Juan 20
20
Spitzcꞌubꞌail Jesús
(Mateo 28:1-10; Marcos 16:1-8; Lucas 24:1-12)
1Jaꞌ yet eyto sajbꞌi yet Domingo xin, jix too María Magdalena bꞌey eyoctoj smimanil Jesús tuꞌ. Jix yilon yet jix apni, tol elnaj xa smajil chꞌen chꞌen tuꞌ. 2Yu jun tuꞌ, yuxan jix yakꞌ ani smeltzotej, catuꞌ jix apni scꞌatan Simón Pedro. Ey pax ecꞌ jun scuywom camcꞌulnebꞌil yetoj Pedro tuꞌ, jix yalon ix tet ebꞌ jaxca tiꞌ:
—Jix iꞌle eltej smimanil Naj Kaawil bꞌey jix ale can octoj. ¿Bꞌey mi tuꞌ jix iꞌletoj? ẍi ix tet ebꞌ. 3Jix yabꞌ cꞌal Pedro yetoj junxa cuywom tuꞌ xin, jix too ebꞌ yilon bꞌey chꞌen chꞌen tuꞌ. 4Ani stoo ebꞌ scawanil. Jix cancan Pedro tuꞌ yu junxa tuꞌ, yuxan jaꞌ junxa cuywom tuꞌ jix bꞌabꞌi apni bꞌey jun jolan tuꞌ. 5Jix octoj tꞌanan yul chꞌen chꞌen tuꞌ. Jix yiloni, asanxane an kꞌap jix pixle oc yin, lanan can eyoj. Ma octoj jun cuywom tuꞌ yul chꞌen. 6Tzajan yapni Simón Pedro tuꞌ yintaj. Jix apni cꞌal ocoj, jix octoj yul chꞌen chꞌen tuꞌ. Jaꞌ jix iloni, asanxane an kꞌap tuꞌ lanan can eyoj, 7cꞌal an txꞌambꞌale jix oc pixan yin sjolom Jesús tuꞌ chulan can ey an, catuꞌ cꞌotan can ey an. 8Jix lawi tuꞌ, jix octoj junxa cuywom jix bꞌabꞌi apni oc tuꞌ. Jato yet jix yilon jaxca tuꞌ, jix yaon oc yin scꞌul. 9Jaꞌ yet yalantoj cꞌamto chi yaoc ebꞌ yin scꞌul, tol yel jix pitzcꞌu a Jesús, yutol cꞌam chi naꞌcha el yu ebꞌ, tzet tzꞌibꞌebꞌilcan yul An Juun Tzꞌibꞌebꞌilcanoj, tzet utbꞌil tol oj pitzcꞌu pax a Jesús xol ebꞌ camnaj. 10Jix lawi yilon ebꞌ tuꞌ xin, jix pax ebꞌ bꞌey sna.
Jaꞌ Yet Jix Xꞌoxon A Sbꞌa Jesús Tet María Magdalena
(Marcos 16:9-11)
11Jal pax María Magdalena tuꞌ xin, jix cancan scꞌatan jun chꞌen chꞌen tuꞌ. Ma octoj ix yul chꞌen. Tucꞌal jix octoj tꞌanan ix yul, catuꞌ jix okꞌa ix. 12Catuꞌ jix yilon ix, eyoctoj cawan ángel yul chꞌen tuꞌ. Caw saj yili spichil ebꞌ. Chotan ey ebꞌ bꞌey jix ecꞌle smimanil Jesús tuꞌ, jun bꞌey sjolomtaj, junxa bꞌey yajantaj. 13Catuꞌ jix skꞌanlen eltej ebꞌ tet ix jaxca tiꞌ:
—Txo ix, ¿tzet yuxan chach okꞌi? ẍi eltej ebꞌ.
—Chin okꞌi, yutol jix iꞌletej smimanil Naj Waawil titiꞌ. ¿Bꞌey mi tuꞌ jix iꞌletoj? ẍi ix tet ebꞌ. 14Jato yet jix lawi yalon ix jaxca tuꞌ, jix meltzotoj tꞌanan ix yintaj. Catuꞌ jix yilontej ix, tol eyecꞌ Jesús, man pax yotaj oj ix, ta tol jaꞌ Naj. 15Yuxan jix skꞌanle el tet ix jaxca tiꞌ:
—Txo ix, ¿tzet yuxan chach okꞌi? ¿Mac cha seyecꞌoj? ẍi Jesús tet ix. Jaꞌ snaꞌon ix, tol jaꞌ naj ilom awbꞌeal teꞌ linan ecꞌ tituꞌ. Yuxan jix yal ix tet naj jaxca tiꞌ:
—Jaach no, ta jaach jix jul ja wiꞌeltej smimanil tuꞌ, al ey jin an, bꞌey jix bꞌet ja wakꞌcanoj, catuꞌ chin too wiꞌon an, ẍi ix tet Jesús.
16—María, ẍi Jesús tuꞌ tet ix. Yu jun tuꞌ, yuxan jix meltzotoj tꞌanan ix yin Naj. Jix kꞌanabꞌ a ix yin Hebreo tuꞌ jaxca tiꞌ:
—Raboni, ẍi ix. Chi yal yeloc apnoj, Cuywam. 17Catuꞌ jix yalon Jesús tet ix jaxca tiꞌ:
—Manche jin ja mitxꞌa, yutol cꞌamto chin atoj bꞌey eyecꞌ jin Mam. Asiꞌ, al tet ebꞌ wuẍtaj, cꞌal tet ebꞌ wanabꞌ masanil, tzet utbꞌil tol oj jin paxa bꞌey eyecꞌ jin Mam. Jaꞌ jin Mam tuꞌ, je Mam pax wetoj an. Jaꞌ jin Diosal tuꞌ, je Diosal pax wetoj an, ẍi Jesús tet ix. 18Yu jun tuꞌ, jaꞌ María Magdalena tuꞌ, jix too yal tet ebꞌ scuywom Jesús tuꞌ jaxca tiꞌ:
—Caw jix wil yin Naj Kaawil, ẍi ix tet ebꞌ. Catuꞌ jix yalon pax ix tet ebꞌ tzet jix al-le yu Naj tet ix.
Jaꞌ Yet Jix Xꞌoxa Sbꞌa Jesús Tet Ebꞌ Scuywom
(Mateo 28:16-20; Marcos 16:14-18; Lucas 24:36-49)
19Jacꞌal oc yet jun Domingoal tuꞌ yet skꞌejbꞌintajil, jix syambꞌa sbꞌa ebꞌ scuywom Jesús. Caw cꞌanani yeoc smajil jun na bꞌey yaman ecꞌ ebꞌ tuꞌ yu xiwcꞌulalil ebꞌ tet ebꞌ yaawil yeoc bꞌey Judea. Catuꞌ jix yilontej ebꞌ, linan xa oc Jesús snan xol ebꞌ, jix yalon tet ebꞌ jaxca tiꞌ:
—Ey ojabꞌ watxꞌcꞌulal snan je xol, ẍi Naj tet ebꞌ. 20Catuꞌ jix xꞌoxon yul skꞌabꞌ tet ebꞌ tuꞌ, cꞌal smootx bꞌey jix too chꞌen lanza. Jaꞌ yet jix yilon ebꞌ scuywom tol jaꞌ Naj Kaawil, caw jix tzala a ebꞌ sicꞌlebꞌil. 21Catuꞌ jix yalon naj tet ebꞌ junelxa jaxca tiꞌ:
—Ey ojabꞌ watxꞌcꞌulal snan je xol. Jaxca jix yun jin ẍejontej cu Mam Dios, queytuꞌ chi yun jex jin chejon pax toj, ẍi Jesús tet ebꞌ. 22Jix lawi yalon wan tiꞌ, catuꞌ jix xuontoj skaꞌeꞌ yibꞌan ebꞌ tuꞌ. Catuꞌ jix yalon Naj jaxca tiꞌ:
—Chaꞌwej can Santo Espíritu. 23Ta ey mac che yakꞌ mimancꞌulal yin spenail, oj yakꞌ pax Dios mimancꞌulal yibꞌan ebꞌ. Ta ey mac cꞌam che yakꞌ mimancꞌulal yin spenail xin, oj can cꞌaltaꞌ spenail ebꞌ tuꞌ yibꞌan, ẍi Jesús tet ebꞌ.
Jaꞌ Yet Jix Il-le Yin Jesús Yu Naj Tomás
24Ey jun yetbꞌi ebꞌ scuywom Jesús chi yij Tomás, chi yij pax Tioẍ. Cꞌam naj eyecꞌ yetoj ebꞌ yet jix il-le yin Jesús yu ebꞌ. 25Yu jun tuꞌ, yuxan jix yal ebꞌ yet cuywomal tuꞌ tet naj jaxca tiꞌ:
—Jaon tiꞌ, jix kil yin Naj Kaawil, ẍi ebꞌ tet naj.
—Ta cꞌam chi wil yechel chꞌen lawuẍ yul skꞌabꞌ, catuꞌ cꞌam chin jejtoj yiximal jin kꞌabꞌ yul sjolanil chꞌen tuꞌ, cꞌal jin jejontoj jin kꞌabꞌ bꞌey smootx ma waoc yin jin cꞌul, ẍi naj. 26Waxajebꞌxa cꞌual tuꞌ, catuꞌ jix syambꞌan pax oc sbꞌa ebꞌ junelxa bꞌey yul jun na tuꞌ. Eyecꞌ naj Tomás tuꞌ yetoj ebꞌ yet tuꞌ. Caw cꞌanani yeoc smajil jun na tuꞌ, jaxa jix yilontej ebꞌ, linan xa oc Jesús snan xol ebꞌ, catuꞌ jix yalon tet ebꞌ jaxca tiꞌ:
—Ey ojabꞌ watxꞌcꞌulal snan je xol, ẍi Naj tet ebꞌ. 27Catuꞌ jix yalon tet naj Tomás tuꞌ jaxca tiꞌ:
—Il jin kꞌabꞌ tiꞌ an. Jejtoj yiximal ja kꞌabꞌ yul sjolanil tiꞌ. Catuꞌ cha jejon pax toj ja kꞌabꞌ bꞌey sjolanil jin mootx tiꞌ. Manche ja wakꞌ caabꞌcꞌulal, aoc ja cꞌul win an, ẍi Jesús tet naj. 28Jix yalon Tomás tuꞌ tet Jesús jaxca tiꞌ:
—Jaach Waawil, jaach jin Diosal, ẍi naj. 29Catuꞌ jix yalon Jesús tuꞌ tet naj jaxca tiꞌ:
—Tomás, jix ja waoc ja cꞌul win an, yutol jix jin ja wil an. Jaꞌ ebꞌ cꞌam chin ilon an, catuꞌ chi yaon oc scꞌul ebꞌ win, yel xacꞌal watxꞌ yet ebꞌ, ẍi Jesús tet naj.
Jaꞌ Tzet Yuxan Jix Tzꞌibꞌele Jun Libro Tiꞌ
30Ecꞌal tocꞌal milagro jix el yunen Jesús sattaj ebꞌ scuywom tuꞌ, ma cꞌal tzꞌibꞌelecan skꞌaneal masanil yul jun libro tiꞌ. 31Jix tzꞌibꞌelecan wan tiꞌ, yet watxꞌ che yaoc yin je cꞌul, tol jaꞌ Jesús Naj Scꞌaal Dios, jaꞌton Cristo. Ta queytuꞌ oj je yute je yaon oc yin je cꞌul, oj je chaꞌ je kꞌinal tol ey cꞌal yin tobꞌalkꞌinal yu Naj.
Currently Selected:
Juan 20: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.