1 Kuriniu 1
1
Haga Wẽtup 1
1Uito ti Pauru are. Mesuwat uimiwan atipoꞌoro ehewowi tawa Kurintiu piaria einapin hamuat torannia Iesui mohey haria napin hamuat. Uito ti Tupana miꞌairo Tomipoꞌoro Wuatꞌi Porekuat Nuat Iesui moherep miitꞌin miat hanuat are. Iꞌewyte aiwy kahato Sotene po kaipyi tuut mesuwat miwan. 2Pyno kuekatu uruipoꞌoro ehewowi. Miꞌi hawyi waku kahato worohoꞌonapin katupono Tupana miꞌairoria temiitꞌin sese wuat saꞌawyꞌi te wuaria eipe. Taꞌi Tupana watno eiperia wakuaria wo Tupana wywo eweipyhuꞌat -Iesui Aipotypot Aikaꞌiwat sese eweiꞌe pote. Yt eipe yn i maꞌato wuatꞌi miitꞌin mesuwarotiaria mio tã e haria Tupana watnuaria wakuaria Tupana wywo teꞌeropyhuꞌat. 3Pyno mio tã ahẽtup Tupana pe -Tupana etum o tawa Kurintiu piaria pe iꞌatupoityro hap yt kat saꞌup i egyiꞌat hap kaipyi are. Etunug miꞌiria o torannia woꞌowese haria wo areꞌe Aikaꞌiwat Aipotypot Iesui kape Aiꞌywot Atipy piat kape ahẽtup eikawiatno. Uito ti Pauru.
Tohẽtup Tupana Kape Kurintiu Piaria Powyro Hamo
4Wuatꞌi eꞌat pe arehum ewowi Tupana katupono etum naꞌyn tawa Kurintiu piaria pe iꞌatuehakyeraꞌat hap urukaꞌiwat Iesui mohey haria miꞌiria pote areꞌe. 5Taꞌi Tupana aipoitynug kahato Iesui minug hap upi. Miꞌi hawyi ti torannia watikuap kahato kat koꞌi kat koꞌi Aipotypot oktan. Uhehay Tupana wat ewy topyhuꞌat. Wẽtup piit ewy watoineꞌen. 6Watoineꞌen motꞌi Aikaꞌiwat wywo pote ihay iꞌewyte toineꞌen motꞌi aipyꞌa pe. 7Miꞌi pote wahekatup Aipotypot turan Iꞌywot aipoityro kahato aipowyro kahato. Miꞌi hawyi tuwemoherep aru Aikaꞌiwat watoꞌe yn wuatꞌi ehamo. Aimoehãite Iesui mohey hap ete. 8Koitywy Aikaꞌiwat aimoheg kahato tehay wo. Yt watoiat kuap i ahepiat imohey hap wuatꞌi eꞌat pe pote. Miꞌi tã ti tutunug mesuwat yi kahuro hap kape. Miꞌi hawyi meremo taꞌaipok i Aipotypot Wuatꞌi Mimotypot no. Aikaꞌiwat Iesui putꞌok e hap eꞌat pe turan -Yt kat i saꞌag atipuẽti miꞌiria ete e Iesui ahetiat. 9Miꞌi pote waku watomohey iꞌe hap torannia aipyꞌa pe. Saꞌawyꞌi toꞌe -Atikyꞌesat eipe Uhaꞌyru ekatuwyria sese wo eweikupteꞌen e. Ewetunug Miꞌi Miit Uhaꞌyru Eipotypot no pote waku pe iwywo eweikupteꞌen wuatꞌi eꞌat pe e ahepe. Miꞌi hawyi waku watomohey kahato iꞌe hap ewy mesup te.
10Uheꞌywytꞌin uheinytꞌin pywo pe areꞌe ehepe Aipotypot Aikaꞌiwat Iesui ehay moherep hat ti uito are. Miꞌi tupono ahẽtup eiwoꞌoehay upi eweikupteꞌen. Miꞌi pote -Pywo pywo eweiꞌe eiwoꞌope hawyi eiwoꞌowehik kahato. Miꞌi hawyi wẽtup wanetup hap wywo yn eweikupteꞌen. Waku aiwoꞌoꞌewy yn watoineꞌen wẽtup mikyꞌesat upi yn hawyi sehay yt kat i aiwoꞌosytpok hap toineꞌen aikai.
11Gaꞌatpo tõꞌẽ mana Kure yat piaria hawyi miꞌiria henoi uhepe aikotã eipyꞌasetpe tukupteꞌen sehay wuat wuꞌuka haria etiat. 12-Pyno itotiaria wẽtup wẽtup wanetup hap wywuaria iꞌatuꞌe. Yt toꞌoꞌewy hin i iꞌatuwanetup hap koꞌi. Miꞌi pote wuꞌuka hap yn itote iꞌatuꞌe uhepe ehetiat. Pyno atikuap taꞌyn eipyꞌasetpe tukupteꞌen -Uito ti aimuꞌe hat Pauru upi e haria maꞌato iraniaꞌin -Uito aimuꞌe hat Apauru upiaria e haria. Miꞌi hawyi iraniaꞌin -Uito aimuꞌe hat Peteru upi e haria tukupteꞌen. Maꞌato iraniaꞌin -Uito aimuꞌe hat Iesui upiaria e haria iꞌatuꞌe taꞌatuhenoi uhepe õꞌẽ haria. Miꞌi tã hap kaipyi ti eiwuꞌuka hap topyhuꞌat. 13Uiwyriaꞌin karãpe watuꞌuka aiwoꞌope miꞌi hawyi watopatꞌok patꞌok kahato hawyi aiwat i aiwat i yn watoineꞌen karania heko rakaria ewy neꞌi. Maꞌato Iesui piit yt miꞌi ewywuat hin i areꞌe. Wẽtup piit ewywuat yn watoineꞌen. Uito Pauru maꞌato uito yt uikuꞌuro i ariaꞌyp posak ete ehehakyeraꞌat hamo. Iꞌewyte ti ehetꞌok hawyi yt uhet i ti topyhuꞌat eikai ehete. Pywo yt uwe i ti eiperia uimisetꞌok koꞌi. 14Taꞌi uito ti yt worohoꞌosetꞌok i eiperia yꞌy pe. Toĩ ni maꞌato typy ok yn itote uimisetꞌok koꞌi mekewat mehin Kiripu hawyi mehin Kaiu hawyte wuat uimisetꞌok koꞌi maꞌato miꞌiria yn ahetꞌok hawyi iraniaꞌin eiperia -Uito ti Pauru upiat hat imisetꞌok pote yt eweiꞌe kuap i katupono typyꞌok yn ni itote uimisetꞌok. 15Yt uwe i toꞌe kuap -Uito ti Pauru misetꞌok miꞌi pote poꞌog uito eikai e hat. Iꞌewyte yt uwe i toꞌe kuap -Eipe Pauru misetꞌok toset wuat e hat. 16Iꞌewyte uimiꞌatusetꞌok koꞌi tukupteꞌen itote uhyt Etewana yat piaria yn maꞌato miꞌi hawyi uimiꞌatusetꞌok koꞌi yt uwe i itote.
17Pywo ti Aikaꞌiwat Iesui yt uipoꞌoro i miitꞌin setꞌok setꞌok hamo maꞌato tehay wakuat moherep hamo yn uipoꞌoro tehay wakuat enoi wuatꞌi puoria piat hamo yn e. Miꞌi hawyi atiꞌatumuꞌe haty wo aikotã Aikaꞌiwat ikuꞌuro aikawiatno hap ariaꞌyp posak ete hap yn uhehay. Yt aremotypot teran i maꞌato ahenoi aikotã Aiporekuat nuat Tupana Mipoꞌoro ikuꞌuro ariaꞌyp posak etiat hap yn ahenoi teran. Pyno ti yt miitꞌin mikyꞌesat ewy hin i ti atimoherep katupono aremotypot uhehay se wywo hap hawyi yt hesaika hin i uhehay Tupana wanetup hawe.
18Taꞌi ariaꞌyp posak etiat Iesui ikuꞌuro ahetianuat enoi hap ti yt hee hin i mekewat hoꞌowasat rakaria pe -Yt eweꞌeg hin i ti iꞌatuꞌe neꞌi ahepe. Maꞌato aito Iesui mikyꞌeria pe ti hee kahato raꞌyn katupono watikuap taꞌyn hesaika kahato mekewat sehay hap. 19Aikotã saꞌawyꞌi yianmiaria Tupana ehay moherep haria teꞌeroꞌe hap ewy -Meiũran ti aru atimoma raꞌyn eiweꞌeg kahato hap -Uito poꞌog kuap hat wuatꞌi kawiat hap e. Atimoweityk ti aru miitꞌin weꞌeg hap yt nakuat i koꞌi e. Miꞌi hawyi -Uito atikuap poꞌog e haria yt uwe i topyhuꞌat e Tupana saꞌawyꞌi tehay moherep hat Isaia miwan 29.14 piat pe.
20Aikope aru tukupteꞌen -Wuatꞌi etiat kuap haria uruto e haria e. Aikope aru tukupteꞌen wuatꞌi sehay kuap haria. Aikope tukupteꞌen mekewat iraniaꞌin akit taꞌatuehay wuat haria. Taꞌi yt aikope i ti aru katupono iꞌatuwat iꞌatuweꞌeg hap Tupana tiꞌakit yne raꞌyn. Miꞌi hawyi miitꞌin weꞌeg hap topyhuꞌat wuatꞌi miꞌakit akit wo raꞌyn. 21Katupono saꞌawyꞌi wuat weꞌeg kahato haria ikuap teran Tupana maꞌato yt putꞌok e i iꞌatuweꞌeg hap Tupana kuap hamuat hap. Katupono koitywy Tupana tikyꞌesat kahato mekewat yt iꞌatuweꞌeg i hap kaipywiat ariaꞌyp posak etiat neꞌi ikuꞌuro rakat mohey haria ehehakyeraꞌat hamuat hap. Poꞌog Tupana iweꞌeg miitꞌin kai Katupono Tupana mikyryꞌi wo toineꞌen miitꞌin weꞌeg kahato hap e.
22Mio tã iꞌatuꞌe Iuteu ywania -Etomoherep to iwato kahato mesuwe uruepe Tupana esaika hap uruepiat emohey hamo miꞌi pote ti aru uruimohey en iꞌatuꞌe watiꞌatumoherep Iesui iꞌatuepe turan. Maꞌato Kereku ywania miꞌiria -Etimoherep uruepe ehay iweꞌeg kahato hawyi uruimohey Iesui etiat iꞌatuꞌe. 23Maꞌato miꞌiria pe -Iesui yn ahehakyeraꞌat kuap urutoꞌe. Iesui yn ikuꞌuro ariaꞌyp posak ete ahetiatno e hap uruhenoi Iuteu ywania pe Kereku ywania pe yt ihay se hin i pykai taꞌatupuẽti Iuteuria ywania. Miꞌi hawyi ti Kereku ywania miꞌiria mekewat sehay ti yt weꞌeg hin i hat ehay iꞌatuꞌe ahepe. 24Maꞌato aito Tupana miꞌairoria ete ti Iuteu ywania sio Kereku ywania ti mekewat sehay Iesui ikuꞌuro ariaꞌyp posok ete aikuꞌuro hap u hamo hap hesaika kahato topyhuꞌat ahehakyeraꞌat hamo. Taꞌi watomohey mekewat sehay Iesui etiat hawyi ahehakyeraꞌat hap toineꞌen. Pywo ti rat Iesui ti Tupana esaika hap wywo iweꞌeg hap wywo toiꞌatuehakyeraꞌat kuap wuatꞌi miitꞌin watoꞌe. 25Katupono mekewat Tupana weꞌeg hap poꞌog iweꞌeg torannia aiweꞌeg hap kai watoꞌe. Katupono Tupana tuwekyryꞌi pote poꞌog iweꞌeg torannia mesuwiaria weꞌeg hap koꞌi kai haype watoꞌe. Katupono Tupana perupꞌi hap ti poꞌog hesaika mesuwarotiat hesaika rakaria kai watoꞌe yn ahehay.
26Taꞌi uhekatuwyria koitywy ti watikuap kahato aikotã Tupana tiꞌairo yt weꞌeg i haria temiitꞌin sese wo hap. Saꞌawyꞌi aiꞌairo temiit no turan yt aiweꞌeg hin i te turan aiꞌairo. Iꞌewyte yt typyꞌi hin i iwatoꞌin nakaria toiꞌairo temiit no mesuwe. Iꞌewyte yt typyꞌi hin i hesaika rakaria toiꞌairo temiit no. Maꞌato miꞌi pykai aiꞌairo temiit no torannia kaipyi. 27Maꞌato toiꞌairo yt weꞌeg i haria temiit no typyꞌi kahato. Miꞌi tã tutunug hawyi toiꞌatumohit kahato -Uito poꞌog weꞌeg hat e haria. Iꞌewyte ti Tupana tiꞌairo miitꞌin emiit temiit no typyꞌi kahato. Miꞌiria kaipyi ti toimohit -Uito poꞌog torannia kai e haria. 28Taꞌi ihakyꞌeꞌi rakaria yt uwe mikyꞌe i koꞌi miit emiit koꞌi yt iwato hin i rakaria yn ni toiꞌairo temiit sese wo. Iꞌewyte yt kat sehapap i hap koꞌi wyti toiꞌairo temiit no. Iꞌewyte yt uwe mikuap i koꞌi ti satek takaria toiꞌairo temiit no. Miꞌi hawyi ti -Uruto poꞌog e haria yi kai neꞌi raꞌyn teꞌeropyhuꞌat katupono hemiitꞌin sese teꞌeruwanetup kahato imienoi kape. 29Eweikuap apo kat pote Tupana tiꞌaro temiitꞌin no paa e haria. Pyno ahenoi teran ehepe. Tupana tiꞌatuꞌaro temiit no miit hit koꞌi katupono yt toikyꞌesat aru atipy pe tuwemowato rakaria. Yt toikyꞌesat itote -Uito poꞌog uhewaku torannia kai pote Tupana uiꞌairo temiit no e haria. Yt toikyꞌesat i itote -Uito poꞌog pote Tupana uiꞌairo saꞌawyꞌi tehay moherep hamo e haria katupono mio tã e haria Tupana mopyꞌahak haria tukupteꞌen e.
Tupana Aiꞌairo Yt Nakuaria I Aito Pykai
30Aito ti Aipotypot Iesui mohey haria pote Tupana ainug Tosaꞌyru wywo wẽtup miit ewy. Saꞌawyꞌi yt aiweꞌeg hin i pykai mesup aiweꞌeg kahato katupono Iesui amyãtym toineꞌen aipiit pakup we hawyi Iesui weꞌeg hawuo wahewyry mesup. Saꞌawyꞌi yt ahehay kuap i Tupana wywo maꞌato mesup Iesui wẽ aipiit pe pote ahehay kuap kahato Tupana wywo. Koitywy watoineꞌen Iesui piit ewy mesuwarote. Miꞌi pote watopyhuꞌat Tupana saꞌyruꞌin koꞌi Tupana sakiꞌytꞌin koꞌi mesuwe. Miꞌi pote watopyhuꞌat Tupana ywania ewywuat mesuwe. 31Yt naku i watoꞌe aiwepe paĩ -Uito poꞌog Iraniaꞌin kai yt naku i watoꞌe aiwanetup hawe. Yt miꞌi tã hin i are. Poꞌog waku watoꞌe -Tupana ti waku poꞌog uikai waku watoꞌe. Miꞌi yn ni aipowyro kahato hat watoꞌe waku. Aikotã iꞌe hap ewy aru tutunug yne toꞌe hap waku watoꞌe aiperupꞌi hap wywo. Uito ti miitꞌin yt naku i rakat maꞌato Iesui miꞌairo kahato.
Currently Selected:
1 Kuriniu 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.