Maeka 1
1
Fas toktok
1Hem ya nao Mesij blong Yawe wea hemi talemaot long Profet Maeka blong taon long Moreset. Yawe hemi somaot Mesij ya long hem insaet long olketa spesol drim long taem blong King Jotam, an long taem blong King Ehas, an long taem blong King Hesekaea. Olketa evriwan ya i king blong Jiuda. Olketa spesol drim ya hemi profesi abaotem olketa pipol blong taon long Samaria, wea hemi kapitol blong Israel, an olketa pipol blong taon long Jerusalem, wea hemi kapitol blong Jiuda.#1:1 “Mesij blong Yawe” Aesaea 1:10; Jeremaea 1:2; Esikiel 1:3; Hosia 1:1; Joel 1:1; Jona 1:1; Sefenaea 1:1; Hagae 1:1; Sekaraea 1:1; Malakae 1:1. Olketa king 2 Kings 15:32 - 16:20; 18:1 - 20:21; 2 Kronikols 27:1 - 32:33.
Singsing fo sore long Samaria an Jerusalem
(Profet hemi tok)
2!Lisin kam long toktok blong mi,
yufala evri pipol long wol!
Lod Yawe hemi witnes agensim yufala.
Bae hemi tok kamdaon
from haos blong hem long heven.
3!Olketa! Bae Yawe hemi kamdaon
an wakabaot antap long olketa maonten.
4Hem nao olketa maonten ya bae i ranaot,
olsem kandol wea hemi stap kolsap long faea.
Bae olketa ran kamdaon insaet long olketa vali,
olsem wata wea hemi ran kamdaon from wanfala hil.
5Olketa samting ya bae hemi hapen nao, bikos yufala evri pipol blong Israel i gohed fo sin olowe nomoa, an fo agensim God. !Yufala pipol blong Israel! ?Yufala gohed fo agensim hem, bat hu nao lidim yufala fo go long ravis wei ya? Olketa long Samaria nomoa ya. !An yufala pipol blong Jiuda! ?Yufala gohed fo wosipim olketa kaving god, bat hu nao lidim yufala fo duim olketa ravis samting ya? Olketa long Jerusalem nomoa ya. 6From diswan nao, Yawe hemi tok olsem, “Bae mi spoelem finis disfala bikfala taon long Samaria. An bae taon ya hemi luk olsem hip long ravis long open ples, an bae hemi kamap olsem nomoa ples fo plantem grep tri. Olketa ston blong taon ya, bae mi kapsaetem go long vali, an faondesin blong taon ya nomoa bae hemi stap nating long emti ples. 7Olketa kaving god, bae mi mekem olketa enemi blong yufala i pisisim olketa. An olketa ofaring wea yufala gohed fo givim go long olketa hiden tambuhaos, bae mi mekem olketa enemi blong yufala i bonem olketa. Ya, evri kaving bae hemi kamap olsem ravis. Olketa woman prist i juri nomoa, an yufala bin gohed fo durong wetem olketa fo mekem wosip long olketa laea god. Bat bae mi mekem olketa enemi fo tekem evrisamting wea yufala blong Samaria i yusim long wosip olsem, fo givim go long olketa juri prist blong laea god blong olketa.”#Diutronomi 23:17-18.
8 (Profet) Olketa samting ya wea mi herem, bae hemi mekem mi fo sore an krae. An bae mi tekemaot kaleko blong mi an sandol blong mi, an wakabaot olsem man wea hemi gohed fo sore an krae fo man dae. Bae mi gohed fo krae bikfala olsem wael dog, an krae nogud olsem aol. 9Disfala panis wea hemi kasem olketa pipol blong Samaria hemi olsem soa long bodi wea hemi nating save gudbaek moa. An disfala semkaen samting hemi kasem yumi finis long Jiuda. Ya, disfala panis hemi kasem tu olketa geit blong Jerusalem, bikfala taon ya blong pipol blong mi.
Olketa enemi i kam kolsap long Jerusalem
10 (Profet) !Olketa pipol blong Jiuda! Yufala mas no go talemaot long olketa pipol blong Filistia long taon long Gat,#1:10 “Gat” Long Hibru langguis, disfala nem Gat hemi here olsem “talemaot”. Gat hemi wanfala bikfala taon blong Filistia. wea yumi lus long faet. An yufala mas no krae. !Olketa pipol blong taon long Bet-Leafra!#1:10 “Bet-Leafra” Long Hibru langguis, disfala nem Bet-Leafra hemi here olsem “haos blong asis”. Yufala mas gohed fo rol olobaot long asis fo somaot dat yufala i barava sore fogud.#2 Samuel 1:20. 11!Olketa pipol blong taon long Safia! Bae olketa enemi i aotem kaleko blong yufala mekem yufala barava sem fogud, an fosim yufala fo stap long narafala kantri. An olketa pipol blong taon long Saanan i fraet fo kam aotsaet from taon blong olketa. Olketa blong taon long Bet-Esel i gohed fo sore an krae. An yufala no save go haed long ples blong olketa. 12Olketa pipol blong taon long Marot i wari tumas, an olketa laekem tumas fo eniwan hemi kam fo sevem olketa. Bat disfala bikfala trabol, Yawe nao hemi givim kam, an hemi stap kolsap finis long olketa geit blong Jerusalem.
13!Olketa pipol blong taon long Lakis!#1:13 Lakis Long Hibru langguis, disfala nem Lakis hemi here olsem “long olketa kaat”. Yufala mas taemapem olketa hos blong yufala go long olketa kaat mekem yufala save ranawe. Yufala nao i falom ravis wei blong olketa pipol long Israel long not, an yufala i lidim tu olketa pipol blong Jerusalem fo sin. 14!Olketa pipol blong Jiuda! Hemi taem fo yumi evriwan fo gudbae long taon long Moreset-Gat,#1:14 “Moreset-Gat” Hemi narafala nem fo taon long Moreset, wea hemi hom blong Maeka. bikos olketa enemi i kam fo tekova nao long taon ya. An olketa pipol blong taon long Aksib#1:14 “Aksib” Long Hibru langguis, disfala nem Aksib hemi here olsem “laea”. bae i laea long olketa king blong yumi.
15!Olketa pipol blong taon long Maresa! Bae no longtaem Yawe hemi letem olketa enemi blong yumi fo kam tekova long taon blong yufala. An olketa barava bikman blong yumi bae i ranawe go haed insaet long olketa kev kolsap long taon long Adulam.#1:10-15 Olketa taon long Bet-Leafra, an Safia, an Saanan, an Bet-Esel, an Marot, an Lakis, an Moreset-Gat, an Aksib, an Maresa, an Adulam, i stap long west saet blong Jiuda falom rod wea enemi save kam fo faetem Jerusalem. 16!Olketa pipol blong Jiuda! Yufala mas katem hea blong yufala fo somaot dat yufala sore an krae. Ya, yufala mas katemaot hea mekem yufala bolhed, bikos olketa enemi blong yumi bae i kam fo fosim olketa pikinini wea yumi lavem tumas, fo go stap long ples blong olketa.
Currently Selected:
Maeka 1: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.