YouVersion Logo
Search Icon

Hechos 1

1
Jix Yal Dios Tol Oj Yakꞌ Santo Espíritu Tet Ebꞌ
1Wuẍtaj Teófilo, jaꞌ yul jun an bꞌabꞌel juun jix jin tzꞌibꞌetoj ey jaach an,#1:1 Jaꞌ yet chi kilon jun versículo tiꞌ yetoj wan versículo bꞌey Lucas 1:1-4 chi naꞌcha el ku, tol jaꞌ naj Lucas jix tzꞌibꞌen pax jun libro Hechos tiꞌ. jix waltoj jantaj tzet jix el yunen Jesús, cꞌal jantaj tzet jix yun scuywa tet ebꞌ ánima yet tax cꞌal jix ẍaꞌon el yich scuywai, 2masantaꞌcꞌal jix jul scꞌual spaxa satcan. Jaꞌ yet cꞌamto chi paxaoj, jix yalon can wanxa chejbꞌanile tet ebꞌ ẍejabꞌ, ebꞌ sicꞌbꞌil el yu. Queytuꞌ jix yun yu Naj Santo Espíritu. 3Jaꞌ yet jix ecꞌle camich yibꞌan, ecꞌal el tocꞌal jix xꞌox sbꞌa tet ebꞌ ẍejabꞌ tuꞌ. Cawinaj to cꞌu jix xꞌox sbꞌa tet ebꞌ, tzet utbꞌil tol caw yel jix pitzcꞌu aoj. Jix kꞌanabꞌ yetoj ebꞌ yin tzet utbꞌil tol jaꞌ Dios oj oc can yin Yaawiloj.
4Jaꞌ yet eyto ecꞌ yetoj ebꞌ ẍejabꞌ tuꞌ, jix yalon tet ebꞌ jaxca tiꞌ:
—Cananwej bꞌey conobꞌ Jerusalén tiꞌ. Echbꞌanewej jun albꞌilcan ey jex yu Dios, yet jix yakꞌon can stiꞌ, jaxca jix wute walon ey jex an. 5Yel toni, jaꞌ naj Juan jix akꞌwi bautizar yetoj jaꞌ, jal tinaniꞌ jayebꞌxane pax cꞌu, catuꞌ oj akꞌle Naj Santo Espíritu ey jex, catuꞌ jaxca tol oj jex akꞌle bautizar yetoj, ẍi Jesús tet ebꞌ ẍejabꞌ.
Skꞌaneal Spaxbꞌal A Jesús Bꞌey Satcan
6Jaꞌ yet eyto cꞌal ecꞌ Jesús yetoj ebꞌ ẍejabꞌ, jix skꞌanlen el ebꞌ tet jaxca tiꞌ:
—Jaach Cuywam, ¿jam tinaniꞌ, oj ja col ebꞌ ket conobꞌ Israel, yet watxꞌ junelxa chi kaoc kaawil yul ket? ẍi ebꞌ tet Jesús.
7Jix yalon Naj tet ebꞌ jaxca tiꞌ:
—Ma akꞌle je yotajne el scꞌual cꞌal stiempoal. Yutol jaꞌ jun tiempoal tuꞌ, asan cu Mam Dios ey yalon yet yin bꞌakꞌin oj oc jun yaawil tuꞌ. 8Oj yakꞌ pax yipal Dios ey jex, yet oj je chaꞌon Santo Espíritu junjun jex. Oj lawoj jun tuꞌ, catuꞌ oj je yalon el jin kꞌaneal bꞌey Jerusalén tiꞌ, yetoj bꞌey masanil lugar Judea tiꞌ, cꞌal yul-laj yet Samaria, masantaꞌcꞌal bꞌey chi lawi can apnoj yul yibꞌankꞌinal tiꞌ, oj je yaleloj, ẍi Jesús tet ebꞌ.
9Jaꞌ yet jix lawi yalon Jesús wan tiꞌ, catuꞌ jix iꞌle atoj satcan. Jix atoj tꞌanan ebꞌ yin, catuꞌ jix qꞌueya xol jun asun.#1:9 Jaꞌ bꞌey Antiguo Testamento, jaꞌ Dios chi xꞌox sbꞌa tet ebꞌ ánima xol asun. Ma xa yil yin Naj ebꞌ. 10Jaꞌ yet tꞌanan atoj ebꞌ satcan yet jix paxa Jesús tuꞌ, catuꞌ jix yilon ebꞌ, linan xa oc cawan winaj scꞌatan ebꞌ. Saj wejinaj xacꞌal yili spichil ebꞌ.
11Jix yalon ebꞌ cawan tuꞌ jaxca tiꞌ:
—Jex a Galilea jex tiꞌ, ¿tzet yuxan tꞌanan jex cꞌal atoj satcan? Jaꞌ Jesús tiꞌ, jix iꞌle a je xol, catuꞌ jix paxa satcan. Jaxca jix yun je yilon stoo tiꞌ, queytuꞌ oj yun sjul pax oj, ẍi ebꞌ tet ebꞌ.
Jix Seyle Sqꞌuexel Naj Judas
12Jix lawi cꞌal tuꞌ xin, jix paxeytej ebꞌ scuywom tuꞌ bꞌey wonan Olivo tuꞌ. Catuꞌ jix meltzotej ebꞌ bꞌey Jerusalén. Jaꞌ jun wonan tuꞌ, ey mi snan oj legua xol yetoj Jerusalén. 13Jaꞌ yet jix apni ebꞌ yul conobꞌ tuꞌ, jix atoj ebꞌ yul can bꞌey jun cuarto bꞌey ey sposada Pedro, yetoj Jacobo, Juan, Andrés, cꞌal Felipe, Tomás, Bartolomé, Mateo, Jacobo yuninal naj Alfeo, yetoj Simón yetbꞌi cꞌal sbꞌa yetoj ebꞌ Cananista#1:13 Ebꞌ Cananista, jaꞌton sbꞌi jun bꞌulan ebꞌ chi jowi oc yin naj yaaw bꞌey Roma. Chi yoche ebꞌ chi el yalan naj yaaw tuꞌ, catuꞌ chi yaon oc jun yaawil ebꞌ yul yet xꞌojli. yet yalantoj, yetoj pax jun Judas yuẍtaj Jacobo. Jaꞌ tituꞌ, junne ey sposada ebꞌ masanil. 14Junjun cꞌal cꞌu jix syambꞌan sbꞌa ebꞌ masanil yu chi txali ebꞌ tet Dios. Ey ebꞌ ix jix txali yetoj ebꞌ. Eyecꞌ ix María yetoj ebꞌ, ix xutx Naj Jesús. Ey pax ecꞌ ebꞌ yuẍtaj Jesús tuꞌ.
15Jaꞌ yet jun tiempoal tuꞌ, ey mi junoj 120 ebꞌ creyente yaman ocoj. Catuꞌ jix a linan naj Pedro snan xol ebꞌ, catuꞌ jix yalon jaxca tiꞌ:
16—Jex wuẍtaj, jex wanabꞌ, sowalil ton jix yun tzet albꞌilcan yul An Juun Tzꞌibꞌebꞌilcanoj. Yutol jaꞌ Naj Santo Espíritu jix akꞌon can stzꞌibꞌe naj David yin naj Judas, jaꞌ naj txꞌoxwawom tet ebꞌ mitxꞌwawom yin Jesús. 17Jaꞌ naj Judas tuꞌ, eyoc cu tzꞌajiloj yet yalantoj, junne kopiso yetoj. 18Jix cꞌal ẍaꞌ pax stumin yin jun tzetyetal pena jix el yuneni. Catuꞌ jix smanon jun txꞌotxꞌ yetoj chꞌen tumin tuꞌ. Jix lawi tuꞌ xin, jix titqꞌuey pitxnaoj. Catuꞌ jix eltej secna yul scꞌul tuꞌ. 19Jaꞌ ebꞌ a Jerusalén tiꞌ, masanil ebꞌ jix yabꞌ skꞌumal jun tiꞌ. Yuxan, jix yakꞌ yij sbꞌi jun txꞌotxꞌ ebꞌ tuꞌ Hacéldama yin stiꞌ ebꞌ. Jaꞌ chi yal yeloc apnoj, “Xꞌotxꞌal Ẍiqꞌuil Ánima.”
20Jaxca tuꞌ jix yunne, yutol chi yal jaxca tiꞌ yul an Libro chi yij Salmos:
Can ojabꞌ sna yin cusiltaj.
Cꞌam ojabꞌ mac chi kaey tituꞌ, ẍi.#Salmos 69:25.
Chi yalon pax jaxca tiꞌ:
Oc ojabꞌ junojxa mactxequel sqꞌuexeloj yin yopiso, ẍi yul An Juun tuꞌ.#Salmos 109:8.
21-22Yuxan, sowalil chi cu sicꞌ junoj mac chi oc sqꞌuexeloj naj. Catuꞌ chi kaon oc yopiso yalon eloj tol yel jix pitzcꞌu a Jesús. Jaꞌ jun mactxequel oj cu sicꞌ el tuꞌ, sowalil jaꞌ junoj ketbꞌi cꞌaltaꞌ cu bꞌa yetoj, yet jix cu ecꞌ yetoj Naj Kaawil Jesús. Jaꞌ jun mactxequel tuꞌ, jaꞌ junoj jacꞌal jun ketoj yet tax cꞌal jix akꞌle bautizar Jesús yu naj Juan, masantaꞌcꞌal jix iꞌle pax atoj satcan, ẍi naj Pedro tet ebꞌ.
23Yuxan ey cawan winaj jix satne oc ebꞌ, jaꞌton Matías yetoj José jun chi yij pax Barsabás ma Justo. 24Jix lawi jun tuꞌ, catuꞌ jix txali ebꞌ masanil, jix yal ebꞌ yin xa tuꞌ jaxca tiꞌ:
—Mamin, ja wotajxa tzet utbꞌil yili cu naꞌbꞌal cu masanil jon. Yuxan, txꞌox ey jon, mac junoj oj ja sicꞌ el xol cawan tiꞌ, 25yet watxꞌ chi oc yopiso, catuꞌ chi oc ẍejabꞌoj Jesucristo. Yutol jix iꞌle el Judas yin yopiso yu spenail. Catuꞌ jix toocan bꞌey jun lugar bꞌey smoo stoi, ẍi ebꞌ.
26Jix lawi jun tuꞌ, catuꞌ jix ale oc puesto yin ebꞌ scawanil. Jix txeclo eltej yu jun puesto tuꞌ, tol jix can yin naj Matías. Catuꞌ jix oc can stzꞌajiloj ebꞌ juslucꞌwan ẍejabꞌ Jesucristo tuꞌ.

Currently Selected:

Hechos 1: knj

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy