YouVersion Logo
Search Icon

Filemón 1

1
Yichbꞌanil Scarta Naj Pablo
1Jaꞌ tinaniꞌ xin, jain Pablo jin tiꞌ, yetoj kuẍtaj Timoteo, chi katoj cu carta tiꞌ ey jaach wuẍtaj Filemón. Preso wei, yu cꞌal chi walel skꞌaneal Naj Cristo Jesús. Camcꞌulnebꞌil ku, catuꞌ ket mulnawomal cu bꞌa ja wetoj yin smulnail Dios. 2Chi wa pax toj scawil scꞌul ebꞌ creyente chi syambꞌa sbꞌa bꞌey ja na, yetoj tet kanabꞌ Apia, cꞌal tet kuẍtaj Arquipo, yutol chi yakꞌ yip yin yet Dios ketoj. 3Chi woche tol chi xꞌox swatxꞌcꞌulal cu Mam Dios cꞌal Kaawil Jesucristo ey jex tituꞌ, catuꞌ ey ojabꞌ watxꞌcꞌulal snan je xol yetoj Dios.
Scamcꞌulal Naj Filemón
4Junjun el chin txali ja wu, chi wal yu diosalil tet Dios, 5yutol chi wabꞌ ja kꞌumal titiꞌ, tol caw eyoc ja cꞌul yin Naj Kaawil Jesús. Caw ey ja camcꞌulal yin naj, cꞌal yin masanil ebꞌ yuninal xa Dios. 6Ey ebꞌ chi yaoc scꞌul yin Cristo, yutol chi yil ebꞌ tol eyoc ja cꞌul yin. Lalan jin kꞌanon tet Dios yu ebꞌ, tol chi naꞌcha el yu ebꞌ, tol jaꞌ Cristo Jesús, chi akꞌon masanil tzet watxꞌ ey jon. 7Caw chin tzala an, yutol ey ja camcꞌulal yin ebꞌ yuninal xa Dios tituꞌ. Caw chi wiꞌ jin mimancꞌulal yu titiꞌ, yutol jaach tiꞌ wuẍtaj, caw cha wakꞌ tzalabꞌoj scꞌul ebꞌ creyente tituꞌ.
Jix Skꞌan Naj Pablo Tet Naj Filemón Yu Naj Onésimo
8Jain tiꞌ, ẍejabꞌ jin Cristo an. Yuxan ey walon wet chi wal ey jaach tzet watxꞌ sowalil cha wunne. 9Man pax oj wun jaxca tuꞌ an. Jaꞌ tiꞌ wet an, tol chin kꞌan ey jaach, yet watxꞌ chi txeclo el ja camcꞌulal. Jain Pablo jin tiꞌ, icham jin xa. Preso pax we tinaniꞌ yu cꞌal chi walel skꞌaneal Naj Cristo Jesús. 10Chin kꞌan ey jaach yu naj Onésimo,#10 Onésimo chi yal yeloc apnoj yin stiꞌ ebꞌ Griego; “Caw ey yopiso”. naj jaxca tol jix oc jin cꞌaaloj an, yutol jix ẍaꞌ Cristo Scolomal oj naj wu an yul preso tiꞌ. 11Jaꞌ yet yalantoj, cꞌam niꞌoj yopiso naj jaach yakꞌon servil. Jal tinaniꞌ xin, caw chi oc yopiso naj ja wu, catuꞌ chi oc pax yopiso naj wu an. 12Lalan jin chejon pax toj naj ey jaach tuꞌ. Jaꞌ yet chi too naj chi too jin naꞌbꞌal yetoj, yutol caw chin camcꞌulne naj. 13Chi woche tol chi cancan naj wetoj titiꞌ yu chin yakꞌ servil. Jaxca tol jaach chin jaꞌ wakꞌ servil yul preso tiꞌ. Ilaꞌ tol preso we an, yu cꞌal chi walel skꞌaneal colbꞌanile. 14Cꞌam cꞌal chi yal jin cꞌul chi wakꞌ jin wa kꞌane yetoj naj masantaꞌcꞌal chi wabꞌ ey jaach. Yutol chi woche tol chi el yin ja cꞌul tol cha txꞌox ja camcꞌulal ey jin an, catuꞌ chin yakꞌon servil naj an. Manaj yutol chi wal ey jaach tol jaxca tuꞌ sowalil cha wunne. 15Yel toni, jix el naj ja wintaj jun tiempoal. Tejan taꞌ jix yun jaxca tuꞌ, yet watxꞌ ey xacꞌal ecꞌ naj ja wetoj yin junelne. 16Manxa yakꞌomaloj servil chi yun oc naj ja wintaj tinaniꞌ. Mimanxa yeloc apnoj naj yul ja sat. Ilaꞌ, kuẍtajxa naj, caw camcꞌulnebꞌil naj wu an. Yel ojabꞌ cha camcꞌulne naj yet oj apnoj naj ey jaach. Man asanne oj yutol watxꞌ jaach yakꞌon servil naj, yuxan oj ja camcꞌulne naj, yu cꞌal tol kuẍtajxa cu bꞌa yetoj naj yin Naj Kaawil. 17Ta caw yel ketbꞌi cu bꞌa cha naꞌ, chaꞌ apnoj naj junelxa. Jaxca ojabꞌ tol jain chin ja chaꞌ apnoj, queytuꞌ cha wute ja chaꞌon apnoj naj. 18Ta ey junoj spenail naj jix oc ey jaach, ta ey sjec naj jix oc xin, tzꞌibꞌe cantoj wibꞌan an. 19Jain jaꞌcaw Pablo jin tiꞌ, oj wakꞌ pax sjec naj tuꞌ ey jaach. Yu cha naꞌeloj tol yel jun tuꞌ yuxan jain chin tzꞌibꞌetoj jun tiꞌ ey jaach. Man oj wal ey jaach, yutol ja wotajxa tol jaxca tol ey pax ja jec ey jin an, yutol jain jix wal ja wabꞌe, yuxan jix ja chaꞌ Cristo ja Colomaloj. 20Yuxan, wuẍtaj, yutol creyente jaachxa, yuxan chin kꞌan jun tiꞌ ey jaach an. Yu ojabꞌ Cristo cha wakꞌon tzalabꞌoj jin cꞌul an. 21Chi waltoj wan tiꞌ ey jaach an, yutol jijem cꞌal cha wute ja bꞌa. Wotaj an, tol man asanne oj jantaj tzet chi waltoj ey jaach oj ja wunne. Oj ja wun cꞌal pax wanojxa tzetyetal. 22Chi wal pax toj ey jaach, cha sey niꞌoj bꞌey chi wakꞌ jin posada tituꞌ. Ta oj el yin scꞌul Dios oj jin toj ey jex tuꞌ, jaxca taꞌ che yute je kꞌanon yin je txa.
Jix Too Scawil Scꞌul Naj Filemón
23Chi yatoj scawil ja cꞌul kuẍtaj Epafras. Ey pax oc preso wetoj an, yu cꞌal tol chi yaoc scꞌul yin Cristo Jesús. 24Chi ya pax toj scawil ja cꞌul ebꞌ wet mulnawomal, jaꞌton naj Marcos, Aristarco, Demas, cꞌal Lucas. 25Chi woche chi xꞌox swatxꞌcꞌulal Naj Kaawil Jesucristo ey jex tituꞌ.

Currently Selected:

Filemón 1: knj

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy