YouVersion Logo
Search Icon

Iuwãu 4

4
Haga 4
1Miꞌi hawyi nagnia ehay enoi haria Wariseuria koꞌi tikuap taꞌyn Iesui potmuꞌeria poꞌog miitꞌin setꞌok haria wo Iuwãu kai. 2Iesui tiꞌatusetꞌok kahato miitꞌin topotmuꞌeria po wo kat pote Iesui yt topotsetꞌok i topo wo. Miꞌi pote poꞌog Iuwãu potmuꞌeria kai taꞌatusetꞌok iꞌatuꞌe nagnia ehay enoi haria. 3Mio tã iꞌatuꞌe hawyi Iesui toto raꞌyn Iuteu eꞌyi pyi hawyi taꞌaipok yi Karireia kape iraꞌyn.
Iesui Ihay Haryporia Wywo Tawa Samaria Ieineꞌen Hat
4Miꞌi hawyi maꞌato Iesui yt toto i muap hãpyk puat upi teꞌyi Karireia kape katupono tokosap teran yi Samaria puo. 5Miꞌi hawyi toto tawa Sikat kape yi Samaria puo. Itote nimo ahaꞌaseꞌi Iako toineꞌen. Saꞌawyꞌi itote teꞌyi tutum tosaꞌyru Iuse pe. Miꞌi tote ti aseꞌi tunug yꞌy yi pan me. Miꞌi tote yꞌy yi pan me topyhuꞌat. 6Mekewat yꞌy pan hap aseꞌi Iako minug pote topyhuꞌat iwat het puo. Miꞌi hawyi Iesui atposake turan tuwemohy raꞌyn muap hake topysero raꞌyn pote. Miꞌi hawyi taꞌapyk yꞌy kaꞌa ẽpeke. 7Miꞌi turan putꞌok e wẽtup haryporia tawa Samaria kaipywiat suut hat yꞌy sat hamo. Miꞌi hawyi Iesui apo e haryporia pe -Areꞌyꞌu teran e. Ehoꞌoium kuap apo uhepe e. 8Iesui tuweran toineꞌen itote katupono ipotmuꞌeria tuwat tawa Sikat kape miꞌu soꞌokyiꞌat hamo. 9Miꞌi pote toiwesat -En ni Iuteu ywania maꞌato uito ti Samaria ywania neꞌi e. Kat poteĩ ehay uiwywo mimi yt eheko ewy i. Kat pote uipo pyi etikyꞌesat yꞌy katupono Iuteuria ywania yt toꞌoehay teran i yi Samaria ywania wywo e. 10Miꞌi hawyi toiwesat -Yt etikuap i kahato mana uwe yꞌy ẽtup epe e. Yt etikuap i kahato kat som Tupana tum neran epe mana e. Etikuap pote ten meremo ehẽtup uhepe yꞌy sese woꞌomoieineꞌen hap emoieineꞌen wuatꞌi eꞌat piat hamuat e. 11Mio tã e hawyi toiwesat -Yt kat i kahu ekuiruꞌa saity etiat yꞌy sat hamuat e katupono meiũwat pyi pya poityꞌi yi pe yꞌy e. Aikotã aru pyno etum uhepe yꞌy uimoieineꞌen hamuat e. 12Nimo kahato urueꞌaseꞌi Iako ti hum uruepe mesuwat yi kaꞌa piat yꞌy sat hap e. Saꞌawyꞌi ti Iako mepytꞌin teꞌeruweꞌyꞌu mesuwat yi kaꞌa piat yꞌy wo. Iꞌewyte iwat ihũria teꞌereꞌyꞌu meiũpe iꞌewyte urueꞌaseꞌi Iako teꞌyꞌu meiũpe mimi e. En apo pyno poꞌog wakuat yꞌy moherep hat urueꞌaseꞌi Iako kai mimi e. 13Mio tã e hawyi toiwesat -Uwe uwe teꞌyꞌu meiũwat pe meiũran teꞌyꞌutui i raꞌyn e.
14Maꞌato uwe uwe mekewat uimiium yꞌy wo teꞌereꞌyꞌu miꞌi haria ti aru yt karamuo i raꞌyn teꞌereꞌyꞌutui e katupono uimiium yꞌy toineꞌen emoieineꞌen hamuat wuatꞌi eꞌat piat ihãite rakat raꞌyn. Uimiium yꞌy yresa sese ewy raꞌyn tuwẽtem yꞌy epyꞌa pyi mana e. 15-Pyno mimi etum no uhepe ewat eꞌy e. Miꞌi rakirẽ mono yt karamuo i raꞌyn areꞌyꞌutui hawyi yt karamuo i raꞌyn ariot meiũpe yꞌy soꞌosat hamo e. 16Miꞌi pote toꞌe tope -Pyno ereto ro eꞌaito kape hawyi eterut uhewowi mana e. 17-U an mimi yt uheꞌaito i e. Mio tã e neꞌi toiwesat pote toꞌe -Pywo pe ti mio tã ere mana katupono yt eꞌaito kahato i. 18Mio ti wẽtup ok ihainia wywo ereineꞌen pykai miꞌi ti yt eꞌaito i e. Haꞌawyte ti eꞌaito wo 5 ok wẽtup ok wẽtup ok tuereto wo miꞌiria etiꞌatuꞌatoiat yne. Mio tã e Iesui tomoherep haryporia pe yt iweꞌeg i hap kuap haype. 19Miꞌi pote toiwesat -Are an atikuap taꞌyn mimi En ni Tupana kaipywiat moherep hat e. 20Saꞌawyꞌi uruꞌywotꞌin tomotypot Tupana mesuwat yityꞌok tote pyi Mimi maꞌato eiperia Iuteuria tawa Ierusarẽi me yn waku watomotypot Tupana e haria e. 21Miꞌi hawyi toꞌe -Etimohey ro uiꞌe hap mana e. Meiũran ti aru yt eweiwat i raꞌyn meiũwat yityꞌok kape. Iꞌewyte yt uwe i tuwat aru Tupana motypot hamo tawa Ierusarẽi kape e. 22Eiꞌywania yt ikuap i kahato Tupana motypot hap are. Uwe Tupana sese hap yt eweikuap hin i are. Maꞌato uruto uruikuap kahato Tupana katupono Iuteuria ywania kaipyi tuut raꞌyn miitꞌin ehakyeraꞌat hat e. 23Mesup ti aru tuut raꞌyn Tupana motypot hap yt mesuwat ewywuat i raꞌyn maꞌato Tupana motypot haria sese taꞌatupyꞌa pywiat taꞌatuwanetup hap kaipywiat raꞌyn imotypot hãpyk kahato haria raꞌyn tukupteꞌen Tupana mikyꞌesat ewy e. 24Tupana toineꞌen Ipaꞌãu yn yt heremo i miꞌi tupono toikyꞌesat miitꞌin miat tomotypot hap yt heremo i taꞌatupyꞌa piat kaipyi tomotypot hap. Aiwanetup we yn pywo sese e hap kaipywiat aipyꞌa pywiat mio toikyꞌesat tomotypot hap mana e. 25-Pywo Mimi atikuap taꞌyn meiũran ti aru Tupana tipoꞌoro temiit Aiporekuat nuat aimuꞌe yne hamuat mekewat Wuatꞌi Miitꞌin Porekuat e hap het rakat. Miꞌi ti yne etiat aimuꞌe hanuat e. 26-Yt meiũran i raꞌyn ti aru mana katupono tuut kahu raꞌyn. Uito raꞌyn meiũ mekewat emiekatup e haryporia pe. 27Miꞌi turan ipotmuꞌeria putꞌok iꞌatuꞌe raꞌyn miꞌu kyiꞌat hawyi. Miꞌi turan teꞌeraꞌakasa Iesui ihay haryporia wywo. Miꞌi hawyi teꞌeruwanetup kahato -Kat poteĩ Iesui ihay haryporia wywo iꞌatuꞌe. Kat hamo ihay haryporia wywo. Kat som toikyꞌesat ikaipyi hap ete apo iꞌatuꞌe teran wen maꞌato yt apo iꞌatuꞌe kuap i. 28Miꞌi hawyi mana toiat tekuiruꞌa mekewat yꞌy sat hap itote hawyi toto meremo tetawa Sikat kape. 29Putꞌok toꞌe hawyi toꞌe itotiaria pe -Toꞌiro worohoꞌomoꞌakasa wẽtup ok miit iuẽpiat kape yne uiminug hap koꞌi toimoherep yne uhepe yt uwe piat i henoi pykai e. Tupana Mipoꞌoro Aiporekuat nuat apo Miꞌi Miit e iꞌatuepe. 30Miꞌi hawyi tuwat tuwat haryporia upi tawa pyi teꞌeraꞌakasa Iesui kapiat hamo. 31Miꞌi turan Iesui emiitꞌin teꞌeroꞌe Iesui pe -Urumuꞌe hat waku raꞌyn aimiꞌu. Erenuk to iꞌatuꞌe. 32Maꞌato toiꞌatuwesat -Waku raꞌyn e uiꞌok taꞌyn e. Toĩ uimiꞌu yt eimikuap i e. 33Miꞌi pote toꞌope apo iꞌatuꞌe -Toĩ apo wẽtup ok imiꞌu erut hat meiko pe tawa pe ahewyry turan iꞌatuꞌe. 34Miꞌi pote Iesui toꞌe. -Uiwyriaꞌin e aikotã miꞌu wo aiꞌok hawyi aimowepiit kahato miꞌi hap ewy uipoꞌoro hat mikyꞌesat nug uhepiat hap uimowepiit kahato atuꞌu hawyi e. 35Uiwyriaꞌin mio tã eweiꞌe eiwoꞌope. Meiũran 4 ewaty hawyi ti aru aimikoi waku raꞌyn haat raꞌyn eweiꞌe eiwoꞌope e. Uito ti maꞌato areꞌe ehepe eweiꞌakasa ro eiꞌapypueri wo katupono aiko waku raꞌyn haat raꞌyn ewehoꞌohep hamo e. 36Mio ti haat raꞌyn waku raꞌyn eweiterek to are raꞌyn ehepe e. Ewehoꞌohep to miitꞌin wuatꞌi eꞌat piat ieineꞌen hanuaria wo e. Wẽtup ok ikoi hat wẽtup ok iterek hat e. Miꞌiria toꞌoꞌewy iꞌatuwepiit kahato taꞌatuminug hap koꞌi ete. Miꞌi hawyi uwe ipotpap ikoi hap ete uwe ipotpap iterek hap ete. Miꞌiria toꞌoꞌewywuat saꞌup taꞌatupuẽti e. 37Pywo wẽtup ok hãꞌỹi koi hat topyhuꞌat hawyi wẽtup ok iterek hat topyhuꞌat. 38Miꞌi tã worohoꞌopoꞌoro mikoi terek hamo raꞌyn aikope haꞌawytewuaria eiꞌyian miaria ikoi hap kape hap ewy worohoꞌopoꞌoro e. Aikope Tupana ehay moherep haria iꞌatupotpap saꞌawyꞌi hap kape worohoꞌopoꞌoro e. Miꞌi hawyi iraniaꞌin piat ikoi haria potpap hap kaipyi eiweterek wyti aru e. Taꞌi haat raꞌyn wyti ikoi hawuo mio uipotmuꞌeria e.
39Miꞌi toꞌe turan tõꞌẽ kahato hewowi typyꞌi raꞌyn yi Samaria piaria Iesui mohey haria wo teꞌeropyhuꞌat mekewat haryporia ehay upi. -Miꞌi ti yne uiminug moherep yt uwe piat i henoi pykai e hap upi. 40Putꞌok taꞌatuꞌe hawyi teꞌeroꞌe Iesui pe -Waku ereineꞌen uruetawa pe mehin iꞌatuꞌe. Mio tã iꞌatuꞌe pote ti typy eꞌat toineꞌen iꞌatuetawa pe. 41Miꞌi hawyi toiꞌatumuꞌe raꞌyn itotiaria. Miꞌi hawyi itotiaria typyꞌi raꞌyn Iesui mohey haria wo teꞌeropyhuꞌat. 42Miꞌi hawyi teꞌeroꞌe -Mana iꞌatuꞌe saꞌawyꞌi ti ehenoi uruepe hawyi uruimohey raꞌyn maꞌato koitywy imienoi hap kaipyi uruimohey raꞌyn iꞌatuꞌe. Pywo Miꞌi ti mesuwat yi totiat woꞌoehakyeraꞌat hat urutoꞌe.
43Toineꞌen Iesui yi Samaria pe typy eꞌat hawyi toto raꞌyn tomotag hap yi Karireia kape. 44Muap upi Iesui toꞌe topotmuꞌeria pe -Araꞌaipok hamuat uimotag hap kape tawa Nasare kape e. Pywo pe areꞌe ehepe Tupana ehay moherep hat wyti imotag haria yt timotypot i yt taꞌatumohey i e. 45Maꞌato putꞌok e Iesui yi Karireia pe hawyi itotiaria iꞌatuwese tuete kat pote teꞌeraꞌakasa raꞌyn imisepap koꞌi tuwat hupiat tawa Ierusarẽi kapiat hawyi ienuk hap koro eꞌat pe. 46Miꞌi hawyi Iesui toto tawa Kana kape yi Karireia piat aikope Uwa hy nug yꞌy kawiat hap kape toto. Yt pya i tawa Kana kai toineꞌen wẽtup tawa Kawanaum e hap. Itotiat tawa porekuat saꞌyru hit ti iꞌahuu kahato toineꞌen. 47Karãpe iꞌywot tikuap taꞌyn Iesui putꞌok e tawa Kana pe hap miꞌi hawyi toto meremo hẽtup hamo -Uhaꞌyru moehãite epiat hap ti atikyꞌesat kahato e. Iꞌahuu kahato ikuꞌuro hamuat uhaꞌyru uhyt e. Miꞌi pote moreroto teran uhetawa Kawanaum kape imoehãite hamo e. 48Miꞌi pote Iesui tiwesat -Are paĩ yt eweiꞌakasa i uiminug wakuap koꞌi kapiat pote rasom yt uimohey hin i eipe e. 49Maꞌato iꞌahuu rakat ywot toꞌe -Merep to mehin. Ikuꞌuro irane uhaꞌyru e. 50Maꞌato Iesui tiwesat -Yt ikuꞌuro i esaꞌyru uhyt. Ihãite raꞌyn emepyt e. Pyno eraꞌaipok i ro eꞌyat kape katupono waku raꞌyn e Iesui. Miꞌi hawyi imohey hap wywo toto tosaꞌyru kape. 51Miꞌi hawyi muap tote hemiitꞌin tõꞌẽ hewowi -Urukaꞌiwat iꞌatuꞌe ihãite raꞌyn ti esaꞌyru uhyt iꞌatuꞌe. 52Miꞌi hawyi apo e -Kat eꞌat kahu uhaꞌyru ihãite e. -Gaꞌatpo atposake pyi ti ipiit sakup nik tokosap taꞌyn meremo ihãite raꞌyn iꞌatuꞌe. 53Miꞌi hawyi iwatetup taꞌyn Iesui atposake pyi toꞌe hap kape -Ihãite i raꞌyn ti esaꞌyru e hap kape. Miꞌi hawyi iꞌywot timohey raꞌyn Iesui. Torannia raꞌyn itotiaria imohey iꞌyat piaria taꞌatukuap hawyi. 54Miꞌi tomisepap tutunug naꞌyn yi Karireia pe taꞌaipok yi Iuteu kaipywiat hawyi. Typua raꞌyn wakuap tutunug iwato rakat tomisepap yi Karireia piaria ete. Saꞌawyꞌi tutunug sapo hy yꞌy kawiat. Miꞌi hawyi toimoehãite pya pyi haꞌyru ikuꞌuro irane rakat.

Currently Selected:

Iuwãu 4: mav

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy