Iuwãu 14
14
Haga 14
Iesui Timoesaika Raꞌyn Topotmuꞌeria
1Uiwyriaꞌin e Iesui areto irane eipyꞌasetpyi maꞌato yt eiꞌarot reiꞌo eipyꞌa pe eiwanetup hawe e. Eweimohey poꞌog yn o Tupana iꞌewyte uimohey yn o e. 2Pywo pe ti Uiꞌywot etama pe ti tukupteꞌen kahato aiꞌyat sese koꞌi e yt uheso i e. Eiꞌyat koro koꞌi nug hamo areto irane e. Waku pe yne itote eiꞌyat koꞌi hawyi araꞌaipok ehewowi i raꞌyn e. Maꞌato so hap neꞌi pote yt ahenoi i ehepe e. Uimohey ro e Iesui. 3Maꞌato waku yne eiꞌyat koꞌi itote hawyi ti aru ariot i ehewowi e. Miꞌi hawyi ti aru aikope Uito areineꞌen miꞌi hap tote raꞌyn eweikupteꞌen e. Pywo itote uiwywo eweikupteꞌen e. 4Taꞌi koitywy eweikuap taꞌyn muap uheineꞌen hap kapiat areto hamuat hap e. 5Maꞌato ipotmuꞌe Tume tiwesat -Yt uruikuap hin i Uhyt aikowuat ereto hamuat hap e. Pyno aikotã som waku pyno uruikuap epuꞌap Uhyt e. 6Miꞌi hawyi Iesui tiwesat -Uito yn wyti muap uheineꞌen hap kapiat e. Uito yn wyti hãpyk sese rakat miitꞌin mowaku hamuat. Uito yn wyti muap miitꞌin moieineꞌen hat e. Uwe uwe uimohey miꞌi hat yn wyti putꞌok e aru Uiꞌywot kuap hamo e Iesui Tume pe. 7Uikuap haria eipe pote iꞌewyte Uiꞌywot kuap haria eweipyhuꞌat e. Pyno mio uikuap haria eipe miꞌi pote Uiꞌywot kuap haria eipe e. Uiꞌywot kapiat akasa haria eipe e Iesui. 8Mio tã e pote Wiripi toꞌe -Pyno etomoherep to Eꞌywot uruepe Mehin e miꞌi pote ti aru uruikuap uwe Eꞌywot hap e. 9Miꞌi pote Iesui Wiripi wesat -Kat pote yt uikuap i en uiwy Wiripi e katupono areineꞌen motꞌi kahato raꞌyn eipyꞌasetpe maꞌato apo yt uikuap i te en e. Uhewowiat akasa haria wyti Uiꞌywot kapiat akasa haria tukupteꞌen e. Kat pote -Etomoherep to Eꞌywot uruepe ereꞌe e Iesui Wiripi pe. 10Yt etimohey i apo Uiꞌywot eiam sese neꞌi Uito e. Iꞌewyte uheiam neꞌi Uiꞌywot e Uimienoi ehepiat ti yt uiat i maꞌato Uiꞌywot wat ahenoi e. Uiꞌywot yn wyti uipoꞌoro kat koꞌi kat koꞌi nug hamo e. 11Pywo pe ti Uito Uiꞌywot eiam neꞌi e. Iꞌewyte uheiam neꞌi Uiꞌywot maꞌato mio tã uiꞌe hap yt eweimohey i pote waku eweimohey ro uiminug wakuap ehehamuat upi e. 12Taꞌi pywo pe ti areꞌe uwe uwe uimohey hat wyti aru uiminug koꞌi ewy inug e. Uiꞌywot kape areto pykai wyti aru uimohey haria poꞌog iwato inug uiminug koꞌi kai e. 13Itotiat turan kat koꞌi kat koꞌi ewehẽtup uhewowi uhet upi pote atum wyti aru ehepe. Atum wyti aru eimiẽtup koꞌi miꞌi hawyi eiminug hap koꞌi kaipyi Uiꞌywot motypot hamuat hap topyhuꞌat. 14Pyno kat koꞌi kat koꞌi ewehẽtup uhet upi Uiꞌywot motypot hamuat atum wyti aru ehepe e Iesui topotmuꞌeria pe.
Iesui Henoi Raꞌyn Tupana Paꞌãu Putꞌok E Hap Etiat
15Miꞌi hawyi poꞌog tohenoi -Uikyꞌe ehepiat pote ewetunug no einapin uhepiat hap koꞌi e. 16Miꞌi hawyi ahẽtup Uiꞌywot pe hawyi ti aru toipoꞌoro raꞌyn ehepe wẽtup ok einapin wuatꞌi eꞌat piat hanuat. Miꞌi ti aru eiwywo toineꞌen einapin hanuat Uito yt uwe i hawyi e. 17Ahẽtup hawyi Tupana tum aru Topaꞌãu pywuat e. Maꞌato Tupana yt kyꞌesat i haria ti aru yt haꞌat teran i Ipaꞌãu katupono yt heremo i pote yt taꞌatukuap i. Maꞌato eipe ti eweikuap taꞌyn katupono toineꞌen naꞌyn eipyꞌasetpe. Maꞌato miꞌi hawyi ti aru eipyꞌa pe raꞌyn topyhuꞌat aat kaꞌap Tupana Paꞌãu wakuat e. 18Maꞌato Uito iꞌewyte yt worohoꞌoꞌatoiat sese i katupono aipok wo areto e. Araꞌaipok te ti aru ehewowi uimohey haria e. 19Pywo pe ti yt pya i raꞌyn wyti Tupana yt kyꞌesat i haria yt akasa i uhewowiat hamuat e. Maꞌato eipe akasa uhewowiat haria ti aru eweikupteꞌen naꞌyn wuatꞌi eꞌat pe katupono Uito areineꞌen iraꞌyn eiwywo hawyi eiperia worohoꞌomoieineꞌen iraꞌyn wuatꞌi eꞌat pe e. 20Karãpe Tupana Paꞌãu wo ipytꞌat eipiit hawyi ti aru eweikuap taꞌyn Uiꞌywot uheiam neꞌi toineꞌen hap e. Iꞌewyte Uito eheiam wo areineꞌen hap hawyi eiperia uheiam wo neꞌi eweikupteꞌen hap e. 21Iꞌewyte uwe uwe uhepiat tonapin hap koꞌi nug hat wyti aru uikyꞌe sese hat toineꞌen miꞌi miit e. Uikyꞌe hat uhepiat tonapin hap nug hat wyti aru Uiꞌywot mikyꞌe sese topyhuꞌat iꞌewyte uimikyꞌe kahato topyhuꞌat e. 22Miꞌi hawyi ipotmuꞌe Iuta maꞌato wẽtup ok yt Iuta mekewat Ikarioti saꞌyru i toꞌe Iesui pe -Kat pote pyno uruepe yn apo eremoherep En hap Mehin e. Kat pote yt yne miitꞌin me eremoherep teran Uhyt e. 23Mio tã e pote Iesui tiwesat -Iuta pywo pe ti uwe uwe uikyꞌe uwe uwe uhehay nug hat toineꞌen miꞌi hat ti aru Uiꞌywot mikyꞌe wo topyhuꞌat e. Miꞌi hat kape ti aru Uiꞌywot wywo ariot hawyi miꞌi hat pytꞌatnug hamo urutukupteꞌen e. Miꞌi hat topyhuꞌat uruꞌyat ewywuat e. 24Uwe uwe yt uikyꞌe sese i haria yt uhehay nug neran hin i miꞌi haria yt tuwat teran hin i uhepiat taꞌatunapin hap upi yt uikyꞌe sese i pote e Iesui. Uiwyriaꞌin uimienoi ehepiat koꞌi yt uiat uimienoi sese i maꞌato Uiꞌywot Uipoꞌoro hat mienoi sese uhepiat koꞌi e. Iꞌe hap yn ahenoi ehepe e. 25Mio tã are ti eipyꞌasetpe areineꞌen ne turan eimuꞌe hanuat e. 26Maꞌato meiũran ti aru uhaipe kai Maꞌãu Wakuat Tupana tipoꞌoro uhetiat einapin hanuat Miꞌi ti aru putꞌok e ehete hawyi yne eimiwaure uimienoi ehepiat koꞌi ete eimowatetup eiwanetup hãpyk hamo hat topyhuꞌat ehepuo e. 27Uiwyriaꞌin areto raꞌyn eipyꞌasetpyi are wen maꞌato yt eiwanetup koꞌi koꞌi teiꞌo miꞌi hap upi e. Yt eweikenꞌẽ teiꞌo e. Mesup taꞌyn worohoꞌonug Tupana mowepiit hanuaria e. Worohoꞌomowepiit kahato aru eiperia maꞌato yt mesuwat rotiat woꞌomowepiit hap ewy i katupono eimowepiit hap wyti aru eipyꞌa piat toineꞌen e. 28Areto irane eipyꞌasetpyi uhemiitꞌin maꞌato miꞌi hawyi ti aru ariot rẽ ehewowi iraꞌyn e. Yt paa eweiꞌe teiꞌo maꞌato waku eiwemowepiit areto hap ete katupono areto aru Uiꞌywot kape. Miꞌi ti poꞌog uikai toineꞌen e. 29Areto aru Uiꞌywot kape maꞌato aru hawyi araꞌaipok te ehewowi e. Miꞌi e hap ahenoi ehepe yian me te katupono ti aru karãpe topyhuꞌat uiꞌe hap ewywuat miꞌi eꞌat pe ti aru poꞌog naꞌyn uimohey eipe katupono atunug yne yne uiꞌe hap ewywuat pote e. 30Koran te ti yt worohoꞌomuꞌe kuap i kahato eipe saꞌawyꞌi wuat eimuꞌe hap oktan katupono ti yt naku i nug haria potypot putꞌok e irane mesuwe uipyhyp teran haype maꞌato yt uipyhyp kuap i e. Pywo pe ti miꞌi esaika hap yt putꞌok e hin i uhesaika hap kai e. 31Koitywy ti aru wuatꞌi miitꞌin naꞌyn ikuap kahato uhepiat Uiꞌywot kyꞌe kahato hap e. Iꞌewyte Uiꞌywot mikyꞌesat yn nug hat Uito hap taꞌatukuap e. Uiꞌywot mienoi koꞌi yne yne nug hat areineꞌen hap taꞌatukuap aru e. Mio tã tohenoi yne hawyi -Pyno waku raꞌyn are toꞌiro pyno meiũpepyi uipotmuꞌeria e Iesui topotmuꞌeria pe.
Currently Selected:
Iuwãu 14: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.