Iuwãu 19
19
Haga 19
1Miꞌi hawyi Piratu toꞌe tesuraraꞌin me -Pyno eweipok pok to haty wo meiũwat Miit Iesui haity hehu rakat wo e. 2Miꞌi hawyi suraraꞌin timokoꞌi Iesui. Miꞌi hawyi wẽtup ok tipiꞌig morekuat akag sokpe ewywuat maꞌato hehu rakat morekuat painug hap ewywuat. Miꞌi taꞌatupag sapeu hehu rakat iꞌakytꞌape haty wo. Miꞌi hawyi morekuat esokpe hupꞌi ewywuat taꞌatupag ipiit pe. 3Miꞌi tã hap ewy taꞌatunug taꞌatumikyryꞌi hap -Wakuat Iuteu ywania porekuat iꞌatuꞌe taꞌatuehay mikyryꞌi wo haype. Miꞌi hawyi taꞌatuꞌahyk ahyk Iesui taꞌatupo wo haty wo hewa ete. 4Miꞌi hawyi Piratu tuwẽtem tioto toꞌyat pyi ipainug sokpe hupi wuat rẽ mekewat amãtap hehu rakat wywo hawyi -Ewehehaꞌat ro Miꞌi Miit kape e. Pywo ti rat yt kat i iminug saꞌag atipuẽti e. Yt kat i i. 5Miꞌi hawyi Iesui tuwemoherep itote morekuat esokpe hupꞌi topiit piat puo iꞌewyte hehu rakat ipainug hap iꞌakag me hap wywo tuwemoherep iꞌatupyꞌasetpe. Miꞌi hawyi Piratu toꞌe -Ewehehaꞌat ro meiũwat Miit kape e. 6Teꞌerahaꞌat hawyi teꞌeroꞌe haty wo -Waĩ ne iꞌatuꞌe etiꞌauka ro etiꞌauka ro ariaꞌyp posak ete iꞌatuꞌe paꞌi kororia taꞌatuesuraraꞌin akag koꞌi wywo Piratu pe. Maꞌato Piratu tiꞌatuwesat -Eipo pe raꞌyn atopag koitywy iꞌauka ehepiat hamo e katupono uiwanetup hawe yt kat pe i ti toiꞌaparap iꞌauka hamo atipuẽti uito are e. Pyno eweiꞌauka teran pote eweiꞌauka ro ariaꞌyp posak ete e maꞌato uito yt sake i atunug neran miꞌi tã e Piratu. 7Miꞌi hawyi Iuteu akag koꞌi tiwesat -Maꞌato uruwat urunapin hap ete ti toineꞌen kahato meiẽwat miit iꞌaparap hap iꞌatuꞌe katupono tuwenoi Tupana Saꞌyru Uito e. Miꞌi pote etipoꞌoro ro esuraraꞌin iꞌauka hamo iꞌatuꞌe. 8Karapeĩ morekuat Piratu tikuap taꞌyn Iesui e hap Uito Tupana Saꞌyru e hap hawyi tokenꞌẽ kahato raꞌyn. Miꞌi hawyi iperup taꞌyn tokenꞌẽ kahato Iesui auka hap nug hamuat. 9Miꞌi hawyi putꞌok toꞌe toꞌyat piat hawyi toꞌe i raꞌyn Iesui pe -Aikope pyi pyno eriot Uhyt e Piratu maꞌato yt Iesui tiwesat hin i raꞌyn. 10Miꞌi pote Piratu toꞌe -Yt uiwesat i apo Uhyt e. Yt etikuap i apo uikaipyi eꞌauka hap taꞌatukyꞌesat e. Taꞌi Uhyt woroputsit reran pote woroputsit kuap neꞌi e katupono uipo pe neꞌi ereineꞌen. Woroꞌauka kary teran pote woroꞌauka kuap ariaꞌyp posak ete e morekuat Piratu. 11Maꞌato Iesui tiwesat -Tupana yt enug i uruporekuatno mesuwarote pote yt aikotã kuap i uiꞌauka hamuat hap e maꞌato uiꞌauka pote iꞌaparap epiat hap iwato wen maꞌato poꞌog iwato ekawiat iꞌaparap hap mekewat uherut ewowiat hat wat e. Miꞌi wat ri iꞌaparap hap poꞌog epiat iꞌaparap hap kai e Iesui Piratu pe. 12Mio tã e hawyi Piratu tikyꞌesat poꞌog Iesui puksit hap maꞌato Iuteu akag koꞌi waĩꞌiꞌatuꞌe -Yt etiporenotem neiꞌo Miꞌi Miit iꞌatuꞌe maꞌato etiporenotem pote ti aru eꞌakag morekuat koro Sesa ewanikap mo raꞌyn iꞌatuꞌe. Katupono uwe uito ti miitꞌin porekuatno e hat wyti morekuat Sesa ewanikap wo toineꞌen. 13Miꞌi hawyi Piratu tioto Iesui iꞌywania Iuteuria akagnia kape waku sio yt iꞌatuꞌe hamo. Miꞌi hawyi itote taꞌapyk iꞌatupyꞌasetpe morekuat eꞌamyap nu kawiat rote aikotã miitꞌin kuap hap waku sio yt e hap amyap tote Iuteu pusu puat akipy Kapata e hap tote taꞌapyk.
14Atposake raꞌyn turan ienuk koro hap eꞌat owakai te morekuat Piratu toꞌe haty wo -Meiũ raꞌyn Eiporekuat koro wuat e Piratu Iesui ywania akag koꞌi pe. 15Maꞌato taꞌatuehay pirik wo teꞌeroꞌe -Yt wyti yt wyti. Yt urumikyꞌesat i iꞌatuꞌe yt uruporekuat hin i iꞌatuꞌe. Eweiꞌauka ro eweiꞌauka ro ariaꞌyp posak ete iꞌatuꞌe haty wo. Miꞌi hawyi toiꞌatuwesat -Atiꞌauka meiũwat pote ti ren aru yt kat i eiporekuat koro e. Miꞌi hawyi taꞌatuwesat -Wẽtup ok yn ni aiporekuat koro. Miꞌi wyti kuepe morekuat wato Sesa e hap iꞌatuꞌe Iuteu akag koꞌi.
Iesui Auka Hap
Mateu 27.32-44; Maku 15.21-32; Iruka 23.26-43 Piat Ewy
16Miꞌi hawyi Piratu toꞌe tesuraraꞌin me -Pyno eipo pe raꞌyn Iesui iꞌauka ehepiat hamo e. Miꞌi hawyi suraraꞌin tioto raꞌyn Iesui iꞌauka hamo. 17Miꞌi hawyi tuwẽtem naꞌyn Iesui Piratu yat pyi teꞌariaꞌyp posak wywo. Miꞌi hawyi totioto Miit Akag Akag e hap kape yityꞌok Koukota e hap ipusu puo. 18Miꞌi hawyi itote taꞌatupehik taꞌatuꞌateg Iesui py koꞌi pereku wato wo iꞌewyte ipo koꞌi ariaꞌyp posak ete. Typy ok iwywo taꞌatupehik typy ariaꞌyp posak ete wẽtup ok ipo ran kai wẽtup ok ipo sese kai. Miꞌi hawyi taꞌatumopoĩꞌam naꞌyn Iesui ariaꞌyp posak wywo yi kaꞌa pan me taꞌatupag. Miꞌi hawyi yꞌam me Iesui topyhuꞌat tomosat e hap ete. 19Miꞌi hawyi morekuat Piratu tipoꞌoro towat tomiwan Iesui apy totiat hupit hamo. Mio tã toꞌe Piratu miwan me -Meiũ ti Iuteu Ywania Potypot sese e tawa Nasare piat ti meiũ e. 20Mekewat Iesui auka hap ti yt pya hin i tawa Ierusarẽi kai. Miꞌi pote iꞌatu kahato akasa Piratu miwan kapiat haria. Taꞌatukuap kahato Piratu miwan katupono myẽꞌym pusu puo toiwan Iuteu ywania pusu puat hawyi Iratĩ ywania pusu puat hawyi Kereku ywania pusu puat Piratu tiwan toꞌe hap Iesui etiat ariaꞌyp posak tote. 21Miꞌi hawyi Iuteu epaꞌi koro koꞌi teꞌeroꞌe Piratu pe -Yt etiwan neiꞌo meiũ ti Iuteu Ywania Potypot sese e hap meipe pe iꞌatuꞌe maꞌato Miꞌi Miit wyti toꞌe Uito Iuteuria Porekuat e hap yn waku etiwan mehin iꞌatuꞌe. 22Maꞌato Piratu tiꞌatuwesat -Yt rat e. Yt atiwan i wẽtup e. Koitywy ti meipe piatnuat raꞌyn uimiwan topyhuꞌat uiꞌe hap ewy e.
Suraraꞌin Wemahara Nug Hamo Iesui Sokpe Ete
23Miꞌi hawyi suraraꞌin 4 ok takaria tihep Iesui esokpe. Miꞌi taꞌatusat hawyi taꞌatupatꞌok taꞌaturaniawuat maꞌato hesokpe hekamisa wato yt aikotã kuap i taꞌatukyꞌesat yne pykai taꞌatusat taꞌaturaniawuat. Yt taꞌatupatꞌok kuap i yt taꞌatuhiot kuap i katupono yt mipiꞌig i pote wẽtup soꞌo yn pote yt taꞌatupatꞌok kuap i. 24Miꞌi pote teꞌeroꞌe toꞌope -Yt naku i raꞌyn watihiot hiot hekamisa wato iꞌatuꞌe. Waku poꞌog watuwemahara yn naꞌyn uwe ikaꞌiwat pakup puẽti hamo iꞌatuꞌe. Aikotã saꞌawyꞌi miwan me Saumu 22.18 pe Tupana ehay moherep hat e hap ewy taꞌatunug yian mete wuat e hap ewy taꞌatunug -Taꞌatupatꞌok patꞌok aru uhesokpe hawyi uhekamisa wato ete iꞌewyte teꞌeruwemahara toꞌopohari pohari hamuat e yian mete miwan me. Mio tã e hap ewy ti suraraꞌin tunug Iesui esokpe ete. 25Miꞌi hawyi yt pya hin i ariaꞌyp posak kai Iesui ty Maria toineꞌen tokypyꞌyt wywo hawyi mekewat wẽtup ok Maria uhyt Koropai eharyꞌi. Miꞌi hawyi iꞌewyte mekewat Maria yi Matarena kaipywiat itote toineꞌen yꞌam me. 26Miꞌi hawyi Iesui tehaꞌat raꞌyn ariaꞌyp posak totepyi toty kape iꞌewyte topotmuꞌe tomikyꞌe kape. Miꞌi hawyi Iesui toꞌe toty pe ariaꞌyp posak pyi -Mamai e meiẽwat uimimuꞌe yatype ro ereineꞌen koitywy e. Emepyt no raꞌyn toineꞌen koitywy e. 27Miꞌi hawyi toꞌe topotmuꞌe pe -Uiwy e meiẽwat uity epo pe raꞌyn toineꞌen e. Miꞌi hawyi totioto Iesui ty toꞌyat kape hawyi iꞌyat pe raꞌyn toineꞌen.
Mateu 27.45-56; Maku 15.33-41; Iruka 23.44-49 Piat Ewy
28Miꞌi hawyi Iesui tikuap taꞌyn topyꞌa pe torannia Tupana mikyꞌesat ewywuat tepiat inug hap hawyi toꞌe miwan miat toꞌe hap ewy -Areꞌyꞌutui kahato e aikotã yian mete wuat Tupana e hap ewy. 29Miꞌi hawyi Iesui tikuap taꞌyn yne toꞌywot e hap ewy raꞌyn ariaꞌyp posak ete toiꞌauka hamo. Miꞌi hawyi toꞌe -areꞌyꞌu teran e. Toineꞌen Uwa sapo hy haiug nakat kuiꞌa pe. Miꞌi rẽ taꞌatupoꞌi pina wyꞌyp ãpy ete amukiusu ap ewywuat ete. Miꞌi rakirẽ taꞌatupehik Iesui wẽ ete. 30Miꞌi toihysym hawyi toꞌe haty wo -Uiꞌywot e atunug yne raꞌyn uipoꞌoro epiat hap e. Ikahu raꞌyn miitꞌin ehakyeraꞌat hap e. Waku raꞌyn e hawyi ipyhu tekꞌe raꞌyn ikuꞌuro sese raꞌyn. Tutum naꞌyn teha piat Tupana pe. 31Miꞌi rakirẽ wãtymꞌi kape taꞌatuhep teran naꞌyn meremo ariaꞌyp posak koꞌi pyi iꞌatupiit koꞌi katupono taꞌatusyp teran meremo katupono mukiꞌite raꞌyn wemohy hap eꞌat taꞌatuꞌe haype. -Yt naku i ti watuwepotpap iꞌatusyp hap ete aat minꞌe hawyi katupono wãtymꞌi turan putꞌok e Tupana motypot eꞌat iꞌatuꞌe. Miꞌi pote Piratu pe teꞌeroꞌe -Etiꞌatupoꞌoro ro esuraraꞌin mehin ariaꞌyp posak piaria yt ikuꞌuro i te rakaria kagꞌyp pirik hamo iꞌatuꞌe katupono miꞌi watunug pote meremo topap sese iꞌatusyp hamo iꞌatuꞌe Iuteuria akag koꞌi. 32Miꞌi hawyi Piratu tiꞌatupoꞌoro raꞌyn tesuraraꞌin iꞌatukagꞌyp pirik hamo. 33Miꞌi hawyi putꞌok iꞌatuꞌe Iesui kagꞌyp pik hamo maꞌato Iesui ikuꞌuro sese raꞌyn pote yt taꞌatukag pik i raꞌyn. 34Maꞌato wẽtup surara toto Iesui sakupe suk muruku wato wuat hamo. Toisuk hawyi tuwẽtem huu yꞌy wywo. 35Toineꞌen itote wẽtup ok yne kapiat akasa hat. Miꞌi ti yne Iesui auka hap etiat henoi pywuat sehay. Miꞌi hap ti tohenoi teran pywuat sehay yne miitꞌin miat ikuap hamo hawyi taꞌatumohey hamuat. 36Yt suraraꞌin tipik i ti Iesui kagꞌyp uhehamo aikotã Tupana toꞌe saꞌawyꞌi wuat henoi hap ewy ti raꞌyn -Yt wẽtup i ti aru taꞌatupik ikag e hap ewy Numeru 9.12 pe.
37Iꞌewyte surara tisuk Iesui miitꞌin ehamo aikotã yian me Tupana toꞌe miwan me Sakaria 12.10 e hap ewy -Meiũran aru iꞌatuepiat isuk hap kape teꞌerahaꞌat kahato e miwan me hap ewy.
Mateu 27.57-61; Maku 15.42-47; Iruka 23.50-56 Piat Ewy
38Miꞌi hawyi Iesui ewy Iuse toto raꞌyn Piratu kape Iesui piit ẽtup hamo. Miꞌi Iuse ti Iesui potmuꞌe wen maꞌato ti tokenꞌẽ Iuteuria pupi imohey hap enoi hamo. Miꞌi ti tawa Arimateia kaipywiat. Toto Piratu kape hawyi toꞌe -Morekuat e atihep teran wyti Iesui piit ariaꞌyp posak pyi mehin e. Miꞌi pote toiwesat -Hẽ to e etihep to e. Miꞌi hawyi Iuse toto hawyi toimaꞌapyk taꞌyn Iesui piit ariaꞌyp posak pyi. 39Miꞌi hawyi mekewat Nikutemu saꞌawyꞌi wuat toto wãtym muat Iesui kapiat hat toto wy Iuse wywo. Nikutemu tioto mohag hy ikap takat Mira kawiat. Miꞌi hawyi miꞌi wo taꞌatupen towy ok Iuse wywo Iesui piit 40 Kiru rakat wo. 40Miꞌi hawyi taꞌatumipen mohag hy koꞌi wywuat wo taꞌatuꞌok poꞌi sokpe kytꞌi wo Iesui piit aikotã Iuteuria ywania eko ewy iꞌatuwoꞌosyp turan wuat ewy taꞌatunug Iesui piit ete mekewat mohag hy ikap takat Mira kawiat wywo. 41Miꞌi hawyi yt pya hin i Iesui auka hap kai mikoi ypia toineꞌen. Miꞌi pyꞌasetpe toineꞌen woꞌosyp hap pakup nu kaꞌa yi py hotꞌi piat woꞌosyp hap yt uwe i te ipuo miit syp hap. 42Yt pya i pote taꞌatusyp teran miꞌi pe Iesui piit katupono Tupana motypot eꞌat yt pya i raꞌyn. Wãtymꞌi raꞌyn pote mukiꞌite toineꞌen aat minꞌe hawyi iꞌatuꞌe Iuteuria pote. Miꞌi pote taꞌatusyp teran Iesui meremo mikoi ypia piat woꞌosyp pakup hawe yt pya i ikuꞌuro hap kai pote.
Currently Selected:
Iuwãu 19: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.