Humanu 1
1
Haga Wẽtup 1
1Humanu ywania kuekatu sese atipoꞌoro ehewowi uimiwan me. Uito Pauru are. Uimiwan ni mesup sehay wakuat atipoꞌoro ehewowi. Uito ti Tupana mipoꞌoro sehay wakuat moherep wuatꞌi ywania puat hanuat. Iesui potmuꞌe sese ti uito. Uito ti Tupana mipoꞌoro Iesui Aiporekuat moherep hanuat. Saꞌawyꞌi te Tupana uiꞌairo hawyi mio tã e uhepe -Mehin Pauru e woropoꞌoro Uhaꞌyru Iesui etiat sehay wakuat moherep wuatꞌi puat miitꞌin miat hamo e. Atikyꞌesat sehay ewẽ pywiat Uhaꞌyru etiat yn e uhepe. 2Aikotã nimo te wuaria uhehay moherep haria pe atum hap ewy woronug e. Nimo te mio tã areꞌe ti raꞌyn uhehay enoi haria pe -Meiũran ti aru atipoꞌoro ehewowi Uimipoꞌoro Wuatꞌi Miitꞌin Ehakyeraꞌat hat e. Mio tã e Tosaꞌyru Iesui etiat pe e Tupana uhepe. Mesup ti miwan miat toineꞌen Uhaꞌyru etiat uiꞌe hap taꞌyn e Tupana uhepe. 3Koitywy atunug naꞌyn uiꞌe hap ewy. Miꞌi ti atipoꞌoro raꞌyn Uhaꞌyru Iesui eiporekuat nuat e. Miꞌi ti morekuat Tawi saipepiat sese e katupono Tawi emiariru emiariru sese Miꞌi e Tupana uhepe. 4Miꞌi ti Uhaꞌyru sese e Tupana uhepe. Uiꞌewy hesaika rakat e. Uipaꞌãu wakuat oktan ne hesaika rakat e. Koitywy atimoherep taꞌyn uiꞌe hap e Tupana. Koitywy atimoherep taꞌyn nimuat uiꞌe hap e Tupana. Koitywy Miꞌi moherep hap niatpo kahato raꞌyn aikotã atiõtem guꞌuro pyi Uhaꞌyru e Tupana uhepe haꞌawyte uikay kay tehay sytpok hamuat hap tote are. 5Tosaꞌyru mohey hawyi Tupana iwese kahato uhete. Mio tã e uhepe -Woronug en mehin uhemiit sese wo e. Atikyꞌesat miitꞌin tukupteꞌen torannia Uhaꞌyru mohey haria wo e. Atikyꞌesat kahato Uhaꞌyru taꞌatunug Taꞌatuporekuat no hap. Miꞌi haype woropoꞌoro en iꞌatumuꞌe hamuat e Tupana uhepe. 6Pyno Humanu ywania uito ti Iesui potpoꞌoro Pauru are. Tapyiꞌa Humanu ywania eipe atikyꞌesat eipe ipotpoꞌororia wo uiꞌewywuat. Mio tã e raꞌyn ti Tupana ehepe mesup -Ewetunug no Uhaꞌyru Eiporekuat no e raꞌyn ehepe. Tupana Eikyꞌe kahato hat pote eiꞌatukay kay yne tuwewawi.
7Miꞌi hap atiwan mesuwat uimiwan ehewowi Humanu ywania. Mio tã areꞌe Tupana pe -Uruꞌywot kahato En. Esaꞌyru ti Emipoꞌoro sese urukaꞌiwat nuat. Miꞌi pote ahẽtup eset upi Esaꞌyru set upi etum no tapyiꞌaria Humanu ywania pe egyiꞌat kahato hap are. Ereineꞌen no hegyiꞌat iꞌatuepiat rakatno etum no ewese hap yt kat saꞌup i tapyiꞌa Humanuꞌin me are. Etunug no miꞌiria woꞌowese haria wo aikotã Esaꞌyru ewese hap ewy are Tupana pe.
Kereku Piaria Pauru Kyꞌe Kahato Haria Wo
8Haꞌawyte atikuap eweimohey Iesui hawyi arehum kahato Tupana kape. Uimowepiit kahato haria eipe katupono ewetunug naꞌyn Iesui Eipotypot koro wo pote. Koitywy ti yne mesuwat yi totiaria tikuap kahato raꞌyn eipe Iesui mohey haria raꞌyn hap. Miꞌi pote arehum kahato Tupana kape. 9Yt uheso hin i are maꞌato Tupana tikuap yt uheso i hap. Ahẽtup aat kaꞌap Tupana kape eipowyro hamuat. Yt uheso i uiwyriaꞌin. Ahẽtup aat kaꞌap Tupana kape eikawiatno. Pywo ti rat Tupana tikuap eweikupteꞌen uiwanetup hawe aat kaꞌap hap. Pywo ti Tupana uiꞌairo tehay wakuat Tosaꞌyru Iesui etiat moherep hatno. Uipyꞌa pyi ti ateropat ehetiatno aat kaꞌap. Ahẽtup aat kaꞌap Tupana kape eipowyro hamuat. 10Ahẽtup Tupana kape turan mio tã areꞌe -Tupana atikyꞌesat kahato uipoꞌoro Humanuꞌin kapiat uhewyry hamo are. Tupana ewaku hap upi uipoꞌoro ro En iꞌatumuꞌe hamo are. Tupana atikyꞌesat kahato uhehay Humanuꞌin wywuat hap are mesup te maꞌato yt kat i muap iꞌatuewowi. 11Atikyꞌesat kahato meremo uipoꞌoro Humanuꞌin kapiat uhewyry hamo. Tupana ewaku hap upi uipoꞌoro o iꞌatumuꞌe hamo. 12Atikyꞌesat Iesui mohey hap etiat uruwoꞌomoesaika moesaika hap itote Tupana. Putꞌok urutoꞌe itotiat hawyi urutunug neran Humanu ywania ewatnuaria wẽtup miit ewy Esaꞌyru mohey hap upi. 13Saꞌawyꞌi areꞌe Tupana pe -Areto teran tawa wato Huma kape katupono uheinytꞌin uheꞌywytꞌin Esaꞌyru mohey haria kapiat araꞌakasa hamo are. Maꞌato ahãꞌãg hawyi toineꞌen uipyhyp pyhyp hap kat koꞌi kat koꞌi uikosap hamo. Uiwyriaꞌin areto teran ehewowi. Miꞌi hap o yt eweiwaure teiꞌo katupono worohoꞌomoesaika teran eiperia Iesui mohey hap ete. Iraniaꞌin ywania aikopiat aikopiat kape areto kahu raꞌyn mote areto teran ehewowi eikuap hamo. Maꞌato uipyhyp pyhyp kat koꞌi kat koꞌi ehowawiat uikosap hamo. Koitywy iraniaꞌin miꞌiria teꞌeropyhuꞌat Iesui mohey haria itag nakaria wo raꞌyn. Miꞌi hap ewy atikyꞌesat ehetama pe wy. Yt uheso hin i miꞌi pote ahãꞌãg i ahãꞌãg i kahato ehewowi wen maꞌato yt putꞌok are i te ehewowi eimotag. 14Uipap kahato Iesui kapiat miitꞌin porerokosap hamo maꞌato yt atimoherep i Iesui wuatꞌi ywania pe pote yt naku i nug hat arepyhuꞌat Tupana pe. Miꞌi pote yne ywania miitꞌin kape areto teran Iesui moherep hamo sio iweꞌeg kahato rakaria kape sio yt. Yne ywania kape areto teran pote ehetama kape areto wy. Tawa wato piaria kape areto teran Iesui ehay moherep hamo iꞌewyte yne tawa hit kape areto teran wy. Yne tapyiꞌaria kape areto wy sio haiwot rakaria kape sio iwese rakaria kape sio gaꞌapy puaria gupteꞌen haria sio tawa watoꞌin puaria kape areto wy. Iwan kuap kahato haria kape areto wy. Yt kat kuap i haria kape areto wy. Uipap kahato wuatꞌi miit ekyi Iesui kapiat hamo. Taꞌi areineꞌen aikotã weteweru hat ewy. -Etum no uhehay wuatꞌi miitꞌin me uhehay yt kuap i haria pe e Iesui uhepe pote atum neran wuatꞌi ywania pe wen maꞌato yt atum i pote wuatꞌi piat weteweru hat ewywuat areineꞌen. 15Miꞌi pote uipap kahato ehewowi wy atum neran eiꞌywania pe Iesui etiat sehay pote. Toran kahato atimoherep teran sehay wakuat eiꞌywania pe ehetawa wato Huma totiaria pe.
Ahekyeraꞌat Hap Aimohey Hap Kaipyi
16Miꞌi pote rat yne uhesaika hap wywo ahãꞌãg neran ehowawiat areto hamo wen. Katupono sehay wakuat Iesui etiat hesaika kahato rakat aikotã Tupana esaika hap oktan ne. Aikotã pureke koꞌi esaika hap ewy Iesui etiat sehay. -Pywo ti rat uwe uwe timohey raꞌyn Iesui miꞌi hat Tupana miehakyeraꞌat wo topyhuꞌat sio wuatꞌi miitꞌin eropat haria sio wuatꞌi miitꞌin akagnia koꞌi toiꞌatuehakyeraꞌat kuap torannia Tosaꞌyru mohey haria areꞌe raꞌyn wuatꞌi ywania pe. Saꞌawyꞌi waku Iuteu ywania kape watimoherep Iesui etiat miꞌi hawyi waku iraniaꞌin yt Iuteu i ywania kape watimoherep Aipotypot Iesui. Hesaika kahato mesuwat sehay Iesui etiat are. Iesui etiat sehay pupi ti yt aremoti hin i imoherep hamo. 17Saꞌawyꞌi Tupana toꞌe miwan me -Uimohey haria yn ni aru uimiehakyeraꞌat nuaria e. Miꞌiria yn uimimoieineꞌen wuatꞌi eꞌat piatnuaria e. Nimo pyi mesup te Tupana timoewaku Tosaꞌyru mohey haria yn. Pywo ti rat worohoꞌonug eipe wakuap Uiꞌewy uimohey hawyi e Tupana nimo te miwan me. Mesup te wy mio tã e -Uhaꞌyru mohey haria yn atiꞌatumoieineꞌen wuatꞌi eꞌat pe e wuatꞌi ywania pe. Uiwyriaꞌin pyno waku yne eꞌat watuwemoheg ahepiat Iesui mohey hap ete. Imohey haria sese pe Tupana toꞌe -Uiwanetup hawe uipyꞌa pe eiperia yn wakuaria e.
Iãꞌãkap Motypot Hap Yt Naku I Topyhuꞌat
18Miitꞌin mesuwarotiaria minug koꞌi yt Tupana mikyꞌesat ewy hin i. Taꞌi yt hãpyk hin i torannia iꞌatuminug koꞌi e Tupana. Taꞌatukuap hãpyk nug hap taꞌatupyꞌa pe wen maꞌato yt iꞌatupotpap i inug hamo e. Miꞌi haype yt naku i nug hap yn taꞌatunug neran e. Taꞌatukuap yne pywuat koꞌi nug hap taꞌatupyꞌa pe hepiat taꞌatunapin hap wen maꞌato yt taꞌatunug hin i uiꞌe hap e Tupana wuatꞌi ywania pe. Yt taꞌatumohey teran i maꞌato taꞌatukyꞌesat taꞌatuminug saꞌag yn neran haype e. Taꞌatupyhyp aat kaꞌap uhehay pywuat sese moherep haria e. Miꞌi haria yt uwe i uikuap teran haria mesuwarotiaria yt uimohey i pote haria e Tupana wuatꞌi miitꞌin miat. 19Miꞌi pote miitꞌin minug yt nakuap i ete uhaiwot kahato areineꞌen e Tupana. Atimoherep yne iꞌatuepe iꞌatuꞌapiheg hap iꞌatuminug saꞌag etiatnuat atipy kaipyi wen maꞌato taꞌatunug ne yt uimikyꞌesat ewy i e. Taꞌi yne eꞌat pe atimoherep taꞌyn iꞌatuewowi uiwat uimikyꞌesat ewy nug hap iꞌatupyꞌa puo maꞌato yt taꞌatunug i uimoherep hap taꞌatupyꞌa piat hap ewy e. Yt teꞌeruwewaĩ hin i uhehay wo. Aremoherep aat kaꞌap miitꞌin me iꞌatuwanetup hawe maꞌato uiwemoherep hap taꞌatupun taꞌatupyꞌa pyi. Miꞌi pote yt taꞌatukuap kuap i areineꞌen hap e Tupana. Areineꞌen miitꞌin wywo maꞌato yt uikuap i haria wo tukupteꞌen e. -Tupana yt heremo i iꞌatuꞌe toꞌope. -Maꞌato aremoherep uiminug ikahu rakaria wo areineꞌen nat uiꞌe hap e. Teꞌerahaꞌat uiminug koꞌi kape hawyi -Taꞌi Tupana minug kaipyi watikuap toineꞌen Tupana hap yt iꞌatuꞌe i toꞌope e. -Aremoherep uiminug wo areineꞌen sese hap maꞌato uimimoherep yt taꞌatukyꞌesat i taꞌatuwanetup hawe e Tupana saꞌawyꞌi 20Tupana minug yi aat waty waikiru sem teꞌeraꞌakasa yne pykai -Pywo ti rat Tupana toineꞌen yt iꞌatuꞌe i teꞌeraꞌakasa iminug yne pykai. Yt naku i katupono Tupana tuwemoherep kahato raꞌyn tominug koꞌi wo toieineꞌen hap miitꞌin muo. Tupana yt heremo i wen aheha pe maꞌato tuwemoherep taꞌyn ahepe tominug koꞌi wo. Saꞌawyꞌi Tupana tunug mesuwat yi hawyi iꞌewyte mesuwarotiaria gaꞌapy puat yꞌy puat miat koꞌi. Miꞌiria koꞌi ti yt ihay kuap i rakaria tukupteꞌen wen maꞌato ihay rakaria ewy -Ainug hat ri Tupana iꞌatuꞌe haria ewy. Pywo ti Ainug hat ri Tupana iꞌatuꞌe wuatꞌi miitꞌin me. Yt heremo i Tupana wen maꞌato toineꞌen kahato aikai. Taꞌi hesaika sakpoꞌe Ainug hat iꞌatuꞌe hap ewy iminug koꞌi yne ahepe. Wuatꞌi eꞌat piat -Ainug hat toineꞌen iꞌatuꞌe ahepe iminug koꞌi. Yt uruwewi i urutuwenug iꞌatuꞌe hap ewy ahepe Tupana minug koꞌi wuatꞌi ywania pe. Miꞌi hawyi miitꞌin teꞌerahaꞌat Tupana minug koꞌi kape hawyi -Pywo Tupana ti wuatꞌi nug hat yt iꞌatuꞌe hin i heremo kahato pykai. Teꞌerahaꞌat kahato hewakuap moherep hap kape pykai -Aiwewi watuwenug iꞌatuꞌe saꞌag neꞌi toꞌope. 21Taꞌi mesuwarotiaria tikuap taꞌyn Tupana toineꞌen iminug koꞌi kaipyi maꞌato taꞌatukuap toineꞌen pykai yt taꞌatumotypot hin i Tupana. Iwese kahato hegyiꞌat kahato iꞌatuepe pykai -Waku kahato En Tupana yt iꞌatuꞌe hin i. Yt teꞌeruwehum hin i Tupana miium ahepiat hap kape. Yt nakuat i wo yn teꞌeruwanetup Tupana kape. Pywuat sehay Tupana etiat yt taꞌatukyꞌesat hin i mesuwarotiaria miitꞌin. Yt karãpe i teꞌeruwanetup teran Tupana kape. Yt kat i iꞌatuwanetup hap Tupana etiat hap pote aikotã hoꞌowasat sese rakaria ewy tukupteꞌen taꞌatuwanetup hawe. Iꞌypyryp kahato iꞌatuwanetup hap miꞌi pote wẽtup sehay kape yn taꞌatuwanetup. Yt kan hamuat i sehay rakat kape yn taꞌatuwanetup. Hesoꞌok takaria ewy tukupteꞌen iꞌatuwanetup hawe. Yt nakuaria i sese taꞌatupyꞌa pe. Yt iꞌatuweꞌeg i sese rakaria ewy iꞌatuwanetup hap. 22Yt nakuaria sese pykai -Taꞌi uruto poꞌog uruweꞌeg torannia kawiat iꞌatuꞌe taꞌatupyꞌa pe. Maꞌato Tupana wanetup hawe yt iꞌatuweꞌeg hin i haria wo teꞌeropyhuꞌat. 23Tupana toineꞌen wuatꞌi eꞌat piat ieineꞌen hat pykai mesuwarotiaria yt timohey i mio tã e hap. Taꞌi yt taꞌatumotypot hin i Tupana Sese mekewat Wuatꞌi Eꞌat Piat Ieineꞌen hat. Maꞌato taꞌatukyꞌesat poꞌog taꞌatupo wuat taꞌatuminug tupanaria saꞌag hit koꞌi. Miꞌi hawyi miitꞌin me -Eipe ti tupana iꞌatuꞌe saꞌag Tupana minug koꞌi pe iꞌatuꞌe. Taꞌatunug miitꞌin mesuwarotiaria taꞌatuetupana wo. Miꞌi hawyi miitꞌin iãꞌãkap mo wuat minug koꞌi kape teꞌeruwepỹꞌãtutuk -En ni tupana iꞌatuꞌe. Iraniaꞌin weitaria iãꞌãkap koꞌi kat kat kawiat mo wuat taꞌatunug hawyi -Meimuẽ ni tupana sese iꞌatuꞌe saꞌag. Iraniaꞌin miat koꞌi pira koꞌi iakare koꞌi iãꞌãkap koꞌi taꞌatunug saꞌag taꞌatuetupana wo. Taꞌatunug taꞌatupo wo hawyi miꞌiria kape teꞌeruwepỹꞌãtutuk -Miꞌiria so tupana iꞌatuꞌe saꞌag. Moiꞌok kape iꞌewyte iꞌatuwẽpapꞌi aat kaꞌap maꞌato taꞌatunug hat kape Tupana Koro kape mekewat Poꞌog Poꞌog Ikahu Torannia Tominug Koꞌi Kawiat Rakat kape yt kat i iꞌatuꞌe hap are. Teꞌeruweꞌywyk kahato Tupana sese kaipyi taꞌatukuap saꞌawyꞌi pykai. Nuꞌe saꞌyruꞌin saꞌawyꞌi wuat yne aito pote. 24Yt taꞌatuweꞌeg i hap tupanaria yn taꞌatukyꞌesat pote Tupana toꞌe iꞌatuepe -Pyno ewetunug no yt eiweꞌeg i hap aat kaꞌap eikuꞌuro hap kape e. Ewetunug eimikyꞌesat oktan eiwepyi hap oktan e Tupana tomohey hap pun haria pe. Miꞌi hawyi poꞌog saꞌag nug haria wo teꞌeropyhuꞌat saꞌawyꞌi wuat kai. Miꞌi hawyi yne taꞌatupyꞌa pywiat iꞌatuminug saꞌag iꞌatumikyꞌesat koꞌi taꞌatunug toran aat kaꞌap hawyi yt naku i nug haria sese wo teꞌeropyhuꞌat aat kaꞌap. Miꞌi hawyi iꞌatueko yt naku i nug hap po pe teꞌeropyhuꞌat hesoꞌok takaria. Yt taꞌatuꞌatoiat kuap i taꞌatueko taꞌatuhãꞌãg mytkai. Yt naku i nug hap eropat aat kaꞌap haria teꞌeropyhuꞌat yt teꞌeruwewaĩ kuap i hawyi. Miꞌi tupono hewaire waire hap kahato toꞌope toꞌope taꞌatunug haryporia wywo ihainia ihainia wywo hap ewy taꞌatunug aat kaꞌap yt iꞌatuweꞌeg i haria yne katupono saꞌag kahato taꞌatunug taꞌatupiit wywo. Yt miit ewy i teꞌeruwewuk wuk taꞌatupiit mikyꞌesat saꞌag upi. Taꞌatumoherep yt taꞌatuweꞌeg i hap koꞌi toꞌope toꞌope. Miꞌi hawyi teꞌeruwemoti aat kaꞌap hap topyhuꞌat taꞌatuwanetup hawe iꞌatuminug saꞌag hap kaipyi. 25Saꞌawyꞌi wuaria sehay Tupana etiat pywuat taꞌatukuap taꞌatuwanetup hawe maꞌato miꞌi hawyi heso rakaria wo tukupteꞌen hawyi taꞌatuwaure teran pywo sehay Tupana etiat. Katupono taꞌatunug neran yt Tupana mikyꞌesat ewywuat i koꞌi. Miꞌi hawyi taꞌatuꞌatoiat Tupana hawyi Tupana minug koꞌi kape -Eipe ti urunug hat iꞌatuꞌe. Waku watunug miitꞌin ahetupana wo iꞌatuꞌe toꞌope. Miꞌi hawyi hesoꞌok takaria sese ewy teꞌeropyhuꞌat. Miꞌi hawyi taꞌatunug taꞌatuetupanaria taꞌatupo wo. Miꞌi hawyi teꞌeruwepỹꞌãtutuk tupanaria iãꞌãkap ran koꞌi taꞌatumotypot hamo. Miꞌi hawyi Tupana minug koꞌi pe -Urunug hat en iꞌatuꞌe taꞌatupo minug koꞌi pe.
Maꞌato aito Iesui mohey haria -Tupana watoꞌe En ni urunug hat sese watoꞌe. Pywo pe ti En ni poꞌog wuat torannia kai watoꞌe raꞌyn. 26Maꞌato iraniaꞌin saꞌag kape yn iꞌatuwanetup hap. Miꞌi tã taꞌatukyꞌesat pote Tupana toꞌe iꞌatuepe -Pyno hẽto e. Eiwemaꞌat teran eiminug saꞌag koꞌi wywo pote worohoꞌoꞌatoiat eipe eiminug yt naku i eheko eropat haria wo e. Miꞌi hawyi teꞌeruwepyi sewaire sewaire hap kape yn taꞌatukyꞌesat haype. Miꞌi hap urumowepiit kahato hap topyhuꞌat aru iꞌatuꞌe. Maꞌato taꞌatunug kahato hawyi iꞌatumoti hap yn topyhuꞌat. Miꞌi hawyi awareria ewy tukupteꞌen toꞌope. Meiũran haryporia yt haryporia ewy hin i teꞌeropyhuꞌat. Katupono haryporiaꞌin yt tikyꞌesat poꞌog ihainia taꞌatueꞌaito wo maꞌato taꞌatukyꞌesat haryporiaꞌin ne taꞌatueꞌaito saꞌag wo taꞌatukyꞌesat. 27Iꞌewyte ihainiaꞌin tiꞌatukyꞌesat towary wo ihainiaꞌin yt ihainia sese ewy hin i teꞌeropyhuꞌat. Yt Tupana mikyꞌesat ewy hin i taꞌatukyꞌesat pote yt Tupana minug ewy hin i teꞌeropyhuꞌat. Miꞌi hawyi haryporia tiꞌatuꞌatoiat ihainiaꞌin hawyi haryporiaꞌin toꞌope toꞌope toꞌokyꞌesat hap topyhuꞌat iꞌewyte ihainiaꞌin ihainiaꞌin wywo toꞌope toꞌope yt miit ewy i yt naku i hap eropat sese haria wo. Miꞌi hap upi tukupteꞌen Tupana miꞌapiheg wuatnuaria wo. Iꞌatuminug saꞌag iwato hap oktan toiꞌatumosoꞌopot.
28Miꞌiria pe wahenoi sehay wakuat Tupana etiat pote waĩꞌiꞌatuꞌe ahepe katupono yt taꞌatukyꞌesat i. Miꞌi sehay kape yt teꞌeruwanetup teran i. Yt taꞌatukyꞌesat iꞌatuewaure kaꞌa pe iꞌatuwanetup hawe -Yt kat i Tupana sese iꞌatuꞌe toꞌope pote toineꞌen pykai. Miꞌi pote Tupana toꞌe miꞌiria ewywuaria pe -Hẽto eiwewanetup eiminug saꞌag kape yn aat kaꞌap eimikyꞌesat ewy e. Miꞌi hawyi poꞌog yt ihainia ewy i yt haryporia ewy i teꞌeropyhuꞌat taꞌatupyꞌa pe taꞌatuwanetup hawe taꞌatuminug. Yt naku i hap koꞌi yn neꞌi taꞌatunug taꞌatuwẽpyi hap ewy. Teꞌeruwepyi Tupana wanetup hap ikahu rakat kaipyi iꞌatuehamanaꞌi. 29Aikotã aikotã saꞌag nug kuap haria tukupteꞌen. Yt naku i nug hap ete yn teꞌeruwemoehapap aat kaꞌap -Taꞌi yt nakuap i waku iꞌatuꞌe taꞌatupyꞌa pe. Uiminug yt nakuap i yn uimowepiit sese iꞌatuꞌe. Atikyꞌesat iraniaꞌin ekat yne uiwatnuat uhekat hamo iꞌatuꞌe taꞌatuwanetup hawe. Iꞌatuehay miitꞌin moti te hap yn iꞌewyte sehaꞌawyꞌi hap yn taꞌatunug torannia miitꞌin ete. -Uito poꞌog waku eikai iꞌatuꞌe wakuaria pe iꞌatuehayꞌywyi wywo. Miitꞌin potꞌauka haria wo teꞌeruwepyhuꞌat. Miꞌi hawyi woꞌopotmaꞌat haria teꞌeruwepyhuꞌat. Teꞌeruwepyi iꞌatuhoiroꞌi hoiroꞌi iraniaꞌin ete. Yt pywuat sehay i taꞌatuhenoi iraniaꞌin ete miꞌiria maꞌat hamo iraniaꞌin heꞌi heꞌi wo. 30Toꞌoewa pe iꞌatuwese kahato maꞌato haipekai miitꞌin atumohit kahato hap yn iꞌatuehay. Yt taꞌatukyꞌe hin i Tupana sese iꞌewyte miitꞌin me -Yt kat hamo i eiperia iꞌatuꞌe yn taꞌatupyꞌa pe. Yt iꞌatuwese i iꞌewyte yt taꞌatuwesat i iraniaꞌin katupono -Uito rat poꞌog nakat eikai iꞌatuꞌe teꞌeruwewanetup hawe. Atunug kuap poꞌog eikai iꞌatuꞌe. Yt taꞌatuꞌywotꞌin taꞌatutyꞌin miat waĩꞌe hap upi hin i teꞌeropyhuꞌat. 31Teꞌeruwepyi taꞌatupehik taꞌatuehay -Taꞌi atunug aru uiꞌe hap iꞌatuꞌe maꞌato yt taꞌatunug hamuat pykai i. Miitꞌin maꞌat hap kape yn teꞌeruwanetup pote -Atunug aru are ti rat uiꞌe hap iꞌatuꞌe pykai yt taꞌatunug hin i aru taꞌatuꞌe hap koꞌi. Yt taꞌatukuap teran i taꞌatuweꞌeg hap. Yt taꞌatukyꞌe kuap i iraniaꞌin. Marakꞌa koꞌi wo tukupteꞌen. Yt kat i miitꞌin ehakyꞌeꞌi hap iꞌatupyꞌa pe. 32Taꞌatukuap Tupana waĩꞌe hap mekewat kat som waku watunug kat som yt naku i watunug e hap koꞌi wen maꞌato yt taꞌatunug hin i. Yt taꞌatukyꞌesat i haype. -Miꞌi tã ewetunug mote worohoꞌoꞌapiheg guꞌuro hamo e Tupana. Miꞌi taꞌatukuap pykai taꞌatupugha yne Tupana piat ainapin hap koꞌi. Iꞌewyte toꞌomowehum kahato toꞌope toꞌominug saꞌag koꞌi ete -Urumowepiit kahato haria eipe iꞌatuꞌe yt naku i nug haria pe. Miꞌi hawyi watoꞌe -Maꞌato uito ti yt miꞌiria ewywuat hin i areineꞌen katupono waku kahato uito watoꞌe pote ti waku aiweꞌeg wo o uiwyriaꞌin katupono yne aito miꞌiria ewywuaria Tupana wanetup hawe are.
Currently Selected:
Humanu 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.