Iuwãu 11
11
Haga 11
Irasaru Iesui Timohymut Raꞌyn Guꞌuro Hap Kaipyi
1Miꞌi hawyi Iesui mikyꞌe kahato Irasaru e hap het rakat iꞌahuu kahato topyhuꞌat tawa hit Petania pe. Miꞌi ti toineꞌen itote toinytꞌin Mata iꞌewyte Maria wywo. 2Mekewat Maria ti Iesui py koꞌi pen mohag hy hekat rakat wuat hat hawyi toimogag ipy koꞌi toꞌasap wywo rakat. Miꞌi Maria kywyt ti iꞌahuu kahato toineꞌen. 3Miꞌi hawyi mana Mata iꞌewyte mana Maria teꞌeruwehaypoꞌoro Iesui kape -Mimi iꞌatuꞌe urukywyt emikyꞌe kahato wyti iꞌahuu kahato teꞌerehay poꞌoro. 4Iesui tikuap taꞌyn iꞌatuwehaypoꞌoro hap hawyi toꞌe topotmuꞌeria pe -Aiwy Irasaru wyti iꞌahuu kahato paĩ e maꞌato yt ikuꞌuro hamuat i e. Taꞌi iꞌahuu ti wen maꞌato meiũran Tupana motypot hap topyhuꞌat irane e. 5Iesui tiꞌatukyꞌe kahato ti Mata iꞌewyte Maria iꞌewyte Irasaru. 6Iesui miꞌatukyꞌeria kahato ti miꞌiria maꞌato ti yt toto i iꞌahuu turan. Typy eꞌat yt toto i. 7Typy eꞌat tokosap hawyi toꞌe temiitꞌin me -Pyno toꞌiro tawa Petania yi Iuteu piat kape e. 8Miꞌi pote iwyriaꞌin tiwesat -Urumuꞌe hat yt naku i ereto tama Iuteu kape katupono gaꞌatpo porap eꞌauka nu wo itote iꞌatuꞌe. 9Miꞌi pote Iesui tiꞌatuwesat -Pyno apo yt aat posake i te e. Pyno uwe ihatꞌok puo hewyry rakat ipy aipytek hap yt kat i. Katupono heineꞌen ne turan aimoẽtyhot hap mesuwat rotiat toineꞌen e. 10Maꞌato wãtym naꞌyn hawyi iꞌypyryp taꞌyn hawyi miitꞌin taꞌat kuap muap yt heremo i pote. Katupono wãtym turan yt kat i aimoẽtyhot hap e. 11Mio tã tohenoi hawyi toꞌe topotmuꞌeria pe -Uiwyriaꞌin e aiwy Irasaru ti toket raꞌyn miꞌi pote areto raꞌyn mesup ihymut hamo e. 12-Mehin iꞌatuꞌe waku ti iꞌahuu pote mohag iket hamo iꞌatuꞌe. Tuwemohy hawyi ti aru meiũran waku i raꞌyn tuete iꞌatuꞌe. 13Katupono iwyriaꞌin teꞌeruwanetup iket hap kape yn yt taꞌatukuap i ikuꞌuro sese e hap ete ihay. 14Miꞌi hawyi ti tohenoi raꞌyn -Uiwyriaꞌin e aiwy Irasaru ti ikuꞌuro sese raꞌyn e. 15Miꞌi pote toꞌiro ikuꞌuro hap kape e. Iꞌahuu turan yt areto teran i hewowi e. Poꞌog waku areto mesup ikuꞌuro sese rakat toineꞌen turan katupono uiminug kape eweiꞌakasa aru hawyi poꞌog poꞌog uimohey eipe e. Pyno toꞌiro watuwat e. 16Miꞌi hawyi toꞌe wẽtup ok hemiit ipat rakat Tume e hap -Pyno waku watuwat iwywo e. Waku aikuꞌuro iwywo e iraniaꞌin Iesui potmuꞌeria pe. 17Miꞌi hawyi tuwat raꞌyn. Putꞌok iꞌatuꞌe itote hawyi taꞌatuhenoi raꞌyn Iesui pe -Ikuꞌuro raꞌyn Irasaru iꞌatuꞌe. Gaꞌatpo 4 eꞌat raꞌyn uruisyp taꞌyn iꞌatuꞌe. 18Pyno tawa hit Petania yt pya hin i toineꞌen tawa wato Ierusarẽi kai aikotã aiko kapiat pya hap ewy toineꞌen. 19Miꞌi pote tõꞌẽ tawa Ierusarẽi ikaipyi Iuteuria mana Maria mana Mataꞌin moesaika hamo mowepiit hamo. 20Mana Mata tikuap taꞌyn Iesui uut hap hawyi toto meremo raꞌyn howa kape maꞌato mana Maria yt toto i maꞌato toꞌyat pe topyhuꞌat rẽ. 21Miꞌi hawyi toꞌopuẽti Iesui wywo hawyi toꞌe Iesui pe -Mimi e ikuꞌuro raꞌyn aiwy urukywyt e. Yt naku i katupono meiũpe ereineꞌen pote teneke urukywyt yt ikuꞌuro hin i Mimi e. 22Maꞌato atikuap ti kat ere ehẽtup kat ere ehẽtup Tupana kape miꞌi pote tutum merep emiẽtup oktan hap e Mata. 23-Pywo mana ekywyt Irasaru toineꞌen hamuat i raꞌyn e. 24-Pywo an Mimi atikuap miꞌi e. Atikuap aikotã aikuꞌuro hawyi aheineꞌen i hap toineꞌen ne hamuat hap e. Atikuap uikywyt ti aru tuwẽtem ne tokuꞌuro hap pyi mekewat ikahuro hap eꞌat pe tuwehymut rẽ hamuat. 25-Mana e Uito ti meiũ ikuꞌuro rakaria moieineꞌen hat sese e. Uwe uwe ikuꞌuro uimohey hatno turan miꞌi miit meiũran aru toineꞌen i raꞌyn wuatꞌi eꞌat pe. 26Iꞌewyte uwe uwe uimohey hatno topyhuꞌat toineꞌen ne hap turan miꞌi miit yt karãpe i ikuꞌuro sese hamuat aru maꞌato topyhuꞌat wuatꞌi eꞌat pe e. Mana e etimohey apo mio tã uiꞌe hap e. 27-Pywo ti an Mimi woromohey kahato e. En ni uruporekuat nuat Tupana Mipoꞌoro urumiekatup e woromohey kahato e. En ni Tupana Saꞌyru sese Mimi e. 28Mio tã e mana Mata hawyi taꞌaipok i raꞌyn toꞌyat kape. Miꞌi hawyi toikay kay tokypyꞌyt Maria iweran turan tohenoi hamo -Tuut raꞌyn ti Aimuꞌe hat e. Miꞌi ti ekay kay raꞌyn Maria e. 29Maria tikuap taꞌyn Iesui uut hap hawyi meremo ipoĩꞌam hawyi toto raꞌyn Iesui kape. 30Miꞌi turan Iesui yt putꞌok e i te tawa Petania pe maꞌato toineꞌen muap tote aiũpe Mata piat topuẽti hap tote. 31Miꞌi hawyi Iuteu ywania Mariaꞌin mowepiit hanuaria toꞌyat pywiat Maria toto meremo hap kape teꞌerahaꞌat hawyi -Pyno toto raꞌyn tokywyt Irasaru syp hap kape iꞌatuꞌe. Toto raꞌyn tuwak hamo iꞌatuꞌe teꞌeruwanetup hawe. Miꞌi pote tuwat hewatꞌypmo. 32Miꞌi hawyi putꞌok e Maria Iesui etiat hawyi tuwepỹꞌãtutuk hewowi hawyi toꞌe -Uikaꞌiwat meiũpe ereineꞌen pote teneke yt ikuꞌuro i uikywyt Mimi e. 33Iesui taꞌakasa Maria wak towyriaꞌin wywuat hap kape hawyi tohatyꞌu kahato topyꞌa pe. 34-Aikopeĩ ewetopag ewehyp aiwy e. -Urukaꞌiwat iꞌatuꞌe toꞌiro pyno uruimoherep epe aikope uruihyp aiwy Irasaru piit hap iꞌatuꞌe. 35Miꞌi hawyi Iesui tuwak taꞌyn. 36-Tuwak taꞌyn Iesui iꞌatuꞌe. Koitywy watikuap taꞌyn Irasaru kyꞌe kahato Iesui piat hap iꞌatuꞌe toꞌope Iuteuria. 37Maꞌato iraniaꞌin teꞌeroꞌe -Toikyꞌe pote kat pote yt tuut i gaꞌatpo imoehãite hamo iꞌatuꞌe. Toimoehãite kuap kahato iꞌahuu rakaria yt ihapytig i rakaria kat poteĩ pyno yt tuut i Irasaru moehãite hamo ikuꞌuro hap eꞌyian me te iꞌatuꞌe. 38Miꞌi hawyi tohatyꞌu kahato hap wywo putꞌok e aikope towy Irasaru taꞌatupag nu kaꞌa pe hap kape. Mekewat yi py hotꞌi piat nu kaꞌa pe taꞌatusyp Irasaru hawyi taꞌatuꞌokenhyp nu wato wo. 39Miꞌi hawyi Iesui toꞌe -Ewehoꞌokenhypꞌok to aiwy Irasaru e. Maꞌato inyt Mata toꞌe -Yt reiꞌo Mimi katupono nem naꞌyn ti som urukywyt kat pote 4 eꞌat raꞌyn mekepe topyhuꞌat. Iꞌokpuk taꞌyn e. Yt naku i wahoꞌokenhypꞌok mesup e. 40Maꞌato Iesui toꞌe -Mana Mata etiwaure raꞌyn apo muap upiat uiꞌe hap epiat e. Uimohey pote ti aru eraꞌakasa Tupana ẽtyhot hap iminug wakuap sese mesup areꞌe hap. 41Mio tã e hawyi taꞌatueroꞌok taꞌyn nu kawiat heꞌokenhyp hap. Miꞌi hawyi Iesui tehaꞌat atipy kape. 42Miꞌi hawyi toꞌe -Uiꞌywot e atikuap taꞌyn yne uimiẽtup ewowiat etikuap hap e. Meiũ ti mesuwat uhehay ewywo iꞌatuehamo. Miꞌi hawyi atikyꞌesat mesuwaria wehaꞌat haria tikuap hawyi taꞌatumohey Uito uipoꞌoro hat En hap hamo e. 43Miꞌi hawyi Iesui toꞌe tehay pirik wo -Irasaru erẽtem no e. 44Mio tã e pote tuwẽtem meremo guꞌuro pyi Irasaru nu kaꞌa pyi topoꞌi poꞌi hap tesokpe wywo topiit etiat topo etiat topy etiat toꞌakag etiat tosuwy hap sokpe wywo tuwẽtem. Miꞌi hawyi Iesui toꞌe -Eweipoꞌi poꞌi hap porap to hewyry mono e. Miꞌi hawyi Irasaru toineꞌen i itote waku pe ipiit tuwẽtem naꞌyn guꞌuro pyi.
45Miꞌi hawyi iraniaꞌin Mariaꞌin kapiat wat haria teꞌeraꞌakasa raꞌyn wakuap nug Iesui piat hap hawyi taꞌatumohey raꞌyn Iesui. 46Maꞌato iraniaꞌin akasa haria Iesui ewanikap koꞌi tuwat meremo raꞌyn Iuteu akag koꞌi piat henoi hamo aikotã Iesui timoieineꞌen ikuꞌuro sese rakat hap enoi hamo. 47Taꞌatukuap hawyi paꞌi watoria iꞌatuꞌakag koꞌi meremo teꞌeruwaꞌatunug naꞌyn aikotã hap kuap hamo. Miꞌi hawyi teꞌeroꞌe toꞌope -Aikotã som waku watunug iꞌatuꞌe katupono yt miit misepapnug kuap hap ewy i Iesui tunug wakuap wuatꞌi ehamo iꞌatuꞌe. 48-Yt kat i watunug pote ti aru yt watipyhyp i pote miitꞌin typyꞌi kahato rakaria Iesui mohey haria wo raꞌyn tukupteꞌen mesuwe iꞌatuꞌe. Miꞌi pote ti aru aiporekuaria Humanu ywania iꞌatupyꞌahak kahato tukupteꞌen wẽtup ok neꞌi raꞌyn watunug aiꞌywania Porekuatno iꞌatuwanetup hawe. Miꞌi pote ti aru taꞌatupoꞌoro raꞌyn taꞌatuesuraraꞌin aimoma hamo aheTupana yat pugha hamo iꞌatuꞌe toꞌope. Miꞌi hawyi aru ahetawa ikahu rakat taꞌatupugha yne raꞌyn e. Aiꞌywania taꞌatuꞌatuuka yne raꞌyn iꞌatuꞌe. 49Toineꞌen mekewat eꞌat pe wẽtup ok paꞌi wato sese iꞌatupyꞌasetpe Paꞌi Kaꞌiwasi e hap. Miꞌi toꞌe -Yt kat i eweikuap apo e. 50-Uiwyriaꞌin e yt eweikuap i apo aikotã poꞌog waku wẽtup ok miitꞌin ikuꞌuro ahetiatno sio watopap yne sio taꞌatumoma yne aiꞌywania e. 51Paꞌi Kaꞌiwasi toineꞌen paꞌi wato sese mekewat eꞌanu pe itote. Miꞌi ti iwẽ pyi Tupana ihay toikuap i pykai. Iwẽ pyi Tupana henoi Iesui ikuꞌuro Iuteu ywania etiatno hap ete. 52Taꞌi maꞌato ti yt Iuteuria yn etiatno i ikuꞌuro maꞌato iꞌewyte torannia ywania ehakyeraꞌat hamo wyti ikuꞌuro. Miꞌi hawyi tutunug yne ywania kaipywiat tomepytꞌin no. 53Miꞌi hawyi mekewat eꞌat pe nagnia teꞌeruwanetup aat aikotã waku Iesui auka hamo.
54Miꞌi hawyi Iesui yt hewyry i raꞌyn tama Iuteu pe maꞌato wẽtup yi kape toto towyriaꞌin wywo mekewat yahig Ewarĩ e hap upi pya Iuteu ywania kai hewyry.
55Meiũran putꞌok e i tawa Ierusarẽi miat Iuteuria enuk koro hap eꞌat pe. Miꞌi turan tuwat kahato miitꞌin tawa Ierusarẽi kape waku pe yne nug hamuat mekewat ienuk hap eꞌat koro owakai te hamo tuwat aikotã taꞌatueko ewy teꞌeruwei teꞌeruwepitpitꞌok hap ewy ienuk hap owakai te. 56Miꞌi turan tawa Ierusarẽi miaria tikat kahato Iesui itote aikope toineꞌen hap. Putꞌok iꞌatuꞌe Tupana motypot hap yat iwato rakat pe hawyi teꞌeroꞌe toꞌope -Tuut apo Iesui iꞌatuꞌe sio yt iꞌatuꞌe. 57Miꞌi hawyi paꞌi koro koꞌi iꞌewyte Tupana motypot yat akag koꞌi teꞌeroꞌe iraniaꞌin me -Eweikuap Iesui aikope toineꞌen hap pote ewehenoi o uruepe iꞌatuꞌe katupono taꞌatupytyk teran ipyhik hamo taꞌatuꞌauka teran haype.
Currently Selected:
Iuwãu 11: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.