2a Juan 1
1
Camcꞌulal
1Jain ton anciano jin an, chin tzꞌibꞌetoj jun jin carta tiꞌ ey jaach, jaach wanabꞌ, sicꞌbꞌilxa el yu Dios, cꞌal yetoj tet ebꞌ ja wuneꞌ. Caw yel ey jin camcꞌulal je yin. Man asanne oj jin ey jin camcꞌulal je yin, masanil pax ebꞌ otajnen xa jun cuybꞌanil caw yel, ey pax scamcꞌulal ebꞌ je yin. 2Ey cu camcꞌulal je yin yu wan kꞌane yel, tol eyxa oc yin cu pixan junelne. 3Chi ojabꞌ xꞌox swatxꞌcꞌulal cu Mam Dios yetoj Jesucristo ey jex. Jaꞌ Naj Jesucristo tuꞌ, Scꞌaal cu Mam Dios, cꞌal Kaawil pax oj. Okꞌ ojabꞌ pax scꞌul je yin, catuꞌ ey ojabꞌ pax watxꞌcꞌulal snan je xol tituꞌ. Yutol kotaj tol bꞌeytuꞌ eyoc yel, ey pax cu camcꞌulal. 4Caw jix tzala a jin cꞌul yet jix wabꞌen an, tol ey ebꞌ ja wuneꞌ lalan sjijen wan cuybꞌanile jaꞌcaw yel, jaxca jix yun yalon can cu Mam Dios ey jon. 5Jaꞌ tinaniꞌ xin, chin kꞌan ey jex an, tol chi cu camcꞌulnele cu bꞌa cu masanil. Jaꞌ jun chejbꞌanile chi waltoj ey jex tiꞌ, man sbꞌabꞌel oj to che yabꞌocoj, yutol jaꞌ tax yet jix kaon oc Dios yin cu cꞌul jix kabꞌen oc jun tiꞌ. 6Ta lalan kunen tzet chi yal ẍejbꞌanil Dios, ey cu camcꞌulal, chi yal tuꞌ. Jaꞌ jun ẍejbꞌanil kabꞌnaj yet tax jix cu oc yetoj Dios tuꞌ, jaꞌ chi aloni, tol chi cu camcꞌulnelewej cu bꞌa.
Ebꞌ Lekꞌtiꞌ
7Jaꞌ tinaniꞌ, ecꞌal ebꞌ lekꞌtiꞌ chi ecꞌ yul yibꞌankꞌinal tiꞌ. Chi ecꞌ yal ebꞌ jaxca tiꞌ: “Man ocnaj oj smimanil Jesucristo yet jix julecꞌoj,” ẍi ebꞌ, chi tzꞌaj yalon ebꞌ. Jaꞌ ebꞌ chi alon jaxca tuꞌ, chi cꞌal yal ebꞌ jaxca tuꞌ, yutol acꞌul oc ebꞌ yin Cristo. 8Ilwej cꞌal je bꞌa tet ebꞌ, jaex tiꞌ, yet watxꞌ man naꞌbꞌa oj je mulnail tituꞌ. Ta jaxca chi yun walon tiꞌ che yute je bꞌa, tzꞌajan cꞌal oj je chaꞌ spaj je mulnail tet Dios. 9Yal cꞌal mac chi yalaꞌ, tol man tzꞌajanoj scuybꞌanil Cristo, ta chi yalaꞌ, tol eyto sowalil chi kunne, cꞌam Dios eyoc yin, chi yal tuꞌ. Ta ey cꞌal pax oc cu naꞌbꞌal yin scuybꞌanil xin, eyoc cu Mam Dios kin, chi yal tuꞌ, catuꞌ ey pax oc Scꞌaal kin. 10Ta ey mac chi apni je cꞌatan tol txꞌoj cuybꞌanile chi ecꞌ yalaꞌ, manche je chaꞌ ebꞌ bꞌey je na. Manche je kꞌan swatxꞌcꞌulal Dios yibꞌan ebꞌ. 11Ta che kꞌan swatxꞌcꞌulal Dios tuꞌ yibꞌan ebꞌ, jaxca tol che yaltoj je yet yin scuybꞌanil ebꞌ man watxꞌoj tuꞌ yetoj.
Chi Aletoj Scawil Scꞌul Ebꞌ
12Ecꞌal tocꞌal wanxa tzet chi yoche jin cꞌul chi waltoj ey jex, man oj jin tzꞌibꞌetoj yin jun jin carta tiꞌ an. Yutol chin naꞌ, ta chi skeꞌ oj jex too wilon an. Catuꞌ chi wal wanxa tzetyetal ey jex, catuꞌ chi xacꞌal tzꞌajna can el cu tzalacꞌulal tituꞌ. 13Jaꞌ ebꞌ yuneꞌ ix ja no eyecꞌ titiꞌ, jaꞌton ix sicꞌbꞌilxa el yu Dios, chi yatoj scawil scꞌul ebꞌ tituꞌ.
Currently Selected:
2a Juan 1: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.