Iuwãu 7
7
Haga 7
1Miꞌi hawyi Iesui hewyry raꞌyn yi Karireia puo. Yt hewyry teran i yi Iuteu puo katupono yi Iuteu piaria iꞌauka teran. 2Maꞌato mekewat eꞌat pe tuwat raꞌyn miitꞌin yne tawa kaipyi Ierusarẽi kape yi Iuteu kape tuwat tuwat ienuk hap wato nug hamo. Miꞌi tote teꞌeruweꞌywypyiꞌanug ienuk hamo. 3Miꞌi pote Iesui ywytꞌin sese teꞌeroꞌe tope -Urueykeꞌet iꞌatuꞌe miitꞌin sem tukupteꞌen tawa wato Ierusarẽi me miꞌi pote waku erẽtem no meiũpe pyi yi Karireia pyi hawyi ereto ro yi Iuteu kape iꞌatuꞌe. Miꞌi hawyi itote waku eremoherep epotmuꞌeria kape emisepap koꞌi etunug no itote wuatꞌi ehamo iꞌatuꞌe. 4Yt naku i migꞌi wo neꞌi etunug emisepap koꞌi ahetama hit puo iꞌatuꞌe. Waku poꞌog wuatꞌi ehamo wuatꞌi akasa hamo etimoherep uwe En hap kuap hamo iꞌatuꞌe Iesui ywytꞌin tope. 5Mio tã iꞌatuꞌe iꞌywytꞌin taꞌatuwekyryꞌi hap wo yt imohey i haype. 6Miꞌi hawyi toiꞌatuwesat -Uheꞌywytꞌin e yt naku i mesup areto Ierusarẽi kape e. Mesup yt putꞌok e i te uheꞌat miꞌi tã nug hamo maꞌato waku eweiwat tawa Ierusarẽi kape yne eꞌat pe eimikyꞌesat ewy e. 7Taꞌi miitꞌin yt uwe i ipyꞌahak ehete e maꞌato uhete miitꞌin yt iꞌatuwese i kahato i katupono ahenoi henoi iꞌatuepe iꞌatuminug saꞌag koꞌi e. 8Pyno waku eweiwat ro ienuk hap kape maꞌato Uito yt areto i te yt naku i koran areto uheꞌywytꞌin katupono yt uheꞌat i te pote e toꞌywytꞌin me. 9Mio tã e hawyi topyhuꞌat yi Karireia pe Iesui maꞌato iꞌywytꞌin tuwat ienuk wato hap kape.
10Tuwat yne hawyi meiũran iꞌewyte toto Iesui yt uwe mikuap mo i. 11Miꞌi hawyi itote ienuk haria tikat aat Iesui aikope toineꞌen hap maꞌato yt uwe i ipuẽti. Miꞌi hawyi apo iꞌatuꞌe toꞌope -Aikope som toineꞌen iꞌatuꞌe. 12Miꞌi haype teꞌeruwanetup koꞌi koꞌi kahato tuete. Iraniaꞌin -Yt naku i Iesui iꞌatuꞌe aimaꞌat reran tehay wo iꞌatuꞌe. Iraniaꞌin Iesui waku iꞌatuꞌe. 13Maꞌato -Atimohey uito Iesui yt iꞌatuꞌe i wuatꞌi ehamo katupono iꞌatuꞌakagnia pupi teꞌerokenꞌẽ. 14Ienuk hap posasat pe putꞌok e Iesui tawa Ierusarẽi me. Miꞌi hawyi toto Tupana motypot yat wato kape. Miꞌi tote toiꞌatumuꞌe kahato. 15Miꞌi pote Iuteuria teꞌeruwanetup kahato -Iesui iweꞌeg kahato iꞌatuꞌe. Toikuap kahato miwan yne yne Tupana e hap iꞌatuꞌe. Uwe saĩke imuꞌe woꞌomuꞌe haria mikuap yne koꞌi ete iꞌatuꞌe. 16Mio tã iꞌatuꞌe hawyi Iesui tiꞌatuwesat -Uimienoi yt uiat i maꞌato uipoꞌoro hat kaipyi eimuꞌe hamuat e. 17Ewetunug neran Tupana ehay imikyꞌesat ewy pote ti aru meremo eweikuap taꞌyn uimienoi Tupana kaipywiat hap e. 18Iraniaꞌin aimuꞌe haria taꞌatukyꞌesat kahato -Waku kahato en urumuꞌe hat e hap miitꞌin kaipyi taꞌatukyꞌesat maꞌato yt miꞌi tã i Uito worohoꞌomuꞌe katupono uipoꞌoro hat Tupana motypot hap yn uiwanetup hawe worohoꞌomuꞌe. Tupana motypot teran hat ihay hãpyk kahato rakat yt heso hin i rakat e. Miꞌi hat ewy areineꞌen. 19Saꞌawyꞌi ti ahaꞌaseꞌi Muisei ainapin tomiwan me maꞌato ti yt ewetunug i eipe yt ewetunug i ainapin hap ewy. Miꞌi pote uiꞌauka teran neꞌi eipe e maꞌato waĩ erepotꞌauka teiꞌo e Muisei e Iesui. 20Mio tã e hawyi teꞌeroꞌe -Eso kahato yt uwe i eꞌauka teran hat iꞌatuꞌe. Ahiag ni epiit pe iꞌatuꞌe Iesui pe. 21Maꞌato Iesui tiꞌatuwesat -Haꞌawyte ti atunug wẽtup miit moehãite hap yt aipotpap i hap eꞌat pe pote eiperia eiwanetup kahato eipyꞌahak kahato uhete e. 22Maꞌato eipe iꞌewyte eipotpap mekewat yt aipotpap i hap eꞌat pe e. Pywo ti eimepyt ihainia tuwemoherep hawyi toineꞌen 8 eꞌat hawyi eweiꞌahit sokpe tek taꞌyn yne eꞌat pe ahaꞌaseꞌi Muisei mienoi ewy e. Yt Muisei mienoi yn i maꞌato saꞌawyꞌi te wuaria aiꞌywania mienoi hap kaipyi ewetunug. 23Are paĩ miꞌi pykai ti maꞌato uhete yt eiwese i mekewat eꞌat piat sehãite hap nug uhepiat pote. Yt naku i eipyꞌahak uhete wẽtup ok miit moehãite uhepiat yt aipotpap i hap eꞌat pe pote. Yt naku i watiꞌaparap Muisei miwan ete eweiꞌe e Iesui. 24Eweiꞌywyk kahato eiwanetup hap uhetiat e. Yt iũteꞌen neiꞌo uiwesat eipe e. Waku eiwanetup ti ete miꞌi rakirẽ eweiꞌe hãpyk uhepe uwe Uito hap ete e. En yt naku i yt eweiꞌe teiꞌo uhepe iũteꞌen neꞌi e tewanikaptia pe.
Taꞌatupoꞌoro Raꞌyn Suraraꞌin Iesui Pytyk Hamo
25Miꞌi pote mekewat tawa Ierusarẽi miaria iraniaꞌin teꞌeroꞌe toꞌope -Miꞌi apo mekewat Iesui Iuteuria akag koꞌi miꞌauka teran iꞌatuꞌe. 26Kat poteĩ aiꞌakagnia yt tipyhyp i iꞌatuꞌe. Mio apo taꞌatumohey raꞌyn iꞌatuꞌe Tupana Mipoꞌoro Aiporekuat nuat Iesui iꞌatuꞌe raꞌyn apo mio iꞌatuꞌe. 27Taꞌi yt uwe i raso ikuap aiũwat tawa aiũwat yi kaipywiat tuut hamuat Tupana Mipoꞌoro Aiporekuat nuat hap iꞌatuꞌe maꞌato mekewat Iesui ti watikuap kahato raꞌyn aiũwat tawa pe tuwemotag hap iꞌatuꞌe. 28Miꞌi hawyi Iesui toꞌe haty wo -Uikuap eipe wen maꞌato uikuap hap yt heremo kahato i e. Aikope pywiat Uito hap eweikuap maꞌato yt uiwehay pyi i ti ariot ehewowi. Taꞌi Pywuat hat sese wyti uipoꞌoro ehewowi maꞌato Miꞌi hat uipoꞌoro hat yt eweikuap hin i are e. 29Maꞌato Uito atikuap kahato Uipoꞌoro hat katupono ikaipyi ariot e Iesui tehay pirik wo. 30Mio tã e pote Iuteuria akagnia tipyhik teran naꞌyn maꞌato yt heꞌat i te pote yt taꞌapyhik kuap i te. 31Maꞌato typyꞌi iraniaꞌin teꞌeroꞌe toꞌope -Sio Tupana Mipoꞌoro ahehakyeraꞌat hamuat meiẽ katupono Tupana misepap ewy raꞌyn tutunug mesuwe iꞌatuꞌe. Mio tã taꞌatuꞌe hawyi taꞌatumohey raꞌyn. 32Miꞌi hawyi Tupana mohey haria akag koꞌi iꞌewyte paꞌi kororia tikuap taꞌyn iraniaꞌin miat Iesui ti Tupana Mipoꞌoro e hap. Miꞌi pote taꞌatuꞌatupoꞌoro Tupana motypot esuraraꞌin ipyhik hamo. 33Miꞌi hawyi Iesui toꞌe miitꞌin me -Areineꞌen porapꞌi yn naꞌyn eiwywo katupono areto irane raꞌyn Uipoꞌoro hat kape e. 34Miꞌi hawyi ti aru uikat eipe wen maꞌato ti aru yt uipuẽti i raꞌyn eipe e. Aikowo Uito hap kape yt eweiwat kuap i e Iesui. 35Mio tã e pote teꞌeroꞌe toꞌope -Aikowo irane som pyno toto yt aimikuap mo i. Sio wẽtup ywania tawa koꞌi kape topopy irane iꞌatumuꞌe hamo sio topopy iraniaꞌin ywania etawa piaria aiꞌywania muꞌe hamo iꞌatuꞌe Iuteuria. 36Kat toꞌe hawe som -Uikat wyti aru eipe maꞌato ti aru yt uipuẽti i raꞌyn e iꞌewyte yt eweiwat kuap i aikowo aikowo Uito hap kape e ahepe iꞌatuꞌe. Katupono som mio tã e iꞌatuꞌe toꞌope.
37Miꞌi hawyi ienuk hap heꞌat ikahuro hamo mekewat poꞌog iwato hap eꞌat pe Iesui ipoĩꞌam iꞌatupyꞌasetpe hawyi haty wo toꞌe iꞌatuepe -Uwe uwe teꞌyꞌutui miꞌi haria eweiwat ro uhewowi eiweꞌyꞌu hamo e. 38Pywo pe ti uimohey haria pya piat pe aikotã yꞌy tuwẽtem yresa ewywuat aat kaꞌap teꞌyꞌutui hap monik hamuat. 39Mekewat eꞌat pe yt kat i te Tupana Paꞌãu miitꞌin pya pe. Yt tutum i te pote Iesui taꞌaipok atipy kape hawyi Tupana mimotypot no hawyi toimoꞌẽ Topaꞌãu wakuat tomohey haria torannia pe. 40Miꞌi hawyi itotiaria iraniaꞌin tikuap taꞌyn Iesui e hap eweiwat ro uhewowi e hap hawyi teꞌeroꞌe toꞌope -Pywo pe ti Miꞌi Miit wyti aimiekatup Tupana ehay Moherep hat aimuꞌe hanuat raꞌyn iꞌatuꞌe. 41Maꞌato iraniaꞌin -Miꞌi Miit wyti Tupana Mipoꞌoro Aiporekuat nuat iꞌatuꞌe. Maꞌato iraniaꞌin -Yt wyti iꞌatuꞌe katupono aimiekatup aiporekuat koro wyti aru yt yi Karireia kaipyi i tuut iꞌatuꞌe. 42Taꞌi miwan me ti tohenoi mekewat yne miitꞌin porekuat nuat etiat Tupana Mipoꞌoro ete Morekuat Tawi emiariru aru tawa hit Perẽi miat iꞌywaĩꞌĩ rakat iꞌatuꞌe. Morekuat Tawi etawa piat iꞌywaĩꞌĩ rakat e miwan me iꞌatuꞌe. 43Miꞌi pote iꞌatuwanetup hap uwe sese Iesui hap ete yt toꞌoꞌewy i. Miꞌi pote yt toꞌowese i raꞌyn toꞌope. 44Iraniaꞌin ipyhik teran Iesui maꞌato yt uwe i ipyhik kuap. 45Miꞌi hawyi suraraꞌin teꞌeraꞌaipok i raꞌyn paꞌi kororia kape seko etiat woꞌomuꞌe haria akag koꞌi kape. Miꞌi hawyi teꞌeroꞌe suraraꞌin me -Saꞌawyꞌi uruhoꞌopoꞌoro eipe Iesui sat hamo iꞌatuꞌe kat pote pyno yt eweterut i iꞌatuꞌe. 46Maꞌato suraraꞌin tiꞌatuwesat -Mehinꞌin yt uruipyhyp kuap i iꞌatuꞌe katupono Miꞌi Miit poꞌog ikahu torannia woꞌomuꞌe haria kai ihay se rakat iꞌatuꞌe suraraꞌin. 47-Yt naku i kahato rat. Eipe apo iꞌewyte imohey haria iꞌatuꞌe heso hap ete iꞌatuꞌe suraraꞌin me -Eweimohey ti raꞌyn apo iꞌatuꞌewyte iꞌatuꞌe. 48Yt uwe i uruto Iesui mohey haria iꞌatuꞌe. Taꞌi eiꞌakagnia einapin haria uruto yt wẽtup ok i imohey haria topyhuꞌat iꞌatuꞌe. 49Maꞌato iraniaꞌin aiꞌywania itotiaria yt tiꞌatukuap kahato i Muisei woꞌonapin hap koꞌi miꞌi pote iꞌatupap Miꞌi Miit upi. Maꞌato miꞌiria ti aru teꞌeropyhuꞌat Tupana miꞌapiheg wuaria wo iꞌatuꞌe. 50Miꞌi hawyi maꞌato wẽtup ok iꞌatupyꞌasetpe Nikutemu e hap het rakat saꞌawyꞌi toto Iesui ewowi wãtym muo rakat toꞌe iꞌatuepe. 51-Saꞌawyꞌi mio tã e Tupana miwan me -Yt naku i iũteꞌen eweiꞌapiheg wẽtup ok e. Yt naku i eweiꞌauka wẽtup ok yt iwat ihay kuap mo i te e miwan me aiwoꞌonapin hawe e. Yt naku i eweimohit wẽtup ok yt eweikuap i te turan sio waku sio yt e Nikutemu saꞌawyꞌi wuat wãtym muat Iesui kapiat toto rakat. 52Miꞌi pote Nikutemu pe teꞌeroꞌe -Paĩ iꞌewyte yi saꞌag Karireia piat apo en Iesui ewy iꞌatuꞌe. Pyno erehaꞌat ro miwan me hawyi mono etikuap taꞌyn Tupana ehay Moherep hat yt Karireia kaipyi i tuut hamuat hat iꞌatuꞌe. 53Mio tã teꞌeroꞌe hawyi yne itotiaria waꞌatunug haria tuwat raꞌyn taꞌatuꞌyat koꞌi kape.
Currently Selected:
Iuwãu 7: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.