YouVersion Logo
Search Icon

Sekaraea 1

1
Yawe hemi kolem kambaek olketa pipol blong hem
1Long mekeit mans blong mektu yia wea King Darias hemi rul ovarem Pesia,#1:1 ?mekeit mans blong mektu yia? Long datfala taem, mekeit mans long yia hemi mans long Makesvan long kalenda blong olketa pipol blong Israel, an hemi sem taem long yia olsem Oktoba o Novemba long kalenda blong yumi. An mektu yia wea King Darias hemi rul ovarem Pesia hemi 520 B.K. Yawe hemi talemaot Mesij blong hem long Profet Sekaraea, san blong Berekaea, an grani blong Ido.#Esra 4:24—5:1; 6:14. Hemi tok olsem, 2?Mi Yawe mi bin barava kros long olketa olo blong yufala. 3From samting ya, yu mas tok olsem long olketa pipol: Yawe hu hemi garem evri paoa, hemi tok olsem, ?!Olketa! !Yufala mas tane kambaek long mi! Sapos yufala duim olsem, bae mi kambaek fo stap moa wetem yufala.? 4Bae yufala mas no falom wei blong olketa grani blong yufala bifoa. Olketa profet bin talem Mesij blong mi long evriwan olsem olketa mas lusim olketa ravis wei an olketa sin blong olketa. Bat olketa les fo lisin long Mesij blong mi, an olketa nating obeim mi tu. 5Olketa grani blong yufala, olketa dae finis. An olketa profet ya, distaem no eniwan long olketa hemi stap laef. 6Bat olketa toktok an olketa woning wea mi talem olketa profet ya hu i wakaman blong mi bifoa, fo talemaot long olketa grani blong yufala, olketa les fo lisin long toktok ya. An from samting ya, mi bin panisim olketa.
?Den olketa lusim olketa ravis wei ya blong olketa, an olketa tok olsem, ?Yawe hu hemi garem evri paoa, hemi stret nomoa fo hemi panisim yumi from olketa ravis wei blong yumi. Olketa samting ya, hemi planem finis olsem bae hemi mas hapen, an olketa hapen finis olsem wea hemi talem.??
Fas spesol drim: Olketa hos
7(Profet) Long mektuenti-foa de long mekleven mans, wea hemi mans long Sebat, blong mektu yia wea King Darias hemi rul ovarem Pesia,#1:7 mektuenti-foa de long mekleven mans, blong mektu yia? Long datfala taem, mekleven mans long yia hemi mans long Sebat long kalenda blong olketa pipol blong Israel, an hemi sem taem long yia olsem Januare o Febuare long kalenda blong yumi. Disfala spesol drim hemi kam long Sekaraea long 15 Febuare 519 B.K. Yawe hemi talemaot Mesij blong hem long mi Profet Sekaraea, san blong Berekaea, an grani blong Ido. 8Long naet, mi lukim wanfala spesol drim. An long disfala spesol drim, mi lukim wanfala enjel blong Yawe wea hemi sidaon long wanfala red hos. Disfala hos hemi stanap long wanfala smolfala vali, long midol long olketa smolfala tri wea olketa kolem matel. An mi lukim dat olketa narafala man long hos tu i stanap bihaen long red hos ya, an olketa narafala hos i red, an braon, an waet.#Revelesin 6:2-8. 9An mi askem enjel ya olsem, ??Bikman, wanem nao mining blong olketa samting ya??
Bat narafala enjel hemi ansarem mi olsem, ?Bae mi som mining blong olketa fo yu.?
10Den fas enjel ya wea hemi stap long midol long olketa matel tri, hemi tok olsem, ?Yawe hemi bin sendem kam olketa ya fo lukluk olobaot long disfala wol.?
11An olketa man wea i sidaon long olketa hos ya i tok olsem long fas enjel ya, ?Mifala bin go finis olobaot long disfala wol, an mifala lukim dat disfala wol hemi stap kuaet long piis.?
12Enjel blong Yawe ya hemi tok olsem, ?Lod Yawe, yu garem evri paoa. Seventi yia nao yu kros long olketa blong Jerusalem an long olketa narafala taon long Jiuda. ?Hao long nao bae yu gohed fo kros long olketa? ?Wataem nao bae yu somaot dat yu sore long olketa??
13Den Yawe hemi givim wanfala gudfala ansa long mektu enjel wea hemi bin gohed fo tok wetem mi, fo liftimap tingting blong hem. 14An enjel ya hemi tok olsem long mi, ?Yu mas talemaot dat Yawe hu hemi garem evri paoa, hemi tok olsem, ?Jerusalem wea hemi stap antap long tambu maonten long Saeon, hemi taon blong mi, an mi garem strongfala tingting fo hem. 15Bat mi kros tumas long pipol blong olketa narafala kantri wea i praod tumas an gohed fo tingting wea laef hemi isi nomoa. Bifoa, mi kros lelebet nomoa long olketa, bat olketa mekem olketa pipol blong mi fo safa moa winim wea mi laekem.?
16?Dastawe nao Yawe, hemi tok olsem, ?Bae mi kambaek long Jerusalem, fo somaot sore blong mi fo olketa. An bae olketa bildimbaek moa Tambuhaos blong mi, an wakem gudfala disfala taon ya tu.?
17?Yu mas talemaot tu dat Yawe hu hemi garem evri paoa, hemi tok olsem, ?Olketa taon blong mi bae i kamap gudfala moa. Bae mi Yawe mi helpem moa Jerusalem, an mekem wea hemi spesol taon blong mi moa.??
Mektu spesol drim: Fofala hon an fofala man fo wakem aean
18Mi lukim narafala spesol drim moa, an long spesol drim ya mi lukim fofala hon blong buluka.#1:18 ?hon blong buluka? Long datfala taem, hon blong buluka hemi tokpiksa fo samting wea hemi barava strong. So long disfala spesol drim, fofala hon ya i tokpiksa long olketa strongfala kantri raonem Israel long not, an long saot, an long ist, an long west. 19An mi askem enjel wea hemi gohed fo tok wetem mi olsem, ??Wanem nao mining blong olketa samting ya??
Hemi ansa olsem, ?Hem nao olketa narafala kantri wea i garem paoa, an olketa ronemaot olketa pipol blong Jiuda, an pipol blong Israel, an pipol blong Jerusalem.?
20Den Yawe hemi somaot moa long mi fofala man fo wakem aean wea i holem fofala bikfala hama. 21An mi askem enjel ya olsem, ??Olketa man ya, i kam fo mekem wanem ya??
Hemi ansa olsem, ?Olketa hon ya i olketa kantri wea i yusim paoa blong olketa fo ronem Jiuda an mekem olketa fraet fo lukluk raonem olketa. Bat olketa man fo wakem aean, olketa kam fo mekem olketa kantri ya fo fraet, an fo barava spoelem olketa.?

Currently Selected:

Sekaraea 1: SIPB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy