YouVersion Logo
Search Icon

Juan 11

11
Scamichal Naj Lázaro
1Jaꞌ bꞌey jun aldea chi yij Betania, ey jun winaj chi yij Lázaro. Yaꞌey naj. Ey cawan yanabꞌ naj Lázaro tuꞌ, ey jun chi yij María, ey junxa chi yij Marta. A Betania cꞌal ebꞌ yoxwanil. 2Jaꞌ ix María tuꞌ, jaꞌton jun jix aon oc jun ambꞌal sukꞌukꞌi sabꞌ yin Jesús Kaawil, catuꞌ jix sjoꞌontaj yajan Jesús ix yetoj xil yaꞌ. Caw yaꞌ pax ey naj Lázaro tuꞌ. 3Yuxan jix yaltoj ebꞌ ix anabꞌe tuꞌ tet Jesús. Jix yal ebꞌ ix jaxca tiꞌ:
—Mamin, jaꞌ naj camcꞌulnebꞌil ja wu, caw yaꞌey naj tinaniꞌ, ẍi ebꞌ. 4Jaꞌ yet jix yabꞌen Jesús tzet jix yaltoj ebꞌ ix, catuꞌ jix yalon Naj jaxca tiꞌ:
—Jaꞌ jun yaꞌbꞌil tuꞌ, man oj cam naj yu yin junelne. Jix michꞌcha naj yu jun yaꞌbꞌil tuꞌ, yet watxꞌ chi xꞌoxel sbꞌa Dios tol miman yeloc apnoj Naj, cꞌal yu xꞌoxon pax eloj, tol miman weloc apnoj jain Cꞌaale jin tiꞌ an, ẍi Jesús. 5Caw ey scamcꞌulal Jesús yin naj Lázaro tuꞌ, cꞌal yin ix María yetoj ix Marta. 6Jaꞌ yet jix yabꞌen tol caw yaꞌey naj, ma toj Naj yin eymanil yiloni. Scaabꞌial xa tuꞌ, catuꞌ jix toi. 7Jaꞌ yet jix apni scꞌual stoo tuꞌ, jix yalon tet ebꞌ scuywom jaxca tiꞌ:
—Toonwej bꞌey lugar yul yet Judea junelxa, ẍi Naj tet ebꞌ. 8Catuꞌ jix yalon ebꞌ tet Naj:
—Jaach Cuywam, jayebꞌ jix too cꞌu yakꞌlen ebꞌ yaawil yeoc bꞌey Judea tuꞌ jaach skꞌojchꞌenen tituꞌ. ¿Tumi cha woche chach too pax junelxa tituꞌ tinaniꞌ? ẍi ebꞌ tet Naj. 9Jix yalon Naj tet ebꞌ:
—Kotaj, ey lacawebꞌ hora yul junjun cꞌu. Ta cꞌualil chi cu ecꞌabꞌi, man comonoj chi cu telcꞌoi, yutol sajkꞌinal, 10jal ebꞌ chi ecꞌabꞌ yet akꞌbꞌalil xin, comon cꞌal chi telcꞌo ebꞌ, yutol cꞌam sajkꞌinal ebꞌ, ẍi Jesús tet ebꞌ. 11Jix lawi tuꞌ, jix yalon pax tej yu naj Lázaro:
—Jaꞌ naj kamigo tuꞌ, tol chi wey naj, yuxan oj jin toj jin tenel sweyan naj, ẍi Naj tet ebꞌ.
12—Jaach Cuywam, ta tol chi weyi, tejan oj waꞌxoj scꞌul, chi yal tuꞌ, ẍi ebꞌ scuywom tuꞌ tet Jesús. 13Jaꞌ yet jix yalon Jesús tol chi wey naj Lázaro tuꞌ, jaꞌ scamichal chi yalaꞌ. Jal pax snaꞌon ebꞌ xin, jaꞌcaw weyan chi yunne. 14Yu jun tuꞌ, yuxan jix yalon Naj junelxa tet ebꞌ jaxca tiꞌ:
—Jix cam naj Lázaro. 15Tinaniꞌ caw chin tzala an, yutol cꞌam jin ey jin ecꞌ tituꞌ yet jix cami, yet watxꞌ che yaoc je cꞌul win. Tinaniꞌ, toonwej kilaꞌ, ẍi Naj tet ebꞌ. 16Jaꞌ naj Tomás, naj chi yij pax Tioẍ, jix yal naj tet ebꞌ yet cuywomal tuꞌ jaxca tiꞌ:
—Toonwej pax oj, to kakꞌ cu bꞌa cam yetoj, ẍi naj tet ebꞌ.
Jaꞌ Jesús Akꞌom Kꞌinale Tol Ey Cꞌal Yin Tobꞌalkꞌinal
17Jaꞌ yet jix apni ebꞌ xin, jix yabꞌen ebꞌ, tol oxi tax jix muji naj Lázaro tuꞌ. 18Jaꞌ scawilal Jerusalén, ey conobꞌ Betania tuꞌ, jaxca mi oxebꞌoj kilómetro xol. 19Yu jun tuꞌ, yuxan ecꞌal ebꞌ a Jerusalén jix bꞌet mimancꞌulnen ix María yetoj ix Marta, yu jun sno ebꞌ jix cam tuꞌ. 20Jaꞌ yet jix yabꞌen ix Marta tol lalan yapni Jesús bꞌey sna ebꞌ, jix too ix ẍaꞌoni. Jal ix María xin, jix cancan ix yul sna. 21Jix yalon ix Marta tet Jesús tuꞌ jaxca tiꞌ:
—Mamin, ta ey jaach ecꞌ titiꞌ, ma mi cam naj jin no tuꞌ. 22Jal tinaniꞌ xin, wotaj an, yal cꞌal tzet oj ja kꞌan tet Dios, oj yakꞌ ey jaach, ẍi ix tet Naj.
23—Jaꞌ naj ja no tuꞌ, oj pitzcꞌu a naj, ẍi Jesús tet ix.
24—Yel toni, wotaj an. Jaꞌ yet slawubꞌ cꞌual, yet oj pitzcꞌu a ebꞌ camnaj, catuꞌ oj pitzcꞌu a naj yetoj ebꞌ, ẍi ix tet Naj. 25Catuꞌ jix yalon Jesús tet ix jaxca tiꞌ:
—Jain tiꞌ, akꞌom jin pitzcꞌu a camnaj, a kꞌinale jin pax oj. Yal cꞌal mactxequel chin yaoc yin scꞌul, caxcꞌal mi oj camoj, oj pitzcꞌu pax aoj. 26Masanil ebꞌ iquisto chin aon oc yin scꞌul, cꞌam bꞌakꞌin oj cam ebꞌ, ¿Chim ja waoc jun tiꞌ yin ja cꞌul? ẍi Jesús tet ix.
27—Chi ton waoc yin jin cꞌul, Mamin, tol jaach tiꞌ Cristo jaach, Scꞌaal jaach Dios. Jaach ton tiꞌ echbꞌanebꞌil ja jul yul yibꞌankꞌinal tiꞌ, ẍi ix tet Naj.
Jix Okꞌ Naj Jesús Yu Naj Lázaro
28Jix lawi yalon ix Marta jaxca tuꞌ, jix paxtoj ix. Jix too yawtentej sno ix. Yin ewantajil jix yun yalon ix tet sno tuꞌ jaxca tiꞌ:
—Jix jul Naj Cuywam, chach yawte Naj, ẍi ix. 29Jix yabꞌ cꞌal ix María jaxca tuꞌ, catuꞌ eyman jix a waanoj, catuꞌ jix too ix bꞌey eyecꞌ Jesús tuꞌ. 30Tutun cꞌamto chi oc Jesús tuꞌ yul conobꞌ tuꞌ. Jaꞌ bꞌey jix bꞌet chaꞌle yu Marta, jatuꞌ eyto ecꞌoj. 31Ey pax ecꞌ ebꞌ a Judea bꞌey sna yetoj ix. Jix apni smimancꞌulnele ix yu ebꞌ. Jaꞌ yet jix yilon ebꞌ, tol eyman jix a waan ix, catuꞌ jix toi, eyman jix too tzajan ebꞌ yintaj ix María tuꞌ, yutol jaꞌ snaꞌon ebꞌ, tol jaꞌ bꞌey mujan naj sno tuꞌ chi too okꞌoj. 32Jaꞌ yet jix apni ix María bꞌey eyecꞌ Jesús tuꞌ, jix ey kaan ix sattaj Naj. Catuꞌ jix yalon ix tet Naj jaxca tiꞌ:
—Mamin, ta ey jaach ecꞌ titiꞌ ma mi cam naj jin no tiꞌ, ẍi ix tet. 33Jaꞌ yet jix yilon Jesús tol chi okꞌ ix, catuꞌ chi okꞌ pax ebꞌ a Judea jix tzajlo yintaj ix tuꞌ, catuꞌ jix cus pax a Naj yetoj ebꞌ sicꞌlebꞌil. 34Catuꞌ jix skꞌanlen tet ebꞌ jaxca tiꞌ:
—¿Bꞌeytuꞌ jix je muj naj? ẍi Naj tet ebꞌ.
—Mamin, toon kilaꞌ, ẍi ebꞌ tet Jesús. 35Jaꞌ yet tuꞌ jix okꞌ Naj Jesús tuꞌ. 36Catuꞌ jix yalon ebꞌ a Judea eecꞌ yilon tuꞌ, jaxca tiꞌ:
—Ilaꞌla, caw camcꞌulnebꞌil naj yu Naj, ẍi xacꞌal ebꞌ. 37Ey pax ebꞌ jix alon jaxca tiꞌ:
—Jaꞌ Jesús tiꞌ, jaꞌ jix jajon sat jun naj cꞌam chi skeꞌ yilwi. ¿Tumi ma skeꞌ yakꞌon jul scꞌul naj Lázaro tiꞌ, yet watxꞌ cꞌam chi cami? ẍi ebꞌ.
Jix Pitzcꞌu A Naj Lázaro Yu Jesús
38Caw jix tit pitzꞌan scuscꞌulal Jesús yet jix apni oc bꞌey mujan naj. Jaꞌ yul jun chꞌen chꞌen jolbꞌil, jaꞌ tituꞌ eyoctoj smimanil naj. Patxan can oc junxa chꞌen smajiloj.
39—Jix yalon Jesús: Iꞌwej el chꞌen smajil tiꞌ.
Jix yalon ix Marta, ix yanabꞌ naj Lázaro tuꞌ jaxca tiꞌ:
—Mamin, oxi tax jix cam naj. Tejan eyxa sabꞌ naj tinaniꞌ, ẍi ix tet Naj.
40—Jix wal ey jaach, ta tol chin ja waoc yin ja cꞌul, oj ton ja wil yipal Dios, ẍi Naj tet ix. 41Catuꞌ jix yiꞌon el smajil ebꞌ bꞌey eyoctoj naj tuꞌ. Jix a tꞌanan Jesús satcan, jix yalon Naj jaxca tiꞌ:
—Mamin, yuwal dios ey jaach, jix ja wabꞌ tzet jix wal an. 42Wotajxa tol tobꞌalkꞌinal cha wabꞌ cꞌaltaꞌ tzet chi wal an. Jaꞌ yu jantaj ánima bꞌulan ecꞌ titiꞌ, yuxan chi wal wan tiꞌ ey jaach, yet watxꞌ oj yaoc ebꞌ yin scꞌul tol jaach jix jin ja chejtej, ẍi Jesús. 43Jix lawi yalon Naj wan tuꞌ, catuꞌ jix a yaw yin ipal jaxca tiꞌ:
—Lázaro, elantej, ẍi Jesús. 44Catuꞌ jix eltej naj camnaj tuꞌ. Chulan oc wan kꞌap yin yajan cꞌal yin skꞌabꞌ naj. Ey pax jun an xotan oc yalan stiꞌ. Jix yal Jesús jaxca tiꞌ:
—Xuywej el wan kꞌap eyoc yin naj tuꞌ, ẍi Jesús tet ebꞌ.#11:44 Jaꞌ sbꞌeybꞌal ebꞌ Israel, tol chi chul-le oc wan an kꞌabꞌ yin scamom ebꞌ, yuxan jix yal Jesús tol chi xuyle el an kꞌabꞌ eyoc yin naj Lázaro tuꞌ.
Jix Sey Ebꞌ Yaaw Tzet Utbꞌil Chi Yute Yakꞌon Cam Jesús
(Mateo 26:1-5; Marcos 14:1-2; Lucas 22:1-2)
45Catuꞌ ecꞌal ebꞌ a Judea eyecꞌ yetoj ix María tuꞌ, jix yil ebꞌ tzet cꞌal jix yun Jesús tuꞌ. Yu jun tuꞌ, yuxan ecꞌal ebꞌ jix yaoc scꞌul yin. 46Ey pax wanxa ebꞌ jix bꞌet alon yabꞌ ebꞌ Fariseo, tzettaj jix yun Jesús. 47Catuꞌ jix slatiꞌne el sbꞌa ebꞌ Fariseo tuꞌ yetoj ebꞌ yaawil yakꞌomal xaambꞌal ebꞌ tet Dios, cꞌal ebꞌ mimej winaj chi akꞌon cuenta conobꞌ. Catuꞌ jix yalon ebꞌ jaxca tiꞌ:
—¿Tzet chi kute jun winaj tiꞌ che naꞌ? Yutol caw ey wan milagro lalan xꞌoxon tinaniꞌ. 48Ta tucꞌal oj kiloc Naj tinaniꞌ, masanil ebꞌ ket conobꞌ oj yaoc scꞌul ebꞌ yin. Jaꞌ ebꞌ yaaw bꞌey Roma, oj jul yuchey jun stemplo Dios ebꞌ tiꞌ, catuꞌ oj yakꞌon jowal ebꞌ yin ebꞌ ket conobꞌ masanil. Caw oj cu can yalan yu ebꞌ naj, ẍi ebꞌ. 49Ey pax jun naj chi yij Caifás xol ebꞌ. Jaꞌ jun tuꞌ eyoc yaawil yakꞌomal xaambꞌal ebꞌ tet Dios yet jun abꞌil tuꞌ. Jaꞌ jix alon tet ebꞌ jaxca tiꞌ:
—Jaex tiꞌ, caw cꞌam niꞌoj tzet je yotaj. 50Cꞌam chi naꞌcha el je yu, tol yel watxꞌ chi cu cani ta chi cam junoj winaj sqꞌuexeloj ánima masanil. Ta queytuꞌ chi yunne, cꞌam chi lawi el ebꞌ ket conobꞌ masanil, ẍi naj Caifás tuꞌ. 51Jaꞌ yet jix yalon wan kꞌane tuꞌ, man yul oj yet jix yaloni, yutol yaawil yakꞌomal xaambꞌal ebꞌ Israel tet Dios yeoc yet jun abꞌil tuꞌ, yu jun tuꞌ, yuxan jix akꞌle yal yu Dios tol oj cam Jesús sqꞌuexeloj ebꞌ Israel masanil. 52Man asanne oj yu ebꞌ Israel tuꞌ, yuxan jix cami. Jix cam yu syambꞌan oc jantaj ebꞌ yuninal Dios sajleminaj ye cantoj yul yibꞌankꞌinal tiꞌ, yet watxꞌ junxane chi yun can ebꞌ. 53Yu jun tuꞌ, yuxan jaꞌ yet jun cꞌual tuꞌ, jix ẍaꞌel yich ebꞌ yaaw tuꞌ seyon tzet utbꞌil oj yute yakꞌon cam Jesús ebꞌ. 54Yu jun tuꞌ, yuxan cꞌamxa chi ecꞌ Jesús snan xol ebꞌ a Judea tuꞌ. Jix el bꞌey jun lugar tuꞌ. Catuꞌ jix too bꞌey jun conobꞌ chi yij Efraín stiꞌlaj el jun cusiltaj txꞌotxꞌ. Jaꞌ taꞌ tituꞌ jix apni Naj yetoj ebꞌ scuywom. 55Jaꞌ yet lalanxa sjul stiempoal jun skꞌin ebꞌ Israel chi yij Pascua, ecꞌal ebꞌ naat speto, catuꞌ chi apni ebꞌ bꞌey Jerusalén. Cꞌamto chi oc kꞌin tuꞌ, catuꞌ chi apni ebꞌ, yet watxꞌ chi swaꞌne sbꞌa ebꞌ jaxca taꞌ sbꞌeybꞌal. 56Jaꞌ yet eyecꞌ ebꞌ tituꞌ, caw jix seyle ecꞌ Jesús yu ebꞌ, catuꞌ ey ebꞌ jix alon yul stemplo Dios jaxca tiꞌ:
—¿Tzet ẍi je cꞌul? ¿Oj mi jul Jesús bꞌey kꞌin tiꞌ, ma man oj jul che naꞌ? ẍi ebꞌ. 57Jaꞌ yet tuꞌ jix yiꞌeltej jun ley ebꞌ Fariseo yetoj ebꞌ yaawil ebꞌ yakꞌomal xaambꞌal ebꞌ Israel tet Dios tuꞌ. Chi yal jun ley tuꞌ jaxca tiꞌ: “Ta ey bꞌey che yil yin Jesús, chi jul je yal titiꞌ,” ẍi. Queytuꞌ jix yun sajlem kꞌane yu ebꞌ, yutol chi yoche ebꞌ chi yaoc Naj preso.

Currently Selected:

Juan 11: knj

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy