Iuwãu 9
9
Haga 9
Iesui Timoehãite Raꞌyn Yt Iha Pytig I Rakat Iꞌywãꞌĩ Hap Kaipyi
1Miꞌi hawyi Iuteu ywania yt potpap i hap eꞌat pe toto Iesui muap upi towyriaꞌin wywo. Miꞌi hawyi muap tote toipuẽti wẽtup ok miit yt ihapytig i rakat wemoherep toty kaipywiat yt kat kapiat i akasa hat. 2Miꞌi hawyi Iesui wyriaꞌin apo iꞌatuꞌe Iesui pe -Urumuꞌe hat iꞌatuꞌe uwe piat iꞌaparap hap upi som Tupana tiꞌapiheg yt ihapytig i rakat iꞌatuꞌe. Iꞌywotꞌin piat iꞌaparap hap upi toineꞌen yt ihapytig i sio iwat iꞌaparap sese hap kaipyi apo iꞌatuꞌe. 3-Yt wyti uiwyriaꞌin yt iꞌywotꞌin minug saꞌag upi i ti iꞌewyte yt iwat iminug saꞌag upi i wyti yt ihapytig i hap are maꞌato miꞌi miit wyti yt ihapytig i rakat toineꞌen Tupana misepap moherep toieineꞌen hap etiat hamuat e. 4Uiwyriaꞌin ihatꞌok puo aipotpap kuap maꞌato wãtym putꞌok e hawyi yt kat i watunug kuap are e. Miꞌi hap ewy waku watunug yne uipoꞌoro hat mikyꞌesat ewy e. 5Uheineꞌen hap mesuwarote turan Uito ti miitꞌin moẽtyhot hap ewywuat areineꞌen e. 6Mio tã toꞌe hawyi kuitu e yi tote hawyi totat topo pe yi og tẽty hy wywo toiꞌapokik hawyi miꞌi wo toipen iha yt kat kapiat i akasa hat e. 7Miꞌi hawyi toꞌe yt ihapytig i rakat pe -Mehin e mowehasei ro mekewat yꞌy Sirue e hap woꞌosei hawe Tupana Mipoꞌoro yꞌy e hap kape. Miꞌi rẽ toto raꞌyn tuwehasei hamo hawyi taꞌaipok ihapytig nakatno raꞌyn. 8Miꞌi hawyi tuwemoherep toꞌyat ete i wuaria kape hawyi miꞌiria teꞌeroꞌe toꞌope -Ihapytig naꞌyn apo saꞌawyꞌi wuat yt ihapytig i rakat iꞌatuꞌe sio wẽtup ok neꞌi iꞌatuꞌe. Mekewat yt kat saꞌup i miium ẽtup hat raꞌyn apo meke sio yt iꞌatuꞌe toꞌope. 9Taꞌi miꞌi rasom iꞌatuꞌe iraniaꞌin. -U yt miꞌi i rat iꞌatuꞌe iraniaꞌin. Iꞌewywuat neꞌi rat maꞌato yt miꞌi i iꞌatuꞌe. Maꞌato saꞌawyꞌi wuat yt ihapytig i rakat tiꞌatuwesat -Uito rat e. 10-Aikotã pyno eraꞌakasa raꞌyn raꞌyn apo mio uhyt mimi iꞌatuꞌe. 11Mio tã iꞌatuꞌe hawyi toiꞌatuwesat -Wẽtup ok Miit Iesui e hap het rakat wyti tomiꞌapokik yi tẽty hy wywuatno uheha pen hawyi ti toꞌe uhepe -Mowehasei ro yꞌy Sirue e hap woꞌosei hawe e uhepe hawyi areto arehasei hamo. Miꞌi hawyi ti mio araꞌakasa raꞌyn uheha raꞌyn e iꞌatuepe. 12-Aikope mio emoꞌakasa hat iꞌatuꞌe. U paĩ yt atikuap i e.
Wariseuria Koꞌi Taꞌatuhẽtup Kahato Yt Iha Pytig I Rakat Pe
13Miꞌi hawyi sehaꞌat haria tioto raꞌyn paꞌi kororia Tupana ehay miitꞌin napin haria kape. 14Taꞌatuereto iha pakup takat Tupana mohey haria akag koꞌi kape katupono Iesui timoehapytig miꞌi yt motpap i hap eꞌat pe pote. 15Miꞌi hawyi Tupana ehay wuat woꞌonapin haria akag koꞌi apo iꞌatuꞌe -Aikotã me kahu etipuẽti ehapytig hap mehin iꞌatuꞌe. Miꞌi hawyi toiꞌatuwesat -Taꞌi toiꞌapokik yi og tẽty hy wywuat hawyi ti uheha pen hawyi arehasei hawyi ti mio uheha raꞌyn araꞌakasa kuap taꞌyn e. 16Tupana ehay moherep haria teꞌeroꞌe -Pyno miꞌi miit yt Tupana kaipywiat i iꞌatuꞌe katupono yt aipotpap i hap eꞌat pe miꞌi tã hap tutunug iꞌatuꞌe. Maꞌato iraniaꞌin teꞌeroꞌe -Kat pote yt Tupana kaipywiat i Miꞌi Miit eweiꞌe iꞌatuꞌe. Yt Tupana kaipywiat i Miꞌi Miit pote aikotã som pyno wakuap sese tutunug kuap yt Tupana Mipoꞌoro i Miꞌi Miit pote iꞌatuꞌe iraniaꞌin. Miꞌi hawyi yt toꞌoꞌewyꞌewy i raꞌyn teꞌeruwanetup. 17Miꞌi hawyi apo iꞌatuꞌe ihapytig rakat pe iraꞌyn -Kat ereĩ pyno erewanetup mekewat emoehapytig hat ete apo iꞌatuꞌe hawyi toiꞌatuwesat -Taꞌi Tupana ehay enoi hat wyti Miꞌi e iꞌatuepe. 18Maꞌato Iuteu ywania akag koꞌi yt timohey i saꞌawyꞌi yt iha pytig i rakatno toineꞌen hap. Miꞌi hawyi taꞌatukay kay iꞌywotꞌin apo taꞌatuꞌe hamo. 19Iꞌywotꞌin putꞌok iꞌatuꞌe hawyi Iuteu ywania akag koꞌi apo iꞌatuꞌe -Eimepyt apo meiũ tuweꞌywãꞌĩ apo yt ihapytig i rakat iꞌatuꞌe. -Pywo toꞌywãꞌĩ pyi te yt kat i taꞌakasa iꞌatuꞌe. Pywo pote aikotã mio taꞌakasa raꞌyn iꞌatuꞌe iꞌywotꞌin me. 20-Miꞌi hat ti rat urumepyt iꞌatuꞌe iꞌywotꞌin. Pywo ti toꞌywãꞌĩ pyi te ti yt kat i taꞌakasa iꞌatuꞌe. 21Maꞌato mio wyti yt uruto tewy uruikuap aikotã me toipuẽti tehapytig hap iꞌatuꞌe iꞌewyte uwe imoehapytig hat yt uruikuap i iꞌatuꞌe. Pyno apo eweiꞌe ro tope. Itag naꞌyn tohenoi kuap rasom iꞌatuꞌe iꞌywotꞌin apo e haria pe. 22Mio tã hap ewy iꞌywotꞌin teꞌeroꞌe katupono Iuteu ywania akag koꞌi pupiat teꞌerokenꞌẽ haype katupono Iuteu akag koꞌi teꞌeroꞌe raꞌyn toꞌope -Uwe uwe Iesui Tupana Mipoꞌoro Aiporekuatnuat e hat o watipun naꞌyn Tupana motypot yat wato pyi iꞌatuꞌe. 23Miꞌi pote yt kat toꞌe teran i taꞌatumepyt moehãite hap etiat. Miꞌi pote -Itag naꞌyn tohenoi kuap tã som iꞌatuꞌe iꞌywotꞌin Iuteu akag koꞌi apo e haria pe teꞌerokenꞌẽ haype. 24Miꞌi hawyi taꞌatukay kay i raꞌyn mekewat Iesui mimoehãite iha pakup takat taꞌatuwewowi teꞌeroꞌe hamo -Pyno Tupana ehamo hãpyk to ehenoi uruepe katupono uruikuap ti mekewat miit emoehãite hat yt nakuat i iꞌatuꞌe. 25-U paĩ yt atikuap i kahato koitypuo yt nakuat i sio yt e. Maꞌato wẽtup hap atikuap saꞌawyꞌi yt kat kape i araꞌakasa maꞌato mesup ti araꞌakasa yne raꞌyn. Miꞌi hap yn atikuap kahato are e. 26-Aikotã eĩ pyno tutunug emoꞌakasa hamo apo iꞌatuꞌe i. 27Mio tã iꞌatuꞌe hap i toiꞌatuwesat iraꞌyn -Ahenoi henoi raꞌyn ti ehehamo aikotã uipohag nug hap e. Kat poteĩ eweikuap kahato teran uiwẽ pyi uimoehãite hap e. Eweipyhuꞌat teran hemiitꞌin wo haype apo e. 28Mio tã e pote iꞌatupyꞌahak kahato tuete -Yt naku i en iꞌatuꞌe. En wyti iwat hemiit maꞌato uruto ti aseꞌi Muisei emiitꞌin naꞌyn iꞌatuꞌe. 29Uruto ti uruikuap kahato aseꞌi Muisei mienoi Tupana ehay iꞌatuꞌe maꞌato mekewat miit uwe mipoꞌoro aikope pyi tuut hap ti yt uruikuap hin i iꞌatuꞌe. 30Miꞌi hawyi iha pakup takat tuwanetup kahato hawyi toꞌe -Kat pote aikope pyi tuut hap yt eweikuap i te are e. Eiwanetup to mehinꞌin katupono Miꞌi Miit uimoꞌakasa raꞌyn paĩ e. 31Miꞌi hawyi mio tã e -Taꞌi watikuap taꞌyn yt nakuaria i po wo tomisepap koꞌi Tupana yt timoherep i tewaku nug hap koꞌi maꞌato tomotypot haria tehay nug haria po wo yn toimoherep kuap wakuap sese mesuwe e. 32Yi nug hawyi te ti mesuwat etiat miitꞌin yt inug kuap i yt iha rakat moehapytig hap. 33Yt Tupana kaipywiat i Miꞌi Miit pote ti teneke yt uheha nug kuap hin i e. 34Mio tã e pote poꞌog iꞌatupyꞌahak tuete -Ehire pyi te ti yt nakuat i ereineꞌen yt eꞌywot wekuap i rakat en paĩ iꞌatuꞌe. Miit yt iweꞌeg i rakat en iꞌatuꞌe. Aikotã pyno urumuꞌe teran en yt nakuat i en pykai iꞌatuꞌe. Miꞌi hawyi taꞌatuporenotem haty wo Tupana motypot yat pyi mekewat iha pakup takat.
Iesui Tuwemoherep Imoehãite Rakat Pe
35Maꞌato Iesui tikuap Tupana yat pywiat iporenõtem hap hawyi toikat raꞌyn. Toipuẽti hawyi toꞌe tomimoehãite pe -Etomohey apo mekewat Wuatꞌi Miitꞌin Ykeꞌet mekewat Tupana Saꞌyru e. 36Miꞌi hawyi -Uwe miꞌi e. Atimohey teran nat wen maꞌato yt atikuap i uwe Miꞌi Miit e. 37Miꞌi hawyi Iesui toꞌe -Uito Miꞌi Miit e. Mio ti Miꞌi raꞌyn ihay ewywo e. Koitywy eraꞌakasa raꞌyn uhewowi e Iesui iha pakup takat pe. 38-Taꞌi Uiporekuat woromohey kahato raꞌyn ti koitywy e Iesui pe. Miꞌi hawyi toimotypot kahato raꞌyn toikyꞌe kahato raꞌyn Iesui. 39Miꞌi hawyi Iesui toꞌe tope -Mesuwarotiat yt watikuap i kahato Tupana e haria yt ahehapytig i e haria moehapytig sese hamo ariot e maꞌato iraniaꞌin watikuap kahato Tupana e haria ahehapytig kahato e haria moehapysasep hamo ariot e. 40Miꞌi hawyi iraniaꞌin itotiaria Tupana ehay moherep haria akag koꞌi mio tã e Iesui hawyi apo iꞌatuꞌe tope -Pyno apo uruto yt ihapytig i rakaria ewywuat neꞌi ewanetup hawe iꞌatuꞌe. 41Mio tã e akagnia pe -Yt ehepytig i rakaria pote yt eweikuap i yt nakuaria i eipe eweikupteꞌen maꞌato -Pywo yt uruehapytig i rakaria wo urutukupteꞌen eweiꞌe pote taꞌi yne eiminug saꞌag heremo kahato raꞌyn e.
Currently Selected:
Iuwãu 9: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.