YouVersion Logo
Search Icon

Juan 2

2
Jun Nupil Jix Oc Bꞌey Conobꞌ Caná
1Jaꞌ yet scaabꞌial jun tuꞌ xin, catuꞌ jix oc jun nupil bꞌey conobꞌ Caná, bꞌey yul yet Galilea. Jix bꞌet xutx Naj Jesús bꞌey jun nupil tuꞌ. 2Jix bꞌet pax ecꞌ Jesús yetoj ebꞌ scuywom, yutol awtebꞌil ebꞌ. 3Jix lawi svino ebꞌ, yuxan jix yal xutx Jesús tuꞌ tet Naj jaxca tiꞌ:
—Jix lawi svino ebꞌ, ẍi ix tet Jesús. 4Catuꞌ jix yalon Jesús tuꞌ jaxca tiꞌ:
—Chicay, ¿tzet yuxan jaꞌ ey jin cha walaꞌ? Cꞌamto chi aapnoj stiempoal jin txꞌoxon el wipal xol ánima,#2:4 Jix yal Jesús: “Cꞌamto chi jul worail.” Chi yal yeloc apnoj tol cꞌamto chi xꞌoxel yipal yopiso, jaxca tuꞌ jix yun stzꞌibꞌele yul jun versículo tiꞌ. ẍi Naj tet xutx. 5Catuꞌ jix yalon xutx Naj tuꞌ tet ebꞌ chi akꞌon servil tuꞌ jaxca tiꞌ:
—Jaꞌ masanil tzet oj yal Jesús ey jex, che jije cꞌal, ẍi ix tet ebꞌ. 6Ey wajebꞌ chꞌen kꞌuchbꞌal sneetal jaꞌ jaꞌ eyecꞌ tituꞌ. Chim to joebꞌoj, ma wajebꞌoj mooc jaꞌ yul junjun. Sneetal yaꞌ ebꞌ yet chi sajbꞌane el stzettaj yetal ebꞌ jaxca taꞌ sbꞌeybꞌal ebꞌ Israel.#2:6 Il tzet chi yal bꞌey diccionario yu txꞌabꞌanil kꞌabꞌe. 7Catuꞌ jix yalon Jesús tet ebꞌ chi akꞌon servil tuꞌ jaxca tiꞌ:
—Akꞌwej no wan neet tiꞌ, ẍi Naj tet ebꞌ. 8Catuꞌ jaꞌ yet jix noi, jix yalon Jesús tet ebꞌ jaxca tiꞌ:
—Tinaniꞌ xin, letxwej atej niꞌoj, catuꞌ che yakꞌon tet naj chi ilon sloꞌoal jun nupil tiꞌ, ẍi Jesús tet ebꞌ.
Catuꞌ jix yakꞌon tet naj tuꞌ. 9Jaꞌ yet jix yabꞌlen naj yuqꞌueni, eyxa oc svinoal. Man yotaj oj naj bꞌeytuꞌ jix tit jun vino tuꞌ. Jal ebꞌ chi akꞌon servil tuꞌ, yotaj ebꞌ, yutol jaꞌ ebꞌ jix letxon atej. Jaꞌ naj chi ilon sloꞌoal jun nupil tuꞌ jix awten naj chi nupi tuꞌ. 10Jix yalon naj tet jaxca tiꞌ:
—Jaꞌ sbꞌeybꞌal ánima, tol jaꞌ vino watxꞌ yucꞌlei, jaꞌ chi yakꞌ ebꞌ ucꞌle sbꞌabꞌelal. Tzunan xa chi ale eltoj svino ebꞌ ey wal chi yal yuqꞌui. Jal jaach, jix ja waꞌne can jun vino watxꞌ yuqꞌui. Tzunan xa, jix ja wiꞌtej ucꞌle oj, ẍi naj chi akꞌon cuenta masanil tuꞌ. 11Jaꞌ bꞌey conobꞌ Caná, yul yet Galilea, jatuꞌ jix xꞌox jun milagro Jesús. Bꞌabꞌel milagro jun jix xꞌox tuꞌ. Queyton tuꞌ jix yute xꞌoxon eloj tol miman yipal, catuꞌ jix yaon oc scꞌul ebꞌ scuywom yin Naj. 12Jix lawi cꞌal tuꞌ, jix too Jesús bꞌey conobꞌ Capernaúm. Jix too xutx cꞌal ebꞌ yuẍtaj cꞌal ebꞌ scuywom. Jix eecꞌ ebꞌ jayebꞌ cꞌu tituꞌ.
Jix Ujtele Eltej Ebꞌ Txonwom Yul Stemplo Dios
(Mateo 21:12-13; Marcos 11:15-18; Lucas 19:45-46)
13Lalanxa sjul jun skꞌin ebꞌ Israel chi yij Pascua. Yuxan jix too Jesús bꞌey Jerusalén. 14Jaꞌ tituꞌ jix octoj yul stemplo Dios. Catuꞌ jix yiloni, ey ebꞌ chi txonwi wacax. Ey ebꞌ chi txonwi meꞌ. Ey ebꞌ chi txonwi uch. Ey ebꞌ xin, qꞌuexo tumin chi yunne.#2:14 Jaꞌ wan noꞌ noꞌ chi txonle yul templo tuꞌ, jaꞌton wan oj yakꞌ ebꞌ yin xaambꞌalil. Chi sqꞌuex tumin yul tituꞌ, yutol asan tumin yet templo chi ẍaꞌ ebꞌ yin ofrenda ma saꞌbꞌeal yul templo tuꞌ. Ecꞌal mac chi yetne ebꞌ yin wan tiꞌ. 15Jaꞌ yet jix yilon jaxca tuꞌ xin, jix swaꞌnen jun txꞌan tzꞌuum yin eyman. Jix ujtele eltej masanil ebꞌ yul stemplo Dios tuꞌ, yetoj cꞌal noꞌ meꞌ tuꞌ, cꞌal noꞌ wacax tuꞌ. Jix lawi tuꞌ xin, jix smakꞌon el tiẍna stumin ebꞌ qꞌuexom tumin tuꞌ sat meẍa. Jix tenon pax a pacꞌlabꞌoj smeẍa ebꞌ. 16Catuꞌ jix yalon tet ebꞌ chi txonwi uch tuꞌ jaxca tiꞌ:
—Iꞌwej el wan tzꞌiquin tiꞌ. Manche je yute sna jin Mam tiꞌ txombꞌalil, ẍi Jesús tet ebꞌ. 17Catuꞌ jix snaꞌontej tzet albꞌilcan yul An Juun Tzꞌibꞌebꞌilcan yu ebꞌ scuywom tuꞌ, bꞌey chi yal jaxca tiꞌ: “Caw pitzꞌan oc jin cꞌul jin yaꞌilnen ja calubꞌal,” ẍi yul An Juun tuꞌ.#Salmos 69:9. 18Catuꞌ jix yalon ebꞌ yaawil yeoc bꞌey Judea tuꞌ tet Naj jaxca tiꞌ:
—¿Tzet milagroal junoj cha txꞌox ey jon, yet watxꞌ chi kotajne el tol ey ja walon ja wet ja wunen wan tiꞌ? ẍi ebꞌ tet Jesús. 19Yuxan jix yal Naj tet ebꞌ jaxca tiꞌ:
—Ta che yakꞌ lawoj jun stemplo Dios tiꞌ, yin yox cꞌual catuꞌ chi a pax wu junelxa an, ẍi Naj tet ebꞌ. 20Catuꞌ jix yalon ebꞌ yaawil yeoc bꞌey Judea tuꞌ tet Naj junelxa jaxca tiꞌ:
—Jaꞌ jun stemplo Dios tiꞌ, 46 abꞌil jix yakꞌ ebꞌ swaꞌneni, ¿Tumi taꞌ chi waꞌxi yin oxebꞌ cꞌu ja wu? ẍi ebꞌ tet Naj. 21Jaꞌ stemplo Dios chi yaltej snaꞌon ebꞌ. Tol jaꞌ pax smimanil Naj chi yal pax oj. 22Yuxan, jaꞌ yet jix pitzcꞌu a xol ebꞌ camnaj, jaꞌ yet tuꞌ jix snaꞌontej ebꞌ scuywom tzet jix yalaꞌ, catuꞌ jix yaon oc ebꞌ yin scꞌul tzet tzꞌibꞌebꞌilcan yul An Juun tuꞌ, cꞌal tzet albꞌilcan tet ebꞌ yu Jesús.
Yotaj Jesús Sbꞌeybꞌal Masanil Ebꞌ Ánima
23Jaꞌ yet eyecꞌ Jesús bꞌey Jerusalén yu kꞌin Pascua tuꞌ, ecꞌal mac jix yaoc scꞌul yin Naj, yutol jix yil ebꞌ wan milagro jix xꞌox Naj. 24Jal pax Jesús xin, ma yaoc ebꞌ yipoj scꞌul, yutol yotaj xa snaꞌbꞌal masanil ánima Naj. 25Man sowalil oj ey mac chi alon tet Naj yu tzet chi snaꞌ junoj mactxequel. Yutol yotaj Naj tzet chi ecꞌ yul cu cꞌul junjun jon.

Currently Selected:

Juan 2: knj

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy