YouVersion Logo
Search Icon

1a Corintios 1

1
Yichbꞌanil An Scarta Naj Pablo
1Jain Pablo jin, awtebꞌil jin oc ẍejabꞌoj Jesucristo, yutol jaxca tuꞌ jix el yin scꞌul Dios, yetoj kuẍtaj Sóstenes tiꞌ, 2chi cu tzꞌibꞌetoj jun carta tiꞌ ey jex, jex yiglesia xa Dios bꞌey conobꞌ Corinto. Yet jex xa Dios, yutol ey jex xa oc yin Jesucristo. Jaꞌ Dios jix jex awten oc yetoj, yetoj jantaj ebꞌ chi yiꞌey sbꞌa tet Naj Kaawil Jesucristo bꞌey masanil conobꞌ. Jaꞌ Naj Yaawil pax ebꞌ ketoj. 3Xꞌox ojabꞌ swatxꞌcꞌulal cu Mam Dios cꞌal Naj Kaawil Jesucristo ey jex, ey ojabꞌ pax cꞌal watxꞌcꞌulal snan je xol.
Watxꞌcꞌulal Chi Cu Chaꞌ Yin Jesucristo
4Tobꞌalkꞌinal chi wal cꞌal yu diosalil tet Dios je yu, yutol txꞌoxbꞌil xa swatxꞌcꞌulal Dios ey jex je masanil yu Cristo Jesús. 5Miman swatxꞌcꞌulal Dios jix xꞌox ey jex, yutol junxane je yeoc yin Cristo. Yuxan, tzꞌajan cꞌal jix yakꞌ naꞌcha el je yu jun jaꞌcaw yel, yetoj pax oj, tzꞌajan jix yakꞌ je yal pax el tzet jix yakꞌ naꞌcha el je yu tuꞌ. 6Jix yun masanil tzet jix wal ey jex tol oj yun Cristo je yin. 7Jaꞌ tinaniꞌ cꞌam junoj saꞌbꞌeal Dios tol cꞌam chi yakꞌ ey jex, yajbꞌan che yechbꞌanen scꞌual sjulbꞌal Naj Kaawil Jesucristo. 8Oj akꞌle cꞌal stecꞌanil je naꞌbꞌal yu Naj Jesucristo, masantaꞌcꞌal oj jul jun slawubꞌ cꞌual tuꞌ, yet watxꞌ cꞌam niꞌoj tzet bꞌey smoo je tzule yet oj jul Naj Kaawil Jesucristo. 9Jaꞌ Dios chi cꞌal yun masanil tzet chi yalaꞌ. Jix cu yawte oc yetoj, yet watxꞌ ey kalon ket yetoj Naj Scꞌaal, jaꞌton Naj Kaawil Jesucristo.
Poꞌolebꞌail Xol Ebꞌ Creyente
10Jex wuẍtaj, jex wanabꞌ, chin oc tean ey jex, jaxca tol jaꞌ Naj Kaawil Jesucristo chi oc tean je yin. Junxane ojabꞌ che yute je naꞌbꞌal je masanil tituꞌ. Man comonoj che poꞌoel je bꞌa xol ebꞌ kuẍtaj, ebꞌ kanabꞌ. Tol jaxca ojabꞌ junxane animail che yute je bꞌa, cꞌal je naꞌbꞌal, catuꞌ jun laan ojabꞌ tzet che yoche. 11Chi waltoj wan tiꞌ ey jex, jex wuẍtaj jex wanabꞌ, yutol jix wabꞌ je kꞌumal yu ebꞌ yetbꞌi ix Cloe, tol abꞌ lalan spitzcꞌu a jowal je xol tituꞌ. 12Jaꞌton yin jun tiꞌ chi wal an, tol abꞌ ey jex lalan je yalon jaxca tiꞌ: “Jain tiꞌ, yet jin naj Pablo,” je chi. Ey jex xin: “Jain tiꞌ, yet jin naj Apolo,” je chi. Ey jex pax xin: “Jain tiꞌ, yet jin naj Pedro,” je chi. Ey mac xin: “Jain tiꞌ, yet jin Naj Cristo,” je chi. 13¿Tumi taꞌ poꞌoquiẍtaj yeoc Cristo, che naꞌ? ¿Ma jain, jix jin cam yin teꞌ culus je yu, che naꞌ? ¿Tumi wal pax yin jin bꞌi, jain Pablo jin tiꞌ, jix jex akꞌle bautizar? 14Yuwal dios yutol man ecꞌaloj jex jix jex wakꞌ bautizar tituꞌ an, asanne kuẍtaj Crispo yetoj kuẍtaj Gayo jix wakꞌ bautizar. 15Yuxan, cꞌam mac chi skeꞌ yaloni, tol yin jin bꞌi akꞌbꞌil jex can bautizar. 16A… tol taꞌ wakꞌnaj pax can bautizar Estéfanas yetoj cꞌal sfamilia. Asan ebꞌ tuꞌ bꞌian, cꞌamxa junojxa akꞌbꞌil bautizar wu chi wute jin naꞌontoj. 17Man akꞌo oj bautizar ánima, wopiso yu Cristo, tol jaꞌton alo el skꞌaneal yet colbꞌanile. Manaj kꞌane yel yaꞌtaj snaꞌcha el chi wal skꞌaneal tuꞌ, yet watxꞌ jaꞌ ojabꞌ scamichal Cristo yin teꞌ culus miman yeloc apnoj yul sat ebꞌ chi abꞌen tuꞌ.
Eyoc Yipal Cꞌal Sjelanil Dios Yin Cristo
18Yutol jaꞌ skꞌaneal scamichal Cristo yin teꞌ culus, cꞌam yeloc apnoj yul sat ebꞌ ánima chi qꞌueyecꞌoj. Jal pax yul cu sat, jaon lalan cu colcha tiꞌ, yipalil Dios yeoc jun skꞌaneal tuꞌ. 19Jaxca chi yal yul An Juun Tzꞌibꞌebꞌilcanoj:
Jaꞌ ebꞌ jelan yaloni, oj wakꞌ lawoj sjelanil ebꞌ tuꞌ. Jaꞌ ebꞌ caw ey snaꞌbꞌal yaloni, oj wiꞌecꞌ snaꞌbꞌal ebꞌ tuꞌ, ẍi Dios yul An Juun tuꞌ.#Isaías 29:14.
20Yuxan, ¿tumi ey niꞌoj yopiso ebꞌ jelan, yetoj ebꞌ cuywam yin ley? Cꞌam pax yopiso ebꞌ jelan yin teelebꞌail. Xꞌoxnajxa Dios tol jaꞌ sjelanil yul yibꞌankꞌinal tiꞌ, cꞌam niꞌoj yopiso yu cu scoloni. 21Yu sjelanil Dios, yuxan jix el yin scꞌul, tol cꞌam chi skeꞌ yotajnele el Dios yu sjelanil ebꞌ yul yibꞌankꞌinal tiꞌ. Tol jix el pax yin scꞌul tol chi cu colcha el yu jun skꞌaneal yet colbꞌanile cꞌam yeloc apnoj yul sat ánima tuꞌ, jaꞌton jun skꞌaneal tuꞌ chi kaleloj. 22Jaꞌ ebꞌ Israel, chi yoche ebꞌ chi yil smilagro* Dios. Jal ebꞌ Griego xin, asan jelanil chi yoche ebꞌ. 23Jal jon pax xin, chi kalel skꞌaneal scamichal Cristo yin culus. Jaꞌ tet ebꞌ Israel tuꞌ, jaxca junoj chacꞌbꞌal ajane yeoc yul sat ebꞌ, caw cꞌam chi yoche jun tuꞌ, catuꞌ qꞌuixwiltaj yul sat ebꞌ. Jal pax ebꞌ man Israeloj, cꞌam niꞌoj yeloc apnoj jun skꞌaneal tiꞌ yul sat ebꞌ. 24Jal pax yul cu sat, mac jon awtebꞌil jon xa yu Dios tiꞌ xin, caxcꞌal Israel jon, ma man Israeloj jon, kotajxa, tol jaꞌ yet jix cam Cristo, jix xꞌox eloj, tol eyoc yipal cꞌal sjelanil Dios yin Naj. 25Yu jix akꞌle cam Cristo yin culus yu Dios, yuxan jaxca tol cꞌam snaꞌbꞌal Dios tuꞌ snaꞌon ánima. Jal pax yin scamichal tuꞌ, jix xꞌox eloj, tol ecꞌbꞌan sjelanil Dios yintaj masanil ebꞌ ánima. Jacꞌalaꞌ chi snaꞌon ebꞌ tol cꞌam yipal Dios, jix xꞌox pax Dios tol ecꞌbꞌan yipal yibꞌan masanil ánima. 26Jex wuẍtaj, jex wanabꞌ, sowalil chi naꞌcha el ku tzet utbꞌil keocoj, mac jon tol awtebꞌil jon xa yu Dios. Yutol jaywanne jon jelan jon yul sat ánima, jaywanne jon yaaw kei, jaywanne jon miman keloc apnoj yul sat ánima yutol jix cu yawte oc Dios yetoj. 27Yutol jaꞌ ebꞌ yeynajil yul sat ánima yul yibꞌankꞌinal tiꞌ, jaꞌ ebꞌ chi iꞌle a can yu Dios, yu xeclo el sqꞌuixwil ebꞌ jelan chi yute sbꞌa snaꞌoni. Yetoj ebꞌ cꞌam yeloc apnoj niꞌoj yul sat ánima, jaꞌ ebꞌ chi iꞌle a can tuꞌ, yu yel sqꞌuixwil ebꞌ miman yeloc apnoj snaꞌoni. 28Jaꞌ mac cꞌam niꞌoj yopiso yul sat ánima, cꞌal ebꞌ intajnebꞌil eloj, cꞌal ebꞌ cꞌam niꞌoj yeloc apnoj, jaꞌ ebꞌ tuꞌ chi iꞌle a can yu Dios. Jaxca tiꞌ chi yute xꞌoxon el Dios, tol jaꞌ mac miman yeloc apnoj yul sat ánima, cꞌam niꞌoj yeloc apnoj ebꞌ yul sat Dios. 29Jix yun jaxca tuꞌ, yet watxꞌ cꞌam junoj mactxequel chi skeꞌ smeynen sbꞌa sattaj Dios. 30Jal pax Dios xin, jix cu sjunbꞌane can ey yetoj Cristo Jesús. Catuꞌ jix yakꞌon sjelanil Cristo cu jelanil oj. Yu Cristo tuꞌ, yuxan watxꞌ jon yul sat Dios tuꞌ. Yu pax oj, yuxan yet jon xa Dios. Yetoj pax oj, yu Cristo tuꞌ, yuxan colchanaj jon xa eloj. 31Jaxca tzꞌibꞌebꞌilcan yul An Juun, bꞌey chi yal jaxca tiꞌ: “Ta ey mac chi yoche chi yiꞌa can sbꞌa, smoo chi yiꞌa can sbꞌa, asan yu tzet jix yun Naj Kaawil yin,” ẍi yul An Juun tuꞌ.#Jeremías 9:24.

Currently Selected:

1a Corintios 1: knj

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy