꞌulal Dios wetoj. 8Yotaj Dios tol caw camcꞌulnebꞌil jex wu an je masanil yetoj scamcꞌulal Jesucristo. 9Chin kꞌan tet Dios je yu, tol chi a can je camcꞌulal, catuꞌ chi yakꞌon sjelanil ey jex. Chin kꞌan pax tet, tol chex a can yin snaꞌcha el masanil tzettaj yetal je yu, 10yet watxꞌ chi cꞌal je yotajne eloj, bꞌeytet wan tzettaj yetal watxꞌ yul sat Dios. Catuꞌ chi jichanbꞌi oc je naꞌbꞌal, yet watxꞌ jaꞌ yet oj jul Cristo, cꞌam ojabꞌ niꞌoj man tzꞌajanoj jex yul sat. 11Oj oc Jesucristo je yetoj, yet watxꞌ jichan cꞌal oj je yute je bꞌeybꞌal. Ta jaxca tuꞌ, oj txeclo el je yin tzet utbꞌil tol caw miman swatxꞌil scꞌul Dios, catuꞌ chi al-le watxꞌ kꞌane tet Dios.
Ma Cusa Naj Pablo Yu Syaꞌilal Jix Jul Yibꞌan
12Jex wuẍtaj, jex wanabꞌ, chi woche pax chi naꞌcha el junxa tiꞌ je yu. Tol jaꞌ tzet jix jul wibꞌan tiꞌ an, man penaoj wet, tol yu, yuxan chi a can yal-le can el skꞌaneal yet colbꞌanile tinaniꞌ. 13Ilaꞌ, tol masanil ebꞌ soldado cꞌal ebꞌ yaaw, cꞌal wanxa ebꞌ ánima titiꞌ, jix cꞌal yabꞌ ebꞌ masanil, tzet utbꞌil tol asan yu eyoc jin cꞌul yin Cristo, yuxan ey jin oc preso. 14Jaꞌ yet jix yilon ebꞌ creyente, tol tecꞌan chi wute jin bꞌa yul preso tiꞌ, ecꞌal ebꞌ chi cꞌal yiꞌ yip wu an. Cꞌamxa chi xiw yalon el skꞌane Dios ebꞌ titiꞌ. Caw chi stecꞌbꞌa sbꞌa ebꞌ yin Naj Kaawil. 15-17Yel toni, ey wan ebꞌ chi chichon oc scꞌul win an, caw chi el sjowal ebꞌ. Yin caabꞌcꞌulalil chi yalon el skꞌaneal Cristo ebꞌ. Man yin oj masanil scꞌul ebꞌ chi yalon el ebꞌ. Tucꞌal chi yiꞌa can sbꞌa ebꞌ. Tol chi yoche ebꞌ tol caw chi wil syaꞌilal yul preso tiꞌ, yuxan chi yalel skꞌaneal Naj Cristo ebꞌ. Ey pax wanxa ebꞌ xin, yin masanil scꞌul ebꞌ chi yalon el ebꞌ, yutol chin scamcꞌulne ebꞌ. Yotaj ebꞌ, tzet utbꞌil tol ey jin ecꞌ titiꞌ yu walon eloj tol caw yel jun skꞌaneal yet colbꞌanile tiꞌ. 18Jal jin jain tiꞌ, cꞌam tzet chin naꞌ yu wan tuꞌ. Caxcꞌal yin masanil scꞌul ebꞌ chi yalon el ebꞌ, caxcꞌal cꞌamaj, jacꞌalaꞌ chin tzalai, yutol jaꞌ skꞌaneal Cristo lalan yalon el ebꞌ.
Yel xacꞌal chi jul jin tzalacꞌulal, 19yutol wotaj an, caxcꞌal chi wabꞌ syaꞌil tinaniꞌ, watxꞌ cꞌal oj jin elocoj, yutol eyoc Naj Yespíritu Jesucristo wetoj an, catuꞌ lalan je txali wu an. 20Caw chi woche tol cꞌam chi el jin qꞌuixwil yu tzet chi wun an. Chi woche, caw tecꞌan cꞌal chi wute walon eloj, jaxca ton cꞌal chi wute jin bꞌa tiꞌ. Ta jaxca tuꞌ, caxcꞌal iquis jin, caxcꞌal chin cam an, oj txeclo can el win an, tzet utbꞌil tol caw miman yeloc apnoj Cristo. 21Yutol jain tiꞌ, jaꞌ yet iquis jin ecꞌoj, asan Cristo naꞌan wu an. Jaxa yet oj jin cam an, ecꞌbꞌan swatxꞌilal oj jin chaꞌ an. 22Ta iquis jin to ecꞌ yul yibꞌankꞌinal tiꞌ niꞌojxa, chi skeꞌ jin mulna niꞌojxa yin yet Naj Kaawil. ¿Txequel, bꞌeytet junoj yel watxꞌ, ta chin cam an, ma iquis jin to ecꞌ niꞌojxa an? 23Cꞌam chi naꞌcha el wu, bꞌeytet junoj watxꞌ. Chi woche chin cam an, yet watxꞌ chi skeꞌ wapni eyman bꞌey eyecꞌ Cristo, yutol jaxca tuꞌ yel watxꞌ wet. 24Tol je yu cꞌal jaex tiꞌ, yuxan sowalil iquis jin to ecꞌ niꞌojxa yul yibꞌankꞌinal tiꞌ. 25Yuxan, wotaj sicꞌlebꞌil, tol oj jin tojcan ecꞌ niꞌojxa je yetoj. Oj jex jin col niꞌojxa, yet watxꞌ che yiꞌ je yip, catuꞌ chi cꞌal jul je tzalacꞌulal, yutol che yaoc Cristo yin je cꞌul. 26Yuxan, oj jin toj ey jex tuꞌ junelxa, yet watxꞌ, che yalon je watxꞌ kꞌane tet Cristo Jesús wu cꞌal. 27Caxcꞌal oj jin toj ey jex tuꞌ an, caxcꞌal cꞌamaj, watxꞌ ojabꞌ cꞌal che yute je bꞌeybꞌal jaxca yalon Cristo yin skꞌaneal yet colbꞌanile. Ta jaxca tuꞌ, oj wabꞌ je kꞌumal, tzet utbꞌil tol jacꞌalaꞌ tecꞌan je yei, catuꞌ tol jacꞌalaꞌ junne naꞌbꞌale je yeoc tituꞌ. Oj wabꞌ pax oj, tol jun laan cꞌal je yaon oc je cꞌul yin jun skꞌaneal yet colbꞌanile, catuꞌ caw tecꞌan je yeoc yin. 28Manche jex xiw tet ebꞌ chi chichon oc scꞌul kin. Jaxca tuꞌ oj je yute je txꞌoxon eloj, tol oj qꞌueycan el ebꞌ yin junelne. Yetoj pax oj, jaxca tuꞌ oj yun xeclo eloj, tol eyxa cu colbꞌanil, yutol queytuꞌ oj yute xꞌoxon el tol oj yun Dios. 29Yu swatxꞌcꞌulal Cristo jix xꞌox ey jon, man asanne oj tol ey kalon ket kaon oc cu cꞌul yin, ey pax kalon ket kabꞌen syaꞌilal yetoj. 30Jaex tiꞌ, jun laan je yakꞌon je yip je tecꞌbꞌan je bꞌa wetoj an. Je yilnaj jin, tol caw tecꞌan wutenaj jin bꞌa je nan je xol. Tinaniꞌ, lalan je yabꞌeni, tol jacꞌalaꞌ tecꞌan cꞌal chi wute jin bꞌa titiꞌ an.

Currently Selected:

Filipenses 1: knj

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy