Maku 1
1
Haga Wẽtup 1
Iuwãu Woꞌosetꞌok Hat
Mateu 3.1-12; Iruka 3.1-8; Iuwãu 1.19-28 Piat Ewy
1Mesup mienoi wakuat ti Aipotypot Iesui etiat Tupana saꞌyru etiat aikotã saꞌawyꞌi te Tupana tipoꞌoro tosaꞌyru meiko wo mesuwat mytyyp kape miitꞌin ehakyeraꞌat hamo. 2-Uhaꞌyru e woropoꞌoro aru En miitꞌin ehakyeraꞌat hamo e maꞌato saꞌawyꞌi atipoꞌoro teran wẽtup ok eꞌuut hap enoi hamo e. Epuꞌap mowaku hamuat e Tupana miwan me Marakia 3.1 pe. 3Atipoꞌoro wyti aru miitꞌin me epuꞌap ywytip hamuat. Mio tã e wyti aru epiat pe uhaꞌyru e. Ewehywytip Tupana saꞌyru muap upi e. Miꞌi hawyi ewetoiat ro eiminug saꞌag koꞌi eiwanetup saꞌag hap koꞌi hawyi toineꞌen muap Tupana kapiat eimimohey wuat e aru e Isaia 40.3 miwan me hap ewy. 4Miꞌi hap ewy raꞌyn Iuwãu putꞌok e raꞌyn Tupana saꞌyru uut hap etiat enoi hamo miitꞌin woꞌosetꞌok hamuat Tupana toꞌe hap ewy. Miꞌi ti yahig note tohenoi henoi kahato miitꞌin me -Eweitotiat eiminug yt naku i hap koꞌi e. Miꞌi hawyi Tupana timoweityk taꞌyn eiminug saꞌag hap koꞌi e. Mio tã ewetunug hawyi worohoꞌosetꞌok e Iuwãu miitꞌin me. 5Miꞌi hawyi miitꞌin tawa Ierusarẽi kaipywiaria yi Iuteu kaipywiaria tõꞌẽ tõꞌẽ yahig kape Iuwãu mienoi kuap hamo. Miꞌi hawyi ti õꞌẽ haria henoi raꞌyn wuatꞌi aikotã taꞌatunug yt naku i hap koꞌi toꞌope. Waku hawyi Iuwãu tiꞌatusetꞌok Iutãu hy pe.
Iuwãu Tohenoi Iesui Etiat
6Miꞌi hap Iuwãu esokpe ti ihũ Kameru sap kawiat. Imiꞌu wyti pohit iꞌewyte awiꞌa hy imiꞌu wo. Iweꞌok kytyt hap ti miat pe kawiat. 7Miꞌi hawyi ti tohenoi henoi miitꞌin me -Meiũran ti aru tuut wẽtup ok poꞌog poꞌog wakuat uikawiat rakat e. Uiat uhewaku hap yt putꞌok e i ipysei hamo ipy sokpe saity pok hamo e. 8-Uito ti worohoꞌosetꞌok yꞌy wo maꞌato miꞌi ti aru Tupana Paꞌãu wakuatno raꞌyn ehetꞌok e Iuwãu miitꞌin me.
Iesui Tuwesetꞌok Hamo
Mateu 3.13; Iruka 3.21-23 Piat Ewy
9Miꞌi hawyi wẽtup eꞌat pe tuut raꞌyn Iesui tawa Nasare kaipyi tomotag hap tama Karireia kaipyi Iuwãu kape tosetꞌok Iutãu hy piat hamo tuut. 10Miꞌi hawyi Iesui tuwẽtem yꞌy pyi hawyi tehaꞌat raꞌyn atipy kape. Miꞌi hawyi taꞌakasa raꞌyn okenꞌypy ewy raꞌyn. Miꞌi tote pyi tuut raꞌyn Tupana Paꞌãu hawyi putꞌok e raꞌyn pykasu ewywuat Iesui ete. 11Miꞌi hawyi sehay tuut Iesui kape atipy kaipyi -Taꞌi uimikyꞌe kahato En Uhaꞌyru e. Miꞌi tupono arehum kahato ete e.
Mateu 4.1-11; Iruka 4.1-13 Piat Ewy
12Miꞌi hawyi meremo Tupana Paꞌãu wakuat tioto raꞌyn yahig wato kape. 13Miꞌi tote toineꞌen 40 eꞌat hap kape itote miat koi pyꞌasetpe. Miꞌi hap tote ahiag hãꞌãg naꞌyn Iesui maꞌato Tupana emiitꞌin timoesaika kahato itote.
Mateu 4.12; Iruka 4.14 Piat Ewy
14Wẽtup eꞌat pe miitꞌin tipyhik woꞌosetꞌok hat Iuwãu. Miꞌi hawyi Iesui toto i raꞌyn yi Karireia kape Tupana ehay wakuat enoi enoi hamo. 15Miꞌi hawyi toꞌe -Koitywy ti porap putꞌok e raꞌyn Tupana Morekuat nuat ieineꞌen hamuat. Miꞌi tupono eweitoiat ro eiminug yt naku i hap koꞌi hawyi eweimohey ro Tupana ehay wakuat e Iesui tetama piaria pe.
Iesui Tikay Kay Topotmuꞌeria
Mateu 4.18-22; Iruka 5.1-11 Piat Ewy
16Wẽtup eꞌat pe so hewyry Iesui yi Karireia hyemyiꞌa eꞌyi kyt upi. Miꞌi turan taꞌakasa pira pytyk haria kape uhyt Simau iꞌywyt Ãtere kape. Miꞌi turan kowoꞌi kowoꞌi suki wato wo taꞌatukat pira yꞌy pe. 17Miꞌi hawyi Iesui tiꞌatukay kay raꞌyn -Toꞌiro uhupi uhytꞌiꞌin e. Mesup te ti pira pytyk haria wo eipe maꞌato meiũran ti aru ahenoi miitꞌin pytyk Tupana watnuat hap ehepe e Iesui Simau iꞌewyte Ãtere pe. 18Mio tã e Iesui hawyi meremo taꞌatuꞌatoiat taꞌatuesuki wato hawyi tuwat raꞌyn Iesui upi. 19Miꞌi hawyi Iesui toto porapꞌi ywykuꞌi upi. Miꞌi turan taꞌakasa i Sepeteu saꞌyruꞌin kape Tiaku Iuwãu kape wesuki wato mog yara piat haria kape. 20Miꞌi hawyi toiꞌatukay kay meremo miꞌiria hawyi tuwat raꞌyn hupi yara pyi taꞌatuꞌywot wywuat pyi. Miꞌi hawyi Sepeteu topyhuꞌat temiitꞌin wywo yara pe.
Mateu 4.13-25; Iruka 4.31-37 Piat Ewy
21Miꞌi hawyi toto i raꞌyn Iesui temiitꞌin wywo tawa Kawanaum kape. Tupana motypot hap eꞌat pe hawyi Iesui teke Tupana motypot yat pe itotiaria muꞌe hamo. 22Miꞌi hawyi teꞌeruwewanetup kahato hawyi teꞌeroꞌe toꞌope -Kat poteĩ Iesui aimuꞌe yt miwan enoi haria ewy i raꞌyn iꞌatuꞌe. Miꞌi ti morekuat ewy raꞌyn wen iꞌatuꞌe. 23Miꞌi turan wẽtup ok miit toineꞌen woꞌomuꞌe hap yat pe ahiag paꞌãu ipiit piat rakat. Miꞌi so toꞌe tehay pirik wo 24Kat ere teran som uruete. Taꞌi uruikuap ti en tawa Nasare kaipywiat en ni Tupana wakuat saꞌyru e tehay pirik wo. Uruꞌatuuka hamo apo eriot iꞌatuꞌe. 25Miꞌi pote Iesui waĩꞌe haty wo -Epoꞌinik to ahiag e. Erẽtem no meiẽwat miit piit pyi e. 26Miꞌi pote meiẽwat miit ahiag tihuruk tuwẽtem tehay pirik wuat haype. 27Miꞌi pote iraniaꞌin teꞌeruwanetup kahato hawyi apo iꞌatuꞌe toꞌope -Uweĩ meiẽ woꞌomuꞌe hat iꞌatuꞌe. Yt wataꞌakasa i meiẽwat ewywuat tehay esaika wuat ahiag sopo hat iꞌatuꞌe. 28Miꞌi hawyi wuatꞌi pe raꞌyn taꞌatuhenoi henoi Iesui etiat hawyi iraniaꞌin yi Karireia piaria ikuap taꞌyn Iesui piat wakuap nug hap etiat.
Mateu 8.14-16; Iruka 4.38-41 Piat Ewy
29Miꞌi hawyi ti Iesui tuwẽtem naꞌyn Tupana motypot yat pyi. Miꞌi hawyi toto i raꞌyn towyriaꞌin Iuwãu Tiaku wywo temiitꞌin Ãtere Simau yat kape. 30Miꞌi hawyi Simau sakitu iꞌahuu rakat yni pe taꞌatupuẽti. Miꞌi hawyi ti mekewat iꞌahuu hap taꞌatuhenoi Iesui pe. 31Miꞌi hawyi toto raꞌyn hewowi. Putꞌok toꞌe hawyi toipopytyk taꞌyn hawyi meremo tokosap iꞌahuu hap. Tehãite meremo hawyi toteropat raꞌyn Iesuiꞌin.
32Miꞌi hawyi aat minꞌe turan taꞌatuerut Iesui kape wuatꞌi iꞌahuu rakaria wuatꞌi ahiag ipiit piat rakaria. 33Miꞌi hawyi ti yne tawa piaria teꞌeruwaꞌatunug okenꞌypyke. 34Miꞌi hawyi itote Iesui tiꞌatumoehãite iꞌatu kahato iꞌahuu rakaria. Iꞌewyte ahiagnia toiꞌatusopo kahato miitꞌin piit pyi. Miꞌi hawyi toꞌe i ahiagnia pe -Eipoꞌinik to ahiagnia e. Iesui yt tero i ahiagnia iꞌatuehay hamo katupono taꞌatukuap taꞌyn uwe Iesui.
Iesui Toto Tuweran Ihay Tupana Wywo Hamo
35Miꞌi hawyi Iesui ipoĩꞌam hunete iꞌypyryp te turan hawyi toto yahig wato kape hawyi ihay itote toꞌywot wywo. 36Meiũran ti Simauꞌin tuwat hupi ikat hamo. 37Taꞌatupuẽti hawyi teꞌeroꞌe tope -Urumuꞌe hat iꞌatuꞌe mio ti ekat haria typyꞌi kahato Mehin iꞌatuꞌe. 38Maꞌato toiꞌatuwesat -Toꞌiro iraniaꞌin tawa kape e. Wuatꞌi tawa pe ahenoi teran e. Yt wẽtup tawa pe yn i ahenoi teran e. Wuatꞌi tawa piat henoi hamo ariot mesuwat yi kape e. 39Miꞌi hawyi toto i raꞌyn Iesui yi Karireia piat Tupana motypot yat piaria enoi hamo. Iꞌewyte itote turan toiꞌatusopo ahiagnia miitꞌin piit pyi.
Mateu 8.2-4; Iruka 5.12-14 Piat Ewy
40Wẽtup eꞌat pe Iesui ewyry hap tote hepihi pihi rakat tuut Iesui kape. Miꞌi hawyi tuwepỹꞌãtutuk haype toꞌe -Uhyt e uimoehãite teran mote uimoehãite kuap e. 41Miꞌi hawyi Iesui tikyꞌe hawyi tuweponug hawyi toꞌe -Taꞌi worokyꞌe kahato woromoehãite teran uhyt e. 42Mio tã e hawyi meremo raꞌyn ipiit kahu raꞌyn tuweityk taꞌyn hepihi. 43Miꞌi hawyi Iesui tinapin hatywo -Pyno waku raꞌyn epe etiat uhyt e. Miꞌi pote areꞌe epe ereto ro paꞌi koꞌi kape hawyi epiit kahu hap etomoherep to iꞌatuepe e. Miꞌi hawyi etum o emiium Muisei napin hap e. Maꞌato iraniaꞌin me o yt etomoherep teiꞌo emoehãite hap muap upiaria pe e. 44Waku ereto ro paꞌiria kape hawyi etomoherep to iꞌatuepe emog uhepiat hap. Miꞌi hawyi aikotã ahaꞌaseꞌi Muisei ainapin hap ewy etum emiium hawyi iraniaꞌin emoehãite hap taꞌatukuap taꞌyn e. 45Maꞌato yt Iesui mikyꞌesat ewy i tohenoi Iesui piat tomoehãite hap yne pe. Miꞌi pote ti Iesui yt teke kuap i tawa pe katupono ti typyꞌi kahato akasa teran haria tõꞌẽ tõꞌẽ hewowi wuatꞌi kaipyi. Miꞌi pote yahig note toineꞌen yt teke kuap i tawa pe pote. Maꞌato miꞌi pykai tõꞌẽ kahato miitꞌin yahig kape Iesui kapiat teꞌeraꞌakasa hamo.
Currently Selected:
Maku 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.