Lucas 23
23
Skꞌaneal Yet Jix Bꞌetecꞌ Jesús Sattaj Naj Pilato
(Mateo 27:1-2, 11-14; Marcos 15:1-5; Juan 18:28-38)
1Jix a linan masanil ebꞌ tuꞌ, catuꞌ jix iꞌletoj Jesús yu ebꞌ sattaj naj Pilato. 2Catuꞌ jix cꞌoli snaꞌon a kꞌane ebꞌ yibꞌan. Jix yalon ebꞌ jaxca tiꞌ:
—Jix kil jon, jaꞌ jun winaj tiꞌ, lalan yakꞌon somcha el scꞌul ebꞌ ket conobꞌ jon. Jix yalaꞌ tol cꞌam chi skeꞌ kakꞌon chꞌen tumin chi kꞌanle el yu naj yaaw a Roma. Catuꞌ chi yalon pax oc sbꞌa Cristoal,* chi yal yeloc apnoj, rey, ẍi ebꞌ.
3Jix skꞌanlen naj Pilato tuꞌ tet jaxca tiꞌ:
—Chin kꞌanle ey jaach, ¿Tumi sreyal jaach ebꞌ Israel tuꞌ? ẍi naj tet Jesús.
—Jaaꞌ, yel toni, queyton tuꞌ jaxca ja walon tuꞌ, ẍi Naj tet naj Pilato.
4Jix yalon Pilato tuꞌ tet ebꞌ yaaw yakꞌomal xaambꞌal ebꞌ Israel tet Dios yetoj ebꞌ ánima eyecꞌ tituꞌ jaxca tiꞌ:
—Jaꞌ jun winaj tiꞌ, cꞌam niꞌoj spenail chi wabꞌe, ẍi tet ebꞌ.
5Caw tol jix yiꞌatej scꞌul ebꞌ yalon junelxa jaxca tiꞌ:
—Jaꞌ yu jun winaj tiꞌ, masanil ebꞌ a Judea tiꞌ lalan somcha el scꞌul ebꞌ yu stit sjowal ebꞌ yin gobierno yu wan cuybꞌanile chi yakꞌa. Jaꞌ tax bꞌey Galilea jix el yich yalon wan cuybꞌanile chi yal tiꞌ, masantaꞌcꞌal jix jul titiꞌ, ẍi ebꞌ tet Pilato.
Skꞌaneal Yet Jix Bꞌetecꞌ Jesús Sattaj Herodes
6Jaꞌ yet jix yabꞌen Pilato wan tuꞌ, jix skꞌanlen tet ebꞌ, ta tol a Galilea Jesús tuꞌ. 7Jaꞌ yet jix yabꞌeni, tol a Galilea toni, jix yatoj tet Herodes, yutol jaꞌ naj Herodes yaaw yeoc bꞌey Galilea tuꞌ. Jaꞌ yet tuꞌ jix eecꞌ jayebꞌ cꞌual naj Herodes bꞌey Jerusalén tuꞌ. 8Jaꞌ yet jix yilon sjul Jesús sattaj, caw jix tzalai, yutol eyxa tiempo yabꞌen skꞌumal Jesús tuꞌ. Yuxan caw chi yoche chi kꞌanabꞌ niꞌoj yetoj. Catuꞌ chi yochen chi yil junoj milagro chi yunne. 9Ecꞌal tzet jix skꞌanle el tet Jesús tuꞌ, cꞌam cꞌal pax tzet jix spajtze. 10Jaꞌ ebꞌ yaaw yakꞌomal xaambꞌal ebꞌ Israel tet Dios, jix apni ebꞌ yetoj ebꞌ cuywam yin sley Moisés. Yelcꞌulal tol jix snaꞌa kꞌane ebꞌ yibꞌan Naj. 11Yuxan jix bꞌawa a Herodes yetoj ebꞌ soldado yin Jesús tuꞌ. Catuꞌ jix bꞌuchwa ebꞌ yin Naj sicꞌlebꞌil. Jix tzꞌaj yaon oc jun pichile ebꞌ caw watxꞌ yin Naj, jaxca yet ebꞌ rey. Jix lawi jun tuꞌ xin, catuꞌ jix ale pax toj bꞌey Pilato tuꞌ junelxa. 12Jato yet jun cꞌual tuꞌ, jix yamigone a sbꞌa naj Pilato tuꞌ yetoj naj Herodes tuꞌ. Yutol jaꞌ yet yalantoj, scajat sbꞌa ebꞌ.
Yet Jix Naꞌle Oc Yin Jesús
(Mateo 27:15-20; Marcos 15:6-15; Juan 18:39—19:6)
13Jix yal Pilato tol chi syambꞌa oc sbꞌa ebꞌ yaaw yakꞌomal xaambꞌal ebꞌ Israel tet Dios yetoj ebꞌ yaaw, cꞌal masanil ánima. 14Catuꞌ jix yalon xol ebꞌ jaxca tiꞌ:
—Jaꞌ jun winaj jix je yiꞌtej ey jin tiꞌ an, che yalaꞌ tol chi somcha el ebꞌ ánima yu. Ilaꞌ tol je sattaj jix jin kꞌanle tet, cꞌam niꞌoj spenail chi txeclo el jaxca je yalon yin tuꞌ. 15Jacꞌalaꞌ Herodes, cꞌam niꞌoj spenail jix ilcha el yin yu naj. Yuxan, jix ẍej pax tej cu cꞌatan junelxa. Yuxan cꞌam niꞌoj spenail smoo scam yu. 16Yuxan tucꞌal oj wakꞌ makꞌle yetoj tzꞌuum, catuꞌ oj jin jajon eloj, ẍi tet ebꞌ.
17Jaꞌ sley Pilato tuꞌ, tol chi sjajel jun a presowom yet junjun kꞌin Pascua. 18Jaꞌ yet jix yabꞌen ánima tol queytuꞌ oj yun Naj, jix a yaw ebꞌ yin ipal jaxca tiꞌ:
—Jaꞌ jun winaj tiꞌ, cam ojabꞌi. Jaꞌ ojabꞌ naj Barrabás cha jajeloj, ẍi ebꞌ.
19Jaꞌ naj Barrabás tuꞌ, eyoc preso yutol locan xol ebꞌ jix yakꞌle jowal yetoj ebꞌ yaaw yul conobꞌ tuꞌ, catuꞌ makꞌom pax cam ánima naj. 20Jaꞌ naj Pilato tuꞌ, caw chi yoche chi sjajel Jesús. Yuxan, queytuꞌ jix yute yalon tet ebꞌ ánima tuꞌ junelxa. 21Jaꞌ yet jix yabꞌen cꞌal ebꞌ ánima jaxca tuꞌ, caw jix a yaw ebꞌ yalon jaxca tiꞌ:
—¡Tol chi cam yin culus! ¡Tol chi cam yin culus! ẍi ebꞌ.
22Jix yalon naj Pilato tet ebꞌ yin yoxelal jaxca tiꞌ:
—¿Tzet yu xin? ¿Tzet jix sey spenailoj che yilaꞌ? Jain tiꞌ, cꞌam niꞌoj spenail tol smoo scam yu chi wil an. Yuxan, tucꞌal oj wakꞌ makꞌle an, catuꞌ oj jin jajon el an, ẍi tet ebꞌ.
23Tol caw jix cꞌal yiꞌatej scꞌul ebꞌ. Jix a yaw ebꞌ sicꞌlebꞌil, tzet utbꞌil tol sowalil chi cam Naj yin culus. Caw ip jix a yaw ebꞌ yetoj ebꞌ yaaw yakꞌomal xaambꞌal ebꞌ tet Dios. Yuxan jix yakꞌ cꞌaltaꞌ ganar ebꞌ. 24Yuxan jix yal Pilato tuꞌ jaxca tiꞌ: “Skeꞌ ojabꞌ jaxca chi yoche ebꞌ tuꞌ,” ẍi naj. 25Yuxan, jaꞌ jun winaj locan xol jowal tuꞌ, jun makꞌom cam ánima eyoc preso tuꞌ, jaꞌ jix jajle eloj jaxca jix yute skꞌanon ebꞌ tuꞌ. Jal Jesús xin, jix ale cantoj yul skꞌabꞌ ebꞌ yu chi yun tzetyetal chi yoche ebꞌ chi yun yin tuꞌ.
Skꞌaneal Yet Jix Oc Jesús Yin Culus
(Mateo 27:32-44; Marcos 15:21-32; Juan 19:17-27)
26Jaꞌ yet lalan yiꞌontoj Jesús ebꞌ bꞌey oj cam tuꞌ, ey jun winaj a Cirene chi yij Simón, lalan sjul naj, jix bꞌet ecꞌabꞌ naj naat, jix smitxꞌon a ebꞌ. Jix yakꞌon teꞌ culus ebꞌ tuꞌ yijtoj naj. Catuꞌ jix oc tzajan yintaj Jesús.
27Ecꞌal pax ánima jix oc tzajan yintaj. Ecꞌal ebꞌ ix, chi el yaw yokꞌ yin Naj.
28Jix meltzotoj jacan Jesús yin ebꞌ, catuꞌ jix yalon jaxca tiꞌ:
—Jex txo ix a Jerusalén, manche jex okꞌ win an. Okꞌanwej je yin. Okꞌanwej yin ebꞌ je yuneꞌ. 29Yutol ey jun tiempoal oj juloj catuꞌ oj je yalon jaxca tiꞌ: “Caw watxꞌ yet ebꞌ ix cꞌam yuneꞌ, cꞌal ebꞌ man uneꞌwom ix oj, yetoj ebꞌ ix cꞌam yuneꞌ chi yakꞌ txutxwoj, watxꞌ pax yet ebꞌ,” je chi, oj je yaloni. 30Jaꞌ yet jun tiempoal tuꞌ, oj yal ebꞌ ánima yu wonanlaj jaxca tiꞌ: “Tol oj wal ey tzet utbꞌil chi yun stit wejna wan wonan tuꞌ kibꞌan,” ẍi ebꞌ, oj yalon ebꞌ. Oj yalon pax ebꞌ yu tzalanlaj: “Eyoj wal tzet utbꞌil chi yun cu muji can yalan wan tzalan tuꞌ,”#Oseas 10:8. ẍi ebꞌ, oj yalon ebꞌ. 31Jain tiꞌ, jaxca tol yaax teꞌ jin an, ta chi yun ebꞌ jaxca tiꞌ ey jin an, yutol cꞌam jin penail, yel xacꞌal yel miman tzet oj yun ebꞌ je yin, yutol laan jex jaxca junoj teꞌ teꞌ caw tajin xa, yutol ey je penail yul sat ebꞌ, ẍi Jesús tet ebꞌ.
32Ey cawanxa mactxequel ey spenail jix iꞌletoj cam yetoj Jesús. 33Jix apni ebꞌ bꞌey jun lugar chi yij Calavera. Chi yal yeloc apnoj, “Sbꞌajil Jolome.” Jatuꞌ jix slocbꞌa a Jesús ebꞌ yin culus. Catuꞌ jix slocbꞌan pax a cawan ey spenail tuꞌ ebꞌ. Jun bꞌey swatxꞌ kꞌabꞌ Jesús, jun bꞌey sqꞌuexan kꞌabꞌ. 34Jaꞌ yet lalan slocbꞌale a Jesús yu ebꞌ, catuꞌ jix yalon jaxca tiꞌ:
—Mamin, akꞌ mimancꞌulal yin ebꞌ, yutol man yotaj oj ebꞌ tzet chi yunne, ẍi Jesús tet Dios. Jix cꞌoli yakꞌon suerte ebꞌ soldado yin spichil Jesús tuꞌ, catuꞌ jix spoꞌon ecꞌ an ebꞌ yin. 35Jaꞌ ebꞌ ánima, jix oc bꞌulan ebꞌ yilon wan tzetyetal chi yun tuꞌ. Jix cꞌoli sbꞌuchwa ebꞌ yaaw yin Jesús tuꞌ. Jix yalon ebꞌ jaxca tiꞌ:
—Jix colcha wan ánima yu. Jal tinaniꞌ, ta tol yel jaꞌ Cristo* tiꞌ, catuꞌ jaꞌ sicꞌbꞌil el yu Dios, scol ojabꞌ sbꞌa kilaꞌ, ẍi ebꞌ.
36Jacꞌalaꞌ ebꞌ soldado pax oj, caw chi bꞌuchwa atoj ebꞌ yin. Jix apni ebꞌ scawilal. Jix yakꞌon vinagre ebꞌ yuqꞌueꞌ. 37Jix yalon ebꞌ tet jaxca tiꞌ:
—Ta tol yel sreyal jaach ebꞌ Israel, col ja bꞌa kilaꞌ, ẍi ebꞌ tet.
38Ey jayebꞌ kꞌane eyoc sjolomtaj Naj. /Tzꞌibꞌebꞌil oc yin stiꞌ ebꞌ Griego, ebꞌ Romano, yetoj ebꞌ Israel,/ ẍi jayebꞌ kꞌane tuꞌ jaxca tiꞌ: “Jaꞌ jun mactxequel tiꞌ, sreyal ebꞌ Israel,” ẍi.
39Ey jun ebꞌ naj locan a yetoj tuꞌ, jix bꞌuchwa yin, jix yalon jaxca tiꞌ:
—Ta tol yel jaach Cristo jaach, col ja bꞌa wil an. Chi lawi jun tuꞌ chon ja colon pax ja wetoj, ẍi naj tet Jesús.
40Jal junxa yetbꞌi sbꞌa yetoj naj tuꞌ, jix tenchanele yu, jix yalon naj jaxca tiꞌ:
—¿Tumi cꞌam chach xiw niꞌoj tet Dios? Ilaꞌ tol lalan kabꞌen syaꞌil yetoj. 41Jaon tiꞌ, cu moo kabꞌen syaꞌil, yu cu toolanen el cu penail. Jal pax jun tiꞌ, cꞌam niꞌoj tzet jix el yuneni, ẍi naj.
42Catuꞌ jix yalon naj tet Jesús jaxca tiꞌ:
—Jaach Jesús, tol oj wal chin ja naꞌtej yet oj jaach jul ja wakꞌon Yaawilal, ẍi naj tet Jesús. 43Jix yalon Jesús tuꞌ tet naj jaxca tiꞌ:
—Caw yel chi wal ey jaach, yet jun cꞌu tiꞌ, oj jaach apnoj wetoj bꞌey jun lugar chi yij Swatxꞌilal, ẍi Jesús tet naj.
Scamichal Jesús
(Mateo 27:45-56; Marcos 15:33-41; Juan 19:28-30)
44Jaꞌ yet chumanxa cꞌu jix kꞌejbꞌi masanil yul yibꞌankꞌinal tiꞌ, masantaꞌcꞌal yet a las tres. 45Jix kꞌej jolel cꞌu. Catuꞌ jix tzilcha eytej snan an kꞌap eyoc smajiloj jun lugar tol Asan Dios Ey Yet Xꞌojli yul stemplo Dios.
46Catuꞌ jix a yaw Jesús yin ipal jaxca tiꞌ:
—Mamin, chi wakꞌcan jin pixan yul ja kꞌabꞌ, ẍi Jesús tet Dios.#Salmos 31:5.
Yet jix lawi yalon jaxca tuꞌ, jix cami.
47Jaꞌ yet jix yilon naj scapitán ebꞌ soldado tzet jix yunne, jix yal naj watxꞌ kꞌane tet Dios. Jix yalon naj jaxca tiꞌ:
—Caw yel, jaꞌ jun winaj tiꞌ, caw cꞌam spenail, ẍi naj.
48Jaꞌ masanil ánima chi matzꞌli, jix yil masanil ebꞌ tzet jix yunne. Jaꞌ yet jix paxtoj ebꞌ, caw chi cus scꞌul ebꞌ sicꞌlebꞌil. 49Jaꞌ masanil ebꞌ jix otajnen Jesús cꞌal wan ebꞌ ix ix jix oc tzajan yintaj yet jix tit bꞌey Galilea, naat jix can linan ebꞌ, catuꞌ chi matzꞌlitej ebꞌ.
Jix Mujle Octoj Smimanil Jesús Yul Jun Jolan Chꞌen
(Mateo 27:57-61; Marcos 15:42-47; Juan 19:38-42)
50Ey jun winaj chi yij José, a conobꞌ Arimatea yul yet Judea. Watxꞌ scꞌul naj, catuꞌ watxꞌ pax sbꞌeybꞌal naj. Yaaw yeoc xol ebꞌ yet yaawil. 51Ma yaoc sbꞌa yetoj ebꞌ yet jix yunen ebꞌ jaxca tuꞌ. Yutol lalan yechbꞌanen swaꞌxi oc Dios yakꞌon Yaawilal. 52Jix octoj José tuꞌ bꞌey Pilato, jix bꞌet skꞌanon eytej smimanil Jesús. 53Catuꞌ jix bꞌet yiꞌon eytej tuꞌ. Catuꞌ jix spichon oc yul jun sábana. Catuꞌ jix bꞌet yaon can octoj yul jun chꞌen chꞌen jolbꞌilxa. Cꞌamto junoj camom chi mujle yul jun jolan tuꞌ. 54Jaꞌ yet jun cꞌual tuꞌ lalan xacꞌal yeycꞌu, catuꞌ scꞌual pax yakꞌon lista sbꞌa ebꞌ Israel yu tzet chi skꞌan ebꞌ yet junxa scꞌual xewilal tuxa oj juloj.
55Jaꞌ ebꞌ ix jix oc tzajan yintaj naj bꞌey Galilea tuꞌ, jix bꞌet ebꞌ yil chꞌen chꞌen tuꞌ. Jix bꞌet yilon ebꞌ tzet utbꞌil jix yun yale can octoj smimanil naj yul chꞌen. 56Catuꞌ jix paxtoj ebꞌ. Jix bꞌet swaꞌnen wan ambꞌal sukꞌukꞌi sabꞌ ebꞌ, yetoj wan sakꞌal yel sabꞌ chi joꞌole oc yin smimanil tuꞌ. Jaꞌ yet scꞌual xewilal tuꞌ, jix xew ebꞌ jaxca taꞌ yalon sley ebꞌ.
Currently Selected:
Lucas 23: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.