Marcos 1
1
Jix Yal Can El Skꞌane Dios Naj Juan Bautista Bꞌey Cusiltaj Txꞌotxꞌ
(Mateo 3:1-12; Lucas 3:1-9, 15-17; Juan 1:19-28)
1-2Jaꞌton watxꞌ skꞌaneal Naj Jesucristo, Scꞌaal Dios. Jaxca tiꞌ jix yun yel yich jaxca jix yun stzꞌibꞌen can jun ẍejabꞌ Dios* chi yij Isaías yul An Juun Tzꞌibꞌebꞌilcanoj* Jix yal Dios jaxca tiꞌ yin Scꞌaal:
Oj jin chej bꞌabꞌoj jun jin chejabꞌ ja sattaj. Jaxca chi yun swaꞌxi junoj bꞌe jaxca tuꞌ oj yun swaꞌnen sbꞌeybꞌal ebꞌ ánima yet cꞌamto chach apni, ẍi Dios.#Malaquías 3:1.
3Jaꞌ jun jin chejabꞌ tuꞌ, jaꞌ bꞌey cusiltaj txꞌotxꞌ oj yal yin ipal jaxca tiꞌ: “Jaxca chi yun swaꞌnele junoj bꞌe yet chi jul junoj yaaw, queytuꞌ che yute je waꞌnen je bꞌeybꞌal, yutol oj jul Naj Kaawil,” queytuꞌ oj yute yaloni, ẍi can yul An Juun Tzꞌibꞌebꞌilcan tuꞌ.#Isaías 40:3. 4Yuxan jix yakꞌ bautizar ebꞌ ánima naj Juan bꞌey cusiltaj txꞌotxꞌ. Jix yalon tet ebꞌ tol sowalil chi snaꞌ sbꞌa scꞌul ebꞌ yin spenail, catuꞌ chi yakꞌon bautizar sbꞌa ebꞌ, yet watxꞌ chi joꞌole qꞌuey spenail ebꞌ yu Dios. 5Masanil ebꞌ ánima yul-laj yet Judea cꞌal ebꞌ a Jerusalén jix bꞌet abꞌen tzet chi yalaꞌ. Chi lawi yalon atej spenail ebꞌ tet Dios, catuꞌ chi yakꞌon sbꞌa ebꞌ yu yakꞌle bautizar ebꞌ yu naj Juan yul jaꞌ miman Jordán. 6Jaꞌ naj Juan tuꞌ, jaꞌ xil noꞌ camello chembꞌil eyoc spichiloj, jal scꞌalil xin, tzꞌuum kꞌalile. Jaꞌ jun tujan noꞌ kꞌuxbꞌeal kochiꞌ noꞌ chi ẍiꞌ naj, catuꞌ yaal xol-lajil teꞌ awcabꞌ chi yuqꞌueꞌ. 7Catuꞌ jix yalon el xol ebꞌ ánima jaxca tiꞌ:
—Ey jun naj tzajan sjul wintaj an, yel xacꞌal yel miman yeloc apnoj wintaj an. Yu jun tuꞌ, yuxan man jin moo oj wakꞌon servil niꞌoj, caxcꞌal chin ey noan sattaj jin xuyon el xꞌanil xanabꞌ naj, man jin moo oj. 8Jain tiꞌ, caw yel chex wakꞌ bautizar yetoj jaꞌ. Jal pax jun chi wal tiꞌ an, jaꞌ oj akꞌon Naj Santo Espíritu ey jex. Tol oj jex akꞌle bautizar yu, ẍi naj Juan tuꞌ.
Sbautismo Naj Jesús
(Mateo 3:13-17; Lucas 3:21-22)
9Jaꞌ yet jun tiempoal tuꞌ, jix el Jesús bꞌey conobꞌ Nazaret yul yet Galilea. Jix apni yakꞌon bautizar sbꞌa tet naj Juan bꞌey jaꞌ Jordán. 10Jaꞌ yet lalan yatej yul jaꞌ tuꞌ, jix yilon sjajcha spuertail satcan, catuꞌ jix eyol Naj Espíritu yibꞌan jaxca chi yun yeyol junoj noꞌ uch. 11Jix lawi jun tuꞌ xin, jix yabꞌen yal-le eytej jayebꞌ kꞌane bꞌey satcan tet ebꞌ, jix yalon eytej jaxca tiꞌ:
—Jaach ton tiꞌ, jin Cꞌaal jaach, camcꞌulnebꞌil jaach wu an. Caw chin tzala ja win an, ẍi.
Jix Akꞌle Porobꞌal Naj Jesús Yu Naj Diablo
(Mateo 4:1-11; Lucas 4:1-13)
12Jix lawi jun tuꞌ xin, jix iꞌletoj Jesús yu Yespíritu Dios bꞌey jun cusiltaj txꞌotxꞌ. 13Cawinaj cꞌu jix bꞌetecꞌ Naj tituꞌ xol noꞌ noꞌ ey smey. Jix ijbꞌale Naj yin spenail yu naj Satanás, ma cꞌaltaꞌ toj Naj. Jix lawi tuꞌ, jix jul akꞌle servil Naj yu ebꞌ ángel.
Jaꞌ Bꞌey Galilea Jix El Yich Xꞌoxon El Yopiso Jesús
(Mateo 4:12-17; Lucas 4:14-15)
14Jaꞌ yet jix ale oc naj Juan yul preso, jix too Jesús bꞌey Galilea. Jix yalon can el watxꞌ kꞌane, /yu chi oc Dios yaawiloj ebꞌ ánima./ 15Jix yalon jaxca tiꞌ:
—Jix jul stiempoal, janicꞌxane wal catuꞌ oj waꞌxoj oc Dios Yaawiloj. Yu jun tuꞌ, yuxan naꞌwej je bꞌa yin je penail. Chaꞌwej je yabꞌ jun skꞌaneal yet scolbꞌanil je pixan, ẍi Jesús.
Jaꞌ Yet Jix Yawtetej Canwan Mitxꞌom Pescado Naj Jesús
(Mateo 4:18-22; Lucas 5:1-11)
16Lalan yecꞌ Jesús stiꞌ jaꞌ mar bꞌey Galilea, catuꞌ jix yiloni, eyecꞌ naj Simón yetoj jun yuẍtaj chi yij Andrés. Lalan yaon eytoj xim ebꞌ xol jaꞌ, yutol mitxꞌom pescado ebꞌ. 17Catuꞌ jix yalon Jesús tet ebꞌ jaxca tiꞌ:
—Ocanwej tzajan wintaj an, cuywanwej wintaj an, oj wakꞌ je yopiso. Jaxca che yute je mitxꞌon noꞌ pescado tiꞌ, queytuꞌ oj je yute je yiꞌontej ebꞌ ánima ey jin an, ẍi Jesús tet ebꞌ. 18Jix sbꞌej xacꞌal can xim ebꞌ yet jun txolan tuꞌ. Yu scuywi ebꞌ, yuxan jix oc tzajan ebꞌ yintaj Naj. 19Jix bꞌey stoo niꞌojxa, catuꞌ jix yilontoj yin naj Jacobo yetoj naj Juan, ebꞌ scꞌaal naj Zebedeo. Eyatoj ebꞌ yul jun barco, lalan snipen xim ebꞌ. 20Catuꞌ jix awteletej ebꞌ naj yu Jesús. Jix tit ebꞌ xin, jix sbꞌejoncan smam ebꞌ yetoj ebꞌ yaman yul teꞌ barco tuꞌ, catuꞌ jix too ebꞌ yetoj Jesús.
Jun Naj Eyoc Pena Espíritu Yin
(Lucas 4:31-37)
21Jix apni ebꞌ bꞌey conobꞌ Capernaúm. Jaꞌ yet scꞌual xewilal jix octoj Jesús yul snail sculto ebꞌ Israel cuywa oj. 22Caw jix qꞌueya scꞌul ebꞌ yet jix yabꞌen ebꞌ wan cuybꞌanil jix yakꞌa, yutol jaꞌ yet jix cuywa snan xol ebꞌ tuꞌ, jix txeclo eloj, tol ey yopiso yu Dios, man jaxca oj ebꞌ cuywam yin sley Moisés. 23Jaꞌ bꞌey snail sculto ebꞌ Israel tuꞌ, ey jun winaj eyoc pena espíritu yin eyecꞌoj. Jix a yaw yin ipal, jix yalon jaxca tiꞌ:
24—¿Tzet ja walon ja wet ketoj jaach Jesús a Nazaret? ¿Ma yu cu jul ja wakꞌon qꞌueyeloj, yuxan jix jaach juli? Wotaj mac jaach txequel. Jaach ton tiꞌ sicꞌbꞌil jaach el yu Dios, ẍi naj tet Jesús. 25Catuꞌ jix tzule jun pena espíritu yu Jesús, jix yalon tet jaxca tiꞌ:
—Tzꞌin ja chi. Elan yin jun winaj tiꞌ, ẍi Jesús tet. 26Catuꞌ jix yakꞌon tit jun joybꞌinaj sat yin naj tuꞌ yu jun pena espíritu tuꞌ. Jix el yaw, catuꞌ jix el yin naj. 27Jix qꞌueya scꞌul masanil ánima jix iloni. Yu jun tuꞌ, yuxan jix cꞌoli yaloꞌtanen ebꞌ jaxca tiꞌ:
—¿Tzet la ye jun tiꞌ? ¿Tzet la cuybꞌanilal jun chi jul tiꞌ? Jaꞌ jun winaj tiꞌ, chi cꞌal skeꞌ yu yalon tet ebꞌ pena espíritu. Ilaꞌ, tol chi sjije ebꞌ tet, ẍi ebꞌ. 28Eyman jix abꞌcha el skꞌumal Jesús xol masanil ebꞌ a lugar bꞌey Galilea tuꞌ.
Jix Waꞌxi Can Scꞌul Ix Sniꞌ Naj Pedro Yu Jesús
(Mateo 8:14-15; Lucas 4:38-39)
29Jix lawi jun tuꞌ xin, catuꞌ jix eltej ebꞌ yul snail sculto ebꞌ Israel tuꞌ, catuꞌ jix too Jesús yetoj Jacobo cꞌal Juan bꞌey sna naj Simón yetoj Andrés. 30Telan ey ix sniꞌ naj Simón, caw yaꞌey ix yu jun kꞌakꞌ, yuxan jix yal ebꞌ tet Jesús tzet utbꞌil tol yaꞌey ix. 31Catuꞌ jix sjitzontoj sbꞌa Naj scꞌatan ix, jix oc mitxꞌan yin skꞌabꞌ ix, jix nicꞌle a waan ix. Yet jun txolan tuꞌ, eyman jix waꞌxi can scꞌul ix. Jix el jun kꞌakꞌ tuꞌ yin ix. Catuꞌ jix cꞌoli yakꞌle servil ebꞌ yu ix.
Ecꞌal Ebꞌ Yaꞌey Jix Waꞌxi Can Scꞌul Yu Jesús
(Mateo 8:16-17; Lucas 4:40-41)
32Jaꞌ yet xax too cꞌu, yet numomi xacꞌal yei, jix iꞌletej masanil ebꞌ yaꞌey scꞌatan Jesús, cꞌal ebꞌ eyoc pena espíritu yin. 33Caw ecꞌal ánima jix syambꞌa sbꞌa stiꞌ na. 34Caw ecꞌal ebꞌ jix apni. Yal cꞌal tzet yaꞌbꞌilal chi etnen ebꞌ jix waꞌxi can scꞌul ebꞌ yu Jesús. Caw ey ebꞌ eyoc pena espíritu yin jix iꞌle can el yin ebꞌ yu Naj. Ma chaꞌle kꞌanabꞌ ebꞌ pena espíritu yu Naj, yutol yotaj xa ebꞌ mactxequel Naj.
Jix Yalel Skꞌane Dios Jesús Yul-laj Yet Galilea
(Lucas 4:42-44)
35Jaꞌ yet eyto sajbꞌi, kꞌej jolinaj to, jix a waan Jesús, catuꞌ jix too txaloj bꞌey jun lugar tzꞌinini stiꞌel conobꞌ. 36Catuꞌ jix too naj Simón yetoj ebꞌ yetbꞌi tuꞌ, jix too ebꞌ seyon ecꞌoj. 37Jaꞌ yet jix ilcha yu ebꞌ, jix yalon ebꞌ tet Naj jaxca tiꞌ:
—Masanil ánima chach seyoni, ẍi ebꞌ tet Naj. 38Catuꞌ jix yalon Naj tet ebꞌ:
—Toonwej bꞌey wan aldea cawil-laj tiꞌ, tol oj toj walel skꞌane Dios xol-laj ánima. Yutol yu jun tiꞌ, yuxan jix jin jul an, ẍi Jesús tet ebꞌ. 39Jix ecꞌ ebꞌ bꞌey masanil yul-laj yet Galilea, catuꞌ jix ecꞌ yalon el skꞌane Dios bꞌey junjun snail bꞌey chi syambꞌa sbꞌa ebꞌ Israel yin culto. Jix ujtele pax can el pena espíritu yin ánima yu Jesús.
Jix Waꞌxi Can Scꞌul Naj Yaꞌey Yu Lepra Yu Jesús
(Mateo 8:1-4; Lucas 5:12-16)
40Ey jun winaj jix apni scꞌatan Jesús, yaꞌey yu jun tujan yaꞌbꞌil chi kꞌaꞌtoj ánima yu, chi yij lepra. Jix ey kaan jun winaj tuꞌ, jix yaloni:
—Ta chi yal ja cꞌul, chi skeꞌ ja wakꞌon can waꞌxoj jin cꞌul, ẍi naj tet Jesús. 41Jaꞌ Jesús, jix okꞌ scꞌul yin naj, catuꞌ jix sbꞌatxbꞌa oc skꞌabꞌ Naj yibꞌan naj:
—Chi yal jin cꞌul. Tol chi wakꞌcan waꞌxoj ja cꞌul, ẍi Jesús tet naj. 42Jix cꞌal yal jaxca tuꞌ xin, jix waꞌxi can jun yaꞌbꞌil tuꞌ. 43Catuꞌ jix chejle paxtoj naj yu Jesús. Catuꞌ jix cam al-le can tet naj jaxca tiꞌ yu Jesús:
44—Abꞌ xin. Cꞌam bꞌey cha wal jun tiꞌ. Asiꞌ, txꞌox ja bꞌa tet naj yakꞌomal xaambꞌal tet Dios. Asiꞌ akꞌ ja wofrenda tet Dios, jaxca yalon sley Moisés. Jaxca tuꞌ oj yun xeclo eloj tol jix jaach waꞌxi, ẍi Jesús tet naj. 45Asanne cꞌal jix too Naj, jix cꞌoli yalon el tzet jix yun swaꞌxi can scꞌul. Pilan jix yalel masanil. Yu jun tuꞌ xin, ma xa skeꞌ yoc Jesús yul junjun conobꞌ, yutol ecꞌal mac chi yoche chi apni scꞌatan Naj. Yuxan jaꞌ bꞌey cꞌam ánima jix ecꞌ cꞌal. Caw chi apni cꞌal pax ebꞌ a junjun lugar scꞌatan Naj.
Currently Selected:
Marcos 1: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.