Juan 14
14
Oj Skeꞌ Kapni Bꞌey Dios Yu Jesús
1Jix yal Jesús tet ebꞌ scuywom jaxca tiꞌ:
—Manche somcha el je naꞌbꞌal. Awej oc je cꞌul yin Dios, catuꞌ che yaon pax oc je cꞌul win an. 2Jaꞌ bꞌey sna Naj jin Mam an, caw ey lugar bꞌey chi cu caeyi. Ta cꞌam tzet jaxca tiꞌ, ¿xax mi wal ey jex an? Oj jin toj jin waꞌne je lugar bꞌey oj jex aapnoj. 3Oj lawoj jin waꞌnen je lugar tuꞌ, catuꞌ oj jin jul pax junelxa. Catuꞌ oj jex wiꞌontoj wetoj an, yet watxꞌ jaꞌ bꞌey ey jin ecꞌ tuꞌ, jatuꞌ oj jex eecꞌ wetoj an. 4Jaex tiꞌ, je yotaj xa bꞌey chin too an, je yotaj pax sbꞌeal bꞌey chin too tuꞌ, ẍi Jesús tet ebꞌ. 5Catuꞌ jix yalon naj Tomás tet Naj jaxca tiꞌ:
—Jaach Cuywam, man kotajoj, bꞌey oj jaach toj tuꞌ. ¿Tzet oj kute kotajnen el jun bꞌe tuꞌ? ẍi naj. 6Jix yalon Jesús tet naj jaxca tiꞌ:
—Jaꞌ jun bꞌe chi wal tiꞌ, jain toni. Asan jin chi skeꞌ jex wiꞌontoj bꞌey eyecꞌ cu Mam Dios. Jain ton yel jin, jain ton a kꞌinale jin an. 7Tol oj wal chin je yotajne eloj. Ta chin je yotajne eloj, oj je yotajne pax el jin Mam, jal tinaniꞌ, je yotaj xa jin Mam tuꞌ, yutol tuxa jix je yil yin, ẍi Jesús tet ebꞌ. 8Jix yalon Felipe tet Naj jaxca tiꞌ:
—Jaach Cuywam, txꞌox ja Mam tuꞌ kilaꞌ, catuꞌ cꞌamxa sowalil wanojxa, ẍi naj Felipe tuꞌ. 9Jix takꞌwi Jesús jaxca tiꞌ:
—Felipe, mimanxa tiempo ey jin ecꞌ je yetoj. ¿Tumi cꞌamto cha wotajne el mac jin txequel xin? Jaꞌ ebꞌ chin ilon an, lalan yilon ebꞌ yin cu Mam Dios. Yu jun tuꞌ, ¿tzet yuxan cha wal ey jin: “Txꞌox ja Mam tuꞌ kilaꞌ,” ja chi? 10¿Tumi cꞌam cha waoc yin ja cꞌul tol ey jin oc yin cu Mam Dios, catuꞌ ey pax oc Naj win an? Jaꞌ tzet chi wal an, man yul oj wet chi walon an. Tol jaꞌ cu Mam Dios eyoc win an, jaꞌ chi oc wetoj an. 11Awej oc yin je cꞌul, tol ey jin oc yin cu Mam Dios, catuꞌ ey pax oc win. Ta cꞌam che yaoc je cꞌul win yu tzet chi wal tiꞌ an, awej oc je cꞌul win yu wan milagro chin txꞌoxoꞌ. 12Caw yel chi wal ey jex an, jaꞌ mac chin aon oc yin scꞌul, oj yun ebꞌ wan chi wun tiꞌ an. Tol tax ey wan tzetyetal ecꞌbꞌan oj el yunen ebꞌ yintaj wan tiꞌ, yutol oj jin paxa bꞌey eyecꞌ cu Mam Dios. 13Yal cꞌal tzet oj je kꞌan tet Dios yin jin bꞌi, oj jin waꞌne el ey jex. Oj jin waꞌne el jain tiꞌ, tol Scꞌaal jin Dios, yet watxꞌ oj jin txꞌoxeloj, tol caw miman yeloc apnoj cu Mam Dios. 14Yal cꞌal tzet oj je kꞌan tet Dios yin jin bꞌi, oj jin waꞌne el ey jex an.
Jix Yal Jesús Tol Oj Ẍejtej Naj Santo Espíritu
15Ta chi camel je cꞌul win an, jijewej jin chejbꞌanil an. 16Jain tiꞌ oj jin kꞌan tet cu Mam Dios, catuꞌ oj jin chejontej junxa mac oj colwa je yetoj, jaꞌton Yespíritu caw yel. Jaꞌ oj eecꞌ je yetoj yin tobꞌalkꞌinal. 17Jaꞌ ebꞌ yet yul yibꞌankꞌinal tiꞌ, ma skeꞌ ẍaꞌon jun tiꞌ ebꞌ, yutol cꞌam chi skeꞌ yilon oc ebꞌ yin, man yotaj oj ebꞌ. Jal jex xin, je yotaj xa Yespíritu tiꞌ, yutol eyecꞌ je yetoj. Jaꞌ oj eecꞌ je yin, yin junelne. 18Jain tiꞌ, man oj jex jin bꞌejcan je txꞌojli, oj jin jul pax junelxa. 19Txenxane tiempo, catuꞌ, cꞌamxa bꞌakꞌin oj yil ebꞌ ánima win an. Jal jex, jaex tiꞌ xin, oj jin je yil an. Yutol iquis jin cꞌal tobꞌalkꞌinal, yu jun tuꞌ, yuxan iquis jex pax tobꞌalkꞌinal. 20Jaꞌ yet jun cꞌual yet oj oc Yespíritu tuꞌ je yin, catuꞌ oj naꞌcha el je yu, tol ey jin oc yin jin Mam, catuꞌ eyoc Naj win an. Catuꞌ oj naꞌcha pax el je yu, tol ey jex oc win an, catuꞌ ey jin pax oj je yin. 21Jaꞌ mac chi abꞌen jin chejbꞌanil, catuꞌ chi sjijen pax oj, jaꞌton ebꞌ tuꞌ chi camel scꞌul win an. Jaꞌ ebꞌ chi camel scꞌul win, jaꞌ jin Mam oj camcꞌulnen ebꞌ. Yetoj jin pax oj, oj jin camcꞌulne pax ebꞌ. Catuꞌ oj jin txꞌoxon jin bꞌa tet ebꞌ an, ẍi Jesús tet ebꞌ. 22Ey junxa mac chi yij Judas, manaj naj Judas Iscariote, jaꞌ jix alon tet Jesús jaxca tiꞌ:
—Jaach Cuywam, ¿tzet yuxan asanne ey jon oj ja txꞌox ja bꞌa? ¿Tzet yuxan man oj ja txꞌox ja bꞌa tet ebꞌ yet yul yibꞌankꞌinal tiꞌ? ẍi naj tet Jesús tuꞌ. 23Catuꞌ jix yalon Naj tet naj Judas tuꞌ jaxca tiꞌ:
—Jaꞌ mac chin camcꞌulneni, chi sjije tzet chi wal an. Yuxan jaꞌ jin Mam chi camcꞌulnen pax ebꞌ. Catuꞌ oj cu eecꞌ yetoj ebꞌ. 24Jal ebꞌ cꞌam chin camcꞌulneni, cꞌam chi sjije ebꞌ tzet chi wal an. Jaꞌ wan kꞌane chi wal ey jex tiꞌ an, man wetoj an, yet cu Mam Dios, Naj jix jin chejontej. 25Chi wal can wan tiꞌ ey jex, yajbꞌan tol ey jin to ecꞌ je yetoj. 26Jaꞌ cu Mam Dios oj chejontej Yespíritu ey jex jin qꞌuexeloj. Jaꞌton oj colwa je yetoj. Oj jex scuy yin masanil tzetyetal. Oj sjej je naꞌ jantaj tzet albꞌilcan ey jex wu an. 27Jaꞌ tinaniꞌ xin, chex wa can oc yin watxꞌcꞌulal. Jaꞌcaw jin watxꞌcꞌulal chi wakꞌcan ey jex. Manaj swatxꞌcꞌulal ebꞌ yul yibꞌankꞌinal tiꞌ chi wakꞌcan ey jex, man quey oj tuꞌ wet chi wakꞌcan ey jex.#14:27 Jaꞌ yet chi yil-len sbꞌa ebꞌ Israel cꞌal yet chi yal-len too sbꞌa ebꞌ, chi yal jun kꞌane tiꞌ ebꞌ: “Ey ojabꞌ watxꞌcꞌulal snan je xol.” Jaꞌton jun tiꞌ jix snaꞌtej Jesús yet jix yalon jaxca tiꞌ: “Manaj swatxꞌcꞌulal ebꞌ yul yibꞌankꞌinal tiꞌ chi wakꞌcan ey jex, man quey oj tuꞌ wet chi wakꞌcan ey jex”. Manche je yakꞌ bꞌiscꞌulal, catuꞌ cꞌam chex xiwi. 28Xax wal je yabꞌ an, tol oj jin pax aoj, oj jin jul pax oj, catuꞌ oj jin eecꞌ je yetoj. Ta yel chin je camcꞌulne, ta jaxca tuꞌ, smoo chex tzalabꞌi yet che yabꞌeni tol oj jin pax a bꞌey cu Mam Dios. Yutol ecꞌbꞌan Naj wibꞌan. 29Yin eyojto chi wal can wan tiꞌ ey jex, yet watxꞌ jaꞌ yet oj yunen tzet chi wal tiꞌ an, catuꞌ oj jin je yaon oc yin je cꞌul. 30Manxa mimanoj tzet chi wal can ey jex an, yutol lalan sjul jun yaaw yul yibꞌankꞌinal tiꞌ. Jaꞌ jun tuꞌ cꞌam yalon yet win. 31Jain, chin jije ẍejbꞌanil cu Mam Dios jix yal ey jin, yet watxꞌ oj yotajne el ebꞌ ánima masanil, tol ey jin camcꞌulal yin Naj. Jaꞌ tinaniꞌ xin, aanwej linanoj, toonwej, ẍi Jesús tet ebꞌ.
Currently Selected:
Juan 14: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.